LUKA 18

Kirwoogindet ak mosoget

1Ki mwachi anyun kalewenet kole, Kanyool kosa peetuusyek tugul, amat chorirenso; 2koleenji, “Ki miitei nganaseet age kirwoogindo ne ki ma koywei Kamuktaindet, ak ki ma koiti chii: 3ak ki mi mosoget age nganasanooto; ne kinyonei ole mi kotugul, koleen, ‘Ibesyeiwo kirwooget ne po iman eng' punyondennyu.’ 4Ak ki eesyo eng' peetuusyek alak: ago eng' let, komwa eng' oriitinnyi kole, ‘Agot ngo ma ywei Kamuktaindet, amaiiti chii; 5ago amu inyalila mosogani, abesyechini anyun, si ma konyonei kotugul koiima.’ ”

6Ak ki le Kiptaiyat, “Ogas kiit ne ki mwa kirwoogindet ne ma po imanda. 7Tos ma yachin Kamuktaindet imanda che lewenotin, che riirchin ineendet peet ak kemoi, ak muitoi ineendet eng' icheek? 8Amwaiwok ale, yachin ineendet icheek imanda kochokyin. Ago ye tuun nyo Weeriitap chii, ko tos nyooru kayaneet eng' ng'wony?”

Kalewenet agobo Pharisaindet ak taagindetap aisuruut

9Ak ki mwachi kogeny kalewenoni alak che ki imang'ugei kole, ki po imanda, ak kosasei piik tugul, 10koleenji, “Ki togosta piik aeng'u Hekaluut koba kosa; Pharisaindet age, ko taagindetap aisuruut age. 11Ki tonon Pharisaindet kosa kong'alaal ineegei kole, ‘Kamuktaindet, amwaun kongoi, amu ma ki kergei ak piik alak, che rebiik, che ma po iman, che ibegei, anan taagindoni po aisuruut. 12Arugutige konyil aeng' eng' wigiit; agoitoi kebeberta ne po taman eng' tuguuk tugul che anyooru.’ 13Ago ki tonon taagindetap aisuruut eng' ye loo, ak ma cham agot konyal kipsengwet, ago kiluch tegeennyi, kole, ‘Kamuktaindet, rireena, aa kiptengekyo.’ 14#Mat 23.12; Luk 14.11 Amwaiwok ale, kichoortagei chiichooto koonnyi ko kagoek ne po imanda kosiir nin age: amu chii age tugul ne itoroorigei kiming'ini; ak age tugul ne iming'inigei ko tuun kitoroori.”

Koberuuri kong kong `Jeso lagok che mengech

(Mat 19:13-15; Mar 10:13-16)

15Ak ki imutyi `piik ineendet manyurunik, si kobiit kotwa icheek: ago ye kingo keer kasubik, koger kong'. 16Ago kiguur Jeso icheek kobwonji, ak koleenji, “Ochamji lagok che mengech kobwanjo, amat oete: amu po che uu chu laitornatetap Kamuktaindet. 17Amwaiwok iman ale, Age tugul ne mataachei laitornatetap Kamuktaindet ko uu lakweet ne ming'in, koma koi mong'ji olooto matiny.”

Kong'alaaljin kong `Jeso chii ne ki mogoryo

(Mat 19:16-30; Mar 10:17-31)

18Ak ki teebe ineendet pounindet age, kole, “Kaneetindoni myee, ayai nee si kobiit anyoor saboondap koigeny?” 19Ak ki leenji Jeso, “Amu nee si iguureno ne myee? Ma mi ne myee, kobatee agenge, nooto ko Kamuktaindet. 20#Kom 20.12-16; NKNg'a 5.16-20 Ingen ng'atuutik: ‘Amoipkei, Amerumisye, Amechoorse, Amebaoryan lembech, teech kwandang'ung' ak kamenng'ung'.’ ” 21Ak ki le, “Ki ariip tuguuchuuto tugul kobooch ko aa neran.” 22Ak ye kingo kas Jeso, koleenji, “Ta ko rartaat kiit agenge eng' inyee: alde tugul che itinye, ak ipchechi kibananook, si inyooru konorwet eng' kipsengwet: ak inyoo, isubwo.” 23Ago ye kingo kas ineendet tuguuchu, koaragen miising'; amu ki mogoryo kot.

24Ak kingo keer `Jeso ineendet, komwa kole, “Pichii ne tya eng' che tinyei mogornatosyek komong'ji laitornatetap Kamuktaindet! 25Amu nyumnyum eng' tambeesyet kochut kondap sindanut, kosiir komong'ji mogoryot laitornatetap Kamuktaindet.” 26Ki mwa anyun che ki kasei, kole, “Ng'oo anyun ne kesaru?” 27Ki le, “Tuguuk che ma imugaksei eng' piik komugaksei eng' Kamuktaindet.”

28Kole Petero, “Keero, kigebagaakte tuguukyok, ak kisubun!” 29Ak ki leenji icheek, Amwaiwok iman ale, Ma mi chii ne ki pagaakta koot, anan osotyot, anan che tupcho, anan sigiik, anan lagok, agobo laitornatetap Kamuktaindet, 30ne ma nyooru che chaang' kosiir eng' peetuusyechu, ak saboondap koigeny eng' peetuusyek che tuun pwoonei.

Sip komwaei Jeso ne po somok agobo meennyi

(Mat20:17-19; Mar10:32-34)

31Ak ki imut taman ak aeng' kobwa ole mi, ak koleenji, “Ogeero, kitogostoi Jerusalem, ak kosulda tuguuk tugul che kisir maotik agobo Weeriitap chii. 32Amu kindoi ineendet eunegap Pororyosyek, si kechurachur, ak kiteweer, ak kesing'ilji: 33ak kobire kipchoritiit, ak kobar: ak kong'eet kogeny eng' peetuutap somok.” 34Ak ki ma iguiyo icheeget tuguuchuuto, agot agenge; ak kiung'ak mwaoniito eng' icheek, ak ki ma ibesyo tuguuk che kiga kimwa.

Kosoobi `Jeso chii ne ki koraat

(Mat 20:29-34; Mar 10:46-52)

35Ak kingo riikyi Jeriko, ko kitebyei ng'wony kipkoratya eng' ooreet taban kosoomsei: 36ak kingo kas kosiirtoi tuiyet, koteep kole, “Nee chu?” 37Ak ki mwachi icheek ineendet koleenji, “Jeso ne po Nazareth ne siirtoi.” 38Ak kiwaach, kole, “Jeso, Weeriitap Daudi, rireena.” 39Ak ki kergong' ineendet anyun che ki indoi, kole kosiis: ago kites kowaach miising' kole, “Weeriitap Daudi, rireena.” 40Ak ki tonon Jeso, ak kong'at kimut ineendet kwo ole mi: ak ye kiga riik, koteebe ineendet, 41kole, “Imache ayaun nee?” Ak ki le, “Kiptaiyat, amache ageerto.” 42Ak ki leenji Jeso, “Keerte: kagosaabin kayaneng'ung'.” 43Ki keerto anyun koma tyanit, ak koosup ineendet, kolasunoti Kamuktaindet: ak kingo keer tuiyet komugul, kogonyit Kamuktaindet.

Currently Selected:

LUKA 18: KAPR

Highlight

Copy