Génesis 41
41
José ndachro keꞌe ruchro kuthachriin faraón
1Ko batho yoo nano, kuthimejan faraón kuxinxin ixin tajingathjen ngandeꞌe jinda jithinga diꞌin Nilo. 2Ko ngathe kuthachrin bikon ixin ngain jinda jithinga, bachrjexin yaato kuxinthaa kunaꞌa anto nthanthao ba ko chrjuin te ba, ko tenea ba nthiꞌa. 3Kai bikon bachrjengixin nda Nilo iyaato kuxinthaa kunaꞌa lantha ko chrjuinꞌa te ba ko tabinthe ba ngakee ku icha. 4Kuthimejan thi ku chrjuinꞌa te ko anto lantha, tajuine thi ku nthanthao.
Kuthimejan faraón xingameꞌe, 5aro kjan tabejua ko kuxinxin inaa. Ko bikon naa kachji jiyama yaato ninchjeꞌen ko chrjuin diguan. 6Aro tuenxin ka jiꞌi bachrje iyaato ninchjan dixeꞌnthe ko chrjuinꞌa te, ixin dinchexenthe chrintho thixin nu thi chrinxin nchaꞌon, thi jii nunthe xema ko xruꞌin jii. 7Ko thi yaato ninchjan dixeꞌnthe tajuine thi yaato ninchjan chrjuin te.
Ko faraón xingamenkjio, ko kunuꞌe ixin jeꞌo naa kuthachrin. 8Aro nduexin faraón jita juachjaon ixin kuthachrin, mexinxin bayee kain ni datsuꞌen kuthachrin, ni beꞌe Egipto, ko kuekiin na̱ thi kuxinxin, aro xruꞌin ni ndachro keꞌe ruchro kuthachrin mee. 9Kuthimejan thi thetuꞌen ni dajon vino, ndachro ngain faraón:
—Jaꞌan uxraxaꞌon ixin anto jianꞌa binthaꞌa. 10Are suixin beguñao ngain thi baketuꞌen ni nchechjian niuthja ko ngajin na, ko kayui ná ruꞌan ni ra ngain thi baketuꞌan nduꞌa xiiso ixin biaxina ná, 11naa thi̱e thi baketuꞌen ni banchechjian niuthja ko jaꞌan kuxinanxin ná, aro kuthachrina ná jejee ruchro. 12Ko ngain nduꞌa xiiso beꞌe ngajin ná naa xan xii hebreo, thi kjui naa ni nchexree xi baketuꞌen ni bagenda suixin. Ko kuekian ná kuthachrina ná, ko ndachjejin ná thi ruchro kuthachrina ná. 13¡Ko kuꞌen kain thi jeꞌe ndachjejin ná! Jaꞌan kjan na ngain xrana, ko thi baketuꞌen ni banchechjian niuthja kuerianda na̱ ngain naa nthaa.
14Mexinxin xi faraón ruaꞌan xa bixrakua José, ko tuin bantsjexin na̱ ngain nduꞌa xiiso. Ko José kjiꞌin jaa ko xrarruꞌa ko bituxiꞌin lunthue ko kunchieꞌen ngathexin kon xi faraón. 15Ko faraón ndachro:
—Jaꞌan kuxinanxin ko xruꞌin kensen nchao ndachro keꞌe ruchro kuthachrina, aro kuian ixin jaꞌa are thiꞌin naa kuthachrin, nchao datsuꞌen keꞌe ruchro kuthachrin.
16Ko José batheꞌe:
—Jeꞌa jaꞌan nthaꞌa yaa; aro Ndo Dio nchao rundathjo Ndo keꞌe ruchro ixin ixruꞌin juachjaon seꞌe ngain ansean.
17Ko faraón ndachro ngain José:
—Ngain kuthachrina, jaꞌan tarringathjen ngadeꞌe nda Nilo, 18ko ngain jnda bachrjengixin yaato kuxinthaa kunaꞌa anto nthanthao ko chrjuin te, ko tenea ba ngain kachji ngandeꞌe nda. 19Ko tuenxin ku teꞌi, jirrue iyaato kuxinthaa anto lantha ko chrjuinꞌa te ba. ¡Xruꞌin nchaꞌon bikon kuxinthaa anto chrjuinꞌa te ngain nunthe Egipto! 20Ko kuxinthaa lantha teꞌi, tajuine thi yaato ku nthanthao bikon saꞌo, 21ko maski juexin juine ba thi ku nthanthao, xruꞌin kensen nchao rugithikaon, ixin xra lantha ba inchin beꞌe ba.
«Ko xingamana, 22aro kuthimejan kjan kuxinanxin ixin naa kachji jiyama yaato ninchjeꞌen chrjuin jitsama nua ko chrjuin tedangi. 23Aro tuenxin ka jiꞌi bachrje iyaato ninchjan dixeꞌnthe ko chrjuinꞌa te, ixin dinchexenthe thi chrintho thixin nu thi chrinxin nchaꞌon. 24Ko thi yaato ninchjan dixema tajuine thi yaato ninchjan chrjuin te. Ko jaꞌan kuekin jiꞌi ngain ni datsuꞌen kuthachrin, aro xruꞌin kensen nchao ndachro keꞌe ruchro kuthachrina.»
25Kuthimejan José batheꞌe faraón:
—Kayui kuthachrin barichunda suixin, xrajeꞌo ruchro. Ndo Dio binthanuꞌa Ndo thi sincheꞌe Ndo. 26Thi yaato kuxinthaa kunaꞌa chrjuin te, mee ruchro yaato nano, ko xrajeꞌo ruchro thi yaato ninchjeꞌen kachji chrjuin te. 27Ko thi yaato kuxinthaa kunaꞌa chrjuinꞌa te ko bachrje tuenxin kunthao te, kai ruchro yaato nano. Ko thi yaato ninchjan dixeꞌnthe ko chrjuinꞌa te, ixin dinchexenthe chrintho thixin nu thi chrinxin nchaꞌon, mee ruchro ixin seꞌe jintha yaato nano. 28Ko jiꞌi ruchro thi bekuxianxin: Ndo Dio ubindathjo Ndo thi sincheꞌe Ndo. 29Tsii yaato nano anto chrjuin suan ngataꞌa nunthe Egipto. 30Aro kuthimejan, tsii jintha yaato nano. Ko ndarrutjañeꞌe na̱ thi anto chrjuin baguan ngain nunthe Egipto ixin anto suji jintha tsii, ko chujni nguii nunthe tangi sathueꞌe na̱. 31Anto jié jintha seꞌe ko chujni iruxraxaonꞌa na̱ thi nano anto chrjuin guan. 32Suixin yoo nthiꞌa xrajeꞌo bekuxianxin, ko mee ruchro ixin Ndo Dio undachro Ndo thi sincheꞌe Ndo, ko utuin sikuꞌen.
33«Mexinxin, atho jian ixin suixin dekjee naa xii chunda jian juaxraxaon ko jian ncheꞌe, ko degakee ixin tsetuꞌan ngain nunthe Egipto. 34Kai degakee chujni nguii nunthe Egipto ixin satsetauꞌen na̱ naa thi naunxin chjeeya tsanda chujni ixin sechjian, ko jiꞌi sincheꞌe na̱ ngain thi yaato nano anto suan. 35Ko jeꞌe na̱ tsjejo na̱ kain nua kachji mee ngain thi yaato nano, ko sechjian ngain tsjé nchia jié, thi suixin sakee chujni ixin senda ko sachrjekuaꞌa nua ixin sine kain rajna. 36Ko jañaa nua kachji sechjian, sathuexin jintha ko senꞌa chujni nunthe Egipto, thi jintha tsunchrjeꞌen yaato nano.»
José thetuꞌan nunthe Egipto
37Ko faraón ko ni thjengijna, binchexruxiꞌin na̱ thi jian nichja José. 38Ko ndachro faraón ngain ni thjengijna:
—¿A xrasinthoo ná inaa xii, inchin xii jiꞌi, thi chunda espiritue Ndo Dio?
39Ko kai ndachro ngain José:
—Xruꞌin inaa chujni anto jian juaxraxauen inchin jaꞌa, ko Ndo Dio thi ndathjo kain jiꞌi. 40Jaꞌa thi tsetuꞌan nchiania ko kain thi richunda, ko kainxin chujni nuntheꞌna sithikaon na̱ thi tsetuꞌen na̱. Aro jeꞌo jaꞌan thi icha renthe na ke jaꞌa. 41Tsjexin, jaꞌan ridakee jaꞌa inchin xi nchiixin nguii nunthe Egipto.
Ko are faraón ndachro jiꞌi, 42bantsje kuchianingo bechunda raa, ko bakeꞌe ba ngain raa José. Kuthimejan kuetuꞌan ixin runchengaa na̱ José luntho anto renthe ko kuenthia na̱ chia oro ngain thusin. 43Ko faraón banchieꞌe José ixin rukani ntha thingajin kunxin ko rurruee ntha jingaa faraón, ko nguii thi bakji José naa chujni bakuyao suji: «¡Dinthethuxin ra!». Ko jañaa faraón bakeꞌe José ixin kuetuꞌen nguii nunthe Egipto.
44Kuthimejan ndachro faraón ngain José:
—Maski jaꞌan faraón na, aro xruꞌin chujni chrujan sincheꞌe ja̱ jaꞌa sajonꞌa juachaxin.
45Ko faraón binchegiꞌin José, Zafnat-penea; ko chjee Asenat ixin bekaꞌo, ko nchrii mee kjui xeꞌen xi daana diꞌin Potifera, danee rajna On. Kuthimejan José kjui bigatsuan nguii nunthe Egipto. 46José bechunda kan ko the nano are bikao na̱ ngathexin kon faraón, rey nunthe Egipto.
Ko José bachrjexin nchianduꞌa faraón ko sakjui nguii nunthe Egipto. 47Ko ngain thi yaato nano anto guan nguii ngataꞌa nunthe, 48José kuetuꞌan batsetauꞌen na̱ thi naunxin chjeeya nua kachji ngain kain ni rajna ko kuenchjiꞌan nua. Ko ngain kain rajna kuenchjiꞌan nua kachji, thi bagatse na̱ ngain kain jngi beꞌe ngandajin rajna mee. 49Ko José kjuejo anto tsjé nua kachji, inchin nchise jii ngandeꞌe ndachaon, ko ikuentaxinꞌa kain thi bakjejo, ixin anto tsjé nua ko ichruꞌa kuekin.
50Are xra kuexinꞌa nano rugeꞌe jintha, José bechundakaꞌo Asenat yoo chjan. 51Xan saꞌo biꞌin xan Manasés ixin ndachro: «Ndo Dio bincheꞌe ixin ndatjañana kain thi tangi ko juachjaon binchegatho na ni nchianduꞌa ndudana.» 52Ko xan yuxin binchegiꞌin xan Efraín, ixin ndachro: «Ndo Dio chjana juachaxin richunda xanꞌna, ngain nunthe jiꞌi, thi anto tangi bathua.»
53Ko batho thi yaato nano anto chrjuin guan ngain nunthe Egipto, 54ko kuexiꞌin thi yaato nano rugeꞌe jié jintha, jañaa inchin ndachro José, ko jié jintha beꞌe ngain nunthe bendajin Egipto, aro ngain nunthe Egipto beꞌe thi bane na̱. 55Aro batho nano ko jintha kai biji ngain nunthe Egipto, ko kain chujni egipcio biganchia na̱ nua kachji ngain faraón, ko faraón ndachro ngain chujni: «Thji ra ngain José ko ncheꞌe ra thi jeꞌe rundathjo ra.»
56Ko are atho suji beꞌe jintha nguii nunthe Egipto, José banthjee kain nchia bechjian nua kachji ixin runchekjiꞌi ni egipcio, ixin anto takuchjunga thi bane chujni. 57Uatho kuchjunga thi bajine chujni, mexinxin chujni tsjé nunthe juii na̱ ngain nunthe Egipto ixin bakenee na̱ José nua kachji.
Currently Selected:
Génesis 41: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
