San Juan 11

Chꞌin Lázaro ikꞌuén

1 # Lc. 10:38, 39. *Kjuákꞌe ijnko nkexro imá níhi mé itꞌin Lázaro, ti chjasin Betania, ti chjasin itjen ti tjan María la ko ti Marta, kícho chꞌan. 2#Jn. 12:3.*Ti tjan María i mé ti tjan kui̱ki̱te aceite xraxé náxrjón to̱té chꞌin Jesús la ko kjuínchexámáxin tjan ka̱xi̱hi tjan. 3A̱ndá yóí ti tjachjin, kícho chꞌin Lázaro, mé ichrꞌán sin ijnko nkexro kixin tsochenka chꞌin Jesús:

―Ìnchéni, ti nkexro tjue̱hé la níhi.

4A̱ndá ti ó kuíhin chꞌin Jesús xi̱kaha la ndáchro:

―Ti ichin chónta chꞌan la jehya tsꞌenxín chꞌan. Náhí. Tíha mé tsja̱ko̱xi̱n ti kjuachaxin ijié chónta ti Xje̱en Díos.

5Chꞌin Jesús la imá tjue̱he chꞌan ti tjan Marta, ti kícho tjan la ko ti chꞌin Lázaro, 6la kjónté kuíhin chꞌan kixin imá níhi ti chꞌin Lázaro, la ntahó kjuákꞌe chꞌan í yaá ña̱o. 7Ndá chrꞌéxi̱n ndáche chꞌan ti sin kꞌuájiko chꞌan:

―Sátsji̱ni Judea ínaá.

8Ndá jehe sin kjuáte̱he sin:

―Maestro, na̱xa̱ séhya ti sin judío la tjinkaon sin chrókꞌóñáxian sin ixro̱. ¿Á chaxín tjinkaoan sátsjia ntiha ní?

9Ndá ndáchro chꞌin Jesús:

―Nkojnko ña̱o la chónta teyó hora. A̱ndá ti nkexro ixri ncha̱kotjin la tsóténki̱xinhña ninkehó kixin tꞌinkaséñaxín ti xrohi kuènté ña̱o. 10A̱ndá ti nkexro ixri sítie mé tsóténki̱xin kixin chóntahya xrohi.

11Ndá chrꞌéxi̱n ndáchro chꞌan:

―Ti nkexro chóxini itꞌin Lázaro, la ó kꞌuajua. Ndá janhan sátsjia si̱ntakjaya̱ha̱ chꞌan.

12Ndá ndáchro ti sin kꞌuájiko chꞌan:

―Ìnchéni, ti kꞌuajua chꞌan la tsito̱he chꞌan jína.

13Kjánchó ti nkehe ndáchro chꞌin Jesús mé tꞌaxrjexín kixin ó kjuixin ikꞌuén chꞌin Lázaro. Ndá ti sin kꞌuájiko chꞌan la kjuénka̱yáxin sin kixin jehó ndáchro chꞌan kixin tjejua ti nkexro a. 14Méxra̱ chꞌin Jesús ndoá chrónka:

―Ó ikꞌuén chꞌin Lázaro. 15La chàna kixin tjénhña ntiha kixin xi̱kaha jahara la tsítekáonra. A̱ndá ijie ìntára sátsjini ti itjen chꞌan.

16Ndá chꞌin Tomás, kja̱xin ti̱ki̱texín chꞌan Nóhé, mé ndáchro:

―Kaíni sátsjini kixin koíni tsꞌenkoni chꞌan.

Chꞌin Jesús nchexechón chojni

17Ndá ti ó kjuíji chꞌin Jesús la kuíhin chꞌan kixin ti chꞌin Lázaro la ó chónta noó ña̱o tsíxravá. 18A̱ndá ti chjasin Betania mé chjinaxón ti chjasin Jerusalén itjen, éxi iyꞌá kilómetro kjínxi̱n. 19Méxra̱ itsjé ti sin judío sátsíkjitsjehe sin ti tjan Marta la ko ti tjan María, la nixje̱he̱ sin kixin kanhñó tsꞌává kixin tsíkꞌen ti kícho sin. 20Ndá ti ó kuíhin ti tjan Marta kixin ó ikui chꞌin Jesús, ndá kꞌuaxrjexín tjan ndo̱e tjan la kjuíxihin tjan nti̱a, kjánchó ti tjan María la kuíto̱he. 21Ndá ti tjan Marta ndáche tjan ti chꞌin Jesús:

―Ìnchéni, ti chrókjuákꞌe ntihi, la chrókꞌuénhña ti kíchóni, 22kjánchó ó noheni kixin Díos tsotjáha kaín ti nkehe tsjanchehé chꞌan.

23Ndá ndáchro chꞌin Jesús:

―Ti kichua la tsoxechón ínaá.

24Ndá ndáchro tjan Marta:

―Ó noheni kixin tsoxechón ti kíchóni ti ó tsoxechón kaín ti sin tsíkꞌen, ti ña̱o tsjixixín.

25Ndá ndáchro chꞌin Jesús:

―Janhan mé nta̱xechuán chojni la ko tja̱ha̱ sin kjuachón. Ti nkexro tsitekaon ti janhan la kjónté ó tsíkꞌen sin, la na̱xa̱ tsꞌejóchón sin. 26A̱ndá kaín ti nkexro na̱xa̱ tjejóchón la titekaon ti janhan, la tsꞌenhña sin nkochríxín. ¿Á titekaoan tíhi ní?

27Ndá ndáchro tjan:

―Chaxín, Ìnchéni, titekaoni kixin jaha mé ti Cristo, ti Xje̱en Díos, ti nkexro itsi chjasintajni.

Tsjánka chꞌin Jesús kixin tsíkꞌen Lázaro

28Ndá ti ó kjuixin ndáchro tjan xi̱kaha, ndá sákjuikꞌéye̱he̱ tjan ti kícho tjan María, la imó chenka tjan:

―Ntiha itjen ti Maestro la tꞌéya̱ha chꞌan ―ichro tjan.

29Ndá ti ó kuíhin ti tjan María, la tuénxín kꞌuínkatjen tjan, sákjuichréhe̱ tjan ti chꞌin Jesús 30kixin na̱xa̱ tsíkꞌixenhña chꞌan ti chjasin a, na̱xa̱ itjen chꞌan ti xéta chꞌan ti tjan Marta. 31Ndá ti sin judío tjejónixje̱he̱ sin tjan kixin kanhñó tsꞌává tjan, la ti ó kꞌuíkon sin kixin tjoka kꞌuaxrjexín tjan nchia, ndá kjuichréhe̱ sin tjan kixin kjuénka̱yáxin sin kixin sátsji tjan ti tsíxravá ti kícho tjan la ntiha tsotsjánkaxín tjan.

32Ndá ti tjan María, ti ó kjuíji tjan ti itjen chꞌin Jesús, ndá kjuákꞌexín tjan tochꞌin tjan nkayakon chꞌan, la ndáchro tjan:

―Ìnchéni, ti chrókjuakꞌe ntihi, la chrókꞌuénhña ti kíchóni.

33Ndá ti ó kꞌuíkon chꞌin Jesús kixin tsjánka ti tjan María la ko ti sin judío kjuíjikotóxi̱n tjan, ndá imá kꞌuává chꞌan, la kóxakohen a̱sén chꞌan. 34Ndá kjuanchankí chꞌan:

―¿Nketí kjua̱vára ti kichuara?

Ndá ndáchro sin:

―Ìnchéni, xrákia, tsjehé.

35Ndá chꞌin Jesús tsjánka. 36Ndá ti sin Judío la ndáchro:

―Tsjehéra kixin imá kꞌuétjue̱he chꞌan ti nkexro tsíkꞌen.

37Kjánchó íso sin ndáchro:

―Ti nkexro i mé kjuínchekꞌikon ti nkexro tꞌikonhña. ¿Á xitjahya chrókjuajon chꞌan kjuachaxin kixin chrókꞌuénhña ti chꞌin Lázaro ní?

Ti xechón Lázaro

38Ndá na̱xa̱ imá tꞌává a̱sén chꞌin Jesús la kóchjinehe chꞌan ti tsíxravá ti nkexro a. Mé tíha la ijnko itjo̱, ndá ndója ti itjo̱ mé tekjèxin ijnko ixro̱. 39Ndá kꞌue̱to̱an chꞌin Jesús, ndáchro:

―Takjìinra ti ixro̱.

A̱ndá ti tjan Marta, kícho ti nkexro tsíkꞌen, mé ndáchro:

―Ìnchéni, kjá ó imá ixra̱ chꞌan kixin ó chónta noó ña̱o xravá chꞌan.

40Ndá kjuáte̱he chꞌin Jesús, ndáchro:

―¿Á ndáxrja̱nhña kixin ti tsitekaoan la tsꞌikuan ti kjuachaxin ijié kuènté Díos ní?

41Ndá kjuakjìin sin ti ixro̱, ndá chꞌin Jesús konta nka̱jní, la ndáchro:

―Itꞌéni, tja̱há kjuasáya kixin kuihín ti nkehe kjuanchaha. 42Janhan ó nona kixin xráxín tihín ti nkehe tjanchaha, ndá ijie ndáxrja̱n kixin tsihin ti sin tjejóntaxín ntihi, ndá tsitekaon sin kixin jaha ichrꞌán ti janhan kꞌuinka.

43Ndá ti ó kjuixin nixja chꞌan, ndá itsen ndáchro chꞌan:

―¡Lázaro, tꞌaxrjéxian méhe̱!

44Ndá ti nkexro tsíkꞌen la kꞌuaxrjexín ntiha, la ti itja chꞌan la ko ti to̱té chꞌan la na̱xa̱ tjejóchróntetoxín ika la ko ti nkayakon chꞌan la tjekjèxin ijnko ika. Ndá chꞌin Jesús kꞌue̱to̱an:

―Tjasinta̱nka̱ra ti ika chróntetoxín chꞌan kixin jína sátsji chꞌan.

Kjuenka̱yáxin sin nkexrín tsotsé sin chꞌin Jesús

(Mt. 26:1-5; Mr. 14:1-2; Lc. 22:1-2)

45Ndá itsjé ti sin judío sákjuikotoxi̱n sin ti tjan María mé kꞌuíkon sin ti kjuaxroan kjuasin chꞌin Jesús ndá kuitekaon sin ti jehe chꞌan, 46kjánchó iso sin la sákjuitsjehe sin ti sin fariseo la chrónka sin ti kjuaxroan kjua̱ko̱xi̱n chꞌin Jesús. 47A̱ndá ti sin fariseo la ko ti sin ncha̱tꞌá tꞌe̱to̱an mé nkoko̱a kónkotséko sin ti sin a̱ntsí tꞌe̱to̱an, la ndáchro sin:

―¿Xá nkehe chrókjuichꞌeheni ti nkexro i kixin jehe chꞌan la imá tjasin chꞌan kjuaxroan ijié? 48Ti tsíto̱heni chꞌan xi̱kahó, ndá kaín chojni tsitekaon sin ti jehe chꞌan, la itsi ti sin romano tꞌe̱to̱an la sinchekꞌitjáña sin ti ni̱nkuéni, ti ixra̱ chóntani la ko ti chjasin kuènténi ―ichro sin.

49Ndá chꞌin Caifás, ti nkexro tꞌe̱tue̱hen ti sin ncha̱tꞌá ti nánó a, mé ndáchro:

―Jahara la noahñara ninkehó kuènté tíhi, 50la ko kjá tjénka̱yáxinhñara kixin ícha jína nkoko̱a chojni chrókꞌuenyákohe̱n ti chjaséni ndá chrókꞌuitjáñahña kuenté ti chjasin ―ichro chꞌan.

51Kjánchó chꞌin Caifás, ti ncha̱tꞌá kꞌue̱to̱an ti nánó a, la jehya jehí chꞌan kjuénka̱yáxin chꞌan tíha. Náhí. Chrónka chꞌan jnko nkehe chaxín tsoxiteyá kixin Jesús mé tsꞌenyákohe̱n ti chjasin judío. 52A̱ndá jehya ti chjasin kuènté sin ó chrókꞌuenyákohe̱n chꞌan. Náhí. Itsꞌen chꞌan kixin sinchekaá chꞌan kaín ti sin kꞌóna xje̱en Díos tjejó kuenté chjasintajni. 53A̱ndá ti ña̱o a ti sin tꞌe̱tue̱hen ti sin judío mé kjuankíxin kjuénka̱yáxin sin kixin chrókꞌóñá sin ti chꞌin Jesús.

54A̱ndá chꞌin Jesús la í noxínhña kꞌuáji chꞌan ti siín ti sin judío, la kꞌuaxrjexín chꞌan Judea, la sákjuí chꞌan ti chjasin itꞌin Efraín chjinaxón nte̱je̱, la ntiha kjuákꞌeko chꞌan ti sin kꞌuájiko chꞌan.

55Ndá í séhya ndá tsꞌixin ti kia Pascua, ti kia kuènté ti sin judío. Ndá itsjé chojni kꞌuaxrjexín sin chjasén sin sákjui̱ sin Jerusalén kixin ntiha tso̱yaxíhin sin kixin sinchetjóá sin a̱sén sin, kjónté na̱xa̱ xrankíxinhña ti kia Pascua. 56Ndá ntiha kꞌuájikjeyá sin ti chꞌin Jesús, la ko ti na̱xa̱ tjejó sin ni̱nko la kjuanchankíhi kícho sin:

―¿Jahara nkechrora? ¿Á chrókui chꞌan ti kia i ní o̱ náhí?

57A̱ndá ti sin fariseo la ko ti sin tꞌe̱tue̱hen ti sin ncha̱tꞌá la ó kꞌue̱to̱an sin kixin ti nkojín nkexro nohe nketí itjen ti chꞌin Jesús la tsochronka sin kixin jína sátsjitsé sin chꞌan tsjakꞌechjina chꞌan.

Currently Selected:

San Juan 11: poeNTplus

Highlight

Copy