Ibeb 23
23
Mkpa kè Sera
1Sera îluk ugwem iso efit acha mè akọp iba mè jaaba. 2Sera onenikwu me Kiriat Ariba, eyi òrere Eburọn, me ido Kenan. Ebereyam ofefieek ejit, mè ito ito enenen inyi Sera ogwu nwa.
3Ebereyam onenitele nkwukwu ogwu nwa, mè isi lek ebi Et, ebikaan̄ ijọn̄ ere îlukbe, 4mè itumu inyi ema ibe, “Emi ìre ogwu ichen ònunu inigọọk iluk me etete kinyi. Soso, ìnyam emi sọntiik ijọn̄, inyi ǹkensa m̀fuun̄ ebi n̄a.”
5Ebi Et cha efọfọọk ọmọ ibe, 6“Ogwu nte, gban̄! Owu ìre ikpele ene Awaji me etete kiji. Fuun̄ ebi kwun̄ me ere ifuun̄-ene kiji echi ònwọnwọn ichit. Kpunu ene geege òbojit ibe owu okafuun̄ ebi kwun̄ me ere ọmọ okifuun̄ ene.”
7Ebereyam onanan̄a ikeke, mè itọbọ ibot inyi ebi Et cha, ìrere ebikaan̄ inyọn̄ ijọn̄ ya, 8mè itumu inyi ema ibe, “Ire ineme enyi ibe emi ǹkemfuun̄ ebi n̄a me ijọn̄ kinyi, soso ìgọọk emi ìbeek Efurọn gwun̄ kè Sowari, 9ibe itumu ewe ǹkororok kan̄ òkup me òta ijọn̄ uko kan̄ me ama Makipela inyi emi ǹlep ǹkensa m̀fuun̄ ebi n̄a, ke mâkpe inu geelek Efurọn môtumube inyi emi me isi kinyi.”
10Efurọn ogwu Et, okukup me etete ebi Et kiban̄ cha ìkweek me ere ya, mè itumu inyi Ebereyam, me isi otutuuk ebi ìkup me otunchit ama ya mgbọ ya ibe, 11“In̄-in̄! Ogwu nte, gban̄! Emi m̀kpanyanyam ijọn̄ ya inyi owu, ǹcheche ijọn̄ ya mè ǹkororok òkup me emen inyi owu, me isi otutuuk ebi ama kiji, ibe owu òbọkọ òsa òkofuun̄ ebi kwun̄.”
12Ebereyam okpọkpọk itọbọ ibot inyi ebikaan̄ ijọn̄ ya, 13mè itumu inyi Efurọn, me isi otutuuk ebi ene cha, ibe, “Môneme emi ire ogban̄ utọn̄ me ikọ nkitumu. Soso tele mè m̀kpe ewe ijọn̄ ya. Bọkọ ikpoko yi, inyi m̀fuun̄ nwa n̄a me ere ya.”
14Efurọn onenifọọk Ebereyam ibe, 15“Ogwu nte n̄a, gban̄, otu ewe ijọn̄ ya ìre efit alata okuket ini.#23:15 Ulobo alata okuket cha ìre kilo ini mè mbubak. Ire, ikpoko ìkakup me lek inu geege me etete kwun̄ melek n̄a. Kpọ, ijọn̄ ire eya, ben nwa kwun̄ si fuun̄.”
16Ebereyam ochechieek, mè ifuk efit alata okuket ini inyi Efurọn, igọọk me otu ifuk ikpoko mgbọ ya, ike Efurọn otumube me isi otutuuk ebi Et ìkweek me ere ya.
17Sa me ikeya ke ijọn̄ kè Efurọn eyi òkup me ama Makipela me agba lek ama Mamire, melek ǹkororok òkup me inyọn̄ ijọn̄ ya, mè otutuuk uti geelek òkup me inyọn̄ ijọn̄ ya ikat ikana me okike ijọn̄ ya, 18okana echi kè Ebereyam, me isi otutuuk ebi Et cha ìnunu me otunchit ama ya mgbọ ya.
19Mgbọ Ebereyam okpebe ewe ijọn̄ ya isan̄a, ibeben Sera ogwu nwa isi ifuun̄ me emen ǹkororok ya òkup me Makipela, me agba lek ama Mamire, òrere Eburọn, me ido Kenan. 20Sa me ikeya ke ijọn̄ ya, mè ǹkororok òkup me inyọn̄ ijọn̄ ya, osa inan̄a me ubọk ebi Et, ikana inin̄ ubọk kè Ebereyam. Ebereyam osasa ijọn̄ ya irọ ijọn̄-ufuun̄ kan̄.
Currently Selected:
Ibeb 23: Obolo
Highlight
Share
Copy
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.
