Génesis 33
33
Jacob ko Esaú binchebagangeꞌe choo ñao
1Ko Jacob kjín bikunxin juii Esaú ko juiaꞌo noo renkia ni xii, mexinxin jeꞌe kunchjeeya chjan ngain Lea ko ngain Raquel ko ngain kayui nchri nchexree nchri chriꞌi. 2Ko basinkjixin nchra ko saꞌo bakeꞌe kayui nchri nchexree chriꞌi kunixin xeꞌen nchra, kuthejan Lea kunixin xeꞌen, ko bincherruee Raquel kunixin xeꞌen diꞌin José. 3Kuthimejan Jacob bitauꞌen nchra nthiꞌá. Ko are uchiaon jidetan xan choo, Jacob kuexiꞌin bisetaꞌa nunthe yaato nthiꞌá, ko jiꞌi kjuaguxin ixin runcheꞌe thi rundachro xan.
4Ko Esaú kuinga bigetan xan choo ko kjuua thusin xan ko kuetuxin xan ixin chjee xan juajna ko kayui binthetsjanga. 5Kuthimejan bikon Esaú ni nchrii kunixin xeꞌen nchra, ko banchiangi:
—¿Kensen ni teꞌi?
Ko Jacob batheꞌe:
—Ndo Dio binchenchaon na ko chjana chjan teꞌi.
6Ko kayui nchri nchexree chriꞌi Jacob kunixin xeꞌen nchra binthekunchieꞌen nchra ko bisetaꞌa nchra nunthe. 7Kuthimejan kunchieꞌen Lea kunixin xeꞌen ko bisetaꞌa nunthe xraa nchri kanxin ko juexinxin kunchieꞌen Raquel ko xeꞌen, xan diꞌin José ko kai bisetaꞌa nunthe. 8Ko banchiangi Esaú:
—¿Keꞌe xraxaon sincheꞌe kunixin kain kuxiigo betan ngatja nthiꞌá?
Ko batheꞌe Jacob:
—Kuxiigo yaa ruchjaꞌa ixin sinchetjañana ko jian sincheꞌe ngajin.
9Aro Esaú ndachro:
—Icha jian, dithuaꞌa kuxigua, jaꞌan anto tsjé ku chunda.
10Ko Jacob xra ndachro:
—Nthatsaꞌan ñao, ja̱ binchetjañana, dayeꞌe kain kuxiigo teꞌi, ixin are ridikon jaꞌa, xraa inchin ridikon Ndo Dio. 11Nthatsaꞌan ñao dayeꞌe thi bikian ixin sinthathuꞌan ixin Ndo Dio anto tsjé chjana Ndo ko chunda kain thi rugundana.
Ko Jacob anto binchetseꞌen ñao Esaú, mexinxin bayee thi bajon Jacob. 12Ko ndachro Esaú:
—Unchao, satsjixin ná nthiꞌi ko jaꞌan sitaon nthiꞌá.
13Aro Jacob ndachro:
—Nchana, detsjeꞌe, xan nchinchinchjan tuin tunchrjen xan, ko kuxiigo kai tenchegangi ba xeꞌen ba ko ja̱ seka ba nguii naa nchaꞌon ndasinthegeꞌen kain ba. 14Icha nchao ditaon nthiꞌá, ko jaꞌan ná yao rurruaꞌa ra ixin yauchjan chrji xan nchinchinchjan ko kuxiguna ná, ko usaso na̱ nthiꞌa ngain nunthe Seir.
15Ko ndachro Esaú:
—Nchao, aro tsinthua ngajin kanxion chujni juii ngajin na, ixin tsjaguꞌa ra na̱ nthiꞌá ko senda ra na̱.
Aro Jacob batheꞌe:
—¡Nthatsaꞌan ñao, taxinꞌa na juachjaon!
16Ko nchaꞌon maꞌo Esaú sakjan nunthe Seir. 17Aro Jacob sakjui ngain nunthe Sucot, ko nthiꞌa binchechjian nchianduꞌa ko nchianduꞌe kuxigue, mexinxin nunthe mee binchegiꞌin Sucot.
18Ko Jacob juixin nunthe Padan-aram ko xruꞌin kuꞌen ko jian biji ngain rajna Siquem, thi jii ngain nunthe Canaán, ko chiaon rajna Siquem kuengathjen nchia ndasiꞌin. 19Ko nunthe binchechjiantaꞌa nchia ndasiꞌin, kueꞌna nunthe ngain ni nchianduꞌe Hamor, thi kjui ndudee Siquem ko kjuenga ꞌna naa renkia tumi chia plata. 20Ko nthiꞌa binchechjian naa giꞌi jitangi ixin sinchesayexin Ndo Dio, ko binchegiꞌin: El-Elohe-israel, ko jiꞌi ruchro “Thi Diue ni Israel.”
Currently Selected:
Génesis 33: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
