San Mateo 6

Jesús otemachtij ika xkuajli tla sekimej kichiuaj teixpan tlen kuajli san para ma kinueyiteneuakan

(Lc. 11.2-4)

1’Xmotakan sano nemejuamej. Maka nenkichiuaskej on tlen kuajli imixpan on tlakamej san para yejuamej ma mechitakan tlen nenkichiuaj. Tla ijki nenkichiuaj, on nemoTajtsin iluikak chanej* xitlaj* mechtlayokolis.

2’Yejua ika, ijkuak nenkimpaleuiskej on yejuan mayankej, maka xtemachistikan ken kichiuaj on omexayakyejkej ne ipan on sinagogas*, tiopamej niman ipan calles. Yejuamej kichiuaj san para on tlakamej ma kintlakaitakan. Pero nejua ika tlen melauak nemechijlia ika san ika on tlen kichiuaj ye kipiyaj intlayokolil. 3Pero ijkuak nemejuamej itlaj ika nenkimpaleuiskej on yejuan mayankej, hasta on yejuan más nemotlajsojkaikniu* maka xkilijkan tlinon nenkichiuaj. 4Yej xchiuakan san ichtaka*. Tla ijkon nenkichiuaskej, nemoTajtsin yejuan kita tlinon nenkichtakachiuaj mechmakas nemotlayokolil yejuan nochimej kimatiskej.

5’Niman ijkuak nenkichiuaskej oración, maka xchiuakan ken on omexayakyejkej kichiuaj. Yejuamej kuelitaj notelketsaj para kichiuaj oración ne ijtik on sinagogas* niman ipan esquinas, san para on tlakamej ma kintakan tlen kichiuaj. Ika tlen melauak tej, nemechijlia ika san yejua ika on tlen kichiuaj ye kipiyaj intlayokolil. 6Pero ijkuak nemejuamej nenkichiuaskej oración, xkalakikan nemokaliltik, xtsakuakan nemotsakuijlou*, niman ompa xkichtakachiuakan nemooración itech nemoTajtsin. Niman nemoTajtsin, yejuan kita tlinon nenkichtakachiuaj, mechmakas nemotlayokolil yejuan nochimej kimatiskej.

7’Ijkuak nenkichiuaskej oración, maka miyekpa sano yejua tlajtojli nenkijtoskej yejuan xitlaj* ika mechpaleuis, ken kichiuaj yejuan xhebreos*. Yejuamej kinemiliaj ika Dios kinkaki pampa ueueyak inoración kichiuaj. 8Maka tej, xchiuakan ken yejuamej pampa on nemoTajtsin ye kimatstikaj tlinon nemejuamej mechpoloua ijkuak xe nenkitlajtlaniliaj. 9Yejua ika tej, ijkin xchiuakan oración:

ToTajtsin, akin tinemi ne iluikak,

ma mitsyekteneua nochi tlakatl.

10Xuajla, xmandaroki nochi tlakatl.

Ipan in tlaltikpaktli on tlakamej ma kichiuakan on tlen tikneki ijkon ken nochiua ne iluikak.

11Aman niman mojmostla xtechmaka tlen tikuaskej.

12Niman xtechtlapojpoluili totlajtlakoluan

ijkon ken tejuamej tikintlapojpoluiyaj on yejuan techchiuiliaj tlen xkuajli.

13Niman xtechpaleui para maka titlajtlakoskej,

yej xtechejeua maka tikchiuaskej tlen xkuajli.

Ijkin timitstlajtlaniliaj pampa tejua tikpiya tekiuajyotl,

niman poder, niman ueyilistli para nochipa.

Ma ijki nochiua.

14’Tla nenkintlapojpoluiskej oksekimej ika on tlen xkuajli mechchiuiliaj, nemoTajtsin iluikak chanej* no mechtlapojpoluis. 15Pero tla on oksekimej xnenkintlapojpoluiliaj on tlen xkuajli mechchiuiliaj, nemoTajtsin no xmechtlapojpoluilis on tlen xkuajli onenkichijkej.

16’Ijkuak nemejuamej nemosauaskej, maka xtlalikan nemoxayak ikan ajmantli ken kichiuaj on omexayakyejkej. Yejuamej tej, ijkon kichiuaj san para on tlakamej ma kitakan ika yejuamej nosautokej. Ika tlen melauak nemechijlia ika san yejua ika on tlen kichiuaj ye kipiyaj intlayokolil. 17Pero nemejuamej ijkuak nemosauaskej, kuajli xmixamikan niman xmotsonmelauakan. 18Ijkon on tlakamej xkitaskej ika nemosauaj, yej san nemoTajtsin yejuan xnenkitaj uelis kimatis. Yejua kitas tlinon nenkichtakachiuaskej, niman yejua mechmakas nemotlayokolil yejuan nochimej kimatiskej.

Jesús otemachtij ika se kitocaroua kipiyas riquezas ne iluikak

(Lc. 12.33-34)

19’Maka xsentlalikan riquezas san para nemejuamej nikan ipan in tlaltikpaktli kampa on pochauistli kijtlakoua niman nochi on tlajtlamach* san ixpoliui, niman kampa on tlachtekkej uelij tlachtekij. 20Yej xsentlalikan nemoriquezas ne iluikak kampa on pochauistli xkaman tlaijtlakoua, niman nochi on tlajtlamach* xkaman ixpoliui, niman on tlachtekkej xkaman tlachtekij. 21Tej, kampa nemejuamej nenkipiyaskej nemoriquezas, no ompa onyas nemoyojlo.

Jesús otemachtij ika itlamachilis sen tlakatl ueli kitlauiluiya ialma

(Lc. 11.34-36)

22’Ijkuak nemotlamachilis kajsikamati on tlen kuajli para nenkichiuaskej, yejua nochiua itlauil nemoalma. 23Pero tla nemotlamachilis xkajsikamati on tlen kuajli para nenkichiuaskej, nemoalma kipiya tlayouajyotl. Niman xonkaj okse tlayouajyotl yejuan más kapotstik* xken yejua on.

Jesús otemachtij ika se xuelis kitekichiuilis Dios niman on tomin

(Lc. 16.13)

24’Xakaj ueli kitekichiuilia ome iteko, pampa se kitlajsojtlas* niman okse kitlauelitas, noso se kipiyalis kuajli iyojlo niman okse kitlaluelkauas. Ijkon tej, xakaj uelis kitekichiuilis Dios niman no kinotekimakas on tomin.

Dios kinmakas ikoneuan nochi tlen kimpoloua

(Lc. 12.22-31)

25’Yejua ika tej, nemechijlia: Maka xkomatstiakan on tlen nenkikuaskej niman on tlen nenkoniskej, nion nemotlaken yejuan noneki para nemotlalnakayo. ¿Tlen xnenkimatij ika on nemilistli más ueyi kijtosneki xken on tlakuajli, niman on tlalnakayotl más ueyi kijtosneki xken on tlakentli*? 26Xkintakan on totomej yejuan patlantinemij ne ipan ajakatl. Yejuamej xtôkaj nion pixkaj, nion kejeuaj ipan se kueskontli on tlen kikuaskej. Maski ijkon tej, nemoTajtsin iluikak chanej* kinmakatikaj tlen kikuaj. ¿Tline* nemejuamej xmás nenueyi kijtosnekij xken yejuamej on totomej? 27¿Niman akinon maski sa tlajtlamach* komatstias, uelis okse tlajko metro más notlakechilis?

28’¿Niman tline sa nenkomatstokej on nemotlaken? Kuajli xkintakan kenijki noskaltiaj on xochimej ne ipan tepetl. Yejuamej xtekitij nion kichijchiuaj intlaken. 29Pero nejua nemechijlia ika on rey Salomón xkaman onotlakentij ken se on xochitl maski sanoyej onokualnextij ika on yejuan patioj itlakeuan. 30¡Ay!, nemejuamej yejuan xmás nenkineltokaj Dios, tla on xojtli yejuan ken aman in onkaj ipan tepetl, Dios ijki kitlakentia niman uajmostla kitlatiaj, ¿tlen xmás mechtlakentis nemejuamej? 31Yejua ika, maka xkomatstiakan nenkijtoskej: “¿Tlinon tikuaskej?, noso ¿tlinon tikoniskej?, noso ¿tlinon ika titotlakentiskej?” 32On yejuan xkixmatij Dios kitejtemouaj nochi in tlajtlamach*. Pero nemoTajtsin iluikak chanej* kimatstikaj ika nochi in mechpoloua. 33Yej achtoj xtejtemokan para nenkichiuaskej nochi on tlen Dios mechnauatia, niman no xnekikan kuajli nennemiskej ken yejua nemi. Tla ijkon nenkichiuaskej, Dios mechmakas nochi tlen mechpoloua. 34Maka xkomatstiakan on tlen mostla nochiuas, pampa cada tonajli ye onkaj tlen nenkiseliskej yejuan ika nemokauaskej. Cada tonajli tej, nenkipiyaskej tlinon mechpajsojlos san kech uelis nenkixikoskej.

Currently Selected:

San Mateo 6: nguNT

Highlight

Copy