San Juan 17

Jesús nchetseꞌen ñao Ndo Dio ixin chujni bakao

1Are Jesús juexin ndachro kain jiꞌi, jeꞌe tsjeꞌe ngajni ko ndachro:

—Suixin Ndudana, ubinkee horana, ko nchesayana jaꞌan thi Xaꞌan ixin jaꞌan kai sinthasayaꞌa. 2Suixin chjana juachaxin ixin tsetuꞌan ngain chujni jii nguixin nunthe, ko sinthakjan na̱ inaa chujni narua ko xruꞌin nchaꞌon seꞌen na̱ ixin Suixin bechjana na̱. 3Ko thi rukjan na̱ inaa chujni narua ko xruꞌin nchaꞌon seꞌen na̱, jiꞌi tsuꞌen are satsuan na̱ Suixin, thi ndua nakuaxinxon Ndo Dio, ko jaꞌan thi Cristo, thi Suixin ruaꞌan nthiꞌi ngataꞌa nunthe.

4’Jaꞌan binthasayaꞌa Suixin nthiꞌi ngataꞌa nunthe, ko juena binthaꞌa thi Suixin kuetunna. 5Ko jai nchesayana ngathexin kon Suixin, ko chjana xrajeꞌo juachaxin barichunda ngajin are xrabeꞌa nunthe.

6’Thi chujni Suixin kuinchieꞌe nthiꞌi ngataꞌa nunthe, ko bechjana, jaꞌan binthagatsuan na̱ kensen Suixin. Ko ni teꞌi kjui chujnia, ko Suixin bechjana na̱ ko jeꞌe na̱ bithikaon na̱ juajnaa Suixin. 7Ko jai unuꞌe na̱ ixin kainxin thi Suixin bechjana, juixin ngajin. 8Ko jaꞌan chjaꞌa na̱ juajna Suixin bechjana, ko jeꞌe na̱ bayée na̱ juajna, ko kuinxin na̱ jian ixin jaꞌan bachrjexin ngajin ko bithikaon na̱ ixin suixin ruaꞌan na.

9’Jaꞌan nthatsaꞌan ñao ixin jeꞌe na̱, jaꞌan rinthatsanꞌa ñao ixin kainxin chujni jii ngataꞌa nunthe, jaꞌan rinthatsaꞌan ñao ixin chujni Suixin bechjana, ixin chujni mee chujnia Suixin. 10Kain chujnina kai chujnia Suixin, ko jaꞌan kusayana ixin jeꞌe na̱.

11’Jaꞌan iseꞌa sariꞌi nthiꞌi ngataꞌa nunthe ixin rukjan na ngajin Suixin, ndo thjen ngajni, aro jeꞌe na̱ sithuꞌe na̱ nthiꞌi ngataꞌa nunthe. Nthatsaꞌan ñao, darinda na̱ kunixin juachaxian, ixin jeꞌe na̱ kainxin nchaꞌon ruxraxaon na̱ inchin nakua chujni, jañaa inchin Suixin ko jaꞌan, nakua ná. 12Ko kain nchaꞌon bariꞌi ngain na̱, jaꞌan barinda na̱ kunixin juachaxian, ko barinda na̱ jian ko xruꞌin ni bitjaan, jeꞌo bitjaan thi bikininxin rugitjaan, ixin jañaa xethjaxin thi Xroon dikji̱n na̱ juajnaa Suixin.

13’Aro jai rukjan na ngajin ko rindachrjan jiꞌi ixin xra riꞌi nthiꞌi ngataꞌa nunthe ko ruchee na̱ inchin jaꞌan chaꞌna. 14Jaꞌan chjaꞌa na̱ juajnaa Suixin, aro chujni dithikaonꞌa ngajin ningakuꞌen na̱ chujnia ná, ixin chujnia ná ijeꞌa nunthe jiꞌi na̱, jañaa inchin jaꞌan jeꞌa nunthe jiꞌi na. 15Jaꞌan rinthatsanꞌa ñao ixin satsjiuxin na̱ nunthe jiꞌi, jeꞌo rinthatsaꞌan ñao ixin thjengijna na̱ ko tanchrjandaꞌa na̱ ixin nchiijin sincheyeꞌe na̱. 16Ko jeꞌe na̱, ijeꞌa nunthe jiꞌi na̱, inchin jaꞌan kai jeꞌa nunthe jiꞌi na. 17Dantsjendaxin na̱ ngain kain thi jianꞌa kunixin thi ndua Suixin ndachro, ixin juajnaa Suixin mee thi ndua. 18Jañaa inchin Suixin ruaꞌan na ngayee chujni nunthe jiꞌi, kai jañaa jaꞌan ruruaꞌan na̱ ngayee chujni nunthe jiꞌi. 19Ko ixin jeꞌe na̱, jaꞌan rinthaꞌa jeꞌo inchin Suixin rinao, ko kai jeꞌe na̱ jañaa sincheꞌe na̱ ixin chunxin na̱ thi ndua.

20’Aro jeoꞌa rinthatsaꞌan ñao ixin ni kuinchieꞌe, kai nthatsaꞌan ñao ixin chujni sithikaon na na̱ jaꞌan, are ni kuinchieꞌe tsjaago na̱ juajnaa Suixin. 21Ko kain na̱ tsato choo na̱ ko ruxraxaon na̱ xraa nakua chujni, jañaa inchin Suixin ko jaꞌan nakua ná, ko kai jeꞌe na̱ sinthe na̱ ngajin ná, ko jañaa sithikaon kain chujni ixin Suixin beruaꞌan na nthiꞌi ngain nunthe. 22Jaꞌan uchjaꞌa na̱ juachaxin inchin juachaxin bechjana Suixin, ixin tsato choo na̱ ko ruxraxaon na̱ xraa nakua chujni, inchin Suixin ko jaꞌan nakua ná. 23Jaꞌan riꞌi ngain na̱, ko Suixin riꞌi ngajin na, ko nthatsaꞌan ñao chjeꞌe na̱ juachaxin rukjan na̱ xraa nakua chujni, ixin chujni te nguixin nunthe tsunuꞌe na̱ ixin Suixin ruaꞌan na, ko tsunuꞌe na̱ ixin Suixin thjueꞌe na̱ inchin thjueꞌna jaꞌan.

24’Suixin Ndudana, jaꞌan rinaꞌo ixin chujni bechjana sinthe na̱ thi jaꞌan sariꞌi ixin jeꞌe na̱ sikon na̱ thi jié juachaxin Suixin bechjana, ixin Suixin bethjueꞌna icha saꞌo ke are nakuexinxon kunchjian nunthe. 25Ndudana, Suixin anto jian, aro chujni nunthe jiꞌi chunxinꞌa na̱ Suixin, jaꞌan chunxin Suixin, ko chujni kuinchieꞌe kuinxin na̱ ixin Suixin ruaꞌan na. 26Ko jaꞌan banthakianxin na̱ kensen Suixin, ko xra sinthagatsuan na̱ icha ixin Suixin, ixin thi anto thjue na jaꞌan, seꞌe ngain na̱ ko jaꞌan sariꞌi ngain na̱.

Currently Selected:

San Juan 17: plsNT

Highlight

Copy