San Lucas 2

Kunkjiꞌi Jesús

(Mt. 1:18-25)

1Are uchiaon binkee nchaꞌon rukunkjiꞌi Jesús, xi baketuꞌan biꞌin Augusto César, kuetuꞌan xa rugetaxin chujni te nguixin nuntheꞌe Roma. 2Jiꞌi nthiꞌa saꞌo binthetaxin chujni are baketuꞌan Cirenio ngain Siria. 3Mexinxin kainxin chujni bintheꞌa ngain rajnee gunda kjan na̱ ngain rajnee na̱ ixin binthetaxin na̱. 4Kai José bachrjexin rajna Nazaret jii ngain nunthe Galilea, ko sakjui ngain rajna Belén nuntheꞌe Judea, thi diguanxin David, ixin David kjui ndo dachri xrachrjeꞌen José. 5Ko José kjui Belén ixin bigetaxin jeꞌe kunixin María, thi sekaꞌo José. Ko are mee, María ubeyaa chjan. 6Ko are binthe na̱ Belén, xethja nchaꞌon ixin María runchekunkjiꞌi xeꞌen, 7ko nthi̱ꞌa̱ binchekunkjixin María xan saꞌo, ko jeꞌe kuensia xan lunthuchjeꞌen xan, ko kuenjua xan ngaa thi jinea kuxinthaa ixin xruꞌin nchia bithja na̱ ngain thi ni tjadua nchia.

Ángel binchenuꞌe thi ni tethingaria kuleko

8Nthi̱ꞌa̱ chiaon rajna Belén kanxion ni bakingaria kuleko bithuekaꞌo na̱ ba nthi̱ꞌa̱ ngataon jngi ngain thie mee. 9Ko kununxinbeꞌo naa angeel Ndo Dio ngain na̱, ko xruii Ndo Dio banchengasaan nguixin ngandajin na̱; ko jeꞌe na̱ anto binthexraon na̱. 10Aro ángel ndachro ngain na̱:

—Xraonꞌa ra ixin jaꞌan bikian naa juajna jian ngajin ra, ko kai are tsiꞌin icha chujni anto ruchee na̱. 11Ixin jai ngain rajnee David kunkjiꞌi naa thi sinthakjan ra inaa chujni narua, ko mee CRISTO, thi Nchaa ná. 12Ko jaꞌin satsuanxin ra xan: Jaꞌa ra sinchii ra xan jisia lunthuchjeꞌen xan ko tajijua xan ngaa thi jinea kuxinthaa.

13Ko kununxinbeꞌo ngaka ángel mee icha tsjé ángel juixin ngajni, ko banchesayeꞌe Ndo Dio ko tendachro:

14¡Nthusayeꞌe ná Ndo Dio, ndo thjen ngajni,

ko ngataꞌa nunthe chrjuin tsunuꞌe anseen kain chujni dayee thi dajon Ndo Dio!

15Kuthejan are kain ángel mee sakjan ngajni, ni tethingaria kuleko ndache choo na̱:

—Chjin ná Belén, sitsjeꞌe ná thi kuꞌen jiꞌi, thi bindathjo ná Ndo Dio.

16Ko tuin binthekji na̱ ko nthi̱ꞌa̱ bithjaxin na̱ María ko José, ko binthegikon na̱ xan nchinchjan tajijua xa ngaa thi jinea kuxinthaa. 17Are jeꞌe na̱ binthegikon na̱ xan nchinchjan, jeꞌe na̱ kuekin na̱ kain thi ndachro ángel ixin jeꞌe chjan mee. 18Ko kainxin chujni kuiꞌin thi ndachro ni thingaria kuleko anto binthekiseꞌen na̱. 19Aro María kain jiꞌi kuenchjiꞌan ngain anseen ko anto baxraxaon kain jiꞌi. 20Ko ni tethingaria kuleko sakjan na̱ thi kuinthuꞌe na̱ kue na̱, ko thinga tethexruxiꞌin na̱ ko tetsjetheꞌe na̱ Ndo Dio ixin thi kuiꞌin na̱ ko bikon na̱ inchin ndachro ángel ngain na̱.

María ko José binchechieꞌen na̱ Jesús ngain niꞌngo

21Are binchexethja Jesús jni nchaꞌon, chjee na̱ xruꞌe ko binchegiꞌin na̱ JESÚS, inchin kuetuꞌan ángel ngain María are xra beyaa chjan.

22Ko are xethja nchaꞌon ixin rukurua na̱, kjui na̱ ngain niꞌngo icha jié jii rajna Jerusalén, inchin kuetuꞌan Ndo Dio ngain Moisés, ko binchechieꞌen na̱ xan nchinchjan ngain Ndo Dio. 23Jeꞌe na̱ jañaa bincheꞌe na̱ ixin jaꞌin jitaxin ngain Xruen ndo: “Xan xii bakunkjiꞌi saꞌo, xan mee jikininxin xan Ndo Dio.” 24Mexinxin kjui na̱ ngain niꞌngo icha jié ko bajon na̱ inchin baketuꞌan Ndo Dio: “Yoo kuthoon o yoo kuxentha.”

25Are mee nthi̱ꞌa̱ Jerusalén beꞌe naa xii biꞌin Simeón. Xii jiꞌi anto binao Ndo Dio, ko bachuꞌen xa thi nchaꞌon are Ndo Dio tsjengijna chujni ngain nunthe Israel ixin itsetuenꞌa inaa nunthe. Ko Espíritu Santo beꞌe ngain Simeón, 26ko Espíritu binchenuꞌe Simeón ixin sikon Cristo tsii, thi ruruaꞌan Ndo Dio, kuthimejan seꞌen. 27Jeꞌe Simeón kjui ngain niꞌngo ixin jamee kuetuꞌen Espíritu Santo. Ko María ko José bijikao na̱ Jesús ngain niꞌngo ixin bincheꞌe na̱ thi thetuꞌan ley, 28ko Simeón kjuua xan xichjan ngaa raa ko binchesayeꞌe Ndo Dio ko ndachro:

29Anchee, Suixin unchao tanchrjanda na seꞌen na,

ixin ubikon thi Suixin ndachjejin na.

30Jaꞌan ubikunxin kon na thi juii ixin tsjengijna ná,

31ko Suixin ruꞌan ko sikon chujni te nguii nunthe.

32Chjan jiꞌi thi sinchengaseꞌen kain chujni jeꞌa chujni Israel,

ko ixin jeꞌe xan tsusayexin chujni Israel, chujnia Suixin.

33José ko janee Jesús, xratha tabinthetsjeꞌe na̱ ixin thi ndachro Simeón ixin Jesús. 34Kuthejan Simeón binchenchaon na̱ ko ndache María, janee Jesús:

—Ixin chjan jiꞌi tsjé chujni Israel rukjan na̱ inaa chujni narua ko tsjé na̱ sueꞌen na̱ jie̱, ko xan jiꞌi, naa xan xranaꞌa dikunxin ni ko tsjé na̱ sithikaonꞌa na̱ xan. 35Ko jamee ruxraago thi xraxaon nanaa chujni ngain anseen na̱. Aro jaꞌa María, kain jiꞌi inchin naa chia sathudoꞌo ansean, ixin anto juachjaon sarichunda.

36Kai nthi̱ꞌa̱ beꞌe naa nchrii banichja nchra juajnee Ndo Dio, ko biꞌin nchra Ana, ko ndudee nchra biꞌin Fanuel, ni bachrjeninxin Aser. Ko anto chjan nchra are dikutheꞌe nchra ko jeꞌo yaato nano bekaꞌo nchra xixiꞌi nchra. Ko nchrii mee ujoon nchra. 37Ko jai jeꞌe nchra naa nchri gaꞌan chunda noo kan ko noo nano. Ko bagachrjexinꞌa nchra niꞌngo, ixin nchaꞌon ko thie banchesayeꞌe nchra Ndo Dio ko banchekjaaño nchra. 38Ko are mee kunchieꞌen Ana ko kuexruxiꞌin Ndo Dio, ko kuexiꞌin nichja ixin Jesús ngain kain chujni jichuꞌen thi nchaꞌon are Ndo Dio tsjengijna chujni Israel.

María ko José sakjankaꞌo na̱ Jesús ngain rajna Nazaret

39Are juexin bincheꞌe na̱ kain thi jitaxin ngain ley kuinthuꞌe Ndo Dio, kjan na̱ Nazaret, rajnee na̱ jii ngain nunthe Galilea. 40Ko Jesús icha bangi, ko icha kusuji, ko icha benuꞌe jian, ko Ndo Dio anto binchenchaon xan.

Jesús kjui ngaxiꞌin niꞌngo icha jié

41Ni nduꞌa Jesús kain nano bakji na̱ ngain rajna Jerusalén ngain kiai diꞌin pascua. 42Are Jesús binchexethja theyoo nano, jeꞌe ko José ko María, janee, kanio na̱ kjui na̱ Jerusalén inchin bancheꞌe na̱. 43Ko are ujuexin kiai mee, jeꞌe na̱ sakjan na̱ ko Jesús ndadigithuꞌe nthi̱ꞌa̱ Jerusalén, ko José ko María benueꞌa na̱. 44Jeꞌe na̱ xraxaon na̱ ixin ngayee chujni jitji Jesús, ko jamee sakjui na̱ nguixin nchaꞌon mee. Are undakunaxin xeꞌe, jeꞌe na̱ kjuee na̱ Jesús ngayee icha chujni chunxin na̱ ko ni chujnii na̱, 45ko bithjaꞌa na̱ Jesús. Kuthejan sakjan na̱ Jerusalén ixin kjuee na̱ Jesús nthi̱ꞌa̱.

46Batho nii nchaꞌon, kuthimejan bithja na̱ Jesús tajii ngaxiꞌin niꞌngo icha jié, ngayee xi bakjaago ley ko tajithiꞌin xan thi tendachro xa ko jeꞌe xan anto tsjé banchiangi xan ngain xa. 47Kain chujni kuiꞌin thi ndachro xan xratao tabinthetsjeꞌe na̱ ixin thi jian juaxraxauen xan ko kain thi jian bagatheꞌe xan. 48Are José ko María bikon na̱ mee, xratao tabinthetsjeꞌe na̱, ko janee xan ndachro jan ngain xan:

—Jaꞌa, ¿unda jañaa bincheꞌe ngajin ná? Ndudaa ko jaꞌan tethjee ra ko anto kuaa ná juachjaon ixin jaꞌa bitjaan.

49Kuthejan Jesús ndachro:

—¿Unda thjee ni ra? ¿Anuaꞌa ra ixin jaꞌan rugunda sariꞌi ngain niꞌngo ixin sinthaꞌa xree Ndudana?

50Aro jeꞌe na̱ kuinxinꞌa na̱ thi ndachro Jesús. 51Kuthejan Jesús kunixin José ko María sakjan na̱ ngain Nazaret, ko Jesús anto xrabagithikaon na̱. Ko María, janee Jesús, kuenchjiꞌan jan ngain anseen jan thi batheꞌe Jesús. 52Ko Jesús icha bangi ko icha bangi juaxraxauen, ko kain chujni ko Ndo Dio anto binao na̱ Jesús.

Currently Selected:

San Lucas 2: plsNT

Highlight

Copy