Génesis 48
48
Jacob nchenchaon Efraín ko Manasés
1Are batho ikanxion nchaꞌon binchenuꞌe na̱ José ixin ndudee anto beniꞌi ndo. Mexinxin José kjui bitsjeꞌe ndudee, ko bikao kayui xeꞌen, xan Manasés ko Efraín. 2Are ndache na̱ Jacob ixin juii José ixin bitsjeꞌe, tanuinka bincheꞌe xendua ixin betaꞌa ngain sauen. 3Ko Jacob ndachro ngain José:
—Ndo Dio, Ndo chunda kainxin juachaxin kununxina Ndo ngain Bet-el, ngain rajna kai diꞌin Luz ngain nunthe Canaán, ko nthiꞌa binchenchaon na Ndo. 4Ko ndachjejin na Ndo: “Tsjexin, jaꞌan sinthaꞌa ixin jaꞌa sarichunda tsjé chjan, ko chujni sachrjeninxin jaꞌa tsunchjianxin tsjé rajna yeye, ko nunthe sinthe na̱ tsji nuntheꞌe na̱ kainxin nchaꞌon.” 5Ko jai, kayui xaꞌan, xan Efraín ko xan Manasés, xan bintheguanxin nthiꞌi Egipto, are xra bariꞌa ngajin ngain nunthe jiꞌi, xan teꞌi tekininxin na xan jaꞌan, jañaa inchin Rubén ko Simeón. 6Ko are sarichunda icha chjan, xan yaa tsji xaꞌan, ixin Efraín ko Manasés kai ruchunda xan, thi ruchjeyeꞌe xanꞌna. 7Are jaꞌan kjanxin na Padan-aram, ndabeꞌen janaa Raquel ngain nunthe Canaán, chiaon rugaso ná Efrata, ko nthiꞌa kjuabaa jan ngatja nthiꞌá Efrata, thi rajna jai diꞌin Belén.
8Ko bikon Jacob kayui xeꞌen José, ko banchiangiꞌi:
—¿A xaꞌan xan teꞌi?
9Ko batheꞌe José:
—Jaan, xan teꞌi xan chjana Ndo Dio nthiꞌi Egipto.
Ko Jacob ndachro:
—Nthatsaꞌan ñao, nchechieꞌen xan icha ngandaxina, ixin sinthanchaon xan.
10Jacob uatho nthaxii ko ibagikonꞌa jian. Mexinxin José binchechieꞌen xeꞌen ngakee ndudee, ko jeꞌe ndo kuetuxin ndo xan ko kjuua ndo xan. 11Kuthejan ndachro ngain José:
—Jaꞌan xraxaonꞌa ixin rukjan na rugikon jaꞌa, aro jai Ndo Dio kai chjana Ndo juachaxin bikon xaꞌan.
12José binthjianxin kayui xeꞌen ngataꞌa ndajuchjiꞌi ndudee, ko bisetaꞌa nunthe. 13Kuthejan bakeꞌe José kayui xeꞌen ngathe kon Jacob, ko Efraín bikauxin ngain rajianxin ko Manasés ngain rajngunxin. Ko jañaa Efraín bithuꞌe nu rajngunxin Jacob ko Manasés nu rajianxin. 14Aro Jacob bakeꞌe rajian ngain Efraín thi icha nchiin, ko rajngo bakeꞌe ngataꞌa jaa Manasés, maski Manasés thi saꞌo. 15Ko jaꞌin ndachro are binchenchaon José:
«Thi Ndo Dio bithikaon
Ndudachriꞌna Abraham ko ndudana Isaac,
Ko jithjengijna na Ndo kainxin nchaꞌon richon.
16Ko thi ángel kjuengijna na ngain kainxin thi tangi bathua,
Jeꞌe sinchenchaon xan xii teꞌi.
Ko ixin jeꞌe xan ruxraxaunxin na chujni jaꞌan
Ko ndudachriꞌna Abraham,
Ko ndudana Isaac.
Ko ruchunda xan tsjé chjan
Ko tsutsjé chujnii xan ngataꞌa nunthe.»
17Aro José binchexruxinꞌa ixin ndudee bakeꞌe ndo rajian ngataꞌa jaa Efraín, mexinxin binthjian raa ndudee ngataxin jaa Efraín ko bakeꞌe ra ngataꞌa jaa Manasés. 18Ko ndache ndo:
—¡Naꞌi, pa, jañaa naꞌi! Jiꞌi xan saꞌo. Degakee rajian ngataꞌa jaa xan.
19Aro ndudee chroꞌa ndo bincheꞌe ndo jañaa ko ndachro ndo:
—¡Ununa! Ko kai jeꞌe sinchechjian naa nunthe jié. Aro xan choo xan, xan icha nchiin icha renthe seꞌe xan, ko chujni sachrjeninxin xan tsjé rajna sinchechjian na̱.
20Ko ngain nchaꞌon mee Jacob jaꞌin binchenchaon xan:
—Ko chujni sachrjeninxin na jaꞌan are sinchenchaon na̱ inaa chujni, jaꞌin rundachro na̱: “Ndo Dio sinthanchaon Ndo, inchin binchenchaon Ndo Efraín ko Manasés.”
Ko Jacob saꞌo bakeꞌe Efraín kuthejan Manasés. 21Kuthimejan Jacob ndachro ngain José:
—Tsjexin, jaꞌan ndaseꞌen na; aro Ndo Dio ngajin ra seꞌe Ndo ko sinthakjan ra Ndo ngain nuntheꞌe ni xranchrjeꞌan ra. 22Ko jaꞌan richjaꞌa icha tsjé ke xan choo: ruchjaꞌa jna Siquem, thi bantsjaa ni amorreo are kuetukiꞌan na̱ kunixin chiataade ko ntha chijno.
Currently Selected:
Génesis 48: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
