Ibeb 46
46
Jekọp îfo Ijipiti
1Ijeren, òrere Jekọp, onenikpulu ebi uwu kan̄ mè otutuuk inu îkaan̄be isa igbaalek inan̄a isi Ijipiti. Mgbọ îrebe Bieseba, igwagwa ngwugwa inyi Awaji kè Ajiki nte kan̄.
2Me eririeen̄ usen ya, Awaji ogwegwen ọmọ me emen ilaak, “Jekọp! Jekọp!”
Jekọp ochechieek.
3Awaji otutumu inyi ibe, “Emi nre Awaji kè nte kwun̄. Katet ukpook isisi Ijipiti. Mije, emi mârọ inyi owot iman kwun̄ ikana ikpele ido me ere ya. 4Mâgọọk owu igbaan̄ ije isi Ijipiti, mè iyaka isa owot iman kwun̄ igwu ikom ika inu inyọn̄ ijọn̄ yi. Mgbọ mkpa kwun̄ isikem, îre Josefu me lek kan̄ obobieen̄ owu ikaan̄#46:4 Me usem Iburu: ‘Îre Josefu obosa ubọk kan̄ ichit owu chieen̄.’ mgbọ owu môtọbọbe.”
5Bọn kè Ijeren enenitap nte kiban̄ mè asa nsabọn kiban̄ mè ebi nwa kiban̄ me emen uji ekpirikpo ogwu Fero oriabe ibe esa enetap nte kiban̄. 6Ema mîkpulu si otutuuk anam kiban̄, mè otutuuk inu geelek ema ekaan̄be me ido Kenan isa ikaan̄ me ubọk ifo Ijipiti. Ikeyi ke Jekọp osa otutuuk bọn owot iman kan̄ isa igbaalek ije. 7Îsa bọn ebirieen̄ kan̄, mè bọn bọn kan̄ ebirieen̄, mè bọn ebibaan̄ kan̄, mè bọn bọn kan̄ ebibaan̄, mè otutuuk ebi kan̄ geelek isa igbaalek inan̄a ifo Ijipiti.
8Erieen̄ bọn kè Ijeren, òrere Jekọp, ìgọgọọk nte kiban̄ inan̄a inu me Ijipiti ìre:
Ruben, adasi gwun̄ kè Jekọp, 9melek bọn ebirieen̄ kè Ruben, ìrere Anọk, mè Palu, mè Ejirọn, mè Kami.
10Simiọn melek bọn ebirieen̄ kan̄, ìrere Jemuwen, mè Jamin, mè Oyadi, mè Jakin, mè Sowari, mè Sawulu ogwu îbonbe me owot ogwu enenwaan̄ Kenan ge.
11Libai melek bọn ebirieen̄ kan̄, ìrere Gasiọn, mè Koyat, mè Merari.
12Juda melek bọn ebirieen̄ kan̄, ìrere Eri mè Onan, mè Siela, mè Pereji, mè Jera, igbaalek Ejirọn mè Amulu bọn ebirieen̄ kè Pereji. (Ire, Eri mè Onan mîkwaan̄ me ido Kenan).
13Isaka melek bọn ebirieen̄ kan̄, ìrere Tola, mè Puwa, mè Jasubu,#46:13 Ofifi erieen̄ kè Jasubu ìre Jobu. mè Simiron.
14Jebulọn melek bọn ebirieen̄ kan̄, ìrere Seredi, mè Elọn, mè Jayalen.
15Ebiba ere bọn ebirieen̄ ebi Jekọp okaan̄be me owot kè Lia me Padan Aram. Kpefuk gwun̄ kan̄ enenwaan̄ ekigwen Daina igbaalek. Otutuuk bọn owot iman kè Lia, ebirieen̄ mè ebibaan̄, enenire akọp ene ita mè ita.
16Gadi melek bọn ebirieen̄ kan̄, ìrere Sifiọn, mè Agi, mè Suni, mè Esibon, mè Eri, mè Arodi, mè Areli.
17Ase melek bọn ebirieen̄ kan̄, ìrere Imina, mè Isiba, mè Isibi, mè Beria, mè ngwan̄ kiban̄ enenwaan̄ ekigwen Sera, igbaalek bọn kè Beria, ìrere Eberi mè Malikien.
18Akọp mè ibot bọn gweregwen kechi ke Jekọp okaan̄ me owot kè Jilipa ogwu usun̄ enenwaan̄ ogwu Leban osabe inyi Lia ogwu gwun̄.
19Bọn ebirieen̄ kè Rechen nwa kè Jekọp ìre Josefu mè Benjamin. 20Josefu onenibon bọn ebirieen̄ iba ekigwen Manasi mè Iferem me Ijipiti me owot kè Asenat gwun̄ kè Pọtifera ogwu òban yọk me Eliopolis.#46:20 Òrere On me usem Iburu
21Benjamin melek bọn ebirieen̄ kan̄, ìrere Bela, mè Bekeri, mè Asiben, me Gera, mè Nieman, mè Eyi, mè Ros, mè Mupim, mè Upim, mè Aridi.
22Akọp mè ebirieen̄ ini kechi ke Jekọp okaan̄ inan̄a me owot kè Rechen.
23Dan melek gwun̄ enerieen̄ ge kan̄, òrere Usim.
24Nafitali melek bọn ebirieen̄ kan̄, ìrere Jajien, mè Guni, mè Jeseri, mè Silem.
25Ibot bọn ebirieen̄ jaaba kechi ke Jekọp okaan̄ me owot kè Biliya ogwu usun̄ enenwaan̄ Leban osabe inyi Rechen ogwu gwun̄.
26Otutuuk bọn, mè bọn bọn kè Jekọp ebi ìgọgọọk ọmọ inu Ijipiti, isan̄a me lek nwa ebi bọn, ìre akọp ene gweregwen mè gweregwen. 27Bọn Josefu obonbe me Ijipiti ìre ibot ebirieen̄ iba. Otutuuk otu ifuk bọn owot iman kè Jekọp ìgọgọọk Jekọp inu Ijipiti ìre akọp ene jaaba.
Jekọp mè ebi uwu kan̄ mîre Ijipiti
28Jekọp oraria Juda ibe idasi ije isi ido Josefu oniin̄ ike ema mêsabe ije isi ire Gosen. Mgbọ ema erebe agan̄ Gosen ya, 29Josefu oninin̄ uji akọn̄ kan̄ anam okitaba ije, mè ikọp isi ichichini nte kan̄ me Gosen. Josefu ibebene chieen̄ itoon̄ me lek ogwu ute, ililibi inin̄, mè ikana ogwu ute ikat, mè iyaka ibot imaan̄ me oguga ogwu ute, mè ifiat mgbọ ito ito enenen.
30Ijeren otutumu inyi Josefu ibe, “Mgbọ keyi nsabe chieen̄ n̄a imun̄ owu, mè imun̄ ibe ke owu òwa me ugwem, nneen̄ lek ikwukwu.”
31Josefu onenitumu inyi ebi ngwan̄ mè otutuuk ebi uwu nte kan̄ cha ibe, “Mânisi irọ inyi ogwu Fero iriọọn̄ ibe ke enyi ebi ngwan̄ n̄a, mè otutuuk uwu nte n̄a ebi ìluk me ido Kenan, mîka inu me lek n̄a. 32Mâtumu si inyi ogwu Fero ibe ke enyi ìre ebi òkpukpo anam, ke enyi mîsa ebot mè arọọn̄ mè eriembuuk kinyi mè otutuuk inu geelek enyi ekaan̄be igbaalek inu. 33Ire ogwu Fero igwen enyi ido ibe mè ìre keke ore ukot mbọm kinyi, 34ìfọọk ibe ke enyi ìre ebi òkpukpo anam bene me akat ke enyi erebe nsabọn, ubọk ebi nte nte kinyi erebe me ukot eyi kiban̄. Sa me ikeya, ogwu Fero môchieek ibe enyi eluk me inyọn̄ ijọn̄ Gosen ya, mije, ene geelek òkikpukpo anam ìre mbuban inu me lek ebi Ijipiti.”
Currently Selected:
Ibeb 46: Obolo
Highlight
Share
Copy
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.
