Hechos 8:29-31

Ndá ti Ncha̱kuén Díos mé kꞌue̱tue̱hen chꞌin Felipe: ―Tóchjina ti itjen ti carreta. Ndá tuénxín kóchjina chꞌin Felipe ti itjen ti carreta la kuíhin chꞌan kixin ti nkexro a la tjenchekuáxin ti xroon tsíkjin Isaías. La ndáchro chꞌan: ―¿Tiénxian ti nkehe tjenchekuáxian ní? Ndá ti nkexro a, la ndáchro: ―¿Xá nkexrín chrókia̱nxia̱n ti kohya nkexro tsochronkaxín nkehe tꞌaxrjexín tíhi? Ndá chrónoéhe̱ chꞌan ti chꞌin Felipe kixin tsꞌi̱tꞌótjen tsjakꞌetja̱xi̱n ti itjen chꞌan tsjinki̱tsa.