Ibeb 21
21
Mîman Ajiki
1Mgbọ mgbọ okembe, Okumugwem onenikaan̄ ejit nsan me lek kè Sera, mè irọ use kan̄ îchieekbe iso. 2Sera oninin̄ owot, mè iman gwun̄ enerieen̄ ge inyi Ebereyam me ukan, me ike mgbọ Awaji ochieekbe ọmọ use. 3Ebereyam ogwegwen gwun̄ ya Sera omanbe inyi ọmọ, Ajiki.#21:3 Ajiki ìsibi ‘imọm.’ 4Mgbọ Ajiki osobe usen jeeta, Ebereyam ofefieek ọmọ afi kubọk Awaji onyibe ida ibe erọ. 5Ebereyam ìre efit acha ge mgbọ emanbe Ajiki gwun̄ kan̄ inyi.
6Sera onenitumu ibe, “Awaji îrọ inyi emi ǹchak imọm. Ebi geelek mênọbe inu yi òrọrọ mêgọọk emi ichak imọm.” 7Îtumu si ibe, “Ìre ekene motumu inyi Ebereyam ibe ke gwun̄ mônwọ ebe me ejit kè Sera? Me atikọ, emi nra iman gwun̄ inyi Ebereyam me ikeke ukan kan̄.”
Ebereyam îlap Ega mè Isimen isibi me uwu
8Ajiki onenimin, ogwu uga oneniban ọmọ ebe. Usen ebanbe Ajiki ebe, Ebereyam ototo ikpele ijọk. 9Ire, Isimen, gwun̄ Ega ogwu Ijipiti omanbe inyi Ebereyam okekirọ Ajiki inu ochak. Sera omumun̄, 10mè itumu inyi Ebereyam ibe, “Lap ogwu enenwaan̄ usun̄ yilọ mè ogwu gwun̄ sibi me uwu yi. Mije, gwun̄ usun̄ yi ìkpogọọk Ajiki gwun̄ n̄a igbaan̄ ikaan̄ ìrot geege me uwu yi.”
11Ikọ ya Sera otumube ofefieek Ebereyam me lek enenen, mije, ìkaweek ilalap ogwu gwun̄ Isimen isibi me uwu. 12Ire, Awaji onenitumu inyi Ebereyam ibe, “Kafieek ejit me lek gwun̄ kwun̄ enerieen̄ melek usun̄ kwun̄ enenwaan̄. Otutuuk inu cha Sera otumube inyi owu, gban̄ utọn̄ me lek, mè rọ. Mije, îre bọn owot iman kè Ajiki ke ebefuk kubọk echi kwun̄. 13Ire, emi mârọ si inyi gwun̄ ogwu usun̄ kwun̄ ya imin ikana ido. Mije, ọmọ ìre si gwun̄ kwun̄.”
14Me ofit iwele kan̄, me okpa otu ewelegwe, Ebereyam omọmọnọ inorie, mè itap mun̄ inwọnwọ me emen ogbokot ikpa anam, mè iben itoon̄ Ega me oguga, mè isa ọmọ melek Isimen ogwu gwun̄ iban me oniin̄. Ega osasa gwun̄ ya ikijijen̄e ikana me emen èwê ere ama Bieseba okupbe.
15Mgbọ mun̄ kiban̄ otabe, Ega obeben ogwu gwun̄ isi iyik me irak gwun̄ uti ge, 16mè ije ida ibọkọ me agba lek gwun̄ ya, inu òbet lek akọp ejit go, isi isiki ikweek, mije, ìbe ke ọmọ ìkpokọt isa chieen̄ kan̄ imun̄ mgbọ gwun̄ kan̄ obokwu. Ikwekweek me ere ya, mè ibene ito ikito.#21:16 Mè ìyaka ire, ‘Gwun̄ ya obebene ito ikito.’
17Awaji onọnọ ida ito gwun̄ ya. Ogwu osat Awaji ge okukup me emen inyọn̄ igwen Ega, mè ido ibe, “Ìre keke ore ufialek kwun̄? Katet ukpook! Awaji înọ ida ito gwun̄ ya me ere îkupbe. 18Nan̄a keke si bene gwun̄ ya kaan̄ me ubọk kwun̄. Mije, emi mârọ inyi gwun̄ ya ikana ikpele ido.”
19Awaji onenichili Ega chieen̄. Ega omumun̄ udọn̄ mun̄ ge me ere ya, mè isi ichibi mun̄ ijot ogbokot ikpa anam ya, mè itọkọ inyi gwun̄ ya inwọ.
20Awaji okekeke inyi gwun̄ ya. Gwun̄ ya onenimin isibi, mè iluk me emen èwê ya, mè ikana ogwu ota òkisook oraan̄. 21Mgbọ ema elukbe me emen èwê me agan̄ Paran ya, ogwu uga onenisi ido nwa me Ijipiti inyi gwun̄ ya.
Ebereyam mè Abimelek mînyan̄a ibot me Bieseba
22Usen ge me emen mgbọ ya, Abimelek melek Fikolu, ogwu ibot akọn̄ kan̄, enenije isi lek kè Ebereyam. Abimelek otutumu inyi Ebereyam ibe, “Mmun̄ ibe ke Awaji îkeke inyi owu me otutuuk inu geelek owu okirọ. 23Eya orọ, sa Awaji nyan̄a ibot nyi emi mgbọ keyi ibe ke owu òkpofiaan̄ emi mè bọn n̄a mè ebi owot iman n̄a. Nyan̄a ibot si ibe ke owu môkaan̄ ata ejit me lek n̄a melek inyọn̄ ijọn̄ yi ere owu ogọọkbe eji iluk, ike emi nkaan̄be ata ejit me lek kwun̄.”
24Ebereyam ofọfọọk ibe, “Nchieek inyanyan̄a ibot inyi owu.”
25Inenitumu inyi Abimelek ibe, “Kpọ, ebi kwun̄ mîtet eji udọn̄ mun̄ kiji ibọkọ.” 26Abimelek ofọfọọk ibe, “Emi ǹkariọọn̄ ogwu òrọrọ ojelek inu òkup ikeya. Owu òkatutumu ikọ yi ìnyi emi, emi ǹkanọnọ si me otu ofifi ene. Adasi emi inọnọ ikọ yi ire eyi.”
27Ebereyam onenikpulu arọọn̄ mè eriembuuk isa inyi Abimelek. Ema ene iba egbagbaan̄ inyan̄a ibot. 28Ebereyam onenigobo bọn uman arọọn̄ jaaba isun̄ esese. 29Mgbọ Abimelek omun̄be inu ya, idodo Ebereyam ibe, “Sa bọn uman arọọn̄ jaaba kechi owu ogobobe isun̄ esese chi ìkup inyi keke ni?”
30Ebereyam ofọfọọk ọmọ ibe, “Soso bọkọ bọn uman arọọn̄ jaaba chi kubọk inu ata-ikọ ibe ke îre emi nrọkọ udọn̄ mun̄ yi.”
31Ikeya orọ ekigwen ama ya Bieseba,#21:31 Bieseba ìsibi ‘udọn̄ mun̄ inyan̄a-ibot’ mè ìyaka ire, ‘Udọn̄ mun̄ jaaba.’ mije ema ene iba ekupbe me ama ya inyan̄a ibot.
32Mgbọ ema enyan̄abe ibot isan̄a me Bieseba, Abimelek mè Fikolu, ogwu ibot akọn̄ kan̄, eneninan̄a ije ifo ido ebi Filisia. 33Ebereyam oneniwop uti tamaris ge me Bieseba, mè itọbọ ebum me ere ya inyi Okumugwem Awaji Mgbọ Geelek. 34Ebereyam îluk ijọn̄ọ mgbọ me ido ebi Filisia ya.
Currently Selected:
Ibeb 21: Obolo
Highlight
Share
Copy
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.
