Génesis 14
14
Abram thjengijna Lot
1Ngain nchaꞌon teꞌa, Amrafel kjui rey rajna Sinar, Arioc kjui rey rajna Elasar, ko Quedorlaomer kjui rey rajna Elam, ko Tidal kjui rey rajna Goim. 2Ko kain rey teꞌi kuetukaꞌo na̱ Bera, rey rajna Sodoma, Birsa rey rajna Gomorra, ko Sinab rey rajna Adma, ko Semeber rey rajna Zeboim ko rey rajna Bela, thi rajna kai diꞌin Zoar. 3Kain ni teꞌi xrathe na̱ ngain chjagee nunthe diꞌin Sidim, thi jii ndachaon diꞌin Digeꞌen. 4Ko theyoo nano Quedorlaomer kuetuꞌan ngain na̱, aro ngain nano theninxin, thi naꞌo rey ibinaoꞌa na̱ ixin Quedorlaomer ruketuꞌen na̱. 5Mexinxin ngain nano thenoo Quedorlaomer ko kain rey bakjengijna kuato choo na̱ ko bikjaaya na̱ ngain ni refaíta, ngain nunthe Astarot Karnaim, kuthimejan kjuaaya na̱ ngain ni zuzita ngain nunthe Ham, ko ni emita ngain nunthe Save-quiriataim, 6ko kai kjuaaya na̱ ngain ni horeo ngain jna Seir ko binchekinga na̱ na̱ ngain nunthe diꞌin Parán, thi jii chrika nunthe xema ko xruꞌin jii. 7Kuthimejan kjan na̱ ko biji na̱ ngain nunthe En-mispat, ko nunthe jiꞌi kai diꞌin Cades, kai are tedatho na̱ kjuaaya na̱ ngain ni amalecita ko tabithuꞌe na̱ nunthe ko kjuaaya na̱ ngain ni amorreo, ni binthe ngain nunthe Hazezontamar.
8Kuthimejan binthegachrje rey rajna Sodoma, rey rajna Gomorra, rey rajna Adma, rey rajna Zeboim ko rey rajna Bela, thi rajna kai diꞌin Zoar, ko kjui na̱ ngain chjagee nunthe Sidim. Ko thi naꞌo rey teꞌi bintheketukaꞌo 9rey diꞌin Quedorlaomer, thi baketuꞌan nunthe Elam, rey diꞌin Tidal, thi baketuꞌan rajna Goim, rey diꞌin Amrafel, thi baketuꞌan nunthe Sinar ko rey diꞌin Arioc, thi baketuꞌan rajna Elasar. Ko thi noo rey teꞌi kuetukaꞌo thi inaꞌo rey. 10Aro ngain chjagee nunthe Sidim, beꞌe anto tsjé thue beria chingo saruthe, mexinxin are sakuinga chujnii rey Sodoma ko Gomorra, kanxion na̱ binthetsingaaya na̱ ngaa thue, ko ni icha sakuinga na̱ ngagaꞌa jna.
11Ko ni bacha sabikao na̱ thi bane ko thi bechunda ni Sodoma ko ni Gomorra, ko sabinthekji na̱. 12Ko kai sabikao na̱ Lot, xan kueen Abram, thi xan beꞌe Sodoma, ko kai sabikao na̱ kain thi bechunda xan. 13Ko naa chujnii Lot sakuinga bindache Abram, thi hebreo, thi beꞌe ngain nthajie̱e̱ Mamre. Ko Mamre kjui naa xii amorreo ko xan choo diꞌin Escol ko Aner, thi jian bagakao na̱ Abram.
14Ko are Abram kuiꞌin ixin xan kueen sabikao na̱ xan, Abram batse kain chujni guanxin ngain nchianduꞌa ko bachunthiaxin ko benuꞌe na̱ bakjaaya na̱, ko kjui nii renkia ko thejni chujni, ko bachrjekaꞌo na̱ ko ruee na̱ chujnii Quedorlaomer ko bitsexin na̱ na̱ ngain nuntheꞌe Dan. 15Ko Abram kunchjeeya chujnii ko kjui na̱ thi̱e ko bikatjabeꞌo na̱ rey teꞌi ko ni sakuinga ruee na̱ na̱ ngain nunthe Hoba, thi jii nu kuexin rajna Damasco. 16Jañaa Abram kjuengijna Lot ixin kuanchrjanda na̱, kunixin kain thi bechunda ko kai ni nchrii ko icha chujnii.
Melquisedec nchenchaon Abram
17Kuthimejan kjanxin Abram ngain thi kjuayaxin ngain Quedorlaomer ko ngain kain rey jian bagakao. Ko are mee rey rajna Sodoma bichuenxin ngain chjagee nunthe Save, ko mee diꞌin Chjagee Rey. 18Ko Melquisedec baketuꞌan Salem ko kjui danee Ndo Dio, Ndo jii ngajni. Ko jeꞌe bajon niuthja ko vino ngain Abram. 19Ko Melquisedec binchenchaon Abram ko ndachro:
«Ndo Dio jii ngajni sinthanchaon jaꞌa, Abram,
Ndo binchechjian ngajni ko nunthe,
20Ko tsusayeꞌe Ndo Dio jii ngajni,
ixin binthagacha ngain chujni ningakuꞌan.»
Ko Abram chjee Melquisedec thi thexin kain thi juiauxin ngain thi kjui bikjaaya. 21Kuthimejan rey rajna Sodoma, ndachro ngain Abram:
—Tunkjana chujni rajnana, ko tadithuꞌa kain thi bikoo ná.
22Aro Abram batheꞌe ngain rey Sodoma:
—Jaꞌan dajin ngathe kon Nchana Dio, Ndo jii ngajni, Ndo binchechjian ngajni ko nunthe, 23ixin jaꞌan xruꞌin tsaa thi jaꞌa chunda, xruꞌin xuchjiꞌan ko rua jichriaxin kathea, ixin rundachroꞌa ixin jaꞌa chjana mee tsjexin richunda. 24Jeꞌo sithuena ná thi juine ni chujnina, ko kai rutse thi jikininxin sayee Aner, Escol ko Mamre, ni kjuengijna ná.
Currently Selected:
Génesis 14: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
