Lud kar liq 16
16
Ma thed che med nged haq sax var
1Awg laq ghuhd teq pa haq Yer suq tawd par hax te mar vid lehq koz che, “Paw sa var te ghad yawd ved med nged haq sax var te ghad cawg che yaog. Med nged haq sax var u ve yawd awg sehr phad ve med nged haq kheha saw kaod te kog vehr chehd che haq su sir lehq, su awg sehr phad haq khuhq kud vid che yaog. 2Awg sehr phad yawd haq kug lehq, ‘Nawg ved awg lawn ngag gha kad che, nawg khawd-ehg kheh te cheawg le. Nawg med nged haq sax var te chehd che, cag land ngag chehd lo yug khuhq vea. Awg lawn ghod ver, yaq ni khaz nuhr ver, nawg haq med nged haq sax che mad kawq te cuha vehr che yaog,’ lehz yawd haq koz vid che yaog. 3Kheh te lehq, med nged haq sax var u ve phad yawd ved ni ma khuhn duhd che, ‘Ngag khawd-ehg te ver cawd tug lehq na. Ngag ved awg sehr phad awr lehr, ngag haq yawd ved med nged haq sax che kanx khuhn yug tuhz vehr tug yaog. Mig giaq ha kawd cad tug liz ngag te tug duhd ma tuhz. Su geh ca lawg cad-eg liz ngag yaq taw che yaog. 4Med nged haq sax che kanx khuhn su ngag haq ghaq tuhz ax ver, ngag khawd-ehg te ver, su ved yehg khuhn ngag haq su haq yug ax tug u ve ngag sir vehor,’ lehd yawd duhd che yaog. 5Yawd ved awg sehr phad geh jeg kha cawg lar che chaw te ghad peg te ghad haq yawd kug vea lehq, awg kawd maq te ghad haq koz vid che, ‘Ngag ved awg sehr phad geh nawg jeg khawd-ehg ma cawg lar hawg le,’ lehd koz na ngawx che yaog. 6‘Nag mand teq ha piz cawg lar che yaog,’ lehz kud vid che yaog. Kheh te lehq, med nged haq sax var koz vid che, ‘Nawg ved cag land haq yug vea lehq har naq mi lar lehq ngad chi piz lehax buhq keog,’ lehz koz vid che yaog. 7Kheh te peg lehq, ni ghad te ghad haq yawd kawq na lehq koz che, ‘Nawg jeg khawd-ehg ma cawg lar hawg le,’ lehd koz na che yaog. ‘Cag sir teq ha taz cawg lar che yaog,’ lehd koz vid che yaog. Kheh te lehq, med nged haq sax var koz che, ‘Nawg ved cag land yug vea lehq hex chi taz lehax buhq keog,’#16:7 Nawg ved cag land yug vea lehq hex chi taz lehax buhq keog Yawd haq cawd vid tug te che yaog. lehz yawd haq koz vid che yaog. 8Ma thed che med nged haq sax var u ve phad cud yiq yehd vix cheaq te lehq, awg sehr phad yawd haq chid muh che yaog. Awg lawn ghod ver, mig gig chaw yad teq pa awr lehr, mig gig chaw yad teq pa haq cawd daq tug te vix che awr lehr, Ghig sa ve awg ghiz yad teq pa haq keh te vix che yaog. 9Kheh te lehq, ngag nig hehd haq koz ax laq, mig gig-aq lo cawg che phu si muhd jeg haq yehd lehq awg chawd te daq lar. Awg lawn ghod ver, phu si muhd jeg u ve peg vehr khaz nuhr ver, muhd nuh kawag lo Ghig sa nawg haq haq yug ax tug yaog.
10A cehax lehax te che haq thed che chaw teq pa awr lehr, kha peh vad-ag te che haq liz te thed tug yaog. Kanx nehax khuhn te lehq ma thed che chaw teq pa awr lehr, kanx nux maz khuhn te liz ma thed tug yaog. 11Kheh te lehq, mig gig-aq lo ve phu si muhd jeg haq liz nig hehd ma thed ma cawd ver, awg cehg mag muhd nuh kawag lo ve med nged jeg kor a sug nig hehd haq chid aq ax ghag le. 12Nig hehd teq pa su ved med nged haq ma thed ma cawd ver, a sug nig hehd ve med nged nig hehd haq ca aq ax piar le.
13Awg ceg khar ve te ghad lehd ma koz, jawd mawd ni ghad ve awg ceg te maq gha hawg. Awg lawn ghod ver, te ghad haq cand ver, te ghad haq haq tug yaog. Ma hez ver, te ghad haq yawz yan ver, te ghad haq maq sawnr ma caz te tug yaog. Nig hehd liz Ghig sa ve awg ceg loar, phu si muhd jeg ve awg ceg loar teq geha te maq gha hawg,” lehd koz vid che yaog.
14Phar rir sehd teq pa awr lehr, i hehd phu si haq sex lae che chaw te lehq, tawd khuhd u ve haq gha kad che te yand, Yer suq haq i hehd koz gid ghig gid che yaog. 15Yer suq i hehd haq koz vid che, “Nig hehd awr lehr, chaw yad ve mehz khuhd suhr huh ver, a sug yawd awg ton thed che cawd che heh te liz, Ghig sa awr lehr, nig hehd ve ni ma haq sir che yaog. Awg lawn ghod ver, chaw yad tar ir che awg ceng haq awr lehr, Ghig sa ngawx bawg che yaog.
Awg lid tawd khuhd he lehq Ghig sa ve muhd mig awg lawn
16Awg lid tawd khuhd he lehq Ghig sa ve cuh kar var teq pa ve tawd khuhd awr lehr, Yod hanr ve awg coaq lehax gag che yaog. U ve khaz nuhr lag cheawg lehr, Ghig sa ve muhd mig awg lawn ha lehg che bon khuhd mar vid lehq, chaw awg gha lia muhd mig u ve khuhn biz daq caq daq gehe che yaog. 17Mig gig muhd nuh maq lug vehr paz vehr cheaq keh, awg lid tawd khuhd liq khuhn ve awg maex nehax ted mag lug vehr mehx vehr tug vawr har jad che yaog.
Awg mid ma haq chid bag che awg lawn Yer suq mar che
18A sug yawd mid ma haq chid bag lar haz lehq awg nuz awr ve yad mid haq ca he che chaw teq pa awr lehr, hax chawd hax paz te che yaog. Awg phad mawd chid bag vehr che yad mid haq ca he che chaw teq pa liz hax chawd hax paz te che yaog.
Paw sa var he lehq Lar sar ruq awg lawn
19Te pawz thad huh, paw sa var te ghad yawd awg phuhd khaz che poq sar pha awg naz miax te che haq veq lehq, ni gha lia thi cad thi dawg chehd che yaog. 20Yawd ved yehg kho ghaz mir khuh pad huh, awg ton tad laod pawd ma kox lehax te che ca lawg cad var Lar sar ruq meh che te ghad haq su taz vea lehq teh lar che yaog. 21Yawd awr lehr, paw sa var u ve cad sez dawg sez lar che teh cuh huhx uh ve cad tug ca ghawz cad gad che yaog. Phid teq pa liz yawd ved pawd ma kox haq sawz lehq chehd che yaog. 22Teq ni awr gaeg lehq, har ghuhd jad lehq lawg cad var u ve phad suh vehr che yaog. Kheh te lehq, muhd nuh maq cuh yad teq pa lag sir ve lehq, Ar brar hanr pad huh muhd nuh kawag lo chehd vid vehr che yaog. Paw sa var u ve liz suh vehr lehq, su yawd haq taz tur vehr che yaog. 23Muhd naz hoq khuhn, paw sa var u ve yawd gha tuq gha khanr jad che te yand, yawd kuhr ca chid ngawx pe lehq, Ar brar hanr he lehq Lar sar ruq ix mag vid-aq lo chehd lehq Lar sar ruq liz Ar brar hanr pad huh chehd chehd che haq yawd gha mawg che yaog. 24Kheh te lehq, yawd huh kug lehq koz che, ‘A pa Ar brar hanr-og, ngag haq a cehax har kax laoq. Ngag awr lehr, a mir che khuhn gha tuq gha khanr jad cheaq te lehq, Lar sar ruq yawd ved laq nuh med a kaz khuhn tiz ke lar haz lehq ngag ved ha lez gawg vid tug a cehax ca te pea viad laoq,’ lehd koz vid che yaog. 25Kheh te lehq Ar brar hanr kawq koz che, ‘Yad par-og, nawg teq chehd thad huh daq che awg ceng teq pa haq lehax nawg gha lehq, Lar sar ruq vawr, mad daq che awg ceng teq pa haq lehax gha che haq nawg duhd nuhd-oq. A meha chuhr huh awr lehr, yawd duhd sa gad sa che khuhn gha chehd lehq, nawg awr lehr, tuq che khanr che khuhn gha chehd che yaog. 26Lex lehq, a nig teq pa awg kanr huh lawg khoq nax maq nux cawg che yaog. Kheh te cheaq te lehq, ngag hehd chehd huh ve liz nig hehd chehd lo lag mad gag. Nig hehd chehd lo ve liz ngag hehd chehd huh lag mad gag hawg,’ lehd kawq koz vid che yaog. 27Paw sa var kawq koz che, ‘Kheh te ver, A pa-og, nawg geh ngag che kheh lawg khawx che yaog. 28Ngag nax var ngad ghad cawg ser hawg. I hehd teq pa tuq che khanr che chehd kig che ve huh maq gha lag tug, Lar sar ruq haq ngar pa yehg lo kae pe lehq i hehd haq kha nehax ca mar vid pe ser,’ lehd koz vid che yaog. 29Ar brar hanr kawq koz che, ‘I hehd geh Mod ser he lehq Ghig sa ve cuh kar var teq pa ve tawd khuhd cawg chehd che yaog. Tawd khuhd u ve teq pa haq i hehd teq pa na yug vid-oq,’ lehd koz vid che yaog. 30Paw sa var kawq koz che, ‘U vea lehax mad lawq ser hawg. A pa Ar brar hanr-og, suh lar haz lehq kawq teq tuag che te ghad i hehd chehd lo kae ver, i hehd vend bax duhd phuhz tug yaog,’ lehd koz che yaog. 31Ar brar hanr kawq koz che, ‘Mod ser he lehq Ghig sa ve cuh kar var ve tawd khuhd haq i hehd maq na yug ver, suh kig lo chaw te ghad kawq teq tuag liz, i hehd ca yonr tug ma hez,’ lehz kawq koz vid che yaog.”
Currently Selected:
Lud kar liq 16: lhiNT
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
Lud kar liq 16
16
Ma thed che med nged haq sax var
1Awg laq ghuhd teq pa haq Yer suq tawd par hax te mar vid lehq koz che, “Paw sa var te ghad yawd ved med nged haq sax var te ghad cawg che yaog. Med nged haq sax var u ve yawd awg sehr phad ve med nged haq kheha saw kaod te kog vehr chehd che haq su sir lehq, su awg sehr phad haq khuhq kud vid che yaog. 2Awg sehr phad yawd haq kug lehq, ‘Nawg ved awg lawn ngag gha kad che, nawg khawd-ehg kheh te cheawg le. Nawg med nged haq sax var te chehd che, cag land ngag chehd lo yug khuhq vea. Awg lawn ghod ver, yaq ni khaz nuhr ver, nawg haq med nged haq sax che mad kawq te cuha vehr che yaog,’ lehz yawd haq koz vid che yaog. 3Kheh te lehq, med nged haq sax var u ve phad yawd ved ni ma khuhn duhd che, ‘Ngag khawd-ehg te ver cawd tug lehq na. Ngag ved awg sehr phad awr lehr, ngag haq yawd ved med nged haq sax che kanx khuhn yug tuhz vehr tug yaog. Mig giaq ha kawd cad tug liz ngag te tug duhd ma tuhz. Su geh ca lawg cad-eg liz ngag yaq taw che yaog. 4Med nged haq sax che kanx khuhn su ngag haq ghaq tuhz ax ver, ngag khawd-ehg te ver, su ved yehg khuhn ngag haq su haq yug ax tug u ve ngag sir vehor,’ lehd yawd duhd che yaog. 5Yawd ved awg sehr phad geh jeg kha cawg lar che chaw te ghad peg te ghad haq yawd kug vea lehq, awg kawd maq te ghad haq koz vid che, ‘Ngag ved awg sehr phad geh nawg jeg khawd-ehg ma cawg lar hawg le,’ lehd koz na ngawx che yaog. 6‘Nag mand teq ha piz cawg lar che yaog,’ lehz kud vid che yaog. Kheh te lehq, med nged haq sax var koz vid che, ‘Nawg ved cag land haq yug vea lehq har naq mi lar lehq ngad chi piz lehax buhq keog,’ lehz koz vid che yaog. 7Kheh te peg lehq, ni ghad te ghad haq yawd kawq na lehq koz che, ‘Nawg jeg khawd-ehg ma cawg lar hawg le,’ lehd koz na che yaog. ‘Cag sir teq ha taz cawg lar che yaog,’ lehd koz vid che yaog. Kheh te lehq, med nged haq sax var koz che, ‘Nawg ved cag land yug vea lehq hex chi taz lehax buhq keog,’#16:7 Nawg ved cag land yug vea lehq hex chi taz lehax buhq keog Yawd haq cawd vid tug te che yaog. lehz yawd haq koz vid che yaog. 8Ma thed che med nged haq sax var u ve phad cud yiq yehd vix cheaq te lehq, awg sehr phad yawd haq chid muh che yaog. Awg lawn ghod ver, mig gig chaw yad teq pa awr lehr, mig gig chaw yad teq pa haq cawd daq tug te vix che awr lehr, Ghig sa ve awg ghiz yad teq pa haq keh te vix che yaog. 9Kheh te lehq, ngag nig hehd haq koz ax laq, mig gig-aq lo cawg che phu si muhd jeg haq yehd lehq awg chawd te daq lar. Awg lawn ghod ver, phu si muhd jeg u ve peg vehr khaz nuhr ver, muhd nuh kawag lo Ghig sa nawg haq haq yug ax tug yaog.
10A cehax lehax te che haq thed che chaw teq pa awr lehr, kha peh vad-ag te che haq liz te thed tug yaog. Kanx nehax khuhn te lehq ma thed che chaw teq pa awr lehr, kanx nux maz khuhn te liz ma thed tug yaog. 11Kheh te lehq, mig gig-aq lo ve phu si muhd jeg haq liz nig hehd ma thed ma cawd ver, awg cehg mag muhd nuh kawag lo ve med nged jeg kor a sug nig hehd haq chid aq ax ghag le. 12Nig hehd teq pa su ved med nged haq ma thed ma cawd ver, a sug nig hehd ve med nged nig hehd haq ca aq ax piar le.
13Awg ceg khar ve te ghad lehd ma koz, jawd mawd ni ghad ve awg ceg te maq gha hawg. Awg lawn ghod ver, te ghad haq cand ver, te ghad haq haq tug yaog. Ma hez ver, te ghad haq yawz yan ver, te ghad haq maq sawnr ma caz te tug yaog. Nig hehd liz Ghig sa ve awg ceg loar, phu si muhd jeg ve awg ceg loar teq geha te maq gha hawg,” lehd koz vid che yaog.
14Phar rir sehd teq pa awr lehr, i hehd phu si haq sex lae che chaw te lehq, tawd khuhd u ve haq gha kad che te yand, Yer suq haq i hehd koz gid ghig gid che yaog. 15Yer suq i hehd haq koz vid che, “Nig hehd awr lehr, chaw yad ve mehz khuhd suhr huh ver, a sug yawd awg ton thed che cawd che heh te liz, Ghig sa awr lehr, nig hehd ve ni ma haq sir che yaog. Awg lawn ghod ver, chaw yad tar ir che awg ceng haq awr lehr, Ghig sa ngawx bawg che yaog.
Awg lid tawd khuhd he lehq Ghig sa ve muhd mig awg lawn
16Awg lid tawd khuhd he lehq Ghig sa ve cuh kar var teq pa ve tawd khuhd awr lehr, Yod hanr ve awg coaq lehax gag che yaog. U ve khaz nuhr lag cheawg lehr, Ghig sa ve muhd mig awg lawn ha lehg che bon khuhd mar vid lehq, chaw awg gha lia muhd mig u ve khuhn biz daq caq daq gehe che yaog. 17Mig gig muhd nuh maq lug vehr paz vehr cheaq keh, awg lid tawd khuhd liq khuhn ve awg maex nehax ted mag lug vehr mehx vehr tug vawr har jad che yaog.
Awg mid ma haq chid bag che awg lawn Yer suq mar che
18A sug yawd mid ma haq chid bag lar haz lehq awg nuz awr ve yad mid haq ca he che chaw teq pa awr lehr, hax chawd hax paz te che yaog. Awg phad mawd chid bag vehr che yad mid haq ca he che chaw teq pa liz hax chawd hax paz te che yaog.
Paw sa var he lehq Lar sar ruq awg lawn
19Te pawz thad huh, paw sa var te ghad yawd awg phuhd khaz che poq sar pha awg naz miax te che haq veq lehq, ni gha lia thi cad thi dawg chehd che yaog. 20Yawd ved yehg kho ghaz mir khuh pad huh, awg ton tad laod pawd ma kox lehax te che ca lawg cad var Lar sar ruq meh che te ghad haq su taz vea lehq teh lar che yaog. 21Yawd awr lehr, paw sa var u ve cad sez dawg sez lar che teh cuh huhx uh ve cad tug ca ghawz cad gad che yaog. Phid teq pa liz yawd ved pawd ma kox haq sawz lehq chehd che yaog. 22Teq ni awr gaeg lehq, har ghuhd jad lehq lawg cad var u ve phad suh vehr che yaog. Kheh te lehq, muhd nuh maq cuh yad teq pa lag sir ve lehq, Ar brar hanr pad huh muhd nuh kawag lo chehd vid vehr che yaog. Paw sa var u ve liz suh vehr lehq, su yawd haq taz tur vehr che yaog. 23Muhd naz hoq khuhn, paw sa var u ve yawd gha tuq gha khanr jad che te yand, yawd kuhr ca chid ngawx pe lehq, Ar brar hanr he lehq Lar sar ruq ix mag vid-aq lo chehd lehq Lar sar ruq liz Ar brar hanr pad huh chehd chehd che haq yawd gha mawg che yaog. 24Kheh te lehq, yawd huh kug lehq koz che, ‘A pa Ar brar hanr-og, ngag haq a cehax har kax laoq. Ngag awr lehr, a mir che khuhn gha tuq gha khanr jad cheaq te lehq, Lar sar ruq yawd ved laq nuh med a kaz khuhn tiz ke lar haz lehq ngag ved ha lez gawg vid tug a cehax ca te pea viad laoq,’ lehd koz vid che yaog. 25Kheh te lehq Ar brar hanr kawq koz che, ‘Yad par-og, nawg teq chehd thad huh daq che awg ceng teq pa haq lehax nawg gha lehq, Lar sar ruq vawr, mad daq che awg ceng teq pa haq lehax gha che haq nawg duhd nuhd-oq. A meha chuhr huh awr lehr, yawd duhd sa gad sa che khuhn gha chehd lehq, nawg awr lehr, tuq che khanr che khuhn gha chehd che yaog. 26Lex lehq, a nig teq pa awg kanr huh lawg khoq nax maq nux cawg che yaog. Kheh te cheaq te lehq, ngag hehd chehd huh ve liz nig hehd chehd lo lag mad gag. Nig hehd chehd lo ve liz ngag hehd chehd huh lag mad gag hawg,’ lehd kawq koz vid che yaog. 27Paw sa var kawq koz che, ‘Kheh te ver, A pa-og, nawg geh ngag che kheh lawg khawx che yaog. 28Ngag nax var ngad ghad cawg ser hawg. I hehd teq pa tuq che khanr che chehd kig che ve huh maq gha lag tug, Lar sar ruq haq ngar pa yehg lo kae pe lehq i hehd haq kha nehax ca mar vid pe ser,’ lehd koz vid che yaog. 29Ar brar hanr kawq koz che, ‘I hehd geh Mod ser he lehq Ghig sa ve cuh kar var teq pa ve tawd khuhd cawg chehd che yaog. Tawd khuhd u ve teq pa haq i hehd teq pa na yug vid-oq,’ lehd koz vid che yaog. 30Paw sa var kawq koz che, ‘U vea lehax mad lawq ser hawg. A pa Ar brar hanr-og, suh lar haz lehq kawq teq tuag che te ghad i hehd chehd lo kae ver, i hehd vend bax duhd phuhz tug yaog,’ lehd koz che yaog. 31Ar brar hanr kawq koz che, ‘Mod ser he lehq Ghig sa ve cuh kar var ve tawd khuhd haq i hehd maq na yug ver, suh kig lo chaw te ghad kawq teq tuag liz, i hehd ca yonr tug ma hez,’ lehz kawq koz vid che yaog.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.