Génesis 37
37
1Kuthimejan Jacob tabeꞌe ngain nunthe Canaán, thi beꞌe ndudee inchin naa chujni jeꞌa nuntheꞌe. 2Ko jiꞌi thi kuꞌen Jacob ko chujnii.
Thi kuxinxin José
Are José, xeꞌen Jacob, bechunda theyaato nano bakingaria kulekue ndudee, jeꞌe kunixin xan choo, xeꞌen Bilha ko xeꞌen Zilpa, nchri bechunda Jacob. Ko José banchenuꞌe ndudee kain thi jianꞌa bancheꞌe xan choo.
3Ko Israel icha thjueꞌe José ke xan icha, ixin ujoon are guan xan. Mexinxin jeꞌe binchechjieꞌen xan naa luntho tsjé naꞌo ixin betsaa xan. 4Aro kain xan choo anto baningakuꞌen xan ko banichjeꞌa xan ixin bagikon xan ixin ndudee xan icha bathjueꞌe José.
5Naa nchaꞌon José kuxinxin, ko kuekiin xan choo thi kuxinxin, ko jeꞌe xan icha guñauꞌe xan, 6ixin ndachro ngain xan:
—Thiꞌin ra, tsekiꞌan ra thi kuxinanxin. 7Kuxinanxin ixin kain ná tate ná ngataon jngi, ko tethiathe ná kachji, ko thi tjua jaꞌan binthachjian xendua ko nao bengathjen, aro tjua binchechjian ra jaꞌa ra binthendajin tjua binthachjian jaꞌan, ko binthesee ka ixin binchesayeꞌe thi tjua binthachjian.
8Kuthimejan xan choo José batheꞌe xan:
—¿Jaꞌa tuenao ixin rukjan reyna ná, ko tsetuna ni ra?
Ko icha guñauꞌe xan ixin kexreen bakekin thi kuxinxin.
9Kuthimejan José kuxinxin inaa, ko kai kuekiin xan choo, ko ndachro:
—Thiꞌin ra, kjan kuxinanxin inaa, ko bikon nchaꞌon, kunithjao ko thejngo kunutse ixin binthesee ngajin.
10Ko are José kuekin kuthachrin jiꞌi ngain ndudee ko ngain xan choo, ndudee binchesatheꞌe ko ndachro Ndo:
—¿Keꞌe rinao rundachro kunixin thi kuxianxin jiꞌi? ¿A jiꞌi ruchro ixin janaa ko jaꞌan ko kain xan choo rukjan ná ni nchexraa jaꞌa?
11Ko kain xan choo bakunchjueꞌe xan ngain, aro ndudee xan juxon baxraxaon ndo ixin keꞌe ruchro thi kuxinxin xeꞌen.
Kuchji José
12Kuthimejan xan choo José sabikao xan kuleko binea ba ngain nuntheꞌe rajna Siquem. 13Ko Israel ndachro ngain José:
—Jaꞌa unuꞌa ixin xan choo tethingaria xan ku ngain nuntheꞌe Siquem. Ko rinaꞌo ixin jaꞌa tsji sitsjeꞌe xan.
Ko José batheꞌe:
—Jaan, rinaꞌo tsji.
14Ko ndachro Israel:
—Nchao, thji ditsjeꞌe kexreen te xan choo ko kain ku, ko kjan tuin ixin sikuꞌna juajna.
Ko Israel ruaꞌan José ko bachrjexin chjagee nunthe Hebrón ko biji ngain rajna Siquem, 15ko tabichrue are sajithji. Ko betan naa thi xii ko ndachro xa:
—¿Keꞌe rithjee?
16Ko ndachro José:
—Rithjee xan chian ko kue xan. ¿Anchao rundachjejin na suixin thinoo te xan?
17Ko ndachro thi xii:
—Usakjuixin xan nthiꞌi. Aro kuian ndachro xan ixin sarrukji xan ngain rajna Dotán.
Ko José sabikjee xan choo ko bithja xan nthiꞌa Dotán. 18Ko xan choo kjínxin bikon xan jithii José, ko daka binthekjuauthexin xan ixin kexreen ruguen xan. 19Ko ndache choo xan:
—¡Unthimee juii thi anto tuxinxin! 20Xrakui ra suen ná xan, kuthejan sankaa ná xan ngain naa thue. Kuthimejan rundachro ná ixin naa kuxiigo chrintho jii ngaꞌa jna ndajuine xan. ¡Ko sukon ná ako sikuꞌen thi kuxinxin xan!
21Are Rubén kuiꞌin jiꞌi, jeꞌe nichjaxin José ko ndachro:
—Suenꞌa ná xan. 22¿Unda tsingo ra jnii xan? Dankaa ra xan ngaa thue xema jiꞌi, thi jii ngain nunthe xema jiꞌi, aro ncheniꞌa ra xan.
Ko Rubén ndachro jiꞌi ixin xruꞌin rukuꞌen José, kuthimejan rugikaan ngain ndudee. 23Aro José, are biji thi te xan choo, jeꞌe xan bantsjeꞌe xan thi jitsaa, 24ko tse xan ko bankaa xan ngaa thue xruꞌin jinda beria. 25Kuthimejan tabinthe xan ixin juine xan.
Ko are xendua xan bikon xan juii tsjé chujni, ko mee ni ismaelita, ni juixin rajna Galaad, ko kukamellue na̱ jiyama ba ndaxrajni, chingue nthaa ko tsjuka ixin tedikao ngain nunthe Egipto. 26Kuthimejan Judá ndache xan choo:
—¿Keꞌe sacha ná ja̱ suen ná xan choo ná, ko kexreen tsema ná ixin ndabeꞌen xan? 27Icha jian sinthukji ná xan ngain ni ismaelita ko suenꞌa ná xan, ko jaꞌa ra nuꞌa ra ixin kai xan choo ná.
Ko kain xan kjuathexin xan ixin thi bincheꞌe xan. 28Ko are tedatho ni ismaelita, ni theꞌna ko nchekji, jeꞌe xan binthegantsjexin xan José ngain thue ko binchekji xan José ixin kan chia plata. Ko ni ismaelita sabikao na̱ xan ngain nunthe Egipto.
29Kuthimejan Rubén kjan ngain thue ko ibithjaꞌa José ngaxiꞌin, ko anto kuaa juachjaon ko kuinchje lunthue. 30Ko Rubén kjan thi te xan choo ko ndachro ngain xan:
—¡Xan choo ná ikoꞌa xan! ¿Anchee keꞌe sinthaꞌa?
31Kuthimejan kua xan luntho bagetsaa José, ko kuinga xan jnii naa kulekuchjan bintheguen xan, 32ko bikao xan luntho ngain ndudee xan ko ndachro xan: «Bithja ná luntho jiꞌi, degatsuan a lunthue xaꞌan o naꞌi.»
33Ko Jacob tuin batsuan luntho ko ndachro: «¡Jaan, lunthue xanꞌna! Chrujan kuxiigo chrintho te ngaꞌa jna kjuaaya ba ko juine ba xan.» 34Ko Jacob anto tabechiin ko kuinchje lunthue ko bengaa luntho thi, ko tsjé nchaꞌon kuaxin juachjaon ko tsjangaxin José. 35Kain xeꞌen xan nchrii ko xan xii binao xan rugantsjeꞌe xan juachjaon ndudee xan, aro Jacob binaoꞌa kuiꞌin xan. Ko anto batsjangaxin xeꞌen ko baganchia rugeꞌen tuin ixin sarrukji ngain xan.
36Ko are ni madianita, ni banchekji ko bakeꞌna, biji na̱ Egipto, binchekji na̱ José ngain naa xii biꞌin Potifar, thi baketuꞌan ngain ni nchexree faraón, ko kai baketuꞌan ngain ni bakji bakjaaya.
Currently Selected:
Génesis 37: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
