Lizsij dih Gaihcij 15
15
Cangqdiq caiq doiqyungz gangj gij baujcingq gaxgonq
1Goq gienh saeh neix le, Yaqbwzlanz lujnaeuz fangxngwnz yienghmwnq dingqri Yehhozvaz doiq de naeuz: “Yaqbwzlanz, mwngz gaejyungh lau; gou dangq baj doenqbaiz#15:1 Baj doenqbaiz couh dwg gij vunz gujdaiq doxhoenx aeu ma dangj youq dangqnaj ndaej dangj fag giemq he. mwngz, dangj youq dangqnaj mwngz ndaej baujhuq mwngz, caemh ij nyok hawj mwngz haujlai haujlai hwj.”
2Hoeng Yaqbwzlanz han naeuz: “Ceiq miz gienz dih Yehhozvaz hax! Gou daiq lwg cungj mbouj miz haem; mwngz ij nyok hawj gou guxmaz nex? Baezneix gij gyadangq gou cungj dwg ngaiz boux youq ndaw ranz gou Hijliqhijseq, vunz Daqmajswqgwz Singz, ciep aeu he lah.” 3Yaqbwzlanz caiq naeuz: “Mwngz cungj mij hawj gou miz saek daeglwg haem, fanjcingq baezneix vanzlij dwg bouxhoiq youq ndaw ranz gou seng he ndaej ciep aeu gij gyadangq gou lah.”
4Gajlaeng Yehhozvaz caiq doiq de naeuz: “Mij dwg law, boux mwnq mbouj ndaej ciep aeu gij gyadangq mwngz nej; ij dwg daeglwg mwngz caenseng he cij ndaej ciep aeu gij gyadangq mwngz lah.” 5Yehhozvaz gangj daengz mwnqneix le, couh daiq Yaqbwzlanz ok rog bae, doiq de naeuz: “Hawjm'z muenghmuengh yawj gwnzmbwn lux, gij ndaundeiq gwnzmbwn bijhuzcih bae; mwngz geq ndaej liux haz?” De vanzlij naeuz: “Doengh daih gajlaeng mwngz baezneix caemh ij luj gij ndaundeiq gwnzmbwn yienghmwnq bijhuzcih bae, geq cungj geq mbouj rox liux.”
6Yaqbwzlanz dingq daengz doenghgij vah neix le, couh sinq Yehhozvaz lo, yiengq Yehhozvaz couh yawj Yaqbwzlanz suenq boux hab'eiq habhoz de dih vunz hih lo.
7Yehhozvaz vanzlij caiq doiq de naeuz: “Gou dwg Yehhozvaz; gou daiq mwngz daj mwnq Gyahlwzdij dih Uzwj mwnq dieg mwnq daeuj daengz dineix, couh dwg ij dawz gij dieg neix nyok hawj mwngz, hawj mwngz aeu ma guh gij gyadangq mwngz.”
8Hoeng, Yaqbwzlanz dauq cam naeuz: “Ceiq miz gienz dih Yehhozvaz hax, gou ij baenzlawz rox gou ij ndaej gij dieg neix nej?”
9Yehhozvaz dingq de yienghneix cam de le, couh raengq de naeuz: “Mwngz couh aeu duz cwzcoh ndaej sam bi he, duz yiengzbyacoh ndaej sam bi he, duz menzyiengzdaeg ndaej sam bi he, duz roegraeu he caeuq duz roegguqgaplwg he daeuj laeng gou dineix.” 10Gajlaeng Yaqbwzlanz caemh ciuq Yehhozvaz raengq hih yienghmwnq dawz doengh duz neix bae lo, dawz bae buq faen song mbiengj hwj, mbiengj caeuq mbiengj doxdoiq baij ndei. Cawz duz roeg mbouj buq, sojmiz hih cungj buq liux lo. 11Sawqmwh miz roegga mbin roengzdaeuj, ndwn youq gij noh doengh duz buq faen song mbiengj mwnq. Yaqbwzlanz raen le, couh aux doengh duz de deuz.
12Yiengq daengz gyangjngoenz ijvanh doek mwhde, Yaqbwzlanz couh ralaep ndaek fwjfwq lo. Sawqmwh lujnaeuz miz ndaek cungj laep saengxsaengx hawj vunz roxnginh yum he guem youq gwnz ndang Yaqbwzlanz. 13Couh youq mwhneix, Yehhozvaz couh doiq Yaqbwzlanz naeuz: “Mwngz ijaeu rox, doengh daih gajlaeng mwngz ij ngaiz doz youq vaihdieg youq, caemh ij ngaiz guh hoiq gij vunz dieg mwnq, caemh ngaiz gij vunz dieg mwnq yawj mbouj hwnj, souh haemz souh hoj baenx seiqbak bi. 14Hoeng, gou gaengjdingq ij fad, fad gij vunz dieg mwnq hawj gyoengqde guh hoiq hih; doengh daih gajlaeng mwngz gaengjdingq ndaej daiq baenx haujlai haujlai cienzcaiz daj mwnq okma. 15Mwngz nej, mwngz gaengjdingq ndaej souhyienz raixcaix, caemh dwg bingzbingz an'an rai gvaqseiq. 16Doenghgij lwglwg lanlan mwngz, daengz daixseiq daih, couh dwg naeuz goq seiqbak bi le,#15:16 Mwhde itbak bi suenq it daih. cij ndaej dauq ma daengz dieg neix, aenvih daengz mwhmwnq, dieg neix dih Yaqmohliq vunz, gyoengqde guh hih doenghgij doegdoeg siebsieb he cij muenxbouh, gou cij fad gyoengqde.”
17Gyangjngoenz doek le, mbwn laep cupcup liux. Sawqmwh, miz ndaek aen luzfeiz oenq ngaujngauq he caeuq foekfeiz dawz yiegyieg he dajlwh cungqgyan gij noh baij doxdoiq mwnq goq bae. 18Couh youq mwhneix, Yehhozvaz youq mwnq doiq Yaqbwzlanz baujcingq naeuz: “Gou dawz mwnq dieg neix nyok hawj doengh daih gajlaeng mwngz, couh dwg dajlwh diuz dah Ngaihgiz#15:18 Cixnaeuz: dajlwh Ngaihgiz dih benhgingj itcig daengz diuz dah Youqfazlahdij, 19daiqlienz gij dieg gij vunz Gihniz cuz hah, gij dieg gij vunz Gihnizsij cuz hah, gij dieg gij vunz Gyazmohniz cuz hah, 20gij dieg gij vunz Hwz cuz hah, gij dieg gij vunz Bijliqsij cuz hah, gij dieg gij vunz Liqfazyimh cuz hah, 21gij dieg gij vunz Yaqmohliq cuz hah, gij dieg gij vunz Gyahnamz cuz hah, gij dieg gij vunz Gwzgyahsaj cuz caeuq gij dieg gij vunz Yehbuqswh cuz hah, cungj nyok hawj liux.”
Currently Selected:
Lizsij dih Gaihcij 15: YBNT
Highlight
Share
Copy
Want to have your highlights saved across all your devices? Sign up or sign in
© New Bridge Publishing Company Limited
