Luku 10

Jisọsu l'agba ndu ozhi ẹbo-ẹbo tẹ whẹ je ozhi-ọma

1E megelewho, Onye-Nwe-Ọha byakwa bya ahọta ụkporo madzụ ugbo ẹto l'ụmadzu iri l'ẹbo ọdo, gbaa whẹ ẹbo-ẹbo, sụ tẹ whẹ vuru iya ụzo jekota l'iwhe bụ mkpụkpu lile mẹe iwhe bụ ẹka lile, yẹbedua l'onwiya l'abya ejeje. 2Ọ sụ whẹ: “Iwhe e meberu l'alị chashịakwaru, mbụ ọ kwatakwaa ha mebyi shinene, ọle ndu ozhi l'akpata iya akpata ta abadụ nwishi. Ọo ya bụ t'unu kfuru nụ Nnajị, nwe iwhe ono, e meberu l'alị, t'o ye ndu ozhi tẹ whẹ bya akpaaru iya iwhe iya ono. 3Unu tụgbua jeshia. Unu lekwawho l'unu dụakwa g'ọo ụnwu-atụru, mu chịakwaru unu ye t'unu jeshia ẹka ágụ́ jiru eji. 4Unu be egudekwa nwẹkpa peni, unu te egude ẹkpa mmaanụ. Unu te egude akpọkpa. Unu be ejekwa ome nke okwerwe ekele l'echi-ụzo.

5“Uwhu, unu bahụjeru, unu vujeedaru ụzo sụ: ‘Nchị dụkwa unu ndoo l'uwhu-a.’ 6Nteke bụ lẹ nwa-nchị-ndoo nọ l'ẹka ono, nchị ọdu ndoo unu abụru nkiya. Nteke bụ l'ọ tọ dụdu, ya alwawhuru unu azụ. 7Unu bulekwaruwho l'uwhu ono rijee, unu angụjekwaawho iwhe bụ iwhe whẹ nụru unu. O noo l'onye l'ese anya b'ọ gbarụ t'ọ nata ụgwo iwhe o setaru. Unu be ebuwhekwa l'uwhu l'uwhu.

8“Nteke o nweru mkpụkpu ẹka unu bahụru, whẹ gbobe ẹka labọ nata unu, unu rijelekwawho iwhe a nụru unu. 9Unu mee t'ẹhu dụ ndu iwhe l'eme lẹ mkpụkpu ono mma. Unu asụkwa whẹ who: ‘Chileke l'abyakwaa ọburu eze unu.’ 10Nteke bụ l'unu bahụjeru lẹ mkpụkpu, whẹ ta anata unu, t'unu lụfu l'ọma ogborogbo ụzo mkpụkpu ọbu je asụ whẹ: 11‘Udzu-ẹja alị unu, tekuru anyi l'ọkpa bẹ anyi jịfuakwaru unu-o! Ọle ọbu, iwhe unu l'a-malẹwho bụ lẹ Chileke byaakwa l'egoshi l'ọo ya bụ eze.’ 12Ọle iwhe l'a-nwụru ndu Sódomu l'a-bụkwanu iwhe ahata mbọku ikpe, amamẹ mkpụkpu ono.

Iwhe l'e-me obodo, jịkaru Jisọsu

(Mát. 11:20-24)

13“Nshọo gụbe Kọrazinu! Nshọo Bẹtusáyida! Nkele nggẹ l'ọo iwhe e wotaru iwhe-awhụrulenya ono, shihuru ike ono, e meru l'ime unu je emeshia l'ime Taya yẹle Sáyịdonu mẹ whẹ gege eyehaakwaro uwe ntsọmawhu, gwọo onwowhe lẹ ntụ gude goshi lẹ whẹ dawarụ onwowhe ụta, haa ome iwhe-dụ-ẹji, whẹ l'emegbabe lwakfutawaa Chileke nteke tehawaruro ẹnya. 14Ọle g'ọ dụ ẹgube-ẹ ntaa bẹ iwhe l'a-nwụru ndu Taya mẹe ndu Sáyịdonu l'a-bụkwa iwhe ahata mbọku ikpe mẹ Chileke kpede ikpe. 15Gụbedua bụ Kapániyọmu! ?Ọ dụ-gee ghu nke t'e kulia ghu t'i sukfuru l'igweli? ?Tị madụ l'aa-gbẹenu kwada ghu, kwadarwua ghu ọku-alị-maa.

16“Onye nụru iwhe unu kfuru nụwaru iwhe mu kfuru. Onye jịkaru unu, jịkaakwaruwho mbẹdua, tẹmenu onye jịkakwanuru mbẹdua bụakwawho onye ono, mu shi l'ẹka bẹ onye ono jịkaru.”

Ndu Jisọsu zhiru ozhi l'alwa l'ẹhu-ụtso

17Ụkporo madzụ ugbo ẹto l'ụmadzu iri l'ẹbo ono bya ejegee, gude ẹhu-ụtso wụlata bya asụ Jisọsu: “Onye-Nwe-Ọha, anyi gude ẹwha ghu kakọta-gee ka ọgvu ike.”

18Ọ sụ whẹ: “Mu shia ele Sétanu g'o shi l'igweli bya adaa g'ọo ebemu-igwe. 19Sụa, mu yewaru unu ike l'ẹka t'unu dzọpyabeje agwọ l'ọkpa mẹe akpị mẹe t'ike nke unu kakọta iwhe bụ ike ọhogu unu ono, bụ Oshifutuswe. Ọ tọ dụdu iwhe fụru ụka meka unu. 20Ọle ọbu, t'iwhe ẹhu l'a-nọ atsọ-turu unu ụtso ba abụkwa l'unu ka ọgvu ike, t'ẹhu gbechia tsọje unu ụtso l'e dewaru ẹwha unu l'ẹkwo l'imigwe.”

Ẹhu l'atsọ Jisọsu ụtso

(Mát. 11:25-27; 13:16-17)

21Nteke ono whọ bẹ Ume-Dụ-Nsọ meru iya, ẹhu tsọmahu iya. Ọ sụ: “Mu l'ekele ghu ekele Nna, gụbe onye nwe igwe nweru alị. Iwhe mu kwoberu ekele ghu ekele ono bụ l'i domiru iwhe lile-e tẹ ndu marụ ágụ mẹe ndu iwhe l'edoje ẹnya ba ama iya. O gbechia bụru ụnwegirima nshịi-a ya, l'ẹte amaa ágụ b'i gbechia bya atọkashiaru iya. Ee! Nna, o nolewho g'ọ zụru ghu nkwe l'obu, ọ bụkwaruwho nno bụ g'ọ dụ ghu ree t'i mee ya.

22“Sụa, Nna mu yekotakwaru mu iwhe lile l'ẹka. Ọ tọ dụkwa onye, marụ onye Nwa bụ gbahaa Nna. O nokwawho gẹ l'ọoto dụa onye marụ onye Nna bụ, gbahalẹwho Nwa; ọdo bụwaa l'ọo onye Nwa ono họtaru, goshi iya.”

23Jisọsu yẹle ndu l'etso ụzo iya nọdulewho nwẹka whẹ, ọ ghachi sụ whẹ: “Ẹhu-ụtso bụ nke unubẹ ndu gude ẹnya unu awhụ iwhe-e unu l'awhụ ọwa. 24Unu marụ-a l'igweligwe ndu nkfuchiru Chileke mẹe ndu eze ha l'igweligwe b'ọ gụshikwaru ẹgu ike tẹ whẹ whụa iwhe-e, unu l'awhụ-a, ọle whẹ ta awhụdu iya. Ọ gụkwa whẹ whọ ẹgu tẹ whẹ nụa iwhe-e, unu l'anụ-a, ọle whẹ ta anụdu iya.”

Ẹtu onye Samériya nweru obu-ọma

25Ọo ya bụ l'onye o-zhi-iwu lanụ agbalihu tẹ ya gudeedaa ajị data Jisọsu. Onye o-zhi-iwu ono sụ iya: “O-zhi-iwhe ?ọo gụnu bẹ mu l'e-me nggẹ mu nweru ndzụ tututu-mịmimi?”

26Jisọsu sụ iya: “?Ọo gụnu b'e deru l'ẹkwo iwu ?ndẹe iwhe ị gụtaru iya?”

27Nwoke ono sụ iya: “Ẹkwo iwu bẹ sụru: ‘Ye Onye-Nwe-Ọha, bụ Chileke ghu obu ghu g'ọ ha. Gude ndzụ ghu g'ọ ha, mẹe ike ghu g'ọ ha, mẹe uche ghu g'ọ ha ye Chileke obu’ woo: ‘Gụ eye madzụ ibe ghu obu lẹge i yeru iya onwoghu.’ ”

28Jisọsu sụ iya: “I kfukotaru iya ree-ree-ree; i -mewaa nno, gụ enweru ndzụ.”

29Nwoke ono l'emekwanu tẹ ya goshi lẹ ya bụ onye dụ chịriri, o gbakota jị Jisọsu ọdo sụ: “?Ọo onye bụ madzụ ibe mu?”

30Jisọsu nmaarụ iya ẹtu sụ: “O nweru nwoke lanụ ọbu shi Jerúsalẹmu eje Jériko. O je evukota ndu l'ana nfụ. Whẹ gude iya gbabẹ iya ọto, tsua ya tọlitoli, tsugbuwhodowa iya-a ndzụ nwanshị, parụ iya haa l'ẹka ono, ọ nọduwaa dzẹedzee ndzụ, whẹ gbakashịhu. 31O nweru g'o meru, o nweru onye l'agbajẹ ẹja nụ Chileke l'aghata l'ụzo ẹka ono. Ọ bya akpolwu nwoke ono, ọ gbangoo ya, je eshia ụzo ọdo ghata iya tụgburu jeshia iwhe l'ooje. 32Onye ọnu-ụlo Lívayi ghatadẹkwawho l'ụzo ẹka ono, ọ bya ebu nwoke ono iwhu, ọ gbangokwaa ya whọ, shia ụzo ọdo tụgbua jeshia iwhe l'ooje. 33Tọ dụ iya bụ lẹ nwoke Samériya l'ejekwaro iwhe ọdo, o rwua ẹka ono nwoke ono daburu, imiko iya dụ iya. 34Ọ bya ejekfu iya je edebechaa ya mmanụ l'ọnya, dụkota iya l'ẹhu, gbashị iyẹ ya mmẹe gude iwhe kechishia ye ya. Ọ bya apata iya tukobe l'anụ-ije iya duba iya l'ụlo-ndụ-ẹbyii, swiru iya l'ẹka ono. 35O rwua echile iya, onye Samériya ono chịfuta shịru labọ chẹe onye l'eletaje ụlo-ndụ-ẹbyii ono sụ iya: ‘Letakwa iya ẹnya. Nteke mu lwadẹleruwho o -nweru iwhe ọdo i mewhuru l'ishi iya, mu akfụa ghu iya.’ ” O noo ya.

36“?Ọo onye ole l'ime ụmadzu ẹto ono goshiru l'iya bụ madzụ ibe nwoke ono vukotaru ndu l'ana nfụ ono?”

37Onye o-zhi-iwu ono sụ ya: “Ọo onye ọwhu whụru iya imiko who.”

Jisọsu sụ iya: “Laa, je emejee nno.”

Jisọsu l'akpakfu Mata mẹe Méri

38Tọ dụ iya bụ lẹ Jisọsu whẹ atụgbukwaru ejelekwawho iwhe whẹ l'eje. Whẹ jenyalewho l'echi-ụzo, ọ bahụ l'ọma mkpụkpu lanụ. Nwanyị ọbu, ẹwha iya bụ Mata dubata iya l'ibe whẹ tẹ whẹ kwaarụ iya ẹbyii. 39Nwanyị ono nweru nwune nwanyị ẹwha iya bụ Méri. Méri je anọdu nọkube Onye-Nwe-Ọha anụ okfu iya. 40Mata yenuka ẹhu l'ome nri. Ọ bya ejekfu Jisọsu je asụ iya: “Onye-Nwe-Ọha ?t'i yedu ọnu gẹ nwune mu nwanyị harụ mu ozhi nkụnyi mu? Sụnu iya t'ọ bya eyeru mu ẹka.”

41Onye-Nwe-Ọha sụ iya: “Mata, Mata, ịikunuka walaa, ajịgbushinuka onwoghu lẹ mee ọwa, mee ọwa. 42Ọo iwhe lanụ kpụ bẹ bụ iwhe dụ mkpa. Méri hataakwarụ oke-iwhe ono ọwhu ka ree. Tọ hẹ l'aabya l'a-nafụ iyẹ ya anafụ.”

Currently Selected:

Luku 10: Ezaa

Highlight

Copy