Makụ 14
14
Idzu nke t'e gbua Jisọsu
(Mát. 26:1-5; Luk. 22:1-2; Jọn. 11:45-53)
1Nteke ono b'ọ whọduwaru-a abalị labọ tẹmenu a bahụ l'ori-oge O-je-ghata mẹkwawho nteke l'aatajẹ buredi l'ekoo eko. Ndu ishi ndu l'agbajẹ ẹja nụ Chileke mẹe ndu o-zhi-iwu l'achọkashilewho ụzo whẹ l'e-shi gude Jisọsu l'edomi gbua ya. 2Whẹ sụ: “Ọle ọ tọ kwa ntaa l'eeri oge-e, l'anyi -tụa ya ama ntaa bẹ ùtsú l'a-dakwa.”
Aawụ Jisọsu mmanụ-ehuhu l'ishi
(Mát. 26:6-13; Jọn. 12:1-8)
3Ọ bya ebe nteke Jisọsu nọ lẹ Bétani, o jee ibe Sáyịmonu ọwhu njọkirehu shi eme. Ọ nọdu l'ẹka ono eri nri, o nweru nwanyị lanụ shi bata. Nwanyị ono bata gude nwite ọbu l'amashị ụma ike. Iwhe dụ iya nụ bụru mmanụ-ehuhu nadụ. Nadụ ono bụ ọkpobe nadụ guru egugu. Nwanyị ono bya etsufua ite ono wota mmanụ ono wụ-kputa Jisọsu l'ishi. 4Ẹhu ghulahaa ndu harụ nọdu l'ẹka ono eghu. Whẹ l'ekfu sụ: “?E kwoberu gụnu emebyishi ẹguru mmanụ ọwa-a ẹgube-ẹ? 5Manụ-a bẹ sụkwaru gẹ bụ e -rede iya ere, e reta iya iwhe ka owhu pọngu iri, chịta keshiaru ndu l'amaa gẹ whẹ l'e-me.” Whẹ balahaaru nwanyị ono mba.
6Jisọsu sụ whẹ: “Unu haa ya. ?Ọo gụnu kpatarụ unu kpabẹ iya okfu? Oo ree b'o meru mu ẹgube-ẹ. 7Unu lẹ ndu l'adụa g'ọ harụ whẹ bupyabe nteke nteke; nteke dụlewho unu ree unu emeeru whẹ ree. Ọle mbẹdua bẹ mu l'unu ta anọpyabedu nteke nteke. 8Nwanyị-a mewaru mu iwhe l'ọo-dụ ike mee. Ọ dụwaa mbụ tee ogwẹhu mu mmanụ gude kwabẹru nteke l'ee-li mu. 9T'o dokwaa unu ẹnya ree, l'iwhe bụ ẹka bụ-zhia ẹka, a ryarụ ozhi-ọma-a lẹ mgboko-o gbaa mgburumgburu bẹ l'aa-kọjekwawho akọ iwhe-e, nwanyị-a meru, gude nyatajẹ nwanyị-a.”
Júdasu l'ekweta lẹ ya l'enwuru Jisọsu ye
(Mát. 26:14-16; Luk. 22:3-6)
10Júdasu Isukáriyọtu, bụ onye lanụ l'ụmadzu iri l'ẹbo ono bya atụgburu jekfushia ndu ishi ndu l'agbajẹ ẹja nụ Chileke tẹ ya je agbarụ Jisọsu ye whẹ l'ẹka. 11Whẹ nụle iya whọ ẹhu tsọlahaa whẹ ụtso, whẹ kweta iya ụkwa lẹ whẹ l'a-nụ iya okpoga. Ọ chọkashide ụzo, l'oo-shi gbarụ iya ye.
Nri-ẹnyashi Ikpazụ Onye-Nwe-Ọha
(Mát. 26:17-30; Luk. 22:7-23; Jọn. 13:21-30; 1 Kọ́r. 11:23-25)
12O rwua lẹ mbọku ọbahu l'oge ono l'aatajẹ buredi l'ete ekoo eko bụ iya bụ mbọku ono, whẹ l'egbuje nwatụru oge O-je-ghata, ndu l'etso ụzo Jisọsu sụ iya: “?Oo awee b'ọ dụ ghu nke t'anyi je edozhiaru ghu t'ị nọdu ria nri oge O-je-ghata-a?” 13Ọ bya ejekfu ụmadzu labọ lẹ ndu l'etso ụzo iya sụ whẹ: “Unu bahụ l'ime Jerúsalẹmu. Unu -rwulewho ẹka ono b'o nweruwho nwoke, vu ite ooku mini l'a-byakfuta unu, unu tsoru iya. 14Ẹka o jenyaaru ọ bahụ, t'unu bahụ ẹka ọbu je asụ onye-nwe uwhu ono, lẹ O-zhi-iwhe bẹ sụru: ?Ndẹe ẹka ọ dụ mbụ ụlo-ndụ-ẹbyii, e doberu ngabẹru mu, bụ ẹka mu lẹ ndu l'etso ụzo mu l'a-nọdu ria nri oge O-je-ghata? 15Oo-goshia unu ụlo-eli, goshi unu ime mkpu, dụ l'eli eli iya, ime mkpu ono ha ọsa mebyi shii, e dobegewa iya oshi, dozhigewa iya ree gẹ l'ọo-dụ, a nọdu iya ria nri. Unu bahụ l'ẹka ono je edozhiaru anyi nri ọbu.”
16Ndu l'etso ụzo iya ono tụgbua bahụ l'ime obodo ono. Ọ bụleruwho g'o kfuru whẹ iya bụ gẹ iwhe lile dụ. Whẹ nọdu l'ẹka ono melahaa nri oge O-je-ghata ono.
17O rwua l'urwẹnyashi yẹle ụmadzu iri l'ẹbo ono lịru bahụ l'ẹka ono. 18Whẹ ridelewho nri ono, Jisọsu sụ whẹ: “Iwhe mu l'ekfuru unu bụ: ọ kwa onye lanụ lẹge unu ha nọdu l'ẹka-a bẹ l'oo-shi l'ẹka, ndu l'achọ mu nụ akpụta mu, mbụkwa-a onye mu l'iya tụkoru eri nri l'ẹka-a.”
19O rwua whẹ l'ẹhu, whẹ wata iya ọji ajị l'ẹhu l'ẹhu sụ: “Ọo mbẹdua; ?tọo mu?”
20Ọ sụ whẹ: “Ọo onye lanụ l'ime unubẹ ụmadzu iri l'ẹbo-ọ, mbụkwa onye ọwhu mu l'iya l'etsutaje nri l'ochi lanụ. 21Abụbu-Ndiwhe l'a-lakwa lẹ g'e deru iya l'ẹkwo Okfu Chileke. Ọle nshọkwanuro onye ono, bụ iya bẹ l'ee-shikwanu l'ẹka iya gbarụ Abụbu-Ndiwhe ye l'ẹka ndu l'achọ ishi iya. Ọ gọgo kalẹkwaru iya whọ mma nggẹ l'ẹte anwụ iya ilile.”
22Whẹ gude nri ono l'ẹka eri, ọ bya ewota buredi bya ekele Chileke ekele, ọ nyawaa ya nụ whẹ sụ whẹ: “Unu narụ, ọ waa bụ ogwẹhu mu.”
23Ọ bya apalia omogo bya ekelekwawho Chileke ekele, ọ pẹe whẹ iya, whẹ ngụ-dzuru iya. 24Ọ sụ whẹ: “Ọ waa bụ mmee mu, mmee a gbashịru l'iswi ẹhu igwe-ọha. Chileke gude mmee mu ono eme t'ọgbandzu, shi mu l'ẹka vuru ire. 25Iwhe mu l'ekfuru unu bụ lẹ mu ta abyahẹdu l'a-ngụbaa iwhe shi l'akpụru vayịnu jeye mbọku ono, mu l'a-ngụ nke ọwhuu lẹ mgboko ọwhuu nke Chileke.”
26Whẹ bya agụa egvu jaa Chileke, gụ-gee egvu ono, whẹ tụgbua jeshia l'ugvu Ólivu.
Jisọsu l'e-kfu lẹ Pyita l'ee-bekochaa sụ lẹ ya ta amadụ iya
(Mát. 26:31-35; Luk. 22:31-34; Jọn. 13:36-38)
27Jisọsu sụ whẹ: “Unu g'unu ha l'e-be hakọta mu gbalashịa, o noo l'e deru iya l'ẹkwo Okfu Chileke sụ: ‘Mu l'e-chigbu onye l'eche atụru, ọwhube atụru ono agbakashịhu.’ 28Nteke ono l'ee-melewho tẹ mu shi l'ọnwu teta nọdu ndzụ bẹ mu l'e-vu unu ụzo jeshia Gálili.”
29Pyita sụ iya: “Mbẹdua ta abyakwa l'a-ha ghu, e -behuduru ndu ọwhuna hakọta ghu.”
30Jisọsu sụ iya: “Iwhe mu l'ekfuru ghu bụ l'ẹnyashi ntanụ-a; okọku bya l'aryadeshia ọrya ugbo labọ b'i gbee kfuwanu ugbo ẹto l'ị tị madụ mu.”
31Pyita kfua ya kfushia ya ike sụ iya: “E -behuduru mu lẹ ghu je l'a-tụko laa, mu ta abyakwa l'a-ha ghu.”
Ndu ọwhu tụko kfukota nno.
Jisọsu l'ekfu anụ Chileke lẹ Getusémeni
(Mát. 26:36-46; Luk. 22:39-46)
32Whẹ rwulewho l'ẹka ọbu, l'eekuje Getusémeni, ọ sụ ndu l'etso ụzo iya: “Unu nọdu anọdu l'ẹka-a tẹ mu kpụliberu je ekfuru nụ Chileke.”
33O duta Pyita, duta Jémusu yẹle Jọnu yeru onwiya, whẹ tụgbua, meji l'atọfu iya atọfu, ọ tsụshide iya lanụ ike. 34Ọ sụ whẹ: “Ha! Meji l'akulẹkwa mu whọ whẹriwheri, mbụkwa nke ọwhu obu l'abya mu echifu.” Woo whẹ: “Unu nọdukwa l'ẹka-a, cheje nche.”
35O jelibeleruwho nwanshị, ọ daa l'alị wata okfu anụ Chileke, sụ t'o wohaaru iya iwhe-ọtsulanu nke nwa nteke ono m'ọ -bụru l'ọo iwhe l'e-kwe emekota, t'o bo rwu iya l'ẹhu. 36Ọ sụ: “Nna, Nna, ọo ghu bụ onye l'adụje ike mekota iwhe lile, nafụ mụbe Jisọsu omogo iwhe-ọtsulanu-a! Ọle ọbu t'ọ bọ bụkwa iwhe ọwhu dụ mu l'uche l'e-me, t'ọ bụkwaru iwhe ọwhu dụ gụbedua l'uche.”
37Ọ dawhushia azụ bya awhụa Pyita whẹ gẹ whẹ l'eku mgbẹnya. Ọ sụ Pyita: “Sáyịmonu ?Ị gbẹenu eku mgbẹnya? ?M'ị tị dụdu ike nwụru ẹnya, eche nche awa lanụ? 38Unu cheje nche, kfuje nụ Chileke t'o bo kwe t'unu daba l'iwhe adata. Obu madzụ bẹ l'ọo-nọje ewheshi uwhere ike, obenu l'ọwhube madzụ l'onwiya bẹ tsụru mmẹe.”
39Ọ tụgbukwaru ọdo jeshia je ekfuru nụ Chileke, je ekfukwaa iwhe-e, o kfuhawaru-a. 40Ọ bya adawhukwa azụ byakfuta whẹ, byatashia whẹ l'ekukwawho mgbẹnya nkele mgbẹnya kogeeru whẹ ẹnya eko, whẹ ta ama iwhe whẹ l'e-kfuru iya.
41Ọ byakfuta whẹ nke ugbo ẹto bya sụ whẹ: “?Unu nọkwadua l'oku mgbẹnya, edzuru onwunu ike g'unu nọ iya? Ọ dụwaa ree ntaa. O bewaru. Abụbu-Ndiwhe b'a byakwaa l'agbarụ ye l'ẹka ndu l'eme iwhe-dụ-ẹji. 42Unu gbashi t'anyi je. Unu lekwa onye ọbu, l'agbarụ mu ye ndọwhu gẹ l'ọobya.”
Eegude Jisọsu
(Mát. 26:47-56; Luk. 22:47-53; Jọn. 18:3-12)
43Jisọsu kpụkwaduru-a okfu ono l'ọnu ekfu, Júdasu bụkwaa onye lanụ l'ụmadzu iri l'ẹbo ono, l'etso ụzo iya bụru whẹrekete. Yẹle igweligwe madzụ lịru. Whẹ chịgbaaru mma mẹe mkpụru. Ndu zhiru whẹ nụ bụ ndu ishi ndu l'agbajẹ ẹja nụ Chileke mẹe ndu o-zhi-iwu mẹe ndu bụ ọgurenya. 44Onye ono l'a-gbarụ iya ye ono kfuhawaru whẹ iwhe l'oo-me gude goshi whẹ onye ọwhu ọbu. Ọ sụhawaru whẹ: “Ọo onye onona mu l'e-jekfu je etsua ọnu gude kele iya ekele bụ onye ọwhu ọbu whẹ l'e-gude kpụta tụgbua, eche iya nche.” 45Erwurwu, Júdasu l'erwu ẹka ono, o jekfulekwawho Jisọsu je etsua ya ọnu l'asa gude kele iya ekele sụ iya: “O-zhi-iwhe!” 46Ndu ono wọchia Jisọsu, gude iya. 47Onye lanụ lẹ ndu kfụkube whẹ l'ẹka ono mịtalewho ogu-ịgba iya gbu nwohuta eze onye ishi ndu l'agbajẹ ẹja nụ Chileke, sefulekwa iya whọ nchị. 48Jisọsu sụ ndu ono, byarụ iya egude: “?Mu bụ onye l'ana nfụ ọwhu unu chịgbaa ogu-ịgba, chịru mkpụru abya mu egude? 49?Mẹ mu l'unu shikwa anọduje mbọku-mbọku l'eze-ụlo Chileke, mu ezhi unu iwhe, unu te egudekwa mu. Ọle iwhe e deru l'ẹkwo Okfu Chileke medzuje.”
50Ndu l'etso ụzo iya tụko gẹ whẹ ha parụ iya haa gbakashịhu.
51O nweru nwokorọbya lanụ ọbu l'etsole iya-a. Nwokoro ono ta adụdu iwhe o we, t'a gụfulewho ẹkwa ọcha, ọ gbakụru onwiya. Ndu ono guderu Jisọsu kpachịa ya. 52Ọ nyịkufu, parụ ẹkwa ọcha ono haa whẹ l'ẹka, gbarụ ọto gbala.
Jisọsu nọ l'iwhu ọgbo-ikpe ndu Ju
(Mát. 26:57-68; Luk. 22:54-55,63-71; Jọn. 18:13-14,19-24)
53Tọ dụ iya bụ lẹ whẹ akpụta Jisọsu kpụ-jeshiaru eze onye ishi ndu l'agbajẹ ẹja nụ Chileke. Ndu ishi ndu l'agbajẹ ẹja nụ Chileke mẹe ndu bụ ọgurenya mẹe ndu o-zhi-iwu zadzua. 54Pyita l'etso whẹ rọ l'ụzo otẹnya, tsozhia whẹ whọ nno jeye o tsoru whẹ bahụ l'ọma ogboduwhu ibe eze onye ishi ndu l'agbajẹ ẹja nụ Chileke ono. O je anọdu anọdu l'ẹka ndu nche nọ, nyalahaa ọku. 55Ndu ishi ndu l'agbajẹ ẹja nụ Chileke ono gẹ whẹ ha mẹe ndu ọgbo-ikpe l'owhu chọlahaa iwhe whẹ l'a-sụ lẹ Jisọsu meru nnta gẹ l'ee-shi t'e kpee ya nkfugbu. Tọ dụ iwhe whẹ whụru o meru. 56Whẹ dụ l'igwe gude ibo agba iya ẹka-ebe, ọle iwhe whẹ kfuru te ebukodu ishi.
57Ndu harụ gbashi dzụlahaa ejire sụ: 58“Anyịbedua gudekwa nchị anyi nụa nteke ọ sụru lẹ ya l'e-mebyishi eze-ụlo Chileke-e, bụ ẹka b'e gude tụa ya, woo l'ime abalị ẹto, ya atụa ọdo, l'abụa ẹka b'e gude tụa ya.” 59Tọ hẹkwanu m'ọo l'iwhe ono whẹ l'ekfu bukoru ishi.
60Eze onye ishi ndu l'agbajẹ ẹja nụ Chileke gbalihu l'edzudzu-ọha ono jị Jisọsu sụ iya: “?Tọ dụdu ọnu l'iiye l'ẹgube ẹka-ebe ọwaa whẹ l'agbakaa ghu ẹgube ya?”
61Ọ nọ-kirishilekwaa nwa nggujingguji, to kfu okfu. Eze onye ishi ndu l'agbajẹ ẹja nụ Chileke jị iya ọdo sụ: “?Ọo gụbedua bụ Kuráyisutu ọbu, mbụ Onye Ndzọta ọbu, Chileke kweru ụkwa iya? ?Ọo ghu bụ Nwa Chileke ọbu?”
62Jisọsu sụ iya: “Ee ọo mbẹdua bụ iya. E -megee bẹ unu l'a-whụkwa Abụbu-Ndiwhe l'ẹka ọ nọ l'ẹka-ụtara Chileke bụ iya bụ Ọkalibe-Kakọta-Ike. E -megekwaawho, unu awhụkwaa ya whọ gẹ l'oo-gude urwukpu shi l'imigwe abya.”
63Eze onye ishi ndu l'agbajẹ ẹja nụ Chileke lajashịa uwe nkiya g'ọ ha sụ: “?O zhia ẹgube ẹka-ebe gụnu ọdo bẹ whẹ l'achọkwadu? 64?Unu nụru-a ekfubyi ono, l'ookfubyishi Chileke? ?Ndẹe iwhe unu chịtaru ntaa?” Whẹ tụko nma Jisọsu ikpe sụ l'iwhe gbalẹru iya whọ bụ t'ọ nwụhu anwụhu.
65Ndu harụ vụlahaa ya ọnu-mini. Whẹ wota iwhe kechia ya ẹnya chilahaa ya iwhe asụje iya: “Kọtadaa onye chiru ghu iwhe ono.” Ndu nche kpụta iya, echije iya ẹka l'ishi-nchị.
Pyita l'agọ lẹ ya ta amadụ Jisọsu
(Mát. 26:69-75; Luk. 22:56-62; Jọn. 18:15-18,25-27)
66Ọwhube Pyita nọdukwaduro l'etezhi l'ụlo-ikpe ono, onye lanụ l'ime ụnwumgboko l'ejeru eze onye ishi ndu l'agbajẹ ẹja nụ Chileke ono ozhi bya abya. 67Ọ whụlewho Pyita l'ẹka l'ọonyata ọku, o lee ya ẹnya sụ iya: “?M'i tsokwa lẹ ndu whẹ l'onye Názaretu ono, bụ Jisọsu shi atụ ọli?”
68Pyita gọfu sụ iya: “Mu ta amakwa iwhe l'iikfu; tọ hẹ l'o doru mu ẹnya.” Pyita golihulekwawho l'ẹka ono, tụgbua je anọdu l'ọnu-ọguzo. Okọku ryalẹkwawho ọrya nteke ono.
69Nwamgbọko ono whụkwaa ya ọdo watakwa okfuru ndu kfụru lẹ mgboro ẹka ono sụ: “Nwoke-e ya lịkwa lẹ ndu l'etso ụzo Jisọsu.” 70Pyita gọfukwa ọdo.
A bya anọta nwanshị, ndu kfụru l'ẹka ono sụ Pyita: “Ba atụshi ẹgo, ị lịchaa ya-a. ?Tịi tị bụdu onye Gálili?”
71Ọ wata anọ akpọ ụrwu ekpu onwiya, erikwawho nte woo: “Mu ta amakwa nwoke ono, unu l'ekfu okfu iya ono.”
72Nteke onowho okọku ryalẹkwawho ọrya nke ugbo labọ. Pyita nyata iwhe ono Jisọsu kfujeru ono sụ lẹ tẹmenu okọku arya ọrya ugbo labọ bẹ l'ii-kfuhawanu ugbo ẹto l'ị tị madụ onye ya bụ. O rwua ya l'anụ ojii, ọ ryashịa ẹkwa.
Currently Selected:
Makụ 14: Ezaa
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Abakaliki Literacy and Translation Trust
Makụ 14
14
Idzu nke t'e gbua Jisọsu
(Mát. 26:1-5; Luk. 22:1-2; Jọn. 11:45-53)
1Nteke ono b'ọ whọduwaru-a abalị labọ tẹmenu a bahụ l'ori-oge O-je-ghata mẹkwawho nteke l'aatajẹ buredi l'ekoo eko. Ndu ishi ndu l'agbajẹ ẹja nụ Chileke mẹe ndu o-zhi-iwu l'achọkashilewho ụzo whẹ l'e-shi gude Jisọsu l'edomi gbua ya. 2Whẹ sụ: “Ọle ọ tọ kwa ntaa l'eeri oge-e, l'anyi -tụa ya ama ntaa bẹ ùtsú l'a-dakwa.”
Aawụ Jisọsu mmanụ-ehuhu l'ishi
(Mát. 26:6-13; Jọn. 12:1-8)
3Ọ bya ebe nteke Jisọsu nọ lẹ Bétani, o jee ibe Sáyịmonu ọwhu njọkirehu shi eme. Ọ nọdu l'ẹka ono eri nri, o nweru nwanyị lanụ shi bata. Nwanyị ono bata gude nwite ọbu l'amashị ụma ike. Iwhe dụ iya nụ bụru mmanụ-ehuhu nadụ. Nadụ ono bụ ọkpobe nadụ guru egugu. Nwanyị ono bya etsufua ite ono wota mmanụ ono wụ-kputa Jisọsu l'ishi. 4Ẹhu ghulahaa ndu harụ nọdu l'ẹka ono eghu. Whẹ l'ekfu sụ: “?E kwoberu gụnu emebyishi ẹguru mmanụ ọwa-a ẹgube-ẹ? 5Manụ-a bẹ sụkwaru gẹ bụ e -rede iya ere, e reta iya iwhe ka owhu pọngu iri, chịta keshiaru ndu l'amaa gẹ whẹ l'e-me.” Whẹ balahaaru nwanyị ono mba.
6Jisọsu sụ whẹ: “Unu haa ya. ?Ọo gụnu kpatarụ unu kpabẹ iya okfu? Oo ree b'o meru mu ẹgube-ẹ. 7Unu lẹ ndu l'adụa g'ọ harụ whẹ bupyabe nteke nteke; nteke dụlewho unu ree unu emeeru whẹ ree. Ọle mbẹdua bẹ mu l'unu ta anọpyabedu nteke nteke. 8Nwanyị-a mewaru mu iwhe l'ọo-dụ ike mee. Ọ dụwaa mbụ tee ogwẹhu mu mmanụ gude kwabẹru nteke l'ee-li mu. 9T'o dokwaa unu ẹnya ree, l'iwhe bụ ẹka bụ-zhia ẹka, a ryarụ ozhi-ọma-a lẹ mgboko-o gbaa mgburumgburu bẹ l'aa-kọjekwawho akọ iwhe-e, nwanyị-a meru, gude nyatajẹ nwanyị-a.”
Júdasu l'ekweta lẹ ya l'enwuru Jisọsu ye
(Mát. 26:14-16; Luk. 22:3-6)
10Júdasu Isukáriyọtu, bụ onye lanụ l'ụmadzu iri l'ẹbo ono bya atụgburu jekfushia ndu ishi ndu l'agbajẹ ẹja nụ Chileke tẹ ya je agbarụ Jisọsu ye whẹ l'ẹka. 11Whẹ nụle iya whọ ẹhu tsọlahaa whẹ ụtso, whẹ kweta iya ụkwa lẹ whẹ l'a-nụ iya okpoga. Ọ chọkashide ụzo, l'oo-shi gbarụ iya ye.
Nri-ẹnyashi Ikpazụ Onye-Nwe-Ọha
(Mát. 26:17-30; Luk. 22:7-23; Jọn. 13:21-30; 1 Kọ́r. 11:23-25)
12O rwua lẹ mbọku ọbahu l'oge ono l'aatajẹ buredi l'ete ekoo eko bụ iya bụ mbọku ono, whẹ l'egbuje nwatụru oge O-je-ghata, ndu l'etso ụzo Jisọsu sụ iya: “?Oo awee b'ọ dụ ghu nke t'anyi je edozhiaru ghu t'ị nọdu ria nri oge O-je-ghata-a?” 13Ọ bya ejekfu ụmadzu labọ lẹ ndu l'etso ụzo iya sụ whẹ: “Unu bahụ l'ime Jerúsalẹmu. Unu -rwulewho ẹka ono b'o nweruwho nwoke, vu ite ooku mini l'a-byakfuta unu, unu tsoru iya. 14Ẹka o jenyaaru ọ bahụ, t'unu bahụ ẹka ọbu je asụ onye-nwe uwhu ono, lẹ O-zhi-iwhe bẹ sụru: ?Ndẹe ẹka ọ dụ mbụ ụlo-ndụ-ẹbyii, e doberu ngabẹru mu, bụ ẹka mu lẹ ndu l'etso ụzo mu l'a-nọdu ria nri oge O-je-ghata? 15Oo-goshia unu ụlo-eli, goshi unu ime mkpu, dụ l'eli eli iya, ime mkpu ono ha ọsa mebyi shii, e dobegewa iya oshi, dozhigewa iya ree gẹ l'ọo-dụ, a nọdu iya ria nri. Unu bahụ l'ẹka ono je edozhiaru anyi nri ọbu.”
16Ndu l'etso ụzo iya ono tụgbua bahụ l'ime obodo ono. Ọ bụleruwho g'o kfuru whẹ iya bụ gẹ iwhe lile dụ. Whẹ nọdu l'ẹka ono melahaa nri oge O-je-ghata ono.
17O rwua l'urwẹnyashi yẹle ụmadzu iri l'ẹbo ono lịru bahụ l'ẹka ono. 18Whẹ ridelewho nri ono, Jisọsu sụ whẹ: “Iwhe mu l'ekfuru unu bụ: ọ kwa onye lanụ lẹge unu ha nọdu l'ẹka-a bẹ l'oo-shi l'ẹka, ndu l'achọ mu nụ akpụta mu, mbụkwa-a onye mu l'iya tụkoru eri nri l'ẹka-a.”
19O rwua whẹ l'ẹhu, whẹ wata iya ọji ajị l'ẹhu l'ẹhu sụ: “Ọo mbẹdua; ?tọo mu?”
20Ọ sụ whẹ: “Ọo onye lanụ l'ime unubẹ ụmadzu iri l'ẹbo-ọ, mbụkwa onye ọwhu mu l'iya l'etsutaje nri l'ochi lanụ. 21Abụbu-Ndiwhe l'a-lakwa lẹ g'e deru iya l'ẹkwo Okfu Chileke. Ọle nshọkwanuro onye ono, bụ iya bẹ l'ee-shikwanu l'ẹka iya gbarụ Abụbu-Ndiwhe ye l'ẹka ndu l'achọ ishi iya. Ọ gọgo kalẹkwaru iya whọ mma nggẹ l'ẹte anwụ iya ilile.”
22Whẹ gude nri ono l'ẹka eri, ọ bya ewota buredi bya ekele Chileke ekele, ọ nyawaa ya nụ whẹ sụ whẹ: “Unu narụ, ọ waa bụ ogwẹhu mu.”
23Ọ bya apalia omogo bya ekelekwawho Chileke ekele, ọ pẹe whẹ iya, whẹ ngụ-dzuru iya. 24Ọ sụ whẹ: “Ọ waa bụ mmee mu, mmee a gbashịru l'iswi ẹhu igwe-ọha. Chileke gude mmee mu ono eme t'ọgbandzu, shi mu l'ẹka vuru ire. 25Iwhe mu l'ekfuru unu bụ lẹ mu ta abyahẹdu l'a-ngụbaa iwhe shi l'akpụru vayịnu jeye mbọku ono, mu l'a-ngụ nke ọwhuu lẹ mgboko ọwhuu nke Chileke.”
26Whẹ bya agụa egvu jaa Chileke, gụ-gee egvu ono, whẹ tụgbua jeshia l'ugvu Ólivu.
Jisọsu l'e-kfu lẹ Pyita l'ee-bekochaa sụ lẹ ya ta amadụ iya
(Mát. 26:31-35; Luk. 22:31-34; Jọn. 13:36-38)
27Jisọsu sụ whẹ: “Unu g'unu ha l'e-be hakọta mu gbalashịa, o noo l'e deru iya l'ẹkwo Okfu Chileke sụ: ‘Mu l'e-chigbu onye l'eche atụru, ọwhube atụru ono agbakashịhu.’ 28Nteke ono l'ee-melewho tẹ mu shi l'ọnwu teta nọdu ndzụ bẹ mu l'e-vu unu ụzo jeshia Gálili.”
29Pyita sụ iya: “Mbẹdua ta abyakwa l'a-ha ghu, e -behuduru ndu ọwhuna hakọta ghu.”
30Jisọsu sụ iya: “Iwhe mu l'ekfuru ghu bụ l'ẹnyashi ntanụ-a; okọku bya l'aryadeshia ọrya ugbo labọ b'i gbee kfuwanu ugbo ẹto l'ị tị madụ mu.”
31Pyita kfua ya kfushia ya ike sụ iya: “E -behuduru mu lẹ ghu je l'a-tụko laa, mu ta abyakwa l'a-ha ghu.”
Ndu ọwhu tụko kfukota nno.
Jisọsu l'ekfu anụ Chileke lẹ Getusémeni
(Mát. 26:36-46; Luk. 22:39-46)
32Whẹ rwulewho l'ẹka ọbu, l'eekuje Getusémeni, ọ sụ ndu l'etso ụzo iya: “Unu nọdu anọdu l'ẹka-a tẹ mu kpụliberu je ekfuru nụ Chileke.”
33O duta Pyita, duta Jémusu yẹle Jọnu yeru onwiya, whẹ tụgbua, meji l'atọfu iya atọfu, ọ tsụshide iya lanụ ike. 34Ọ sụ whẹ: “Ha! Meji l'akulẹkwa mu whọ whẹriwheri, mbụkwa nke ọwhu obu l'abya mu echifu.” Woo whẹ: “Unu nọdukwa l'ẹka-a, cheje nche.”
35O jelibeleruwho nwanshị, ọ daa l'alị wata okfu anụ Chileke, sụ t'o wohaaru iya iwhe-ọtsulanu nke nwa nteke ono m'ọ -bụru l'ọo iwhe l'e-kwe emekota, t'o bo rwu iya l'ẹhu. 36Ọ sụ: “Nna, Nna, ọo ghu bụ onye l'adụje ike mekota iwhe lile, nafụ mụbe Jisọsu omogo iwhe-ọtsulanu-a! Ọle ọbu t'ọ bọ bụkwa iwhe ọwhu dụ mu l'uche l'e-me, t'ọ bụkwaru iwhe ọwhu dụ gụbedua l'uche.”
37Ọ dawhushia azụ bya awhụa Pyita whẹ gẹ whẹ l'eku mgbẹnya. Ọ sụ Pyita: “Sáyịmonu ?Ị gbẹenu eku mgbẹnya? ?M'ị tị dụdu ike nwụru ẹnya, eche nche awa lanụ? 38Unu cheje nche, kfuje nụ Chileke t'o bo kwe t'unu daba l'iwhe adata. Obu madzụ bẹ l'ọo-nọje ewheshi uwhere ike, obenu l'ọwhube madzụ l'onwiya bẹ tsụru mmẹe.”
39Ọ tụgbukwaru ọdo jeshia je ekfuru nụ Chileke, je ekfukwaa iwhe-e, o kfuhawaru-a. 40Ọ bya adawhukwa azụ byakfuta whẹ, byatashia whẹ l'ekukwawho mgbẹnya nkele mgbẹnya kogeeru whẹ ẹnya eko, whẹ ta ama iwhe whẹ l'e-kfuru iya.
41Ọ byakfuta whẹ nke ugbo ẹto bya sụ whẹ: “?Unu nọkwadua l'oku mgbẹnya, edzuru onwunu ike g'unu nọ iya? Ọ dụwaa ree ntaa. O bewaru. Abụbu-Ndiwhe b'a byakwaa l'agbarụ ye l'ẹka ndu l'eme iwhe-dụ-ẹji. 42Unu gbashi t'anyi je. Unu lekwa onye ọbu, l'agbarụ mu ye ndọwhu gẹ l'ọobya.”
Eegude Jisọsu
(Mát. 26:47-56; Luk. 22:47-53; Jọn. 18:3-12)
43Jisọsu kpụkwaduru-a okfu ono l'ọnu ekfu, Júdasu bụkwaa onye lanụ l'ụmadzu iri l'ẹbo ono, l'etso ụzo iya bụru whẹrekete. Yẹle igweligwe madzụ lịru. Whẹ chịgbaaru mma mẹe mkpụru. Ndu zhiru whẹ nụ bụ ndu ishi ndu l'agbajẹ ẹja nụ Chileke mẹe ndu o-zhi-iwu mẹe ndu bụ ọgurenya. 44Onye ono l'a-gbarụ iya ye ono kfuhawaru whẹ iwhe l'oo-me gude goshi whẹ onye ọwhu ọbu. Ọ sụhawaru whẹ: “Ọo onye onona mu l'e-jekfu je etsua ọnu gude kele iya ekele bụ onye ọwhu ọbu whẹ l'e-gude kpụta tụgbua, eche iya nche.” 45Erwurwu, Júdasu l'erwu ẹka ono, o jekfulekwawho Jisọsu je etsua ya ọnu l'asa gude kele iya ekele sụ iya: “O-zhi-iwhe!” 46Ndu ono wọchia Jisọsu, gude iya. 47Onye lanụ lẹ ndu kfụkube whẹ l'ẹka ono mịtalewho ogu-ịgba iya gbu nwohuta eze onye ishi ndu l'agbajẹ ẹja nụ Chileke, sefulekwa iya whọ nchị. 48Jisọsu sụ ndu ono, byarụ iya egude: “?Mu bụ onye l'ana nfụ ọwhu unu chịgbaa ogu-ịgba, chịru mkpụru abya mu egude? 49?Mẹ mu l'unu shikwa anọduje mbọku-mbọku l'eze-ụlo Chileke, mu ezhi unu iwhe, unu te egudekwa mu. Ọle iwhe e deru l'ẹkwo Okfu Chileke medzuje.”
50Ndu l'etso ụzo iya tụko gẹ whẹ ha parụ iya haa gbakashịhu.
51O nweru nwokorọbya lanụ ọbu l'etsole iya-a. Nwokoro ono ta adụdu iwhe o we, t'a gụfulewho ẹkwa ọcha, ọ gbakụru onwiya. Ndu ono guderu Jisọsu kpachịa ya. 52Ọ nyịkufu, parụ ẹkwa ọcha ono haa whẹ l'ẹka, gbarụ ọto gbala.
Jisọsu nọ l'iwhu ọgbo-ikpe ndu Ju
(Mát. 26:57-68; Luk. 22:54-55,63-71; Jọn. 18:13-14,19-24)
53Tọ dụ iya bụ lẹ whẹ akpụta Jisọsu kpụ-jeshiaru eze onye ishi ndu l'agbajẹ ẹja nụ Chileke. Ndu ishi ndu l'agbajẹ ẹja nụ Chileke mẹe ndu bụ ọgurenya mẹe ndu o-zhi-iwu zadzua. 54Pyita l'etso whẹ rọ l'ụzo otẹnya, tsozhia whẹ whọ nno jeye o tsoru whẹ bahụ l'ọma ogboduwhu ibe eze onye ishi ndu l'agbajẹ ẹja nụ Chileke ono. O je anọdu anọdu l'ẹka ndu nche nọ, nyalahaa ọku. 55Ndu ishi ndu l'agbajẹ ẹja nụ Chileke ono gẹ whẹ ha mẹe ndu ọgbo-ikpe l'owhu chọlahaa iwhe whẹ l'a-sụ lẹ Jisọsu meru nnta gẹ l'ee-shi t'e kpee ya nkfugbu. Tọ dụ iwhe whẹ whụru o meru. 56Whẹ dụ l'igwe gude ibo agba iya ẹka-ebe, ọle iwhe whẹ kfuru te ebukodu ishi.
57Ndu harụ gbashi dzụlahaa ejire sụ: 58“Anyịbedua gudekwa nchị anyi nụa nteke ọ sụru lẹ ya l'e-mebyishi eze-ụlo Chileke-e, bụ ẹka b'e gude tụa ya, woo l'ime abalị ẹto, ya atụa ọdo, l'abụa ẹka b'e gude tụa ya.” 59Tọ hẹkwanu m'ọo l'iwhe ono whẹ l'ekfu bukoru ishi.
60Eze onye ishi ndu l'agbajẹ ẹja nụ Chileke gbalihu l'edzudzu-ọha ono jị Jisọsu sụ iya: “?Tọ dụdu ọnu l'iiye l'ẹgube ẹka-ebe ọwaa whẹ l'agbakaa ghu ẹgube ya?”
61Ọ nọ-kirishilekwaa nwa nggujingguji, to kfu okfu. Eze onye ishi ndu l'agbajẹ ẹja nụ Chileke jị iya ọdo sụ: “?Ọo gụbedua bụ Kuráyisutu ọbu, mbụ Onye Ndzọta ọbu, Chileke kweru ụkwa iya? ?Ọo ghu bụ Nwa Chileke ọbu?”
62Jisọsu sụ iya: “Ee ọo mbẹdua bụ iya. E -megee bẹ unu l'a-whụkwa Abụbu-Ndiwhe l'ẹka ọ nọ l'ẹka-ụtara Chileke bụ iya bụ Ọkalibe-Kakọta-Ike. E -megekwaawho, unu awhụkwaa ya whọ gẹ l'oo-gude urwukpu shi l'imigwe abya.”
63Eze onye ishi ndu l'agbajẹ ẹja nụ Chileke lajashịa uwe nkiya g'ọ ha sụ: “?O zhia ẹgube ẹka-ebe gụnu ọdo bẹ whẹ l'achọkwadu? 64?Unu nụru-a ekfubyi ono, l'ookfubyishi Chileke? ?Ndẹe iwhe unu chịtaru ntaa?” Whẹ tụko nma Jisọsu ikpe sụ l'iwhe gbalẹru iya whọ bụ t'ọ nwụhu anwụhu.
65Ndu harụ vụlahaa ya ọnu-mini. Whẹ wota iwhe kechia ya ẹnya chilahaa ya iwhe asụje iya: “Kọtadaa onye chiru ghu iwhe ono.” Ndu nche kpụta iya, echije iya ẹka l'ishi-nchị.
Pyita l'agọ lẹ ya ta amadụ Jisọsu
(Mát. 26:69-75; Luk. 22:56-62; Jọn. 18:15-18,25-27)
66Ọwhube Pyita nọdukwaduro l'etezhi l'ụlo-ikpe ono, onye lanụ l'ime ụnwumgboko l'ejeru eze onye ishi ndu l'agbajẹ ẹja nụ Chileke ono ozhi bya abya. 67Ọ whụlewho Pyita l'ẹka l'ọonyata ọku, o lee ya ẹnya sụ iya: “?M'i tsokwa lẹ ndu whẹ l'onye Názaretu ono, bụ Jisọsu shi atụ ọli?”
68Pyita gọfu sụ iya: “Mu ta amakwa iwhe l'iikfu; tọ hẹ l'o doru mu ẹnya.” Pyita golihulekwawho l'ẹka ono, tụgbua je anọdu l'ọnu-ọguzo. Okọku ryalẹkwawho ọrya nteke ono.
69Nwamgbọko ono whụkwaa ya ọdo watakwa okfuru ndu kfụru lẹ mgboro ẹka ono sụ: “Nwoke-e ya lịkwa lẹ ndu l'etso ụzo Jisọsu.” 70Pyita gọfukwa ọdo.
A bya anọta nwanshị, ndu kfụru l'ẹka ono sụ Pyita: “Ba atụshi ẹgo, ị lịchaa ya-a. ?Tịi tị bụdu onye Gálili?”
71Ọ wata anọ akpọ ụrwu ekpu onwiya, erikwawho nte woo: “Mu ta amakwa nwoke ono, unu l'ekfu okfu iya ono.”
72Nteke onowho okọku ryalẹkwawho ọrya nke ugbo labọ. Pyita nyata iwhe ono Jisọsu kfujeru ono sụ lẹ tẹmenu okọku arya ọrya ugbo labọ bẹ l'ii-kfuhawanu ugbo ẹto l'ị tị madụ onye ya bụ. O rwua ya l'anụ ojii, ọ ryashịa ẹkwa.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Abakaliki Literacy and Translation Trust