Lud kar liq 21

Meh chuhd ma phu tand ke che

1Yer suq kuhr chid ngawx lehq bon yehg khuhn phu tand ke kig huh paw sa che chaw teq pa phu tand ke chehd che haq mawg che yaog. 2Har ghuhd jad che meh chuhd ma te ghad pehq sanr nid pehq ke che haq liz yawd gha mawg che yaog. 3Kheh te lehq yawd koz che, “Ngag nig hehd haq awg cehg mag koz ax laq, har ghuhd che meh chuhd ma che te ghad awr lehr, suaq keh ke mad che yaog. 4Awg lawn ghod ver, su teq pa vawr cad lex yehd lex che teq pa yug vea ke che yaog. Kheh ma khuhd, yad mid che te ghad awr lehr, har ghuhd jad che khuhn yawd a saq hu tug teh lar che awg gha lia haq saw yug tuhz lehq ke vehr che yaog,” lehd koz che yaog.

Yer ruq sar lehr bon yehg nux gha lug tug awg lawn Yer suq koz vid che

5Yer ruq sar lehnr bon yehg nux u ve haq daq jad ngawx sa jad che huhx meh sir haq yug te lehq tand tug med nged awg ceng yug tand che awg lawn haq chaw ted pehg koz daq che te yand Yer suq koz che, 6“Nig hehd gha mawg chehd che che teq pa awr lehr, huhx meh ted dig awg thang ted dig mad cawg gha thad kha gag lug vehr sez vehr tug awg ni gag tug yaog,” lehd koz vid che yaog.

7I hehd teq pa kawq koz che, “Sar lar-og, Yer ruq sar lehr bon yehg nux u ve lug vehr lehd te ver, awg ceng u ve teq pa khar thad phehaq lawg le. Phehaq lehd te ver, a thoq awg hez tuhaz lawg le,” lehd koz na ngawx che yaog.

8Yer suq i hehd haq kawq koz vid che, “Su nig hehd haq pha yax maq gha te tug, sa tiq teo. Awg lawn ghod ver, chaw mad awr ve ngag ved awg meh haq puhd vea lehq, ‘Ngag awr lehr, yawd yaog.’ ‘Awg yand gag vehr tez-or,’ lehd koz tug yaog. I hehd koz che khaz nuhr tad ghaeq. 9Nig hehd teq pa maq bawz che he lehq muhd mig khuhn phuhz daq che awg lawn haq gha kad che te yand ta kuhz. Awg lawn ghod ver, awg ceng che ve teq pa awg kawd gha kex-ag ser tug yaog. Kheh ma khuhd, teq pear lehax awg leh med mad gag ser hawg,” lehd koz che yaog.

Awg leh med gag vehr lehd te che awg hez

10Kheh te lehq, yawd i hehd teq pa haq kawq koz vid che, “Chaw ceng ted ceng he lehq ted ceng, muhd mig te pez he lehq te pez yaq daq jiz daq tug yaog. 11Mig hax ceh nux hiz lehq, meq che kaz che he lehq a nar nag beg nux teq pa cawag tug yaog. Muhd nuh kawag lo kuhz tug ir jad che awg ceng he lehq awg hez teq pa tuhaz tug yaog. 12Kheh ma khuhd, awg ceng che ve teq pa maq kex-ag ser huh, su nawg haq pheh yug lehq tuq khanr cuha tug yaog. Bon lawg kig awg khuhn liz su nawg haq kug na kug jehg lehq, thawnr yehg teq pa khuhn liz su nawg haq yug ke huh tug yaog. Ngag ved awg meh haq te lehq, muhd mig phawd awr ve awg hox awg nax jawd mawd teq pa ve mehz khuhd suhr lo liz su nig hehd haq sir ve kae tug yaog. 13Awg ceng che teq pa haq nawg gha khanr che vawr, ngag awg lawn nawg sax khiz gha khanr tug awg pun te che yaog. 14Kheh te cheaq te lehq, nig hehd khawd-ehg kheh gha te gha koz tug ghod che haq ca duhd ngawx lar tug maq lor hawg. 15Awg lawn ghod ver, nig hehd ve cand par teq pa awg gha lia tawr ma ghad lehq yaw khuhq maq gha lawq lawq te che tawd khuhd he lehq cud yiq ngag nig hehd haq pehar tug yaog. 16A ye a pa, a vix a nax, awg ceng awg khad he lehq awg chawd awg paz teq pa thad kha gag liz, nig hehd haq kawq phuhz tug yaog. I hehd teq pa nig hehd ted pehg pehar haq liz dawz vehr tug yaog. 17Ngag ved awg meh haq te lehq, su nig hehd haq cand jad tug yaog. 18Kheh ma khuhd, nig hehd a koar ve cuhz kheh muh nehax ted maer liz maq gha te lug vid hawg. 19Nig hehd ve ni ma yeg khanr vix cheaq te lehq, nig hehd ve co ha gha teq tug yaog.

Yer ruq sar lehnr med lug vehr tug awg lawn Yer suq koz che

20Yer ruq sar lehnr med haq maq mor nux kha caw yuhd lag hoz vehr che haq nig hehd gha mawg che te yand, med u ve lug vehr lehd te cheaq nig hehd sior. 21Awg yand u ve khuhn, Yud daq muhd mig awg khuhn chehd che chaw teq pa kehaq lo phawe lor. Med khuhn chehd che chaw teq pa med khuhn tuhez lor. Med bag lo chehd che chaw teq pa med khuhn tad kawq gehe mehr. 22Awg lawn ghod ver, Liq phu khuhn kha buhq lar che awg ceng saw phehaq tug, cir yanr che awg ni awg hax gaeg che yaog. 23Awg yand u ve khuhn, yad mid yad hu chehd che he lehq chaw yad nehax cux pehz nux chehd che chaw teq pa awr lehr, gha lug gha sez jad tug yaog. Awg lawn ghod ver, mig gig che thag lo duhd har gad har jad tug yaog. Yud daq chaw ted ceng haq Ghig sa nez nag lehq cir yanr che yaog. 24I hehd teq pa awr lehr, a teh chuh vehr cheaq gha khanr tug yaog. Su i hehd haq pheh yug ve lehq muhd mig awg gha lia khuhn awg ceg te vid tug yaog. Lawd kir yad teq pa awr lehr, i hehd ve awg yand peg thad kha gag, Yer ruq sar lehnr med haq naz kix lar tug yaog.

Chaw yad ve Yad phu kawq yaq che

25Awg yand u ve khuhn, muhd ni, har pa, muhd ki sir teq pa khuhn awg hez tuhaz tug yaog. Lad chuhd ghig he lehq ghig bad teq pa awg khuhd buhg hehnd jad lehq, chaw ceng chaw yad teq pa and jad lehq duhd har gad har jad tug yaog. 26Chaw yad teq pa awr lehr, mig gig khod-aq lo phehaq tug awg ceng teq pa haq duhd ngawx che te yand, kuhz jad cheaq te lehq ma nuhd maq theh phehq vehr tug yaog. Awg lawn ghod ver, muhd nuh kawag lo kand pax cawg che awg ceng teq pa liz, hiz hiz nad nad phehq vehr tug yaog. 27#Dyl 7:13U thad gaeg ver, chaw yad ve Yad phu awr lehr, awg mig awg phond he lehq kand pax ir che khuhn mog khuhn yaq che haq i hehd gha mawg tug yaog. 28Awg ceng u ve teq pa tanr teag lehd te che te yand, nig hehd tu lehq kuhr chid ngawx-oq. Awg lawn ghod ver, nig hehd haq thaer khuhq ax tug awg yand gag vehr tez che yaog,” lehd koz che yaog.

Yer ruq sar lehnr med lug vehr tug awg lawn Yer suq te pawz kawq koz che

29Yawd i hehd haq tawd par hax te mar vid lehq koz che, “A kud cehg he lehq suhz cehg teq pa haq ngawx-oq. 30Awg car car-ag che te yand, muhd god yand gag vehr tez che haq nig hehd khad nawad duhd sir duhd mawg chehd che yaog. 31U ve haq kha sur suar, awg ceng che teq pa phehaq chehd che haq nig hehd gha mawg che te yand, Ghig sa ve muhd mig awr lehr, awg pad huh lag vehr che haq nig hehd sior.

32Ngag nig hehd haq awg cehg mag koz ax laq, chaw che te coaq ve mad pong veh ser huh, awg ceng che teq pa awg gha lia#21:32 awg ceng che teq pa awg gha lia Yer ruq sar lehr med he lehq Yer ruq sar lehr bon yehg nux gha lug tug awg lawn. phehaq tug yaog. 33Muhd nuh maq he lehq mig naz ma saw mehx vehr tug yaog. Kheh ma khuhd, ngag ved tawd khuhd awr lehr, mehx maq gha hawg.

Khar thad liz sa tiq te tug Yer suq koz che

34Nig hehd teq pa a sug yawd awg ton haq sa tiq kha nehax teo. Sa tiq kha nehax maq te ver, cad pong cad lex lehq, juhg dawg sar cad lehq juhg buhz juhg ka lehq mig gig khod-aq duhd har gad har tug teq pa haq lehax duhd har chehd ver, awg ni awg yand u ve ngaz va yaw heh te lehq, nig hehd mad juhg ma khehz te chehd-ag huh, nig hehd haq yaw tug yaog. 35Awg lawn ghod ver, awg ni u ve awr lehr, mig gig khod-aq chehd che chaw awg gha lia geh saw gag tug yaog. 36Kheh te lehq, phehaq tug awg ceng u ve awg gha lia haq nig hehd gha pong lehq, chaw yad ve Yad phu mehz khuhd suhr lo hox yeg chehd tug khar thad liz bon lawg lehq law laor,” lehd koz che yaog. 37Yer suq awr lehr, muhd kaw ver, ni gha lia Yer ruq sar lehnr bon yehg nux lo mar vid lar haz lehq, muhd phiq ver, hax gha lia Sar lonr kehaq lo ca hax-eg che yaog. 38Su teq pa liz, yawd mar che tawd khuhd haq na tug, muhd sawx ted naq loar, Yer ruq sar lehnr bon yehg nux khuhn yawd chehd lo phoz lag che yaog.

Currently Selected:

Lud kar liq 21: lhiNT

Highlight

Copy