San Juan 1

Jesús nduuꞌ Tu̱ꞌu̱n Ndiosí, te̱ ni̱ ki̱xi̱n a̱ i̱i̱n yivi̱ꞌ

1Ña̱ nu̱uꞌ kii̱ꞌ tïa̱ꞌan ko̱o̱ i̱i̱n yivi̱ꞌ ndii, xa̱ yoo ña̱ nduuꞌ Tu̱ꞌu̱n, te̱ Tu̱ꞌu̱n ja̱a̱nꞌ kanduꞌu̱ꞌ miiꞌ yoo Ndiosí, te̱ ña̱ ja̱a̱nꞌ nduuꞌ Ndiosí. 2Te̱ nde̱e̱ ña̱ nu̱uꞌ ni̱ ka̱nduꞌu̱ꞌ ña̱ ja̱a̱nꞌ miiꞌ yoo Ndiosí. 3Xiinꞌ nda̱ꞌaꞌ ña̱ ja̱a̱nꞌ ni̱ xa̱ꞌa̱ Ndiosí sa̱kuuꞌ ña̱ꞌa̱, te̱ nde̱e̱ i̱i̱n ña̱ yoo kö̱o̱ꞌ naaꞌ nï̱ xa̱ꞌa̱ ña̱ꞌaꞌ ña̱ ja̱a̱nꞌ. 4Ña̱ ja̱a̱nꞌ nduuꞌ xaꞌndu̱ kivi̱ꞌ ñu̱u̱, te̱ ña̱ taxiꞌ kivi̱ꞌ ñu̱u̱ ja̱a̱nꞌ nduuꞌ ñuꞌu̱ ña̱ niaꞌá i̱chiꞌ Ndiosí nuu̱ꞌ ne̱ yivi̱ꞌ. 5Te̱ ñuꞌu̱ ja̱a̱nꞌ yiꞌé miiꞌ i̱i̱n yaví, te̱ ña̱ i̱i̱n yaví ja̱a̱nꞌ ndii, kö̱o̱ꞌ chukuuꞌ a̱ nda̱ꞌva̱ ña̱ꞌaꞌ a̱.

6Ni̱ ti̱ꞌviꞌ Ndiosí i̱i̱n te̱ yivi̱ꞌ, te̱ ni̱ na̱niꞌ Juan, 7te̱ ndi̱e̱e̱ yu̱ꞌuꞌ ra̱ xaꞌa̱ꞌ ñuꞌu̱ ja̱a̱nꞌ, te̱ i̱ni̱ sa̱kuuꞌ ne̱ yivi̱ꞌ ku̱ni̱ ña̱ꞌaꞌ ni̱a̱. 8Nï̱ nduu̱ꞌ Juan ja̱a̱nꞌ ñuꞌu̱ ja̱a̱nꞌ, süu̱ꞌ ja̱a̱nꞌ ndii ni̱ ki̱xi̱n ra̱ te̱ ndi̱e̱e̱ yu̱ꞌuꞌ ra̱ xaꞌa̱ꞌ ñuꞌu̱ ja̱a̱nꞌ kui̱ti̱ꞌ. 9Te̱ ña̱ nduuꞌ ñuꞌu̱ ndi̱xa̱, ña̱ yiꞌé nuu̱ꞌ sa̱kuuꞌ ne̱ yivi̱ꞌ ndii, xa̱ kua̱xi̱ a̱ i̱i̱n yivi̱ꞌ. 10Ña̱ ja̱a̱nꞌ ndii, ni̱ xika̱ a̱ i̱i̱n yivi̱ꞌ, te̱ ne̱ yivi̱ꞌ, ne̱ nduuꞌ kuenta i̱i̱n yivi̱ꞌ ndii, nï̱ na̱ku̱ni̱ ña̱ꞌaꞌ ni̱a̱, tee̱ꞌ ndee xiinꞌ nda̱ꞌaꞌ a̱ ni̱ xa̱ꞌa̱ Ndiosí i̱i̱n yivi̱ꞌ. 11Ni̱ ki̱xi̱n a̱ miiꞌ ndieeꞌ ne̱ i̱i̱n kuuꞌ xiinꞌ a̱, ndisu̱ nï̱ na̱ti̱i̱n ña̱ꞌaꞌ ni̱a̱. 12Ndisu̱ sa̱kuuꞌ ne̱ ni̱ na̱ti̱i̱n ña̱ꞌaꞌ, te̱ i̱ni̱ tu̱ ni̱a̱ xini ña̱ꞌaꞌ ni̱a̱ ndii, ni̱ ta̱xi̱ a̱ ndi̱e̱e̱ꞌ ni̱a̱ te̱ nduuꞌ ni̱a̱ siꞌe̱ Ndiosí. 13Ne̱ ja̱a̱nꞌ ndii, ndüuꞌ ni̱a̱ siꞌe̱ Ndiosí xaꞌa̱ꞌ a̱ ña̱ nduuꞌ ni̱a̱ siꞌe̱ ne̱ i̱chiꞌ ya̱taꞌ ni̱a̱, ni̱ nde̱e̱ süu̱ꞌ xaꞌa̱ꞌ a̱ ña̱ ni̱ na̱ka̱siꞌ i̱i̱nꞌ ne̱ yivi̱ꞌ, ni̱ nde̱e̱ süu̱ꞌ xaꞌa̱ꞌ a̱ ña̱ sa̱kanꞌ ni̱ kaꞌa̱n nimá te̱ yivi̱ꞌ. Süu̱ꞌ ja̱a̱nꞌ ndii nduuꞌ ni̱a̱ siꞌe̱ a̱ xaꞌa̱ꞌ a̱ ña̱ sa̱kanꞌ ni̱ kuni̱ mi̱iꞌ Ndiosí. 14Te̱ ña̱ nduuꞌ Tu̱ꞌu̱n ja̱a̱nꞌ ndii, ni̱ na̱ndu̱u̱ a̱ i̱i̱n te̱ yivi̱ꞌ, te̱ ni̱ nduꞌu̱ꞌ a̱ te̱i̱n e̱ꞌ. Te̱ ni̱ xi̱ni̱ ndu̱ ña̱ kaꞌnuꞌ va̱ ña̱ nduuꞌ a̱, te̱ xiinꞌ a̱ ja̱a̱nꞌ ni̱ niaꞌa̱ a̱ ña̱ su̱vi̱ xna̱ꞌa̱ a̱ nduuꞌ ña̱ i̱i̱n nda̱a̱ꞌ tilu̱ꞌ siꞌe̱ Ndiosí. Te̱ ni̱ ku̱miꞌ tu̱ a̱ kuaꞌa̱ꞌ va̱ ña̱ kundani̱ a̱ ne̱ yivi̱ꞌ, te̱ sa̱kanꞌ tu̱ ni̱ niaꞌa̱ a̱ ña̱ ndi̱xa̱ xaꞌa̱ꞌ Ndiosí. 15Juan ndii, ni̱ ndi̱e̱e̱ yu̱ꞌuꞌ tu̱ te̱ ja̱a̱nꞌ xaꞌa̱ꞌ ña̱ ja̱a̱nꞌ kaꞌán tiꞌeꞌ ra̱ ndii:

―Xaꞌa̱ꞌ ña̱ kaa̱ꞌ ni̱ kaꞌa̱n i̱ kii̱ꞌ ni̱ kaꞌa̱n i̱ xiinꞌ ndo̱ꞌ ndii: “Ña̱ kua̱xi̱ xata̱ꞌ i̱ nduuꞌ ña̱ kaꞌnuꞌ ka̱ te̱ sa̱kanꞌ yuꞌu̱, sa̱kanꞌ ña̱ xa̱ yoo a̱ nde̱e̱ kii̱ꞌ tïa̱ꞌan tuvi̱ yuꞌu̱” ―ni̱ kachi̱ ra̱.

16Te̱ xaꞌa̱ꞌ a̱ ña̱ kumiꞌ a̱ sa̱kuuꞌ ña̱ ndi̱e̱eꞌ ja̱a̱nꞌ ndii, nda̱ꞌaꞌ a̱ natiinꞌ sa̱kuuꞌ yooꞌ ña̱ xamaníꞌ va̱ꞌa̱ ka̱ vi̱ꞌ vi̱ti̱n. 17Kua̱chi̱ ndii nda̱ꞌaꞌ Moisés ni̱ sa̱yaꞌá Ndiosí tu̱ꞌu̱n nde̱iꞌ a̱ nuu̱ꞌ e̱ꞌ, ndisu̱ nda̱ꞌaꞌ Jesús ni̱ na̱ti̱i̱n e̱ꞌ ña̱ xamaníꞌ va̱ꞌa̱ ka̱, te̱ ni̱ na̱ti̱i̱n tu̱ e̱ꞌ ña̱ ku̱nda̱ni̱ e̱ꞌ ña̱ ndi̱xa̱ xaꞌa̱ꞌ mi̱iꞌ a̱. 18Nde̱e̱ i̱i̱n kivi̱ꞌ tïa̱ꞌan ku̱ni̱ nuu̱ꞌ nde̱e̱ i̱i̱n ne̱ yivi̱ꞌ Ndiosí, ndisu̱ ña̱ i̱i̱n nda̱a̱ꞌ tilu̱ꞌ siꞌe̱ a̱, ña̱ i̱i̱n nda̱a̱ꞌ ña̱ yooꞌ xiinꞌ a̱ ja̱a̱nꞌ, nduuꞌ ña̱ ni̱ niaꞌa̱ nuu̱ꞌ e̱ꞌ sa̱a̱ kuuꞌ yu̱vaꞌ e̱ꞌ Ndiosí.

So̱ꞌo̱ ni̱ xa̱a̱ a̱ kii̱ꞌ ni̱ ndi̱e̱e̱ yu̱ꞌuꞌ Juan, te̱ ni̱ sa̱kuchiꞌ ne̱ yivi̱ꞌ kuenta Ndiosí, xaꞌa̱ꞌ Jesús

(Mt. 3:11-12; Mr. 1:7-8; Lc. 3:15-17)

19Ña̱ yo̱ꞌo̱ꞌ nduuꞌ ña̱ ni̱ ndi̱e̱e̱ yu̱ꞌuꞌ Juan ja̱a̱nꞌ kii̱ꞌ ni̱ ti̱ꞌviꞌ te̱ judío kuuꞌ nu̱uꞌ nde̱e̱ ñu̱u̱ Jerusalén sa̱va̱ sutu̱ xiinꞌ sa̱va̱ te̱ Levita, te̱ xachuunꞌ tu̱ ti̱xi̱n yu̱kunꞌ kaꞌnuꞌ, te̱ nda̱tuꞌu̱nꞌ ra̱ Juan ja̱a̱nꞌ ndii:

―¿Ndee nuu̱ꞌ chu̱u̱n ndisoꞌ yoꞌó? ―ni̱ kachi̱ ra̱.

20Te̱ Juan ja̱a̱nꞌ ndii, nï̱ ti̱a̱si̱ yu̱ꞌuꞌ ra̱, süu̱ꞌ ja̱a̱nꞌ ndii ni̱ ndi̱e̱e̱ yu̱ꞌuꞌ nda̱ku ra̱ kaꞌán ra̱ ndii:

―Süu̱ꞌ yuꞌu̱ nduuꞌ Cristo tianu̱ꞌ Ndiosí sa̱kakú yooꞌ ―ni̱ kachi̱ ra̱.

21Te̱ ni̱ nda̱tuꞌu̱nꞌ tu̱ku̱u̱ ña̱ꞌaꞌ ra̱ ndii:

―¿Nde̱e̱ nuu̱ꞌ chu̱u̱n ndisoꞌ u̱nꞌ na sa̱kanꞌ? ¿Ñáá Elías nduuꞌ u̱nꞌ? ―ni̱ kachi̱ ra̱.

Te̱ ni̱ na̱kui̱i̱n Juan ndii:

―Üꞌu̱nꞌ, sü̱vi̱ i̱ ―ni̱ kachi̱ ra̱.

Te̱ ni̱ nda̱tuꞌu̱nꞌ tukuuꞌ ña̱ꞌaꞌ ra̱ ndii:

―¿Ñáá te̱ kaꞌán tiakú tu̱ꞌu̱n Ndiosí, te̱ ndiatuꞌ e̱ꞌ, nduuꞌ u̱nꞌ? ―ni̱ kachi̱ ra̱.

Te̱ ni̱ na̱kui̱i̱n ra̱ ndii:

―Sü̱vi̱ i̱ ―ni̱ kachi̱ ra̱.

22Te̱ ni̱ nda̱tuꞌu̱nꞌ ka̱ ña̱ꞌaꞌ ra̱ ndii:

―¿Ndee nuu̱ꞌ chu̱u̱n ndisoꞌ u̱nꞌ na sa̱kanꞌ? Kaꞌa̱n u̱nꞌ xiinꞌ ndu̱, te̱ ku̱vi̱ na̱ta̱xi̱ ndu̱ kuento nuu̱ꞌ te̱ ni̱ ti̱ꞌviꞌ nduꞌu̱. ¿Ndee ña̱ kaꞌán u̱nꞌ xaꞌa̱ꞌ mi̱iꞌ u̱nꞌ? ―ni̱ kachi̱ ra̱.

23Te̱ ni̱ na̱kui̱i̱n Juan ja̱a̱nꞌ nuu̱ꞌ ra̱ ndii:

―Yuꞌu̱ nduuꞌ te̱ kaꞌán tiꞌeꞌ miiꞌ i̱chiꞌ kaaꞌ ndii: “Nda̱sa̱nda̱ku ndo̱ꞌ i̱chiꞌ miiꞌ ki̱xi̱n xto̱ꞌo̱ e̱ꞌ”, sa̱a̱ niiꞌ ni̱ kaꞌa̱n Isaías, te̱ ni̱ kaꞌa̱n tiakú tu̱ꞌu̱n a̱ ―ni̱ kachi̱ Juan.

24Te̱ yivi̱ꞌ, te̱ ni̱ xaꞌa̱n i̱kanꞌ ndii, te̱ fariseo ni̱ ti̱ꞌviꞌ ña̱ꞌaꞌ. 25Te̱ tu̱ku̱ ni̱ ni̱ kaꞌa̱n te̱ ja̱a̱nꞌ xiinꞌ Juan ndii:

―¿Ndichun na sakuchiꞌ u̱nꞌ ne̱ yivi̱ꞌ kuenta Ndiosí naaꞌ süu̱ꞌ Cristo, ña̱ ni̱ ti̱a̱nu̱ꞌ Ndiosí sa̱kakú yooꞌ, nduuꞌ u̱nꞌ, te̱ ni̱ nde̱e̱ süu̱ꞌ Elías nduuꞌ tu̱ u̱nꞌ, te̱ ni̱ nde̱e̱ süu̱ꞌ te̱ kaꞌán tiakú tu̱ꞌu̱n Ndiosí ndiatuꞌ e̱ꞌ ki̱xi̱n nduuꞌ u̱nꞌ? ―ni̱ kachi̱ ra̱.

26Te̱ ni̱ na̱kui̱i̱n Juan nuu̱ꞌ te̱ ja̱a̱nꞌ ndii:

―Xiinꞌ ti̱kui kui̱ti̱ꞌ sakuchiꞌ yuꞌu̱ ne̱ yivi̱ꞌ kuenta Ndiosí. Ndisu̱ te̱i̱n e̱ꞌ xikaꞌ i̱i̱n ña̱ xïní ndo̱ꞌ. 27Te̱ ña̱ ja̱a̱nꞌ na̱ꞌi̱n chuunꞌ nuu̱ꞌ yuꞌu̱, sa̱kanꞌ ña̱ ña̱ kaꞌnuꞌ ka̱ nduuꞌ a̱ te̱ sa̱kanꞌ yuꞌu̱, te̱ ni̱ nde̱e̱ vä̱ꞌa̱ i̱ ku̱ndu̱u̱ te̱ nda̱xinꞌ i̱i̱nꞌ ndixa̱nꞌ kiꞌiꞌ a̱ ―ni̱ kachi̱ ra̱.

28Te̱ sa̱kuuꞌ ña̱ ja̱a̱nꞌ ni̱ xkaꞌndi̱a̱ ñu̱u̱ Betábara, ña̱ kanduꞌu̱ꞌ tu̱ku̱ taꞌviꞌ i̱ti̱a̱ Jordán, miiꞌ ni̱ sakuchiꞌ Juan ne̱ yivi̱ꞌ kuenta Ndiosí.

Jesús nduuꞌ mbe̱e̱ lulu, ña̱ kua̱xi̱ nda̱ꞌaꞌ Ndiosí

29Te̱ tu̱ku̱ kivi̱ꞌ ndii, ni̱ xi̱ni̱ Juan ja̱a̱nꞌ kua̱xi̱ Jesús. Te̱ ni̱ kaꞌa̱n ra̱ ndii:

―Ko̱to̱ ndo̱ꞌ, kaa̱ꞌ kua̱xi̱ ña̱ nduuꞌ mbe̱e̱ lulu, ña̱ nduuꞌ kuenta Ndiosí, te̱ ña̱ kaa̱ꞌ sandoyoꞌ kua̱chi̱ ne̱ yivi̱ꞌ i̱i̱n yivi̱ꞌ. 30Xaꞌa̱ꞌ ña̱ kaa̱ꞌ ni̱ kaꞌa̱n i̱ kii̱ꞌ ni̱ kaꞌa̱n i̱ ndii: “Ña̱ na̱ꞌi̱n chuunꞌ nuu̱ꞌ yuꞌu̱ ndii, ña̱ kaꞌnuꞌ ka̱ nduuꞌ a̱ te̱ sa̱kanꞌ yuꞌu̱, sa̱kanꞌ ña̱ xa̱ yoo a̱ nde̱e̱ kii̱ꞌ tïa̱ꞌan tuvi̱ i̱.” 31Te̱ ndii, nï̱ na̱ku̱ni̱ yuꞌu̱ yoo nduuꞌ a̱, ndisu̱ ni̱ xa̱a̱ i̱ sakuchiꞌ i̱ ne̱ yivi̱ꞌ kuenta Ndiosí te̱ na̱ku̱ni̱ ña̱ꞌaꞌ yooꞌ, ne̱ Israel ―ni̱ kachi̱ ra̱.

32Te̱ sa̱kanꞌ tu̱ Juan ndii, ni̱ ndi̱e̱e̱ yu̱ꞌuꞌ ra̱ kaꞌán ra̱ ndii:

―Ni̱ xi̱ni̱ i̱ nuuꞌ Espíritu Ndiosí nde̱e̱ ndi̱viꞌ nde̱e̱ naa nuuꞌ paloma, te̱ ni̱ xi̱kuiꞌnu̱ ña̱ꞌaꞌ a̱. 33Te̱ ndii, nï̱ na̱ku̱ni̱ yuꞌu̱ yoo nduuꞌ ña̱ kaa̱ꞌ, ndisu̱ ña̱ ni̱ sa̱kuisoꞌ chuunꞌ yuꞌu̱ te̱ sakuchiꞌ i̱ ne̱ yivi̱ꞌ kuenta a̱ xiinꞌ ti̱kui kui̱ti̱ꞌ ni̱ kaꞌa̱n xiinꞌ i̱ ndii: “Ku̱ni̱ u̱nꞌ nuuꞌ Espíritu Santo nde̱e̱ ndi̱viꞌ, te̱ i̱i̱n kuiꞌnu̱ a̱ i̱i̱n te̱ yivi̱ꞌ, te̱ ja̱a̱nꞌ nduuꞌ te̱ sa̱kuchiꞌ ne̱ yivi̱ꞌ kuenta i̱ xiinꞌ ña̱ ndi̱e̱eꞌ Espíritu Santo ja̱a̱nꞌ”, ni̱ kachi̱ a̱ xiinꞌ i̱. 34Te̱ ni̱ xi̱ni̱ yuꞌu̱ ña̱ sa̱kanꞌ ni̱ xa̱a̱ a̱ xiinꞌ ña̱ kaa̱ꞌ, te̱ ndieeꞌ yu̱ꞌuꞌ i̱ ña̱ ña̱ kaa̱ꞌ nduuꞌ siꞌe̱ Ndiosí ―ni̱ kachi̱ Juan.

So̱ꞌo̱ ni̱ xa̱a̱ a̱ kii̱ꞌ ni̱ xa̱ꞌaꞌ ndikún ne̱ yivi̱ꞌ Jesús

35Ni̱ kitu̱ꞌ tu̱ku̱ kivi̱ꞌ ndii, iinꞌ ni̱ tu̱ku̱u̱ Juan ja̱a̱nꞌ xiinꞌ uvi̱ taꞌan te̱ ndikún i̱chiꞌ ra̱. 36Te̱ kii̱ꞌ ni̱ xi̱ni̱ ra̱ ña̱ xkaꞌndíá Jesús kuaꞌa̱n a̱ i̱kanꞌ, te̱ ni̱ kaꞌa̱n ra̱ ndii:

―Ko̱to̱ ndo̱ꞌ, kaa̱ꞌ kuaꞌa̱n ña̱ nduuꞌ mbe̱e̱ lulu, ña̱ nduuꞌ kuenta Ndiosí ―ni̱ kachi̱ ra̱.

37Te̱ kii̱ꞌ ni̱ xi̱ni̱ so̱ꞌo̱ te̱ uvi̱ taꞌan ja̱a̱nꞌ ña̱ ni̱ kaꞌa̱n ra̱ ndii, ni̱ xi̱ku̱ndiku̱n ra̱ Jesús ja̱a̱nꞌ. 38Te̱ ni̱ na̱ndi̱koꞌ kuiín Jesús, te̱ ni̱ xi̱ni̱ a̱ ña̱ ndikún te̱ ja̱a̱nꞌ xata̱ꞌ a̱, te̱ ni̱ nda̱tuꞌu̱nꞌ ña̱ꞌaꞌ a̱ ndii:

―¿Yo̱o̱ nduuꞌ a̱ ndukuꞌ ndo̱ꞌ, ta̱a̱? ―ni̱ kachi̱ a̱.

Te̱ ni̱ kaꞌa̱n ra̱ xiinꞌ a̱ ndii:

―Rabí, ¿miiꞌ nduꞌu̱ꞌ u̱nꞌ? ―ni̱ kachi̱ ra̱ xiinꞌ a̱. (Te̱ Rabí ja̱a̱nꞌ kuni kachi̱ a̱ Maestro.)

39Te̱ ni̱ kaꞌa̱n a̱ xiinꞌ ra̱ ndii:

―Toꞌo̱ꞌ ndo̱ꞌ xiinꞌ i̱, te̱ ku̱ni̱ ndo̱ꞌ ―ni̱ kachi̱ a̱.

Te̱ ni̱ xaꞌa̱n ra̱, te̱ ni̱ xi̱ni̱ ra̱ miiꞌ nduꞌu̱ꞌ a̱, te̱ ni̱ ndoo̱ ra̱ i̱kanꞌ xiinꞌ a̱ kivi̱ꞌ ja̱a̱nꞌ, sa̱kanꞌ ña̱ xa̱ ka̱ ku̱miꞌ xa̱kuaa̱ꞌ ni̱ nduu̱ꞌ a̱. 40I̱i̱n te̱ ja̱a̱nꞌ ndii, ña̱ni̱ Simón Pedro nduuꞌ ra̱, te̱ Andrés naniꞌ ra̱. Te̱ ja̱a̱nꞌ nduuꞌ i̱i̱n te̱ uvi̱ ta̱ꞌan te̱ ni̱ xi̱ni̱ so̱ꞌo̱ ña̱ ni̱ kaꞌa̱n Juan ja̱a̱nꞌ, te̱ ni̱ xi̱ku̱ndiku̱n ra̱ Jesús. 41Te̱ ña̱ nu̱uꞌ ña̱ ni̱ xa̱a̱ Andrés ja̱a̱nꞌ ndii, Simón ña̱ni̱ ra̱ ni̱ xaꞌa̱nꞌ ko̱to̱ ra̱, te̱ ni̱ kaꞌa̱n ra̱ xiinꞌ te̱ ja̱a̱nꞌ ndii:

―Ni̱ xaꞌa̱n kuni̱ ndu̱ ña̱ nduuꞌ Mesías ―ni̱ kachi̱ ra̱. (Te̱ Mesías ja̱a̱nꞌ kuni kachi̱ a̱ Cristo, ña̱ ti̱a̱nu̱ꞌ Ndiosí sa̱kakú yooꞌ.)

42Te̱ ni̱ na̱ka̱ ña̱ꞌaꞌ ra̱ te̱ kuaꞌa̱n ra̱ nuu̱ꞌ Jesús. Te̱ kii̱ꞌ ni̱ xi̱ni̱ Jesús te̱ ja̱a̱nꞌ, te̱ ni̱ kaꞌa̱n a̱ xiinꞌ ra̱ ndii:

―Yoꞌó nduuꞌ Simón, siꞌe̱ Jonás. Te̱ vi̱ti̱n ndii, Cefas ku̱na̱niꞌ u̱nꞌ sa̱a̱ i̱ ―ni̱ kachi̱ a̱ xiinꞌ ra̱. (Te̱ Cefas ja̱a̱nꞌ kuni kachi̱ a̱ Pedro uun Ka̱va̱ꞌ.)

So̱ꞌo̱ ni̱ xa̱a̱ a̱ kii̱ꞌ ni̱ i̱ni̱ Natanael ni̱ xi̱ni̱ ra̱ Jesús

43Te̱ tu̱ku̱ kivi̱ꞌ ndii, ni̱ kuni̱ Jesús kuꞌu̱n a̱ ñu̱ꞌuꞌ Galilea, te̱ ni̱ na̱taꞌanꞌ a̱ xiinꞌ i̱i̱n te̱ na̱niꞌ Felipe, te̱ ni̱ kaꞌa̱n a̱ xiinꞌ ra̱ ndii:

―Ku̱ndiku̱n u̱nꞌ yuꞌu̱, ta̱a̱ ―ni̱ kachi̱ a̱ xiinꞌ ra̱.

44Te̱ Felipe ja̱a̱nꞌ ndii, ñu̱u̱ Betsaida ni̱ ki̱e̱e̱ ra̱ miiꞌ nduuꞌ tu̱ ñu̱u̱ Andrés xiinꞌ Pedro. 45Te̱ Felipe ja̱a̱nꞌ ndii, ni̱ xaꞌa̱n na̱ndu̱kuꞌ ra̱ Natanael, te̱ kii̱ꞌ ni̱ xi̱ni̱ ña̱ꞌaꞌ ra̱ ndii, ni̱ kaꞌa̱n ra̱ xiinꞌ ra̱ ndii:

―Ni̱ xi̱ni̱ taꞌanꞌ ndu̱ xiinꞌ te̱ ni̱ kaꞌa̱n Moisés xaꞌa̱ꞌ nuu̱ꞌ tu̱ꞌu̱n nde̱iꞌ Ndiosí, te̱ ni̱ kaꞌa̱n tu̱ te̱ ni̱ kaꞌa̱n tiakú tu̱ꞌu̱n a̱ xaꞌa̱ꞌ te̱ ja̱a̱nꞌ, Jesús, siꞌe̱ José, te̱ ni̱ ki̱ee̱̱ ñu̱u̱ Nazaret, nduuꞌ ra̱ ―ni̱ kachi̱ ra̱.

46Te̱ ni̱ kaꞌa̱n Natanael xiinꞌ ra̱ ndii:

―Ja̱nꞌ, nde̱e̱ i̱i̱n ña̱ va̱ꞌa̱ xaꞌa̱ꞌ yooꞌ kü̱vi̱ ke̱ta̱ ñu̱u̱ Nazaret ja̱a̱nꞌ ―ni̱ kachi̱ ra̱.

Sa̱kanꞌ te̱ ni̱ kaꞌa̱n Felipe xiinꞌ ra̱ ndii:

―Va̱ꞌa̱, toꞌo̱ꞌ te̱ ku̱ni̱ ndu̱chiꞌ nuu̱ꞌ ña̱ꞌaꞌ u̱nꞌ ―ni̱ kachi̱ ra̱.

47Kii̱ꞌ ni̱ xi̱ni̱ Jesús ña̱ kua̱xi̱ Natanael ja̱a̱nꞌ nuu̱ꞌ a̱, te̱ ni̱ kaꞌa̱n a̱ xaꞌa̱ꞌ ra̱ ndii:

―A̱anꞌ, kaa̱ꞌ kua̱xi̱ te̱ taꞌanꞌ e̱ꞌ, i̱i̱n te̱ xataꞌa̱n nduuꞌ te̱ Israel. Te̱ näsaká nimá nduuꞌ ra̱ ―ni̱ kachi̱ a̱.

48Te̱ ni̱ kaꞌa̱n Natanael xiinꞌ a̱ ndii:

―¿Sa̱a̱ ku̱vi̱ xiní u̱nꞌ yo̱o̱ nduuꞌ yuꞌu̱? ―ni̱ kachi̱ ra̱.

Te̱ ni̱ kaꞌa̱n a̱ xiinꞌ ra̱ ndii:

―Kii̱ꞌ tïa̱ꞌan kaꞌa̱n Felipe xiinꞌ u̱nꞌ, kii̱ꞌ iinꞌ u̱nꞌ xaꞌa̱ꞌ tunꞌ higuera ndii, ni̱ xi̱ni̱ i̱ yoꞌó ―ni̱ kachi̱ a̱.

49Te̱ ni̱ kaꞌa̱n ra̱ xiinꞌ a̱ ndii:

―Rabí, yoꞌó nduuꞌ siꞌe̱ Ndiosí. Yoꞌó nduuꞌ ña̱ xaꞌndia chuunꞌ kuuꞌ nu̱uꞌ nuu̱ꞌ yooꞌ, ne̱ Israel ―ni̱ kachi̱ ra̱.

50Te̱ ni̱ kaꞌa̱n Jesús xiinꞌ ra̱ ndii:

―Ko̱to̱ ka̱ ni̱ kaꞌa̱n i̱ ña̱ ni̱ xi̱ni̱ i̱ yoꞌó xaꞌa̱ꞌ tunꞌ higuera ja̱a̱nꞌ kui̱ti̱ꞌ na kandixaꞌ u̱nꞌ ña̱ ña̱ ja̱a̱nꞌ nduuꞌ i̱. Ndisu̱ ña̱ kaꞌnuꞌ ka̱ ku̱ni̱ u̱nꞌ te̱ sa̱kanꞌ ña̱ ja̱a̱nꞌ ―ni̱ kachi̱ a̱.

51Te̱ ni̱ kaꞌa̱n ka̱ a̱ xiinꞌ te̱ ja̱a̱nꞌ ndii:

―Ña̱ nda̱ku kaꞌa̱n i̱ xiinꞌ ndo̱ꞌ ña̱ ku̱ni̱ ndo̱ꞌ ña̱ xa̱ ni̱ nuni̱a̱ꞌ yiꞌeꞌ ndi̱viꞌ, te̱ ku̱ni̱ ndo̱ꞌ kuaꞌa̱ꞌ ángele, ña̱ xikaꞌ nuuꞌ nuu̱ꞌ Ndiosí, ndaaꞌ a̱ ndi̱viꞌ, te̱ nuuꞌ a̱ nuu̱ꞌ yuꞌu̱, ña̱ nduuꞌ tu̱ te̱ yivi̱ꞌ ―ni̱ kachi̱ a̱.

Currently Selected:

San Juan 1: miy

Highlight

Copy