Ibeb 37
37
Josefu îmun̄ ilaak
1Jekọp, òrere Ijeren, okekiluk me ido Kenan, ere nte kan̄ ogọọkbe iluk.
2Mfufuk otoko kè Jekọp ìje ikeyi:
Me mgbọ Josefu orebe gwun̄ akọp mè acha jaaba, ikekigọọk bọn nte kan̄ ebirieen̄, bọn kè Biliya mè Jilipa, ebi nwa nte kan̄, ikikpukpo anam kubọk ogwu sọn̄ gwun̄ òkitap ubọk inyi ema. Ijo inu geelek ebi ngwan̄ cha erọbe, Josefu îra ikiben inikpa inyi nte kiban̄.
3Ijeren îma Josefu igak otutuuk bọn kan̄, mije Josefu orebe gwun̄ îbonbe me ukan. Îma ọmọ enenen, mè ichim ujuja etibọ ge òkaan̄ owuwa chieen̄ inyi ọmọ. 4Mgbọ ebi ngwan̄ cha emun̄be ibe ke nte kiban̄ îma Josefu igak otutuuk kiban̄, ema ebebene ikicha ọmọ. Kpeyaka ikikọt itumu ikọ geege melek kan̄ me esuuk.
5Eririeen̄ usen ge, Josefu onenimun̄ ilaak, mè iben ikpa inyi ebi ngwan̄. Ebi ngwan̄ echacha ọmọ enenen igak adasi mgbọ. 6Josefu ìtumu inyi ebi ngwan̄ ibe, “Soso, ìgban̄-nu ilaak keyi mmumun̄be. 7M̀mun̄ ubọk eji ekititiin̄ akpa me uko ibọp me efit me efit igwook. Mgbọ eji ekibọp akpa cha, efit akpa eyi n̄a okpọkpọ ijibi lek ibene, mè ikeke. Efit echi kinyi okekeke ikana eyi n̄a okokop, mè ikitọbọ ibot inyi eyi n̄a.”
8Ebi ngwan̄ inọnọ ilaak ya, ebebene ikitumu ibe, “Ìre ìsibi ibe ke îre owu obonire ubọọn̄ kiji me atikọ? Ìre owu obonikikpulu eji ni?” Bak me lek ilaak kan̄ mè otu usem kan̄, ebi ngwan̄ echacha ọmọ igak olu ifin.
9Ofifi eririeen̄, Josefu okpọkpọk imun̄ ofifi ilaak, mè iben ikpa si inyi ebi ngwan̄ ibe, “Ìkpọ, mmumun̄ ofifi ilaak. M̀mun̄ ubọk ura mè onyan̄ mè akọp mè ntoronyan̄ ge ekitọbọ ibot inyi emi.”
10Mgbọ îkpabe ilaak yi inyi ogwu ute mè ebi ngwan̄, ogwu ute okpikpin itap ọmọ me otu, mè ibe, “Ìre kpasi ilaak ke owu omumun̄ ikeyi? Ìre ìsibi ibe ke emi mè nga kwun̄ mè ebi ngwan̄ kwun̄ mêkitọbọ ibot me ijọn̄ inyi owu ni?” 11Ebi ngwan̄ kan̄ ekakaan̄ ejit mba me lek kan̄. Ire, nte kan̄ ìkawuuk inu cha.
Ebi ngwan̄ kè Josefu mînyam Josefu
12Me ike mgbọ ge, ebi ngwan̄ kè Josefu enenisa arọọn̄ nte kiban̄ isi ikpukpo me Sekem. 13Ijeren onenitumu inyi Josefu ibe, “Ke oriọọn̄ ibe ke ebi ngwan̄ kwun̄ ekikpukpo anam me Sekem. Na mè ǹria owu ikwaan̄ me lek kiban̄.”
Josefu ochechieek.
14Ineniria Josefu ibe, “Si kpọ-nu mè ìre ebi ngwan̄ kwun̄ melek anam cha mîkup me utelelek, mè sa etip ka na look emi.” Ikeya ke îria Josefu inan̄a me iteke ijọn̄ Eburọn isi lek ebi ngwan̄ me Sekem.
15Mgbọ Josefu orebe Sekem, mè ikijijen̄e ikana ikiweek ebi ngwan̄ me ere ya, enerieen̄ ge omumun̄ ọmọ okititeek ikana, mè inido ibe, “Ìre òkiweek keke?”
16Josefu ofọfọọk ibe, “Ebi ngwan̄ n̄a ebi ìkikpukpo anam me agan̄ keyi ke nkiweek. Soso, ìre oriọọn̄ ere ekupbe?”
17Ogwu enerieen̄ ya ofọfọọk ibe, “Ema mîsibi itele agan̄ keyi. Nnọ ema ekitọt isisi ama Dotan.”
Eya orọ, Josefu onanan̄a ije isi Dotan, mè isi iweek ebi ngwan̄ imun̄ me Dotan. 18Ire, mgbọ ebi ngwan̄ cha ebenebe chieen̄ imun̄ ọmọ okinu me ujọn̄ọ ere, ema etọtọt ijo otitọt ikeme ọmọ, mè itumu ifieek ibe ke mêtet ọmọ ikpan̄.
19Ema ekekitumu me lek kiban̄ ibe, “Kpọ ogwu òmun̄ ilaak ya okinu yilọ. 20Eji etet ekpan̄, mè eben nkwukwu kan̄ etọp etap me emen udọn̄ ge me ere yi, mè etumu enyi nte kiji ibe ke anam oron ge ochim ikpan̄, mè igwak itaka, mè ekpọ-nu inu ilaak kan̄ cha oboman isibi.”
21Mgbọ Ruben onọbe ijo otitọt yi, iweweek ubọk ìbosa inyan̄a Josefu isibi me ubọk kiban̄. Inenitumu inyi ebi ngwan̄ ibe, “Eji ekasan̄a ugwem kan̄. 22Ikafiat eje ene! Kpan̄asi ikeya, ìda ọmọ ìtap me emen udọn̄ yi. Ikasak ọmọ unan me lek.” Ruben ìtumu ikọ yi, mije, ìkiweek inyanyan̄a Josefu isibi me ubọk ebi ngwan̄, mè isa ika ijet nte kiban̄.
23Eya orọ, mgbọ yaage Josefu orebe ere ya, ebi ngwan̄ cha etetet, mè iwọọk uja etibọ ya isan̄a me lek, 24mè ida ọmọ itap me emen udọn̄ ge me ere ya. Udọn̄ ya, kpunu mun̄ me emen.
25Ema enenisi isiki ikweek ikirie inorie. Ìkafiin̄, ema ebebene chieen̄ imun̄ urum ebi otoko kè Isimen ekisa akpan ewe kiban̄ me inyọn̄ aligọ, inan̄a me agan̄ Giliadi ibeniraka isi Ijipiti. Inu ema etapbe iwuku emen akpan ewe cha, ìre inwan̄ mè ukwuuk uti ekisa irọ inorie itop, mè aran̄ igwa-ene, mè aran̄ unye otu ewe ònan̄a me lek uti mâa.
26Juda otutumu inyi ebi ngwan̄ ibe, “Ìre kpasi oruru ke eji ebekaan̄ ire eji ikpan̄ ngwan̄ kiji, mè ilet eje kan̄? 27Kpan̄asi ikeya, eji etet ọmọ enyam enyi ebi Isimen chilọ, inyi eji ekasak ọmọ unan me lek, mije, ọmọ ìre ngwan̄ kiji, ọmọ melek kiji ìre eje ge.” Ebi ngwan̄ cha echechieek melek kan̄.
28Mgbọ ebi Isimen cha ìnan̄a me ido Midian ebeniraka, ebi ngwan̄ kè Josefu etataba Josefu isibi me emen udọn̄ ya, mè inyam ọmọ inyi ebi ife cha akọp ikpoko alata okuket iba. Ife cha esasa Josefu ifo Ijipiti.
29Mgbọ Ruben ogwube ikom isi ikpọ emen udọn̄ ya, ìkayaka ìmun̄ Josefu. Isasa me ufieejit itaba ofọnti kan̄ igwak, 30mè ije igọọk ebi ngwan̄, mè ikitumu inyi ema ibe, “Jei, gwun̄ ya ìkayaka ìkup me emen udọn̄ ya! Sà emi, ìre ere owa ke mbanin̄?”
31Ebi ngwan̄ kè Josefu cha etetet ebot ge ikpan̄, mè imọnọ etibọ kè Josefu ya ijiin̄ me emen eje ebot ya, 32mè inisa ujuja etibọ ya mè eje me lek ifo isi ijeen̄ nte kiban̄, mè itumu inyi ibe, “Kpọ inu eji emun̄be! Riọọn̄ ubọk kpọ-nu ofọnti yi, mè ìre eyi gwun̄ kwun̄, sà ìkare.”
33Jekọp okpọkpọ, mè itumu ibe, “Îre etibọ kè Josefu gwun̄ n̄a! Ijo anam ge îra ichim gwun̄ n̄a ikpan̄! Jei, îgwak gwun̄ n̄a itaka isan̄a!”
34Isasa me ufieejit itaba ofọnti òkup me lek kan̄ igwak, mè imọnọ ekwut ufieejit itobo me ebon, mè ifieek ejit owuwa usen inyi gwun̄ kan̄ òkwukwu. 35Otutuuk bọn kan̄ ebirieen̄ mè ebibaan̄ mînu ibenikat ọmọ ejit. Ire, ìkachieek. Ìbe ke ọmọ môkup me ufieejit gwun̄ kan̄ mege ire mgbọ ọmọ môkwube ifo igọọk gwun̄ kan̄ me ama ekwukwu. Jekọp îto ito enenen mije kè Josefu ogwu gwun̄.
36Mgbọ ebi Midian cha erebe Ijipiti, enyanyam Josefu inyi ene ge me lek ebi ibot ikwaan̄ ogwu Fero, ogwu ekigwen Pọtifa. Pọtifa yi ore ogwu ibot ebi akọn̄ ìkibem ogwu Fero melek uwu kan̄.
Currently Selected:
Ibeb 37: Obolo
Highlight
Share
Copy
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.
