Génesis 26
26
Isaac ko Abimelec
1Ngain nchaꞌon taꞌa, takuchjunga thi bane na̱ ngain nunthe, jañaa inchin kuꞌen ngain nchauen Abraham. Mexinxin Isaac sakjui ngain nunthe Gerar, thi beꞌe Abimelec, rey ni filisteo. 2Ko Ndo Dio kununxiꞌin Isaac ko ndachro: «Thjiꞌa Egipto, icha jian dithuꞌa ngain thi nunthe jaꞌan rundathjo. 3Dariꞌi ngain nunthe jiꞌi inchin chujni jeꞌa nuntheꞌe, ko jaꞌan sinthanchaon ko sariꞌi ngajin jaꞌa ko ngain ni sachrjeninxin ko ruchjaꞌa ra nguii nunthe jiꞌi. Ko jañaa tsuꞌen thi ndachrjan ngain Abraham, ndudaa. 4Ko jaꞌan sinthatsjé chujnia inchin tsjexin kunutse jii ngajni ko ruchjaꞌa na̱ kain nunthe teꞌi. Ko chujni nguii nunthe tsunchaon na̱ ixin chujni sachrjeninxin jaꞌa. 5Jaꞌan sinthaꞌa jiꞌi ixin Abraham kuiꞌin ko bithikaon thi jaꞌan kjuaago ko kuetuꞌan.»
6Ko jañaa tabeꞌe Isaac ngain nunthe Gerar, 7Ko ni xii binthe nthiꞌa are baganchiangi na̱ ixin Rebeca, chriꞌi Isaac, jeꞌe bandachro:
—Yaa nchri chian.
Jañaa ndachro ixin jeꞌe xraon rundachro: «Yaa chriꞌna», ixin jeꞌe xraxaon ixin ni xii binthe nthiꞌa ruguen na̱ ixin Rebeca anto chrjuin beꞌe.
8Naa nchaꞌon are ubinthe na̱ nthiꞌa, Abimelec, thi rey ni filisteo, bikunxin nu thi jichrjaduxin nchianduꞌa ixin Isaac jitjantama raa ngain Rebeca, chriꞌi jeꞌe. 9Mexinxin Abimelec bayee Isaac ko ndachro:
—¡Nduaxin yaa chriꞌa! ¿Unda ndachro ixin yaa nchri choo?
Ko Isaac ndachro:
—Ixin anto xraon na ixin chrujan ni ruguen na ixin jeꞌe nchra.
10Ko Abimelec ndachro:
—¿Unda jañaa bincheꞌe ngajin ná? Jaꞌa ubenuꞌa jian ixin kexeꞌo chujnina rugantsjaꞌa nchra ko rugejuakaꞌo nchra, ko kain ná rugetsingataꞌa ná thi jianꞌa rukuꞌen.
11Mexinxin Abimelec kuetuꞌan ngain kain chujni rajnee ko ndachro:
—Kexeꞌo chujni rukathe xii jiꞌi o chriꞌi, chujni mee seꞌen.
12Ko ngain nano beꞌe nthiꞌa, kuenga Isaac ngain nunthe mee ko batsiin naa renkia icha tsjé ke thi jeꞌe kuenga, ixin Ndo Dio binchenchaon. 13Ko anto tsjé bechunda, ko kain nchaꞌon icha bakutsjé thi bechunda. 14Ko bechunda tsjé kuleko ko tsjé kuxinthaa, ko anto tsjé ni ncheꞌe xra, mexinxin ni filisteo kuexiꞌin na̱ kunchjueꞌe na̱ ngain Isaac. 15Ko binchekaon na̱ kunixin jinche kain thue bagachrjedoꞌo jinda, thi baketuꞌan Isaac, ko thue dachrjedoꞌo jinda teꞌi binchechjian ni nchexree Abraham, ndudee Isaac. 16Kuthimejan Abimelec ndachro ngain Isaac:
—Sathjixin ngajin ná ixin jaꞌa tsjé chunda ko icha thetuꞌan ke jaꞌan ná.
17Isaac bachrjexin rajna Gerar, aro sabigeꞌe ngain chjagee rajna, ko nthiꞌa binchechjian nchia ndasiꞌin. 18Ko kjan nge kain thue bagachrjedoꞌo jinda binchechjian Abraham, ndudee Isaac, ixin ni filisteo kuenga na̱ jinche are beꞌen Abraham. Ko Isaac kjan binchegiꞌin kain thue teꞌi inchin binchegiꞌin Abraham. 19Naa nchaꞌon, ni nchexree Isaac tenge na̱ ngain chjagee nunthe Gerar ko bithja na̱ jinda jichrindoꞌo. 20Ko ni thingaria kulekue Gerar ko ni thingaria kulekue Isaac kuetuxin na̱ jinda chrindoꞌo, ko ndachro na̱: «Jiꞌi jindana ná.» Mexinxin thue jiꞌi biꞌin Esek, ixin kuetuxin na̱ nda. 21Kuthimejan banthjee na̱ inaa thue, ko kjan kuetuxin na̱, mexinxin Isaac binchegiꞌin Sitna.
22Ko Isaac kuinthuꞌe thue dachrjedoꞌo jinda mee ko sakjui kjín ko kjan nge inaa thue, ko ikuetuxinꞌa na̱ thue mee, mexinxin Isaac binchegiꞌin nunthe mee Rehobot, ko mee ruchro «Thi nunthe thi xruꞌin kensen kayakuen», mexinxin ndachro inaa: «Ndo Dio jai chjaa ná jié nunthe ko sinthanchaon ná ngain thi tsenga ná.»
23Isaac bachrjexin nthiꞌa ko sakjui inaa nunthe biꞌin Beerseba. 24Ko thi̱e biji Isaac ngain nunthe mee kununxiꞌin Ndo Dio ko ndachro Ndo:
«Jaꞌan Ndo Diue ndudaa Abraham,
ko xraonꞌa ixin jaꞌan riꞌi ngajin.
Ko sinthanchaon ko sinthatsjé chujnia
ixin thjuaa Abraham, xi nchexrana.»
25Kuthimejan nthiꞌa Isaac binchechjian naa giꞌi jitangi, ko nthiꞌa binchesayexin Ndo Dio. Kai ngain nunthe mee bakeꞌe nchia ndaasin bexiꞌin, ko ni nchexree nge na̱ inaa thue dachrjedoꞌo jinda.
Isaac ko Abimelec kjuathexin na̱
26Ko naa nchaꞌon Abimelec juixin Gerar ixin rukjao Isaac, ko juiaꞌo Ahuzat, xi jian bagakao, ko Ficol baketuꞌan ngain ni bagenda rajnee Abimelec. 27Ko Isaac ndachro ngain na̱:
—Ja̱ rinaoꞌa ni ra ko bengi ni ra, ¿unda juiꞌi ra bitsjena ni ra?
28Ko jeꞌe na̱ batheꞌe na̱:
—Bikon ná ixin Ndo Dio jii ngajin, mexinxin xraxaꞌon ná ixin jaꞌa ko jaꞌan ná nchao tsjauthexin ná. Ko thi tsjauthexin na̱ mee jiꞌi: 29Xruꞌin jianꞌa nchena ni ra, ixin jaꞌan ná xruꞌin jianꞌa binthaꞌa ra; ko jaꞌa ra jian binthe ra ngajin ná ko kuanchrjanda ra bachrje ra are jaꞌa ra binao ra. Ko jai Ndo Dio jinthanchaon Ndo.
30Kuthimejan Isaac binchechjieꞌen na̱ naa kiai ko binthene na̱ ko biꞌi na̱. 31Ko nduexin nduuyo are bingathjen na̱ ko kjuathexin na̱ inchin ndachro Abimelec. Ko Isaac bikanxin na̱ ngatja nthiꞌá ko jeꞌe na̱ chee na̱ sakjui na̱.
32Ko xrajeꞌo nchaꞌon yaa binthekii ni nchexree Isaac, ni nge thue ixin kjuee na̱ jinda ko ndachro na̱ ixin bithja na̱ jinda. 33Ko Isaac binchegiꞌin thue dachrjedoꞌo jinda mee Seba, ko jiꞌi ruchro “thi kjuathexin ná”, ko mexinxin ngain nchaꞌon jai, rajna mee xra diꞌin Beerseba.
34Are Esaú bechunda yoo kan nano bekaꞌo Judit, mee kjui xeꞌen Beeri, naa xii nunthe heteo. Kai bekaꞌo Basemat xeꞌen Elón kai naa xii heteo. 35Ko yui nchrii teꞌi jianꞌa bincheꞌe ko jiꞌi bancheñao Isaac ko Rebeca.
Currently Selected:
Génesis 26: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
