San Mateo 26

Chujni kjuathexin na̱ ixin suen na̱ Jesús

(Mr. 14:1-2; Lc. 22:1-2; Jn. 11:45-53)

1Are Jesús juexin ndachro kain yaa, jeꞌe ndachro ngain chujni bakao:

2—Inchin jaꞌa ra unuꞌa ra, nthiꞌi yoo nchaꞌon tsii thi kiai diꞌin pascua ko jaꞌan, thi Xii juixin ngajni, rutse na na̱ ko tsenganito na na̱ ngain ntha cruz.

3Ko ngain kiai mee kain xi daana thetuꞌan ngain icha xi daana ko kain xi tjaago ley ko kain ni thetuꞌan rajna xrathe na̱ ngain nchia thetuanxin Caifás, xi daana icha renthe. 4Ko nthi̱ꞌa̱ kjuauthexin na̱ kexreen sincheyeꞌe na̱ Jesús ixin rutse na̱ ko nasuenxon na̱. 5Aro binthendachro na̱:

—Sinthoꞌa ná jiꞌi ngain nchaꞌon kiai ixin tsuñaoꞌa ni rajna.

Naa nchrii kuinthjithe ndaxrajni jaa Jesús

(Mr. 14:3-9; Jn. 12:1-8)

6Are Jesús xrabeꞌe ngain rajna Betania ngain nchianduꞌa Simón thi banchegiꞌin na̱ thi leproso, 7nthi̱ꞌa̱ kunchieꞌen naa nchrii bikao naa ndaxrajni anto renthe ko thi jiria nda dikunchjianxin juxon xro marmol ko jeꞌe nchra kuinthjithe ndaxrajni ngataꞌa jaa Jesús, are jine. 8Are chujni bakao Jesús bikon na̱ jiꞌi, guñao na̱ ko kuexiꞌin na̱ ndachro na̱:

—¿Unda kuxinkua ndaxrajni yaa? 9Ixin icha nchao rukuchji ndaxrajni yaa ixin tsjé tumi ko rukjengijnanxin na̱ chujni nua.

10Jesús kuiꞌin mee ko ndachro ngain na̱:

—¿Unda jañaa techro ra ko ncheñao ra nchrii jiꞌi? Ixin thi bincheꞌe nchra ngajin anto jian. 11Ixin chujni nua kain nchaꞌon sinthe na̱ ngayaꞌa ra, aro jaꞌan kainxinꞌa nchaꞌon sariꞌi ngayaꞌa ra. 12Thi bincheꞌe nchrii jiꞌi, are jeꞌe nchra kuinthjithe na nchra ndaxrajni, mee kuinga na nchra ixin ruxrabaxin na. 13Atho ndua thi jaꞌan rindathjo ra ixin nguii thi sikekin na̱ thi jian juajna jiꞌi, kai rundachro na̱ thi bincheꞌe nchrii jiꞌi, ixin jañaa ruxraxaunxin na̱ nchra.

Judas bindachro ixin rutse na̱ Jesús

(Mr. 14:10-11; Lc. 22:3-6)

14Kuthimejan Judas Iscariote naa thi theyoo chujni bakao Jesús, kjui bitsjeꞌe kain xi daana icha renthe, 15ko ndachro ngain xa:

—¿Kieꞌen tumi ruchjana ra ko rundathjo ra kexreen sincheꞌe ra ixin rutse ra Jesús?

Kuthimejan jeꞌe xa kjuengeꞌe xa ꞌna kan ko the tumi dikunchjianxin chia plata. 16Ko are maꞌo Judas kuexiꞌin kjuee kexreen runcheꞌe ixin rutse na̱ Jesús.

Jesús binekaꞌo thi theyoo chujni bakao

(Mr. 14:12-25; Lc. 22:7-23; Jn. 13:21-30; 1 Co. 11:23-26)

17Nchaon saꞌo thixinxin kiai are bajine na̱ niuthja bagankeꞌa na̱ thi denxin nchoꞌo, thi theyoo chujni bakao Jesús kunchieꞌen na̱ ngain jeꞌe ko banchiangiꞌi na̱:

—¿Thinoo sinthachjianxin ná thi sunthexin ná kiai pascua?

18Jesús ndachro ngain na̱:

—Thji ra rajna Jerusalén, ngain nchianduꞌa thi xii jaꞌa ra uchunxin ra ko ndache ra: “Xi tjaago ndachro: uchiaon juii nchaꞌon ndaseꞌen na, ko ngain nchiandui sinenxin kiai pascua kunixin chujnina.”

19Ko bithikaon na̱ ko bincheꞌe na̱ inchin kuetuꞌan Jesús, ko nthi̱ꞌa̱ binchechjianxin na̱ thi rujine na̱ ngain kiai pascua.

20Ko are ndakunaxin xeꞌe Jesús tabeꞌe ngain nthanchaon kunixin ni theyoo chujnii bakao. 21Ko are tatene na̱, jeꞌe ndachro ngain na̱:

—Atho ndua thi rundathjo ra ixin naa ra rundache ra chujni kexreen rutse na na̱.

22Kuthimejan kain na̱ anto binthechiin na̱ ko nanaa na̱ kuexiꞌin na̱ banchiangiꞌi na̱ Jesús ko ndachro na̱:

—Nchana, ¿a jaꞌan sinthaꞌa mee?

23Ko Jesús ndachro ngain na̱:

—Naa thi rinekiꞌan ngain laato, mee thi rundache chujni kexreen rutse na na̱. 24Jaꞌan, thi Xii juixin ngajni, seꞌen na inchin ndachro ngain Xruen Ndo Dio, aro anto tangi tsuꞌen thi rundache chujni kexreen rutse na na̱. Icha jian chujni mee rukunkjiꞌa.

25Kuthimejan nichja Judas, thi tsjaago kexreen rutse na̱ Jesús, ko jeꞌe ndachro ngain Jesús:

—Suixin ke tjaago, ¿a jaꞌan?

Jesús ndachro ngain:

—Jaan, jaꞌa.

26Are tatene na̱, Jesús kuaa niuthja ko kuexruxiꞌin Ndo Dio, ko kunchjenga nio, kuthimejan bajon nio ngain thi theyoo chujni bakao, ko ndachro ngain na̱:

—Tse ra ko jinthe ra, jiꞌi nthauꞌna.

27Kuthimejan kuaa thi jiria vino ko kuexruxiꞌin Ndo Dio, ko bajon ngain na̱ ko ndachro:

—Kain ra diꞌi ra vino jiꞌi, 28ixin jiꞌi jnina, thi tsunchjianxin inaa trato narua ngain Ndo Dio. Ko jnina singo jni ixin ruxengaxin ꞌna thi jianꞌa ncheꞌe tsjé chujni. 29Aro rindathjo ra ixin jaꞌan irukjanꞌa na siꞌi ndee tho uva, tsija nchaꞌon are siꞌi vino naruaxin ngajin ra nthi̱ꞌa̱ thi thetuꞌan Ndudana.

Jesús ndachro ixin Pedro rundachro ixin chunxinꞌa jeꞌe

(Mr. 14:26-31; Lc. 22:31-34; Jn. 13:36-38)

30Ko are juexin binthetsje na̱ himno, sabinthekji na̱ ngain jnanchjan diꞌin Ntha Olivo. 31Ko nthi̱ꞌa̱ Jesús ndachro ngain na̱:

—Kain ra sinthechiꞌin ra ko tatsinthuna ni ra ixin ngain Xruen Ndo Dio ndachro: “Nasuenxon thi thingaria kuleko, ko kain kuleko ruchjekee ba.” 32Ko are jaꞌan ruxechon na, jaꞌan sitauꞌan ra nthiꞌá ngain rajna Galilea.

33Kuthimejan Pedro ndachro ngain Jesús:

—Maski kainxin na̱ tatsinthuꞌa na̱, aro jaꞌan naꞌi.

34Kuthimejan ndachro Jesús:

—Jaꞌan ndua rindathjo ixin ngain thie jiꞌi, xrarutsjeꞌa kunthaxichia ko jaꞌa uninxin nthiꞌa rundachro ixin chunxinꞌa na.

35Pedro ndachro:

—Maski nasuenxon na na̱ inchin seꞌen suixin, aro rundachrjanꞌa ixin chunxinꞌa.

Ko xrajeꞌo nichja ni ikainxin bagakao Jesús.

Jesús nichjee Ndo Dio ngain Getsemaní

(Mr. 14:32-42; Lc. 22:39-46)

36Kuthimejan Jesús kunixin chujni bakao biji na̱ ngain naa jngi diꞌin Getsemaní, ko nthi̱ꞌa̱ Jesús ndachro ngain na̱:

—Nthiꞌi dinthe ra ko chunna ra ixin jaꞌan sinichjaa Ndo Dio.

37Ko Jesús sabikao Pedro ko kayui xeꞌen Zebedeo, ko kuexiꞌin kunuꞌe naa juachjaon anto suji ngain anseen. 38Kuthimejan jeꞌe ndachro:

—Jaꞌan tununa ngain ansenna naa juachjaon anto suji ko tununa ixin ndaseꞌen na. Dithuꞌa ra nthiꞌi ko dinthechrinꞌa ra.

39Ko Jesús sakjui nchion icha kjín ko nthi̱ꞌa̱ bekjantaꞌa nunthe, ko nichjee Ndo Dio, ko ndachro:

—Suixin Ndudana, ja̱ nchao, tanchrjandaꞌa na satho thi anto tangi tsunna; aro tsuenꞌa inchin jaꞌan rinaꞌo, tsuꞌen inchin Suixin rinao.

40Kuthimejan jeꞌe kjan ngain thi nii chujni bikao, ko are jeꞌe biji nthi̱ꞌa̱, jeꞌe na̱ utadinthejua na̱. Ko ndachro ngain Pedro:

—¿Akuixianꞌa ra tabinthetsjeꞌe ra ngajin na naa hora? 41Tadinthetsjeꞌe ra ko nchetseꞌen ra ñao Ndo Dio ixin xruꞌin thi jianꞌa sitaꞌa ra. Ndua, espiritua ra tajichueꞌon keꞌe sikuꞌen, aro nthauꞌa ra sujiꞌa nthao.

42Ko yuxin nthiꞌa jeꞌe kjan nichjee Ndo Dio ko ndachro:

—Suixin Ndudana, ja̱ chroꞌa sincheꞌe ixin jaꞌan sathoꞌa ngain thi anto tangi jiꞌi, tsuꞌen inchin Suixin rinao.

43Kuthimejan jeꞌe kjan ko bithja na̱ tatejua na̱ inaa ixin jmakon na̱ ikuixinꞌa ixin kuthachrin. 44Jesús nthi̱ꞌa̱ kuinthuꞌe na̱ ko jiꞌi nthiꞌa ninxin kjan binichjee Ndo Dio ko xrajeꞌo ndachro. 45Kuthimejan kjan ngain na̱ inaa ko ndachro ngain na̱:

—¿Axratatechrin ra ko tenchejugaꞌa ra? Ujuii hora ixin jaꞌan, thi Xii juixin ngajni, sinchechieꞌen na̱ ngaa raa chujni jianꞌa. 46¡Dingathjen ra sachjin ná, ixin ujuii thi ndachro kexreen rutse na na̱!

Tse na̱ Jesús

(Mr. 14:43-50; Lc. 22:47-53; Jn. 18:2-11)

47Jesús xrajañaa jindachro are ujuii Judas, naa ni theyoo bakao, ko juiaꞌo anto tsjé chujni teyaa na̱ espada ko nthaa, ixin xi daana baketuꞌan ngain icha xi daana ko ni thetuꞌan ngain rajna, ni mee ni ruaꞌan kain chujni teꞌi. 48Judas, thi bindachro kexreen rutse na̱ Jesús, mee udindachro ngain kain chujni juiaꞌo:

—Thi jaꞌan tsetuxin ixin ruchjaꞌa juajna, jeꞌe mee Jesús, tse ra ko sathjiꞌo ra.

49Kuthimejan jeꞌe Judas kunchieꞌen ngain Jesús ko ndachro:

—¡Chaꞌa suixin ke tjaago!

Ko kuetuxin. 50Jesús ndachro ngain Judas:

—Jaꞌa, ¿keꞌe juixin nthiꞌi?

Kuthimejan kain chujni kjui kunchieꞌen na̱ ko tse na̱ Jesús.

51Aro naa ni theyoo bakao Jesús bantsje espadee ko kunchrijiꞌin ndatsjuen naa xi ncheꞌe xree xi daana icha renthe. 52Kuthimejan ndachro Jesús ngain:

—Thenchjiꞌan espadaa. Ixin kain chujni tjayaxin kunixin espada, kunixin espada senxin kai. 53¿Anuaꞌa ixin jaꞌan nchao rundathjan Ndudana ko jeꞌe ndo jaxon nchao ruruanna setenta y dos mil ángel? 54Aro ja̱ rukuenꞌa jamee, ¿kexreen sikuꞌen thi jitaxin Xruen Ndo Dio? Ixin ngain Xroon jitaxin ixin jiꞌi rugunda sikuꞌen.

55Kuthimejan Jesús ndachro ngain kain chujni:

—¿A ujuiꞌi ra kunixin espada ko nthaa ixin bitse ni ra, inchin ja̱ rukji naa xi cheꞌe? Kain nchaꞌon bariꞌi ngayaꞌa ra ixin banthakuaꞌan ra ngain niꞌngo icha renthe ko tseꞌa ni ra. 56Aro kain jiꞌi jituꞌen ixin sikuenxin kain thi dikji̱n ni bagayee juajnee Ndo Dio ngain Xruen ndo.

Kuthimejan kain chujni bakao Jesús ndakuinthuꞌe na̱ jeꞌo ko sakuinga na̱.

Jesús ngathexin kon ni ncheꞌe jie̱

(Mr. 14:53-65; Lc. 22:54-55, 63-71; Jn. 18:12-14, 19-24)

57Kain ni tse Jesús sabikao na̱ ngain nchianduꞌa Caifás, xi daana icha renthe, ko nthi̱ꞌa̱ dixrathe kain xi tjaago ley ko kain xi thetuꞌan ngain rajna. 58Ko Pedro kjín jiruexin ko biji ngain patiue nchianduꞌa Caifás. Nthi̱ꞌa̱ bixiꞌin Pedro ko tabeꞌe ngayee xi tenda nchia ixin rugikon kexreen rukjexinxin kain jiꞌi.

59Kain xi daana baketuꞌan ngain icha xi daana, kain xi thetuꞌan ngain rajna ko kain xi ncheꞌe jie̱ ngain niꞌngo kjuee xa chujni ixin runichja na̱ thi nduaꞌa ixin Jesús ixin naruguenxon xa. 60Aro xruꞌin ni bithja xa, maski anto tsjé chujni kunchieꞌen ixin ndachro na̱ thi nduaꞌa ixin Jesús. Kuthimejan binthekunchieꞌen yoo chujni nichja thi nduaꞌa ixin Jesús. 61Chujni mee ndachro:

—Xii jiꞌi ndachro xa: “Jaꞌan nchao tsunxanthe ninguꞌe Ndo Dio, ko ngain nchaꞌon ninxin tsjena sinthachjian ningo.”

62Kuthimejan bingathjen xi daana icha renthe ko ndachro xa ngain Jesús:

—¿Axruꞌin satheꞌe? ¿Andua thi ndachro chujni teꞌi ixin jaꞌa?

63Aro Jesús xruꞌin ndachro. Kuthimejan ndachro xi daana icha renthe:

—Jaꞌan rithetuꞌan ixin Ndo Dio, ndo jichon, ndachjejin ni ra andua jaꞌa thi Cristo, thi Xeꞌen Ndo Dio.

64Jesús ndachro:

—Jaan, inchin jaꞌa ndachro. Ko kai rundathjo ra jaꞌa ra ixin sikon ni ra jaꞌan, thi Xii juixin ngajni, sariꞌi ngain rajianxiin Ndo Dio thi chunda kainxin juachaxin, ko sikon ni ra siꞌi ngakjan thjuii ngajni.

65Kuthimejan xi daana icha renthe kuinchje lunthue xa ixin guñao xa ko ndachro xa:

—Xii jiꞌi nichja xa jianꞌa ixin Ndo Dio. ¿Keꞌe icha rugundaa ná runichja chujni ixin thi bincheꞌe xa? Jaꞌa ra ukuiꞌin ra thi jianꞌa nichja xa. 66¿Keꞌe xraxaon ra?

Kain na̱ ndachro na̱:

—Jikininxin seꞌen xa.

67Kuthimejan kanxion na̱ kjuanito na̱ ndathee na̱ ngakon Jesús ko xrangii na̱ thon, ko ikanxion na̱ xrangii raa na̱ ngakon. 68Ko ndachro na̱ ngain:

—Ajaꞌa thi Cristo, ¡datsueꞌen kensen bintja!

Pedro ndachro ixin jeꞌe chunxinꞌa Jesús

(Mr. 14:66-72; Lc. 22:56-62; Jn. 18:15-18, 25-27)

69Are Pedro tajii nduja ngain patio, kunchieꞌen ngain jeꞌe, naa nchri ncheꞌe xree xi daana icha renthe ko ndachro nchra:

—Jaꞌa kai bakjiꞌo Jesús, thi juixin rajna Galilea.

70Aro ngathexin kon kain ni te nthi̱ꞌa̱, Pedro ndachro:

—Nunaꞌa keꞌe rindachjejin na.

71Kuthejan Pedro sajithji thi dachrjexin ni ngain patio, ko bikon inaa nchri ncheꞌe xree xi daana, ko ndachro nchra ngain ni te nthi̱ꞌa̱:

—Xii jiꞌi kai bakao xa Jesús, thi juixin rajna Nazaret.

72Pedro ndachro:

—Jaꞌan chunxinꞌa xii yaa.

73Kuthimejan kain ni te nthi̱ꞌa̱ kunchieꞌen na̱ ngain Pedro ko ndachro na̱:

—Jaan, ndua, jaꞌa kai naa chujnii Jesús ixin datsuanxin ni ra kexreen nichja ra.

74Kuthimejan Pedro banchia rugetsingataꞌa chrujan thi jianꞌa ko ndachro:

—Nduaxin chunxinꞌa xii yaa.

Ko tuenxion tsje kunthaxichia. 75Kuthimejan Pedro xraxaon thi ndachro Jesús ngain jeꞌe: “Xrarutsjeꞌa kunthaxichia ko jaꞌa uninxin nthiꞌa urundachro ixin chunxinꞌa na.” Kuthimejan Pedro bachrjexin nthi̱ꞌa̱ ko anto tsjanga.

Currently Selected:

San Mateo 26: plsNT

Highlight

Copy