San Lucas 4

Nchiijin binao runcheyeꞌe Jesús

(Mt. 4:11; Mr. 1:12-13)

1Ko are Jesús kjanxin ngain nda Jordán, jeꞌe bayée icha juachjaxiin Espíritu Santo, ko Espíritu mee bikao ngagaꞌa jna thi xruꞌin chujni te. 2Nthi̱ꞌa̱ beꞌe Jesús yoo thi kan nchaꞌon, ko nchiijin binao runcheyeꞌe. Ko kainxin nchaꞌon mee xruꞌin juine ko are ubatho kain nchaꞌon teꞌi, beꞌen jintha. 3Ko nchiijin ndachro ngain Jesús:

—Ja̱ ndua jaꞌa Xeꞌen Ndo Dio, thetuꞌen xro teꞌi rukjan xro niuthja.

4Ko Jesús ndachro:

—Ngain Xruen Ndo Dio jitaxin: “Jeꞌa jeꞌo niuthja sechunxin chujni, kai rugundeꞌe na̱ juajnee Ndo Dio.”

5Kuthimejan nchiijin bikao Jesús ngataꞌa naa jna anto nui, ko nthi̱ꞌa̱ kjuaguexin kainxin rajna jii nguixin nunthe. 6Ko ndachro ngain Jesús:

—Jaꞌan ruchjaꞌa juachaxin tsetuꞌen kain rajna yaa, ko ruchjaꞌa thi chrjuin jii ngain rajna. Ixin jaꞌan bayáa kainxin, ko jaꞌan nchao sajon kain yaa ngain thi chujni jaꞌan rinaꞌo ruchjaꞌa. 7Ko ja̱ sarithuxin nthajuchjiꞌa ko sinchesayaꞌna, kain yaa sayéꞌe.

8Aro Jesús ndachro ngain nchiijin:

—Jaꞌa sathjixin ngajin, ixin ndachro ngain Xruen Ndo Dio: “Nchesayeꞌe jeꞌo Nchaa Ndo Dio ko jeꞌo ngain ndo sithikaon jaꞌa.”

9Kuthimejan nchiijin sabikao Jesús ngain rajna Jerusalén ko binchekani ngataꞌa niꞌngo icha jié, ko ndachro ngain Jesús:

—Ja̱ ndua jaꞌa Xeꞌen Ndo Dio, daritsingaxin nthiꞌi, 10ixin jitaxin ngain Xruen ndo:

Ndo Dio tsetuꞌen angeel ixin senda jaꞌa.

11Ko kain ángel mee rukaꞌa kunixin raa,

ixin xruꞌin xro sincheniꞌi ruthea.

12Ko Jesús ndachro ngain nchiijin:

—Kai ndachro ngain thi jitaxin Xruen ndo: “Thjexinꞌa ngain Ndo Dio ixin sikon a sincheꞌe Ndo thi jaꞌa xraxaon.”

13Ko jañaa are nchiijin chroꞌa bincheyeꞌe Jesús, sakjuixin ngain ikanxion nchaꞌon.

Jesús kuexinxin xree ngain Galilea

(Mt. 4:12-17; Mr. 1:14-15)

14Ko Jesús kjan Galilea kunixin anto tsjé juachaxiin Espíritu Santo. Ko ngain kainxin rajna, chujni banichja kain thi jian bancheꞌe Jesús. 15Ko Jesús bakjaago ngain ninguꞌe rajna, ko kain na̱ jian banichja na̱ ixin jeꞌe.

Jesús ngain rajna Nazaret

(Mt. 13:53-58; Mr. 6:1-6)

16Kuthimejan Jesús kjui rajna Nazaret, ngain rajna bangixin jeꞌe. Ko ngain nchaꞌon nchejugaꞌa ni, Jesús kjui ngaxiꞌin niꞌngo nthi̱ꞌa̱ inchin bancheꞌe ko bingathjen ixin kjuao thi Xruen Ndo Dio. 17Ko chjee na̱ Jesús thi xroon dikji̱n Isaías, thi bagayee juajnee Ndo Dio, ko are Jesús kunxiree xron bithja thi jitaxin jaꞌin:

18Espiritue Nchana jii ngajin na jaꞌan,

ixin Ndo Dio chjana xra ixin rundachrjan thi jian juajna ngain chujni nua;

Ndo Dio ruaꞌan na ixin sinthaxruan chujni chunda juachjaon ngain anseen,

ko ixin santsje ni theaxiꞌin,

ko sinthagikon chujni dikonꞌa;

ko chujni tedetan tangi, isetanꞌa na̱ tangi;

19ko rundachrjan ngain chujni ixin ujuii nchaꞌon ixin Ndo Dio tsjengijna na̱.

20Kuthimejan Jesús kuejee xroon mee, ko bajon xron ngain chujni bakenchjiꞌan xron ngain niꞌngo ko tabeꞌe. Ko kainxin chujni xratao tabinchexruan na̱ Jesús, 21ko jeꞌe kuexiꞌin nichja ko ndachro:

—Jai bikuꞌen ngathexin kon ra thi jitaxin xroon jiꞌi.

22Kain chujni nthi̱ꞌa̱ nichja na̱ jian ixin Jesús, ko xratao tabinthenchexruan na̱ ixin thi chrjuin ndachro Jesús ngain na̱. Ko jeꞌo na̱ banchiangiꞌi choo na̱ ko ndachro na̱:

—¿Ajeꞌa jiꞌi thi xi tsiꞌi José?

23Jesús ndachro ngain na̱:

—Ko jaꞌa ra xro dithikaonꞌa ra rundachjejin ni ra: “Jaꞌa ke dajon xruan, tuxruaꞌan jaꞌo”; ko rundachjejin ni ra kai: “Inchin thi kuian ná ixin bincheꞌe jaꞌa ngain rajna Capernaum, ncheꞌe nthiꞌi ngain rajnaa ixin sikon ná jaꞌan ná.”

24Kuthejan Jesús xra ndachro:

—Jaꞌan ndua rundathjo ra ixin xruꞌin ni dayee juajnee Ndo Dio dayee na̱ jian ngain rajnee. 25Jaꞌan rindathjo ra ixin binthe tsjé nchri gaꞌan ngain nunthe Israel ngain nchauen Elías, thi bagayee juajnee Ndo Dio, are juiꞌa chrin nii nano ko rioꞌo ko anto beꞌe jintha nguixin nunthe. 26Aro Ndo Dio ruanꞌa ndo Elías ixin rukjengijna nchri gaꞌan binthe Israel, Ndo Dio ruaꞌan Elías ixin jeꞌo kjuengijna naa nchri gaꞌan beꞌe ngain rajna Sarepta, chiaon rajna Sidón. 27Kai binthe ngain nunthe Israel tsjé chujni beninxin chin lepra ngain nchauen Eliseo, thi bagayee juajnee Ndo Dio. Aro Eliseo xruꞌin ni binchexrueꞌen nthi̱ꞌa̱, jeꞌo binchexingameꞌe Naamán chujnii ni Siria.

28Ko kain ni binthe ngaxiꞌin niꞌngo nthi̱ꞌa̱, are binthekiꞌin na̱ kain yaa anto bintheguñao na̱. 29Bingathjen na̱ ko bantsje na̱ Jesús, ko bikao na̱ chiaon kon jna, ngain jna dikunchjian rajna mee, ixin rukjaxin na̱ nthi̱ꞌa̱. 30Aro Jesús bathuyee na̱ ko sakjui.

Naa xii bechunda espíritu jianꞌa

(Mr. 1:21-28)

31Kuthimejan Jesús kjan Capernaum, ngain nunthe Galilea, ko nthi̱ꞌa̱ ngain niꞌngo banchekueꞌen chujni ixin Ndo Dio ngain nchaꞌon nchejugaꞌa ni. 32Ko chujni bakiseꞌen na̱ ixin thi bakjaago Jesús ko ixin banichja kunixin jié juachaxin.

33Ko nthi̱ꞌa̱ ngain niꞌngo beꞌe naa xii bechunda espíritu jianꞌa ko espíritu mee kuyao ko ndachro:

34—Sathjixin ngajin ná, jaꞌa Jesús, thi juixin Nazaret. ¿Ajuiꞌi ixin sachrje na ná juachaxin chunda ná? Jaꞌan chunxin jaꞌa ko nuna ixin jaꞌa thi icha jian ngain Ndo Dio.

35Jesús ndachro ngain espíritu jianꞌa mee:

—¡Tenkua, ko sathjixin ngain xii yaa!

Kuthejan jeꞌe espíritu jianꞌa banka thi xii mee ngayee chujni, ko bachrjexin ngain xii mee ko xruꞌin thi kuniꞌi xa. 36Kainxin chujni bikon yaa, xraon na̱ ko binthendache choo na̱:

—¿Keꞌe juachaxin chunda thee xii jiꞌi?, ixin are thetuꞌan xa kunixin jié juachaxin ngain naa espíritu jianꞌa, espíritu mee dithikaon ko sathji.

37Ko nguii nunthe mee chujni kunuꞌe thi jian bancheꞌe Jesús.

Jesús binchexrueꞌen janchee Pedro

(Mt. 8:14-15; Mr. 1:29-31)

38Kuthimejan Jesús bachrjexin niꞌngo ko sakjui nchianduꞌa Simón Pedro. Are mee janchee Pedro beniꞌi jan ixin naa sua anto suji, mexinxin binchetseꞌen na̱ ñao Jesús ixin runchexrueꞌen naniita mee. 39Ko Jesús bisee ngain naniita ko nichjayee sua mee, ko tuin tabachrjeꞌe sua, ko naniita jaikua bingathjen ko kuexiꞌin chjee na̱ bine na̱.

Jesús binchexingameꞌe tsjé ni niꞌi

(Mt. 8:16-17; Mr. 1:32-34)

40Ko are biataon nchaꞌon kain chujni binthechunda ni niꞌi bintheninxin na̱ tsjé chin, juiaꞌo na̱ kain chujni mee ngain Jesús; ko jeꞌe kuiin raa ngataꞌa nanaa na̱, ko jañaa Jesús binchexrueꞌen na̱ kain na̱. 41Tsjé ni niꞌi mee binthechunda na̱ espíritu jianꞌa ko are bachrje espíritu mee, kuyao ko ndachro:

—Jaꞌa thi Xeꞌen Ndo Dio.

Aro Jesús binchesatheꞌe espíritu jianꞌa mee ko ikuanchrjandaꞌa nichja icha, ixin espíritu teꞌi benuꞌe ixin Jesús thi Cristo.

Jesús nichjee chujni ixin Ndo Dio ngain nunthe Galilea

(Mr. 1:35-39)

42Are nduexin nduuyo, Jesús bachrjexin ngain rajna ko sakjui ngain thi xruꞌin chujni te. Ko chujni kjuee na̱ Jesús ko are bithja na̱ binchetseꞌen na̱ ñao ixin tarugeꞌe ngain na̱ nthi̱ꞌa̱ Capernaum. 43Aro jeꞌe ndachro:

—Jaꞌan rugunda sinichjaa chujni ngain icha rajna ixin ujuii nchaꞌon ixin Ndo Dio tsetuꞌan ndo ko mee ruanxin na ndo jaꞌan.

44Ko jañaa bakji Jesús ngain kain niꞌngo nguixin nunthe Galilea ixin bakjaago ngain chujni ixin Ndo Dio.

Currently Selected:

San Lucas 4: plsNT

Highlight

Copy