Génesis 45
45
José ndachro kensen jeꞌe
1Ko José ichroꞌa tenkua ngathexin kon kain na̱, mexinxin kuyao suji ko ndachro ngain ni nchexree: «¡Dachrje ra kain ra!» Ko ixruꞌin ni nchexree beꞌe ngain jeꞌe are ndachro ngain kain xan choo kensen jeꞌe.
2Ko anto tsjanga ko ni egipcio kuiꞌin na̱ jiꞌi, ko kai kunuꞌe faraón. 3Ko José ndachro ngain xan choo:
—¡Jaꞌan José na! ¿A xra jichon ndudana?
Aro kain xan choo anto binthexraon xan, mexinxin chroꞌa binthegatheꞌe xan. 4Ko José ndachro inaa:
—Nthatsaꞌan ñao ra tunchieꞌen ra ngajin.
Ko are jeꞌe xan binthekunchieꞌen xan, jeꞌe ndache xan:
—Jaꞌan José na, xan choo ra, thi jaꞌa ra binchekji ra ngain nunthe Egipto, 5aro taꞌa ra juachjaon ko dinthechinꞌa ra ixin binchekji ni ra nthiꞌi. Ndo Dio thi ruaꞌan na nthiꞌi ko jañaa kjuengijnaxin ná Ndo kain ná, ko tsjé chujni benꞌa. 6Uyuxin nano jii jintha ko xraa ditjaan inaꞌo nano, ko xruꞌin seꞌe ko maski singa xruꞌin suan. 7Ndo Dio ruaꞌan na Ndo nthiꞌi icha saꞌo ke jaꞌa ra, ko jañaa senꞌa ra jaꞌa ra ko chujnia ra ko ni sachrjeninxin ra, ko jañaa Ndo Dio tsjaago thi jié juachaxin chunda ixin tsjengijna ra. 8Ko Ndo Dio bincheꞌe Ndo ixin jaꞌan juiꞌi nthiꞌi, ko jeꞌa jaꞌa ra bincheꞌe ra yaa, ko jeꞌe Ndo chjana Ndo juachaxin thetuꞌan nguii nunthe Egipto, ko kai thjengijna faraón. 9Jai dingaxin ñao ra thji ra ngain ndudana ko ndache ra ndo: “Jaꞌin ndachro xaꞌan xan José: Ndo Dio bakeꞌe na ixin tsetuꞌan nguii nunthe Egipto. ¡Dekunchrjanꞌa ko tuin sitsjena! 10Ko sejiꞌi suixin, kain xaꞌan, kain xanthia ko kain kuxigua ko kain thi chunda suixin ixin sinthe ntha ngain nunthe Gosén, ko chiaon sunthexin ná. 11Ko nthiꞌi ruchjaꞌa ra kain thi sinthe ntha, suixin ko kain ni chujnia ntha; ixin xra seꞌe jié jintha inaꞌo nano, ko ja̱ siꞌa ntha suixin ko ni nchiandui ntha sinchetjaan ra kain.” 12Xan chian Benjamín ko jaꞌa ra tedikon ra ixin ndua jaꞌan José ko tethiꞌin ra thi jaꞌan rindachrjan. 13Ko thekiꞌin ra ndudana kain juachaxin chunda nthiꞌi Egipto, ko kain thi bikon ra. ¡Tuin thji ra dirrueꞌe ra ndudana!
14Ko José ko Benjamín kjuua choo ko binthetsjanga. 15Kuthimejan José kuetuxin kain xan choo ixin chjee xan juajna, ko anto tsjanga are kjuua kain xan choo. Kuthimejan xan choo José ukuexiꞌin xan nichjee xan ixin ixruꞌin juaxraon bechunda xan.
16Ko kai chujni beꞌe nchianduꞌa faraón kuiꞌin na̱ ixin nthiꞌa beꞌe kain xan choo José, ko faraón ko kain chujnii chee na̱ are kuiꞌin na̱ jiꞌi. 17Ko faraón ndachro ngain José:
—Ndache xan choo sincheka xan kuluchuꞌe xan ko rukjan xan ngain nunthe Canaán, 18ko tsiaꞌo xan ndudaa ra ko chujnii xan. Ko jaꞌan ruchjaꞌa na̱ nunthe icha jian jii ngain nunthe Egipto, ko sine na̱ kain thi jian dajon nunthe jiꞌi. 19Kai thetuꞌen xan ixin nthiꞌi Egipto sikauxin xan ntha thingajin kunxin ixin tsiaꞌo xan chriꞌi xan ko nchinchinchjeꞌen xan ko ndudaa ra, ko ncho thii na̱. 20Ko tsaꞌa na̱ juachjaon ixin thi tsinthueꞌe na̱ nthiꞌa, ixin nthiꞌi jeꞌe na̱ ruchunda na̱ kain thi jian jii ngain nunthe Egipto.
21Ko jañaa bincheꞌe xeꞌen Israel, ko José bajon ntha thingajin kunxin inchin ndachro faraón, ko bajon thi rujine xan ngatja nthiꞌá. 22Kai bajon luntho narua ngain kain xan choo, aro ngain Benjamín bajon nii renkia chia plata ko naꞌo luntho rugengaa. 23Ko José ruaꞌan ngain ndudee the kulucho jiyama thi icha jian chunda nunthe Egipto, ko the kulucho kunaꞌa jiyama nua kachji, niuthja ko icha thi sine Jacob ngatja nthiꞌá are rukii. 24Ko are José bikanxin xan choo ngatja nthiꞌá, jeꞌe ndache xan:
—Thetoꞌa ra nguii satsji ra ngatja nthiꞌá.
Ko sabinthekji xan. 25Ko bachrjexin xan Egipto, ko kjan xan thi beꞌe ndudee xan ngain nunthe Canaán. 26Kuthimejan are kuekiin xan ndudee xan ixin José xra jichon, ko jeꞌe baketuꞌan nunthe Egipto, Jacob ibenueꞌa keꞌe rundachro, ko xratao bithuꞌe ixin bithikaonꞌa thi ndache na̱. 27Ko are xra ndachro xan kain thi ndachro José, ko bikon ndo kain ntha thingajin kunxin ruaꞌan José ixin tsjixin Jacob, jeꞌe anto chee. 28Kuthimejan Jacob ndachro: «¡Nchao remee, xanꞌna José xra jichon xan! Ko tsji sitsjaa xan, kuthimejan nchao seꞌen na.»
Currently Selected:
Génesis 45: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
