San Marcos 3
3
Jesús okipajtij sen tlakatl yejuan uakiya ima
(Mt. 12.9-14; Lc. 6.6-11)
1Jesús okalak oksejpa ipan insinagoga* on hebreos*. Niman ompa nemiya sen tlakatl yejuan kipiyaya se ima uaki. 2No ompa nemiyaj sekimej yejuan sa kipijpiyayaj Jesús, para kitaskej tla kipajtis on tlakatl ipan on tonajli sábado. Ijkon okichijkej para kipiyaskej tlinon ika uelis kiteixpanuiskej. 3Jesús okijlij on tlakatl yejuan mauakiya, ma notelketsa ne tlajkotian.
4Kemaj okintlajtoltij on tlakamej:
—¿Tlinon techkauilia totlanauatil tikchiuaskej ipan on tonajli sábado? ¿Techkauilia tikinchiuiliskej tlen kuajli on tlakamej, noso on tlen xkuajli? ¿Techkauilia tikmakixtiskej on nemilistli, noso tikmiktiskej?
Pero yejuamej xokinankilijkej. 5Kemaj Jesús okintlaueltlajtlatak, niman sanoyej* onajman pampa sanoyej yoltechikajkej katkaj. Niman okijlij on tlakatl:
—Xmelaua moma.
On tlakatl okimelau ima niman opajtik.
6Kemaj, on fariseos* ouajkiskej niman opejkej tlajtlajtouaj inuan on yejuan iuan nouikaj Herodes kenijki ueliskej kimiktiskej Jesús.
Jesús nemiya iuan on miyek tlakatl itenko on mar
7Jesús onejkuanij, niman oyaj ne itenko on mar inuan inomachtijkauan*. Niman sanoyej miyek tlakatl yejuan chanej* Galilea no oyajkej. No ijki oyajkej yejuan chanejkej imanian Judea, 8niman Jerusalén, niman imanian Idumea, niman ikisayan tonaltsintli de on río Jordán, niman iregión Tiro niman Sidón. Yejuamej oyajkej para okitatoj Jesús pampa okakkej nochi tlinon kichiuaya. 9Yejua ika Jesús okinmijlij inomachtijkauan* ma kuajuikakan sen barco kampa uelis tlejkos, para maka kipitsmiktiskej* on tlakamej. 10Nemiyaj sanoyej tojlamej on tlakamej pampa okimpajtij miyekej kokoxkej. Yejua ika nochimej yejuan kipiyayaj kualolistli kinekiyaj kimatokaskej para pajtiskej. 11Niman on tlakamej, yejuan kipiyayaj on xkuajkualtin espíritus notlajkaliyaj ikxitlan Jesús, niman on xkuajkualtin espíritus chikauak tsajtsiyaj, kijtouayaj:
—Tejua tiiKoneu Dios.
12Pero Jesús okinchikajkanauatij maka kiteijliskej akin yejua.
Jesús okintlapejpenij majtlaktli uan ome inomachtijkauan
(Mt. 10.1-4; Lc. 6.12-16)
13Kemaj Jesús otlejkok ipan sen tepetl niman oksejkan okinuajnots sekimej yejuamej yejua okinek. Niman yejuamej oyajkej itech. 14Kemaj, yejua okitlapejpenij majtlaktli uan ome tlakatl yejuan okinteneu apóstoles* para ma nemikan iuan, niman para kintitlanis ontemachtiskej. 15Niman okinmakak poder para kimpajtiskej on kokoxkej, niman para kintekixtiliskej on xkuajkualtin espíritus. 16Okiteneu Simón yejuan no okitokayotij Pedro. 17No okiteneu Santiago niman Juan ikniu yejuan ikoneuan Zebedeo. (Jesús okintokayotij in omemej Boanerges yejuan kijtosneki tetlajtlauelmej.) 18No ijki okiteneu: Andrés, Felipe, Bartolomé, Mateo, Tomás, Santiago yejuan ikoneu Alfeo, Tadeo, Simón on yejuan teuan nopouaya intech on cananistas, 19niman Judas Iscariote yejuan más sakin* okitemaktilij Jesús.
On temachtijkej ikan itlanauatil Dios okijtojkej ika Jesús kipiya on diablo*
(Mt. 12.22-32; Lc. 11.14-23; 12.10)
20Kemaj Jesús okalak techan, niman oksejpa onosentlalij miyek tlakatl, niman xnajxiliayaj tlakuayaj Jesús niman inomachtijkauan*. 21Ijkuak ifamilia okimat, oualajkej para kuikaskiaj, pampa yejuamej kuitiayaj xok kipiya itlamachilis.
22Yejuamej on temachtijkej ikan itlanauatil Dios, yejuan oualejkej Jerusalén, kijtouayaj:
—Jesús kipiya on diablo* itoka Beelzebú yejuan tlayekanketl intech nochimej on xkuajkualtin espíritus. Niman yejua kipaleuiyaj Jesús para kinkixtia on xkuajkualtin espíritus.
23Kemaj Jesús okinnots, niman okinmijlij:
—¿Kenijki uelis on diablo* kinkixtis on xkuajkualtin espíritus tla sano yejua diablo*? 24Tla sen país noxexelos, niman peuas nouijsokiskej sano yejuamej, on país xuelis nemis. 25Niman no ijki, tla sen familia noxexelos, niman peuas nouijsokiskej sano yejua, on familia xuelis nemis. 26No ijki, tla on diablo* noxelos intech on xkuajkualtin espíritus niman peuas kinuijsokis, xok ueliskej itlaj kichiuaskej.
27’No ijki, tla yakaj ichtekketl kineki kalakis ichan sen tlakatl yejuan kojtik para kixtilis tlinon kipiya, ika onkaj achtoj kisalos on yejuan kojtik tlakatl. Niman ijkuakon uelis kikuilis nochi on tlen kipiya ipan ichan.
28’Melauak tej, nemechijlia ika Dios uelis kitlapojpoluis nochi intlajtlakol on tlakamej niman nochi on tlauijuikaltilistli yejuan kijtouaj. 29Pero tla sen tlakatl kuijuikaltis on Espíritu Santo, Dios xkaman kitlapojpoluis, yej nochipa kipiyas itlajtlakol.
30Ijkon okijtoj pampa on temachtijkej ikan itlanauatil Dios kijtojtikatkaj ika yejua kipiya sen xkuajli espíritu.
On yejuan kitlakamatis Dios, yejua ikniu Jesús niman inanaj
(Mt. 12.46-50; Lc. 8.19-21)
31Kemaj oualajkej inanaj niman ikniuan Jesús. Yejuamej onokajkej ipan calle, niman otlatitlankej ma kinotsatij Jesús. 32On tojlamej yejuan nemiyaj iyeualkan Jesús ne kalijtik, okijlijkej:
—Monanaj niman mokniuan nemij kiauak, niman kinekij mitsitaskej.
33Pero yejua okinnankilij:
—¿Akinon nonanaj niman nokniuan?
34Kemaj yejua okomintak on yejuan ompa nemiyaj iyeualkan, niman kemaj okijtoj:
—Yejuamej nochiuaj nonanaj niman nokniuan. 35Nochi akin kichiuas on tlen Dios kineki, yejuamej nokniuan, niman yejua nonanaj.
Currently Selected:
San Marcos 3: nguNT
Highlight
Share
Copy
Want to have your highlights saved across all your devices? Sign up or sign in
© 1987, 2012 Wycliffe Bible Translators, Inc. All rights reserved.
