Hechos 9

Ti nkehe kóhen Saulo

(Hch. 22:6-16; 26:12-18)

1Saulo la imá tjinkaon chꞌan chrókꞌóñá chꞌan ti sin tinkáchónki Ìnchéni Jesús. La xi̱kaha kjuitsjehe chꞌan ti ncha̱tꞌá tꞌe̱to̱an 2la kjuanchia chꞌan ijnko xroon kjuachaxin kixin ti sátsji chꞌan ti ni̱nko judío itjen Damasco la tsjeyá chꞌan ti sin kuákja ti nti̱a ni̱xin, á chojnindoa o̱ chojnichjin, la tsotsé chꞌan sátsjiko chꞌan sin ti chjasin Jerusalén tsꞌejóchjina sin. 3Landá ti ó kjuíji chꞌin Saulo chjinaxón ti chjasin Damasco, la kui̱xi̱n nkaya nka̱jní ijnko xrohi imá tꞌinkaséña la kua̱ntátjen ti jehe chꞌan. 4Ndá kjaminkí chꞌan la kuíhin chꞌan itén ijnko nkexro ndáchro:

―Saulo, Saulo, ¿nkekuènté nínkaoan chréhé ti janhan?

5A̱ndá chꞌin Saulo kjuanchankí:

―¿Xá nkexro ti jaha?

Ndá ti itan la ndáchro:

―Janhan mé Jesús, ti nkexro ninkákohén xritjéyá.

6Ndá chꞌin Saulo síxrànka̱ chꞌan kjuanchankí:

―¿Xá nkehe tjinkaoan si̱tꞌa?

Ndá Ìnchéni ndáchro:

―Tꞌínkatjen la sátjia Damasco, ndá ntiha tsinhín nkehe si̱chꞌe.

7Ti sin tjejóko chꞌin Saulo ntiha la imá chrákon sin kixin kuíhin sin ti itan níxja ti nkexro, kjánchó kꞌuíkonhña sin ninkexró. 8Landá ti ó kꞌuàya ti chꞌin Saulo, ndá kuakitje̱nki̱ ikon, la kꞌuíkonhña chꞌan ninkehó. Ndá xi̱kaha ti sin xriko chꞌan mé kuinkátséhe sin chꞌan sákjuíko sin Damasco. 9La ntiha kjuákꞌe chꞌan iní ña̱o la kꞌuíkonhña chꞌan la ko kjoniehña chꞌan la kꞌuihya chꞌan ninkehó.

10A̱ndá ti chjasin Damasco mé kjuákꞌe ijnko nkexro tinkáchónki Ìnchéni mé itꞌin Ananías. La ncha̱kuén Díos kꞌuíkonxín chꞌan Ìnchéni, ndáchro:

―¡Ananías! ¡Ananías!

Ndá jehe chꞌan kjuáte̱he chꞌan:

―Ìnchéni, ntihi itjeni.

11Ndá Ìnchéni ndáchro:

―Tꞌínkatjen la sátjia ti nti̱a itꞌin Nti̱a Ndoí. Ndá ti ó tsjasán ndo̱e chꞌin Judas la tjánchánkíá á ntiha itjen ijnko nkexro tsíkji̱xi̱n Tarso itꞌin Saulo. Jehe chꞌan mé tjechronoéhe̱ chꞌan Díos 12la kjuáko̱ha̱ chꞌan kixin ijnko nkexro itꞌin Ananías tsꞌixehen ti itjen chꞌan la tsjakꞌetja itja ti ikja chꞌan ndá tsꞌikon chꞌan ínaá ―ichro Ìnchéni.

13Ndá ti ó kuíhin chꞌin Ananías xi̱kaha la ndáchro:

―Ìnchéni, kuíhini chronka itsjé chojni nkexrín imá jie̱he ti nkexro a la itsjé nkehe jínahña kjuíchꞌehe chꞌan ti sin titekaon ti jaha tjejó chjasin Jerusalén. 14A̱ndá ijie la ikui chꞌan ntihi kixin tsíkꞌayéhe̱ chꞌan kjuachaxin kuènté ti ncha̱tꞌá tꞌe̱to̱an kixin tsotsé chꞌan kaín ti nkexro tꞌákje̱xi̱n ti ihni̱á.

15Kjánchó Ìnchéni ndáchro:

―Sátjia, kixin janhan kjuéyá ti nkexro a kixin tsja̱ko̱he̱ chꞌan ti sin ókjé nación la ko ti sin rey la ko kja̱xin ti sin israelita. 16Janhan tsjákohá chꞌan nkexrín imá tsjasóte chꞌan kixin tinkáchónki chꞌan ti janhan.

17A̱ndá chꞌin Ananías sákjuí ti nchia itjen chꞌin Saulo la kꞌuíxehen chꞌan. La kjuakꞌetja tja chꞌan ikja ti chꞌin Saulo la ndáchro chꞌan:

―Kíchóni Saulo, Ìnchéni Jesús, ti nkexro kꞌuikuan nko̱siñe nti̱a, mé kꞌue̱tua̱han kjuihá ntihi kixin tsꞌikuan ínaá la ko tsꞌayéhé ti Ncha̱kuén Díos ―ichro chꞌan.

18Ndá tuénxín kꞌuánótje̱xi̱n ti ikon chꞌin Saulo ijnko nkehe icha éxi kjo̱e koche xi̱kaha, ndá xíkꞌikon chꞌan ínaá. Ndá kꞌuínkatjen chꞌan la kuikite chꞌan. 19Ndá chrꞌéxi̱n la kjónie chꞌan ndá ikjan a̱sén chꞌan ínaá. Ndá kuíto̱he chꞌan ntiha iso ña̱o kꞌuéjóko chꞌan ti sin tinkáchónki Ìnchéni tjejó Damasco.

Saulo kjuako chjasin Damasco

20A̱ndá iso ña̱o chrꞌéxi̱n la kjuankíxin kjuako chꞌan ti ni̱nko Israel kixin Jesús mé Xje̱en Díos. 21La kaín ti sin tjejótihin la imá chrákon sin la ndáchro sin:

―¿Á jehya ti nkexro i ti tjinkaon sinchekꞌitjáña kaín ti chojni tinkáchónki Jesús ti chjasin Jerusalén ní? ¿Á jehya ti xra̱ a kjui̱xi̱n chꞌan ntihi kixin tsotsé chꞌan sin sátsjiko chꞌan ti tjejó ti sin ncha̱tꞌá tꞌe̱to̱an ní?

22Kjánchó chꞌin Saulo la chrákonhña chꞌan kjuako chꞌan kixin chaxín chꞌin Jesús mé Cristo. La ti sin judío kꞌuejó Damasco la í noehña sin nkehe tsjenka̱yáxin sin.

Kjuachahya ti sin judío itsé ti chꞌin Saulo

23 # 2Co. 11:32, 33. *Landá kꞌuatsínka iso ña̱o, la ti sin judío mé kjuénka̱yáxin sin tsꞌóñá sin ti chꞌin Saulo. 24Kjánchó chꞌin Saulo la kuíhin nkehe kjuénka̱yáxin sin la kónohe chꞌan kixin ncha̱kotjin la ko tie tjejóchóhen sin ti ndója chjasin kixin tsꞌóñá sin ti jehe chꞌan. 25Kjánchó ijnko tie la ti sin tinkáchónki Ìnchéni mé kjua̱kꞌe̱nka̱ya sin chꞌin Saulo ijnko ntaxra ijié la kꞌuínkaji̱nxi̱n sin nóton ti tja̱tꞌo̱ tsíka̱ntatjen ti chjasin. Ndá xi̱kaha kuaá chꞌin Saulo.

Saulo sákjui̱ Jerusalén

26A̱ndá ti ó kjuíji chꞌin Saulo Jerusalén, ndá ntiha tjinkaon chꞌan chrókónkotséko chꞌan ti sin tinkáchónki Ìnchéni. Kjánchó kaín sin la chráko̱nhe̱n sin chꞌan kixin noehña sin á chaxín kuitekaon chꞌan Ìnchéni o̱ náhí. 27A̱ndá chꞌin Bernabé mé sákjuíko chꞌin Saulo ti tjejó ti sin apóstol la chrónka chꞌan nkexrín chꞌin Saulo tsíkꞌikon chꞌan Ìnchéni ti nti̱a sákjuí chꞌan, la Ìnchéni nixje̱he̱ ti jehe chꞌan la ko chrónka chꞌin Bernabé nkexrín chrákonhña chꞌin Saulo kjuako ihni̱é Ìnchéni ti chjasin Damasco. 28Ndá xi̱kaha chꞌin Saulo la kuíto̱he Jerusalén la kꞌuájiko chꞌan ti sin tinkáchónki Ìnchéni, la chrákonhña chꞌan kjuako chꞌan kjuachaxíen ihni̱é Ìnchéni Jesús. 29La kja̱xin nixje̱he̱ chꞌan ti sin judío nixja ngiva griego, kjánchó jehe sin la tjinkaon sin chrókꞌóñá sin ti jehe chꞌan. 30A̱ndá ti ó kuíhin ti sin tinkáchónki Ìnchéni kixin xi̱kaha tjenka̱yáxin sin tsꞌóñá sin ti chꞌin Saulo, la sákjuíko sin chꞌan Cesarea la ntiha kꞌue̱to̱an sin sátsji chꞌan Tarso.

31Landá ti sin tinkáchónki Ìnchéni tjejó kuenté Judea, Galilea la ko Samaria la kjuaxróxin kꞌuejó sin la a̱ntsí kuinkáchónki sin Ìnchéni. La a̱ntsí chónta sin kjuasàya Ìnchéni la ko ti Ncha̱kuén Díos kjuínki̱tsa ti jehe sin la a̱ntsí nkákótsjé sin.

Pedro kjuínchekito̱he jína ti chꞌin Eneas

32Landá chꞌin Pedro kꞌuájitsjehe chꞌan kaín ti sin tinkáchónki Ìnchéni tjejó itsjé chjasin la kja̱xin kuitsjehe chꞌan ti sin tjejó Lida. 33La ntiha kꞌuitja chꞌan ijnko nkexro itꞌin Eneas. Mé ó ijní nánó tjetsínka chꞌan kixin tsíkꞌen to̱té#9:33 tsíkꞌen to̱té paralítico chꞌan. 34Landá chꞌin Pedro ndáchro:

―Eneas, Ìnchéni Jesucristo mé sintakito̱ha jína. Tꞌínkatjen, la tjatsían ti kania.

Landá Eneas la tuénxín kꞌuínkatjen. 35La kaín ti sin tjejó ti chjasin Lida la ko ti chjasin Sarón kꞌuíkon kixin kuito̱he jína ti nkexro níhi, la kuitekaon sin Ìnchéni.

Xechón tjan Dorcas

36A̱ndá ti chjasin Jope mé kjuákꞌe ijnko tjachjin tinkáchónki Ìnchéni Jesús mé itꞌin tjan Tabita. Mé ti ngiva griego la itꞌin tjan Dorcas. Jehe tjan mé jína kꞌuékjakꞌe tjan la kꞌuékjinki̱tsa tjan ti sin nóa. 37Ndá ti ña̱o a, mé imá kóníhi tjan la ikꞌuén tjan. Ndá ti sin ntiha la kjuínchekꞌónti sin ti cuerpoé tjan la kjuakꞌe sin ti cuerpo ti yaáxin piso. 38Ti chjasin Jope mé chjina ti chjasin Lida itjen la ntiha kjuákꞌe chꞌin Pedro. A̱ndá ti sin tinkáchónki Ìnchéni mé kuíhin sin kixin ntiha itjen chꞌan, la ichrꞌán sin yaá chojni kjui̱chrónòa sin kixin tjoka itsji chꞌan chjasin Jope.

39Landá chꞌin Pedro tuénxín sákjuíko chꞌan ti sin a. Ndá kjuíji sin ntiha la sákjuíko sin chꞌan ti itjen ti cuerpoé ti tjan tsíkꞌen. La ntiha tjejó itsjé chojnichjin ikꞌán la imá tsjánka sin la kjuako sin ti ika tsíkjo̱n ti tjan Dorcas ti na̱xa̱ kjuákꞌe tjan. 40A̱ndá chꞌin Pedro kꞌue̱to̱an kixin kaín sin tsꞌaxrjexín sin ntiha. Landá kjuákꞌetꞌo̱xin chꞌan la nixje̱he̱ chꞌan Díos. Ndá komá chꞌan ti tjan tsíkꞌen la ndáchro chꞌan:

―Tabita, Tꞌàyá.

Ndá jehe tjan kuakitje̱nki̱ tjan ikon tjan la kꞌuíkon tjan ntiha itjen chꞌin Pedro la kjuákꞌetja̱xi̱n tjan. 41A̱ndá chꞌin Pedro itsé itja tjan la kjuíchekꞌinkatjen chꞌan tjan. Ndá kꞌuéye̱he̱ chꞌan kaín ti sin tinkáchónki Ìnchéni la ko ti sin ikꞌán tjejó ntiha kixin tsꞌikon sin kixin ó xechón tjan. 42Mé ti kjuaxroan a la kuíhin kaín ti sin tjejó Jope, la itsjé sin kuitekaon sin Ìnchéni. 43A̱ndá chꞌin Pedro la kuíto̱he chꞌan iso ña̱o ti chjasin a, la kjuákꞌe chꞌan ndo̱e Simón, ijnko nkexro nchentá tjo̱é iko.

Currently Selected:

Hechos 9: poeNTplus

Highlight

Copy