Génesis 24
24
Isaac ko Rebeca
1Abraham ujunchjan, ko Ndo Dio binchenchaon ngain kain thi bincheꞌe. 2Ko naa nchaꞌon Abraham ndache naa ni nchexree thi icha see jincheꞌe xra ko thi baketuꞌan kain thi bechunda Abraham:
—Dakee raa ngangixin nthatsao na, 3ko dajin ngathexin kon Ndo Dio, Ndo thetuꞌan ngajni ko nunthe ixin ncheꞌe thi rundathjo. Tajandaꞌa ixin xanꞌna, xan Isaac, tsutheꞌe xan ngain naa nchri cananea, thi nunthe te ná jai. 4Icha jian thji ngain nunthe te ni chujnina, ko nthiꞌa thjee nchrii sekaꞌo xanꞌna xan Isaac.
5Ko thi ncheꞌe xra banchiangi:
—Aro ja̱ xan nchrii sinaoꞌa xan tsii xan ngajin na, ¿keꞌe sinthaꞌa, a tsjiꞌan xaꞌan ngain thi nunthe begachrjexin suixin?
6Ko Abraham ndachro:
—¡Naꞌi, thjioꞌa xanꞌna nthiꞌa! 7Ndo Dio, Ndo thetuꞌan ngajni, Ndo bantsjexin na ngain nchianduꞌa ndudana ko ngain nuntheꞌe ni chujnina, thi jeꞌe Ndo nichjananxin Ndo ko ndachro Ndo ixin rugajon nunthe jiꞌi ngain ni sachrjeninxin na jaꞌan. Mexinxin rurruaꞌan Ndo angeel Ndo ngajin ko jeꞌe Ndo sincheꞌe Ndo ixin sinchii xan nchrii sekaꞌo xanꞌna. 8Aro ja̱ xan nchrii sinaoꞌa xan tsii xan ngajin, isithueꞌa ixin jaꞌa; aro nthatsankua ñao xruꞌin nchaꞌon thjiꞌo xanꞌna thi nunthe bachrjexin jaꞌan.
9Ko xi ncheꞌe xra jiꞌi bakeꞌe raa ngangixin nthatsao Abraham, nchee xa, ko kjuathexin na̱ ixin sincheꞌe thi kuetuꞌen Abraham. 10Kuthimejan kuinchieꞌe the kucamello, ko icha thi anto renthe bechunda nchee ixin bikao, ko sabinthekji na̱ ngain nunthe Mesopotamia, thi jii rajnee Nacor. 11Ko are ubiji nthiꞌa ko utsukjin, bincheꞌe ixin bethuxin kucamello nthiꞌa chrikee naa thue dachrjedoꞌo jinda, chiaon rajna mee. Ko are mee kain xan nchrii bakii xan bagirrue xan jinda. 12Ko xi nchexree Abraham nichjee Ndo Dio: «Nchana ko Ndo Diue nchana, nthatsaꞌan ñao dinchenchaon na ko dinchenchaon nchana ngain nchaꞌon jiꞌi. 13Jaꞌan sithuna chrikee thue dachrjedoꞌo jinda, ko are kain xan nchrii rajna jiꞌi tsii xan sirrue xan jinda, 14dencheꞌe ixin thi xan nchrii rundathjan: “Nthatsaꞌan ñao nchegania nchixraꞌa ko chjana nchin jinda”, ko kai satheꞌe xan: “Degiꞌi nda suixin ko kai ruchjaꞌa kukamellua siꞌi ba nda”, ko jañaa tsununa ixin xan nchrii yaa thi Suixin kuinchieꞌe ixin jeꞌe xan Isaac. Ko jañaa tsjagunanxin thi anto thjueꞌe nchana.»
15Ko xra jinichjayee Ndo Dio, are bikon juii naa xan nchrii kunixin nchixreꞌe xan ngataꞌa nthacheen xan. Ko mee Rebeca, xeꞌen Betuel, ko Betuel kjui xeꞌen Milca ko Nacor, ko Nacor ko Abraham choo. 16Ko Rebeca anto chrjuin beꞌe, ko xrajeꞌo beꞌe ko xra xruꞌin xii bejuakaꞌo. Ko bingajin xan ngain thue dachrjedoꞌo jinda ko binchechre nchixreꞌe ko usajikjan. 17Are mee xi nchexree Abraham kunchieꞌen ngain Rebeca ko ndachro:
—Nthatsaꞌan ñao chjana nchin jinda siꞌi, nda jiria nchixraꞌa.
18Ko Rebeca ndachro:
—Degiꞌi nda suixin.
Ko jaikua binchegania nchixreꞌe ko tajikeꞌe nchiixra ko jeꞌe biꞌi nda. 19Ko are xi ncheꞌe xra juexin biꞌi nda, Rebeca ndachro:
—Kai santsje jinda siꞌi kukamellua, ko santsje jinda tsujexin kain ba.
20Ko jaikua kuekia nda ngain thi dixin ba nda ko tsjé nthiꞌá kjui bigantsje nda, juexinja biꞌi ba nda. 21Ko xi ncheꞌe xra xratao binchexruan xan ixin binao rukunuꞌe a Ndo Dio jithjengijna ixin rugithja naa xan nchrii rugekaꞌo Isaac. 22Are kucamello juexin biꞌi ba nda, xi ncheꞌe xra bajon naa kuchianingo yexin inkjaon gramo chia oro ngain Rebeca, kai bajon yoo chia oro dethia raa xan ko yexin naa renkia gramo. 23Ko ndachro xi ncheꞌe xra:
—Nthatsaꞌan ñao, ¿ndachjejin na kensen ndudaa? ¿A tuenao ndudaa ruchjana ná juachaxin satho ná thi̱e jiꞌi nchianduꞌe ndo?
24Ko jeꞌe xan ndachro xan:
—Ndudana Betuel, xeꞌen Milca ko Nacor. 25Ko ngain nchiania ná kai jii thi sithuꞌa ra thi̱e jiꞌi, kai jii tsjé thi sine kukamellua.
26Kuthimejan xi ncheꞌe xra bethuxin ko bisetaꞌa nunthe ko kuexruxiꞌin Ndo Dio, 27ko ndachro: «¡Kain juasaaya jikininxin Ndo Dio, Diue nchana Abraham, ixin jian Ndo ngain, ko ncheꞌe Ndo kain thi ndachro Ndo ngain nchana ixin kjuengijna na ngain nthiana ko jeꞌe thi bikian ngain ni nchianduꞌa ni chujnii nchana!»
28Ko Rebeca kuinga kjui ngain nchianduꞌa janee ixin kuekiin jan kain thi kuꞌen. 29Ko Rebeca bechunda naa xan choo biꞌin Labán, ko jeꞌe kuinga bikjee thi xii ngain thue dachrjedoꞌo jinda 30ixin bikon kuchianingo ko chia jithia raa xan choo, ko kuiꞌin are Rebeca jithekin kain ngain janee. Ko Labán kjui bikjee xi ncheꞌe xra ko bikon tajii chrikee kucamello nthiꞌa chiaon thi thue dachrjedoꞌo jinda. 31Ko ndache:
—Dejiꞌi suixin, thi binchenchaon Ndo Dio. ¡Suixin ntha chroꞌa sithuꞌa ntha nthiꞌi nduja, jaꞌan urrichunda thi sithuꞌa suixin ko kai kukamellua ntha!
32Kuthimejan xi ncheꞌe xra kjui xa nchia. Ko Labán bankajiꞌin kain kucamello ko chjee ba juine ba, kuthimejan Labán juiauꞌe jinda xi nchexree Abraham ko kain ni juiaꞌo ixin runthekjeen ruthee na̱.
33Ko are ukuekieꞌe na̱ ixin rune na̱, jeꞌe xi nchexree Abraham ndachro:
—Jaꞌan chroꞌa sine, ja̱ saꞌo rundachrjanꞌa unda juiꞌi nthiꞌi.
Ndachro Labán:
—Denichja suixin.
34Ko xi ncheꞌe xra ndachro:
—Jaꞌan xi nchexree nchana Abraham. 35Ndo Dio anto binchenchaon nchana ko anto tsjé chunda ixin chjee kuleko, kuxinthaa, chia oro ko chia plata, tsjé xi ncheꞌe xra ko nchri ncheꞌe xra, kucamello ko kulucho. 36Kai Sara, chriꞌi nchana, binchekunkjiꞌi naa chjan are unachrichjan, ko nchana bajon kain thi chunda ngain xeꞌen. 37Ko nchana bincheꞌe ixin jaꞌan bajin ngathexin kon, ko ndachro: “Tanchrjandaꞌa ixin xanꞌna sekaꞌo xan naa nchri cananea, thi nunthe riꞌi jaꞌan. 38Icha jian thji nchianduꞌa ndudana, ngain chujnina ko thjee nthiꞌa naa nchrii sekaꞌo xanꞌna.” 39Ko jaꞌan ndathjan: “Nchana, ¿keꞌe sinthaꞌa, ja̱ xan nchrii sinaoꞌa tsii xan ngajin?” 40Ko nchana ndachjejin na: “Jaꞌan kain nchaꞌon bithikaꞌon Nchana, Ndo Dio mexinxin jeꞌe Ndo rurruaꞌan Ndo angeel Ndo ngajin ko jañaa tsji jian thi tsji. Ko jaꞌa rugunda thjee naa xan nchrii sekaꞌo xanꞌna, nthiꞌa nchianduꞌa ndudana. 41Ko ja̱ chujnina sithuexinꞌa na̱ ruchjaa na̱ xan nchrii mee, jeꞌo jañaa jaꞌa isincheꞌa thi bajin ngajin na.”
42«Ko jañaa are juiꞌi ngain thue dachrjedoꞌo jinda jiꞌi, jaꞌan nichjayaa Ndo Dio, Diue nchana Abraham ko ndachrjan: “Ja̱ ndua Suixin sinchenchaon na ngain nthiana jiꞌi, 43nthatsaꞌan ñao thjengijna na ixin thi juixin, ko jiꞌi thi deganchiaꞌa: Thi xan nchrii tsii sirrue jinda ko jaꞌan rundathjan: Nthatsaꞌan ñao chjana nchin jinda siꞌi, nda jiria nchixraꞌa, 44ko sathena xan: Jaan, degiꞌi nda suixin, ko kai santsje nda siꞌi kukamellua, ko jañaa jaꞌan rukianxin ixin Suixin kuinchieꞌe nchrii jiꞌi ixin sekaꞌo xeꞌen nchana.” 45Ko xra thjexinꞌa rinichjayaa Ndo Dio are bikon biji Rebeca kunixin nchixreꞌe ngataꞌa nthacheen. Ko bingajin xan ixin bantsje xan jinda, ko jaꞌan ndathjan xan: “Nthatsaꞌan ñao, chjana nchin jinda siꞌi.” 46Jeꞌe xan jaikua binchegania nchixreꞌe xan, ko ndachjejin na xan: “Degiꞌi nda suixin, kai ruchjaꞌa kukamellua nda.” Ko jeꞌe xan chjana xan jinda ko kai chjee xan kukamelluna jinda. 47Kuthimejan ndathjan xan: “¿Kensen ndudaa?,” ko jeꞌe xan batheꞌe xan: “Ndudana Betuel, xeꞌen Nacor ko Milca.” Kuthimejan bakee naa kuchianingo ngain chinthjon xan ko chia bethia raa xan, 48ko barithuxin ko binthasayaa Ndo Dio, Diue nchana Abraham, ixin kjuengijna na Ndo juiꞌi ko bithja chujnii nchana, ko xan nchrii sekaꞌo xeꞌen nchana, naa xeꞌen xan choo nchana. 49Anchee ndachjejin ni ra, asincheꞌe ra thi jian ko thiakunueꞌe ra nchana, ja̱ naꞌi, kai ndachjejin ni ra, ko jañaa tsununa keꞌe nthiꞌá rurruaa.»
50Kuthimejan Labán ko Betuel batheꞌe:
—Jaan, dikon ná ixin Ndo Dio kjuengijna juiꞌi nthiꞌi, mexinxin xruꞌin inaa dithuꞌe rundachrjan ná. 51Detsjexin, nthiꞌi jii Rebeca, dekjiꞌo xan ko ncho tutheꞌe xan ngain xeꞌen nchaa, jañaa inchin binchekininxin Ndo Dio.
52Are xi nchexree Abraham kuiꞌin jiꞌi, bethuxin ko bisetaꞌa nunthe ko kuexruxiꞌin Ndo Dio. 53Kuthimejan bantsje tsjé chia plata ko chia oro ko luntho ixin chjee Rebeca. Kai xan choo ko janee bayee tsjé thi renthe juiaꞌo na̱. 54Kuthejan jeꞌe ko ni juiaꞌo juine na̱ ko biꞌi na̱ ko nthiꞌa batho na̱ thi̱e mee. Ko nduexin are binthengathjen na̱, xi nchexree Abraham ndachro:
—Chjana ra juachaxin rukjan na̱ nchianduꞌe nchana.
55Aro xan choo ko janee Rebeca ndachro na̱:
—Ncho dithuꞌe xan ithe nchaꞌon ngajin ná, kuthimejan nchao satsji xan ngajin.
56Aro xi nchexree Abraham ndachro:
—¡Nthatsaꞌan ñao ra tajanda ni ra! Ndo Dio jian bincheꞌe Ndo kain; dekanchrjanda ni ra rukjan ná nchianduꞌa nchana.
57Ko jeꞌe na̱ batheꞌe na̱:
—Sayee ná jeꞌe xan, ko tsiꞌin ná keꞌe ruchro xan.
58Ko bayee na̱ Rebeca ko banchiangiꞌi na̱:
—¿Arinao satsji ngain xii jiꞌi? Ko Rebeca batheꞌe:
—Jaan, satsji.
59Ko kuanchrjanda na̱ sakjui Rebeca, ko chjee na̱ nchri bakuꞌen are xra nchion beꞌe, xi nchexree Abraham ko ni bikao. 60Ko binchenchaon na̱ jaꞌin:
«Jaꞌa nchri chian ná,
¡jaꞌa tsji janee tsjé no̱ chujni!
¡Ko ni sachrjeninxin
sacha na̱ nuntheꞌe ni runingakuꞌen na̱!»
61Kuthimejan Rebeca ko kain nchri nchexree binthetaꞌa na̱ kucamello ko ruee na̱ xi nchexree Abraham. Ko jañaa xi nchexree Abraham sabikao Rebeca.
62Ko Isaac beꞌe ngain nunthe Neguev, ko jeꞌe jikjanxin ngain thue dachrjedoꞌo jinda diꞌin «Thi jichon ko dikon na». 63Ko kjui ngataon jngi bixraxaon nchin, ko are mee batsiin kon ko bikon ixin jitunchiaon kanxion kucamello. 64Ko kai are Rebeca bikon Isaac, jaikua banianxin kucamello 65ko banchiangiꞌi xi nchexree Abraham:
—¿Kexeꞌe xii jiꞌa, thi jithii thi tethji ná?
Ko xi nchexree Abraham batheꞌe:
—Xii yaa xeꞌen nchana.
Kuthejan Rebeca kuaa naa manta ko kuejanthe ngakon.
66Kuthimejan xi ncheꞌe xra kuekiin Isaac kain thi kuꞌen. 67Kuthimejan Isaac bikao Rebeca ngain nchia ndasiꞌin janee, ko Rebeca ndakjan chriꞌi Isaac. Ko jeꞌe anto thjueꞌe Rebeca, ko jañaa jeꞌe tjañeꞌe thi juachjaon bechunda ixin beꞌen janee.
Currently Selected:
Génesis 24: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
