San Mateo 2

Thi nii xii anto nuꞌe juii bitsjeꞌe Jesús

1Jesús kunkjixin ngain rajna Belén, ngain nuntheꞌe Judea, are Herodes baketuꞌan ngain nunthe jiꞌi. Ko ngain rajna Jerusalén juii kanxion xii anto nuꞌe ko kunutse bagatsuanxin xa keꞌe rugikuꞌen ngataꞌa nunthe, ko xii teꞌi binthekixin xa nunthe jii thi chrinxin nchaꞌon. 2Ko banchiangi xa:

—¿Thinoo jii xan ukunkjiꞌi?, xan tsetuꞌen chujni judío. Jaꞌan ná ngain nunthe jii thi chrinxin nchaꞌon bikunxin ná kunutsee xan. Ko jaꞌan ná juiꞌi ná ixin sinthasayaa ná xan.

3Are rey Herodes kunuꞌe jiꞌi, ibenueꞌa keꞌe runcheꞌe, jeꞌe kunixin kain chujni Jerusalén. 4Kuthimejan rey Herodes baye̱e kain xi daana baketuꞌan ngain icha xi daana ko kain xi tjaago ley ko banchiangiꞌi kain ni teꞌi ixin thinoo tsunkjixin Cristo. 5Ko jeꞌe na̱ binthendachro na̱:

—Ngain rajna Belén ngain nuntheꞌe Judea, ixin thi bagayée juajnee Ndo Dio jaꞌin dikji̱n:

6Ko jaꞌa, rajna Belén, thi rajna jii ngain nuntheꞌe Judá,

jaꞌa jeꞌa rajna icha nchiin jii ngayee kain rajna icha renthe te ngain nunthe Judá;

ixin ngajin sachrjexin naa xi tsetuꞌan,

ko jeꞌe sakuꞌen chujni Israel.

7Kuthimejan Herodes jimao baye̱e xii anto nuꞌe teꞌi ko banchiangiꞌi xa ixin kexeꞌe nchaꞌon ndua xraago kunutse jiꞌi. 8Kuthimejan Herodes kuetuꞌen xii anto nuꞌe teꞌi ko ndachro:

—Thji ra, ko danchiangi ra jian thinoo jii chjan yaa. Ko are usinchii ra xan, nchenuna ra ixin jaꞌan kai tsji sinthasayaa xan.

9Are ujuexin kuiꞌin xii anto nuꞌe teꞌi thi ndachro xi rey, sabinthekji xa. Ko kunutse binthegikon xa ngain thi nunthe jii no thi chrinxin nchaꞌon jitaon ba nthiꞌá thi tethji xa ko tabeꞌe ba thi jii xannchinchjan. 10Are xii anto nuꞌe teꞌi binthegikon xa kunutse, anto binthechee xa. 11Ko are binthegixiꞌin xa nchia, binthegikon xa xannchinchjan, kunixin María, janee xan, ko binthethuxin xa ko binchesayeꞌe xa xannchinchjan. Kuthimejan banthjee xa thi binthekiaꞌo xa ko binchendusen xa oro, tsjuka ko naa ndaxrajni diꞌin mirra. 12Ko are usarunthekji xa bituꞌen xa xraa ngathe kuthachrin ixin irukjanꞌa xa thi beꞌe Herodes, mexinxin ujee nthiꞌá sabinthekjanxin xa ngain nuntheꞌe xa.

María ko José sakuingakaꞌo na̱ xan nchinchjan ngain nunthe Egipto

13Kuthimejan are sabinthekji xii anto nuꞌe teꞌi, naa angeel Ndo Dio kununxiꞌin José ngathe kuthachrin ko ndachro:

—Dingathjen ko sathingakoꞌo xannchinchjan kunixin janee xan, ko sathji ra ngain nunthe Egipto ko tadinthe ra nthi̱ꞌa̱ ko ujaꞌan rundathjo ra kensa sachrjexin ra nthi̱ꞌa̱, ixin Herodes tsjee xannchinchjan ixin nasuenxon xan.

14Ko José bingathjen are xranaxion xeꞌe ko sabikao xannchinchjan kunixin janee xan ngain nunthe Egipto. 15Ko nthi̱ꞌa̱ tabinthe na̱ ndabenja Herodes. Jaꞌin bikuenxin thi ndachro Ndo Dio ngain thi bagayée juajnee ndo, thi ndachro: “Ngain nunthe Egipto baya̱xin Xanꞌna.”

Herodes kuetuꞌan beꞌen kain xannchinnchinchjan

16Are Herodes kunuꞌe ixin xii anto nuꞌe teꞌi ikjanꞌa xa inchin jeꞌe kuetuꞌan, anto guñao ko kuetuꞌen xi soldadue ixin nasuenxon xa kainxin xannchinnchinchjan kunkjiꞌi are kununxin kunutse, thi xan xranchexethjaꞌa yoo nano, xan te ngain rajna Belén ko kain rajna tendajin. 17Jaꞌin kuꞌen ixin xethjaxin thi dindachro Jeremías, thi bagayée juajnee Ndo Dio:

18Kuiꞌin ni naa thi jituyao ngain rajna Ramá,

jitsjanga ko ta juachjaon.

Ko mee Raquel thi batsjangaxin xeꞌen,

ko juinaoꞌa runchebangeꞌe na̱ ñao,

ixin kain xeꞌen undadintegeꞌen xan.

19Ko are undabenja Herodes, naa angeel Ndo Dio kununxiꞌin José ngathe kuthachrin, nthi̱ꞌa̱ Egipto, 20ko ndachro:

—Dingathjen ko sakjankoꞌo xannchinchjan kunixin janee xan ngain nunthe Israel ixin undabinthegeꞌen chujni binao naruguenxon xan.

21Kuthimejan bingathjen José ko sabikao xannchinchjan kunixin janee xan ngain nunthe Israel. 22Are kunuꞌe José ixin Arquelao, xeꞌen Herodes jithetuꞌan ngain thi baketuꞌan ndudee, José xraon rukji nthi̱ꞌa̱. Ko Ndo Dio ngathe kuthachrin kuetuꞌen ndo ixin sarukji ngain nuntheꞌe Galilea. 23Ko are biji na̱ nthi̱ꞌa̱, tabinthe na̱ ngain rajna Nazaret. Jañaa xethjaxin thi ndachro ni bagayée juajnee Ndo Dio, ixin xannchinchjan runchegiꞌin na̱ nazareno.

Currently Selected:

San Mateo 2: plsNT

Highlight

Copy