Génesis 7
7
Chrin suji
1Kuthimejan ndachro Ndo Dio ngain Noé: «Dixiꞌin jaꞌa ko kain ni nchiandui ngain barco, ixin ngayee kain chujni te ngain nunthe jiꞌi, jeꞌo jaꞌa thi jian ngathexin kon na. 2Ko ngakjan kain kuxiigo ndachrjan nchao sinthe ra, tse yaato kudaꞌa ko yaato kunaꞌa yoo ko yoo ku xrajeꞌo. Ko kain ku icha tse ra naa kudaꞌa ko naa kunaꞌa kai yoo ko yoo ku xrajeꞌo. 3Ko ngayee kain kunthua tjaganga ngajni tse yaato kudaꞌa ko yaato kunaꞌa yoo ko yoo ku xrajeꞌo ixin sitjanꞌa ba ngain nunthe. 4Ko satho yaato nchaꞌon, kuthejan jaꞌan sinthagania chrin ngataꞌa nunthe yoo kan nchaꞌon ko yoo kan thi̱e ko sinthatjaan kain thi jichon binthachjian ngataꞌa nunthe.» 5Ko Noé bincheꞌe jañaa inchin Ndo Dio kuetuꞌen.
6Noé bechunda inkjaon renkia nano are juii chrin suji ngataꞌa nunthe. 7Ko Noé bixiꞌin ngain barco jeꞌe ko kain xeꞌen ko chriꞌi ko kain nchri deindeꞌe. 8Ko kai bixiꞌin kain kuxiigo ndachro Ndo Dio ixin nchao sine na̱ ko kuxiigo chroꞌa sine na̱, ko kain kuxiigo chunda nene ko kain ku thingajintaon tseꞌe ngataꞌa nunthe. 9Ko kain kuxiigo jii, yoo ko yoo ba bixinkaꞌo Noé ngain barco, kudaꞌa ko kunaꞌa yoo ko yoo ku xrajeꞌo, jañaa inchin Ndo Dio kuetuꞌan Ndo.
10Ko batho yaato nchaꞌon, kuthimejan kuexiꞌin bitjangi nunthe chringi jinda ixin chrin suji. 11Ko are bechunda Noé inkjaon renkia nano, ngain kunithjao yuxin ko theyaato nchaꞌon, chrindoꞌo jinda chringi ndachaon ko chrintaon thi jikeꞌe nda, ko xiree ngajni. 12Ko bania chrin ngataꞌa nunthe yoo kan nchaꞌon ko yoo kan thi̱e. 13Ko ngain nchaꞌon yatuxin Noé bixiꞌin ngain barco kunixin Sem, Cam ko Jafet kunixin chriꞌi Noé, ko kanio chriꞌi xeꞌen, 14jeꞌe na̱ ko kain kuxiigo chrjikua ko te ngaꞌa jna ko kain kuxiigo nchekjanii ni ngain nchia, ko kain kuxiigo thingajintaon tseꞌe ngataꞌa nunthe ko kain kuxiigo chunda nene. 15Kain kuxiigo mee bixinkaꞌo Noé ngain barco yoo ko yoo ba. 16Ko kuxiigo binchechjian Ndo Dio bixiꞌin yoo ko yoo ba, naa kudaꞌa ko naa kunaꞌa, jañaa inchin Ndo Dio kuetuꞌen Noé. Kuthimejan kuejee Ndo thi bixinxin na̱ barco.
17Ko chrin suji kunchrjeꞌen yoo kan nchaꞌon ko jinda kuyee nda ngataꞌa nunthe, ko barco takjuintauꞌen nda. 18Ko jinda thinga kuyee nda ngataꞌa nunthe ko barco tajitauꞌen nda. 19Ko jinda anto kuyee nda ko tabitjangi kain jna icha yeye jii ngataꞌa nunthe. 20Ko yaato metro kuajinxin jinda ngatauꞌen kon jna icha yeye. 21Ko ndabeꞌen kain chujni ko kain kuxiigo: Kuxiigo techunda nene, kuxiigo nchekjanii ni ngain nchia, kuxiigo chrjikua ko te ngagaꞌa jna ko kuxiigo thingajintaon tseꞌe ngataꞌa nunthe. 22Ko kain thi beꞌe ngataꞌa nunthe ko bechon ndabeꞌen. 23Jañaa beꞌen kain thi bechon ngataꞌa nunthe: Chujni, kuxiigo yeye, kuxiigo thingajintaon tseꞌe ngataꞌa nunthe, kuxiigo techunda nene, kainxin ndabeꞌen. Bithuꞌe jeꞌo Noé ko kain thi bixinkaꞌo ngain barco. 24Ko nunthe ndabengangi chringi jinda naa renkia ko yoo kan ko the nchaꞌon.
Currently Selected:
Génesis 7: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
Génesis 7
7
Chrin suji
1Kuthimejan ndachro Ndo Dio ngain Noé: «Dixiꞌin jaꞌa ko kain ni nchiandui ngain barco, ixin ngayee kain chujni te ngain nunthe jiꞌi, jeꞌo jaꞌa thi jian ngathexin kon na. 2Ko ngakjan kain kuxiigo ndachrjan nchao sinthe ra, tse yaato kudaꞌa ko yaato kunaꞌa yoo ko yoo ku xrajeꞌo. Ko kain ku icha tse ra naa kudaꞌa ko naa kunaꞌa kai yoo ko yoo ku xrajeꞌo. 3Ko ngayee kain kunthua tjaganga ngajni tse yaato kudaꞌa ko yaato kunaꞌa yoo ko yoo ku xrajeꞌo ixin sitjanꞌa ba ngain nunthe. 4Ko satho yaato nchaꞌon, kuthejan jaꞌan sinthagania chrin ngataꞌa nunthe yoo kan nchaꞌon ko yoo kan thi̱e ko sinthatjaan kain thi jichon binthachjian ngataꞌa nunthe.» 5Ko Noé bincheꞌe jañaa inchin Ndo Dio kuetuꞌen.
6Noé bechunda inkjaon renkia nano are juii chrin suji ngataꞌa nunthe. 7Ko Noé bixiꞌin ngain barco jeꞌe ko kain xeꞌen ko chriꞌi ko kain nchri deindeꞌe. 8Ko kai bixiꞌin kain kuxiigo ndachro Ndo Dio ixin nchao sine na̱ ko kuxiigo chroꞌa sine na̱, ko kain kuxiigo chunda nene ko kain ku thingajintaon tseꞌe ngataꞌa nunthe. 9Ko kain kuxiigo jii, yoo ko yoo ba bixinkaꞌo Noé ngain barco, kudaꞌa ko kunaꞌa yoo ko yoo ku xrajeꞌo, jañaa inchin Ndo Dio kuetuꞌan Ndo.
10Ko batho yaato nchaꞌon, kuthimejan kuexiꞌin bitjangi nunthe chringi jinda ixin chrin suji. 11Ko are bechunda Noé inkjaon renkia nano, ngain kunithjao yuxin ko theyaato nchaꞌon, chrindoꞌo jinda chringi ndachaon ko chrintaon thi jikeꞌe nda, ko xiree ngajni. 12Ko bania chrin ngataꞌa nunthe yoo kan nchaꞌon ko yoo kan thi̱e. 13Ko ngain nchaꞌon yatuxin Noé bixiꞌin ngain barco kunixin Sem, Cam ko Jafet kunixin chriꞌi Noé, ko kanio chriꞌi xeꞌen, 14jeꞌe na̱ ko kain kuxiigo chrjikua ko te ngaꞌa jna ko kain kuxiigo nchekjanii ni ngain nchia, ko kain kuxiigo thingajintaon tseꞌe ngataꞌa nunthe ko kain kuxiigo chunda nene. 15Kain kuxiigo mee bixinkaꞌo Noé ngain barco yoo ko yoo ba. 16Ko kuxiigo binchechjian Ndo Dio bixiꞌin yoo ko yoo ba, naa kudaꞌa ko naa kunaꞌa, jañaa inchin Ndo Dio kuetuꞌen Noé. Kuthimejan kuejee Ndo thi bixinxin na̱ barco.
17Ko chrin suji kunchrjeꞌen yoo kan nchaꞌon ko jinda kuyee nda ngataꞌa nunthe, ko barco takjuintauꞌen nda. 18Ko jinda thinga kuyee nda ngataꞌa nunthe ko barco tajitauꞌen nda. 19Ko jinda anto kuyee nda ko tabitjangi kain jna icha yeye jii ngataꞌa nunthe. 20Ko yaato metro kuajinxin jinda ngatauꞌen kon jna icha yeye. 21Ko ndabeꞌen kain chujni ko kain kuxiigo: Kuxiigo techunda nene, kuxiigo nchekjanii ni ngain nchia, kuxiigo chrjikua ko te ngagaꞌa jna ko kuxiigo thingajintaon tseꞌe ngataꞌa nunthe. 22Ko kain thi beꞌe ngataꞌa nunthe ko bechon ndabeꞌen. 23Jañaa beꞌen kain thi bechon ngataꞌa nunthe: Chujni, kuxiigo yeye, kuxiigo thingajintaon tseꞌe ngataꞌa nunthe, kuxiigo techunda nene, kainxin ndabeꞌen. Bithuꞌe jeꞌo Noé ko kain thi bixinkaꞌo ngain barco. 24Ko nunthe ndabengangi chringi jinda naa renkia ko yoo kan ko the nchaꞌon.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.