Isis 1

Ebi Ijeren mîkana usun̄ me Ijipiti

1Bọn ebirieen̄ kè Ijeren eje melek ototun̄ ukan̄ kiban̄ igọọk nte kiban̄, ogwu ekigwen si Jekọp, isi ido Ijipiti. Erieen̄ kiban̄ ìre: 2Ruben, mè Simiọn, mè Libai, mè Juda, 3mè Isaka, mè Jebulọn, mè Benjamin, 4mè Dan, mè Nafitali, mè Gadi, mè Ase. 5Otu ifuk bọn owot iman kè Jekọp me mgbọ ya ìre akọp ene jaaba, igbaalek kè Josefu ogwu òwuwuuk lek ikup me Ijipiti.

6Ike mgbọ okije, Josefu, mè otutuuk ebi ngwan̄, mè otutuuk ebi ukot keya ekwakwaan̄ isan̄a kpai. 7Ire, bọn owot iman kè Ijeren ekekimumana, mè iwa enenen me otu ifuk, mè inye lek enenen, mè ijot otutuuk ido Ijipiti.

8Ayaya ogwu Fero ge onenikikpulu ido Ijipiti. Ayaya ogwu Fero yi ìkariọọn̄ ogwu Josefu orebe. 9Ogwu ubọọn̄ yi onenitumu inyi ebi kan̄ ibe, “Ìkpọ-nu ubọk ebi Ijeren chi ewabe ire, mè inye lek igak eji. 10Ìna, inyi eji enetọt ubọk eji ebesa irọ ema nnaan̄. Ire ìkare ikeya, ife chi mêmumana, mè iwa igak eji. Melek si, ire ebi ochicha kiji iniben akọn̄ inu eji me lek, ife chi mêgọọk ebi ochicha kiji ikeke, mè itim akọn̄ ikpan̄ eji, mè inan̄a me ido kiji ilibi isibi.”

11Ikeya ke ebi Ijipiti enito ikpak ikpak ebi ìkikpulu ebi usun̄ ibe ekekpulu ebi Ijeren, mè ekesa me ikwaan̄ òbọp ekerọ ema nnaan̄. Sa me ikeya ke ema enama ikpele ama isun̄-inu iba, ekigwen Pitom mè Rameses, inyi ogwu Fero. 12Ire, ike ebi Ijipiti ekitutuku ema, ikeya si ke ema ekimumana, mè iwa ijot otutuuk ido Ijipiti, ire lek ebi Ijipiti ekitet ukpook enenen me lek kiban̄. 13Mije keya, ebi Ijipiti ekekirọ inyi ema ekesi ikwaan̄ ikpak ikpak, 14mè irọ inyi ugwem kiban̄ ijat enenen sa me unye unye ikwaan̄ ibobot okpungwu inama uwu, mè irọrọ abọt ekisa ichọkọ ewuuk cha, mè isisi unye ikwaan̄ òkup esese esese me uko. Me irak otutuuk ikwaan̄ chi geelek, ebi Ijipiti ekirọ ema inu me lek ikpak ikpak.

15Ikeya si ke ogwu ubọọn̄ ido Ijipiti oninyi ebi ofia uman ebi Iburu iba, ekigwen Sifara mè Puwa, ida ibe, 16“Mgbọ enyi isikitet ebibaan̄ ebi Iburu geelek uman, ire gwun̄ ya ire enerieen̄, ìkpan̄. Ire, ire enenwaan̄, ìtele inyi igat ugwem.” 17Ire, mije ebi ofia uman chi ekitet ukpook me lek Awaji, ema kperọ ida ikọ ogwu ubọọn̄ ya. Kpan̄asi ikeya, ema ekekitele inyi bọn ebirieen̄ ebibaan̄ ebi Iburu emaan̄be egat ugwem. 18Ogwu ubọọn̄ Ijipiti onenigwen ebi ofia uman chi ititiin̄, mè ido ibe, “Ìre keke ke enyi erọ ikeyi, mè itele inyi asa nsabọn ebirieen̄ ebi Iburu ekup me ugwem?”

19Ebi ofia uman cha efọfọọk ogwu Fero ibe, “Ogwu nte, ebibaan̄ ebi Iburu kpekup kubọk ebibaan̄ ebi Ijipiti ekupbe. Ebibaan̄ ebi Iburu mînye lek enenen. Ìkire, uman isitet ema, ema mîra imaman gwun̄ isan̄a mgbọ yaage, sabum ebi ofia uman ebenire.” 20Awaji okakaan̄ ata ejit me lek ebi ofia uman cha. Ebi Iburu ekpọkpọ ikimumana iwa, mè inye lek enenen. 21Mije ebi ofia uman cha ekaan̄be ukpook Awaji me emen, Awaji orọrọ inyi ema ekaan̄ ototun̄ ukan̄ eyi kiban̄.

22Ogwu Fero onyinyi otutuuk ebi Ijipiti ida ibe, “Gwun̄ enerieen̄ geelek ebibaan̄ ebi Iburu emanbe, ìben ìtọp ìfiin̄ me okwaan̄ Nali. Ire, ìtele inyi gwun̄ enenwaan̄ geelek ema emanbe igat ugwem.”

Currently Selected:

Isis 1: Obolo

Highlight

Copy