San Juan 4

Chꞌin Jesús la ko ti tjan samaritana

1A̱ndá ti sin fariseo mé kónohe sin kixin a̱ntsí itsjé chojni chréhe̱ ti chꞌin Jesús la ko kui̱ki̱te chꞌan itsjé sin ke chꞌin Juan. 2Kjánchó jehya chꞌin Jesús kui̱ki̱te chojni. Náhí. Ti sin kꞌuájiko chꞌan mé kui̱ki̱te sin chojni. 3Ndá ti ó kónohe chꞌin Jesús kixin xi̱kaha ichro ti sin fariseo, ndá kꞌuaxrjexín chꞌan Judea la sákjuí chꞌan Galilea.

4A̱ndá ti ó xráko̱axin chꞌan ntiha, la ticháxi̱n tsꞌatsínka chꞌan ti nonte Samaria. 5#Gn. 33:19; Jos. 24:32.*Ndá kjuíji chꞌan ijnko chjasin itꞌin Sicar itjen Samaria, chjinaxón ti nonte tsichjéhe chꞌin Jacob ti xje̱en, José. 6Mé ntiha itjen ti pozo tjiá ìnta̱ kꞌuékuènté chꞌin Jacob. A̱ndá chꞌin Jesús ikui ntiha la imá kꞌóxrjé chꞌan kixin imá ikjín ti nti̱a kjui̱xi̱n chꞌan, ndá kjuákꞌetja̱xi̱n chꞌan chrínta ti pozo. Mé ó chjina chonkíxin tíha. 7-8A̱ndá ti sin kꞌuájiko chꞌan la sákjuí sin ti chjasin chjinaxón ntiha sákjuikꞌe̱na sin nkehe sinie sin. Ndá kanhñó isé la ikui ijnko chojnichjin Samaria tsakítsje ìnta̱ ti pozo a. A̱ndá chꞌin Jesús ndáche chꞌan tjan:

―Tsjánjua intsí ìnta̱ itsꞌia.

9 # Esd. 4:1-5; Neh. 4:1, 2. *A̱ndá ti tjan samaritana kjuáte̱he tjan, ndáchro tjan:

―¿Nkekuènté kixin jaha ijnko chojni judío mé tjánchàna ìnta̱ itsꞌia kixin janhan la ijnko chojnichjin samaritana?

(Xi̱kaha ichro tjan kixin ti sin judío la ko ti sin samaritano la chóntehya sin kjuasàya kícho sin.) 10Ndá ndáchro chꞌin Jesús:

―Ti chrókónoha ti nkehe tjajon Díos la ko chrókjuatso̱an ti nkexro tjetjáncháhá ìnta̱, ndá jaha chrókjuanchehé chꞌan ìnta̱, la jehe chꞌan chrótjáha chꞌan ti ìnta̱ tjechón nkochríxín.

11Ndá ti tjan samaritana la ndáchro:

―¿Xá nkexrín tsjánjua ti ìnta̱ kixin chontahya chontahya nkehe tsakítsjexián?, la ti pozo i la imá ni̱nka. ¿Xá nketí tsjikákjáxian ti ìnta̱ tjechón tsjánjua? 12Ti nkexro kꞌuaxrjeníxini, Jacob, mé kuíto̱he ti pozo i, mé jehe chꞌan kuékꞌi chꞌan ti ìnta̱ la kja̱xin ti xje̱en chꞌan la ko ti iko kuènté chꞌan. ¿A̱ndá jaha la xá a̱ntsí chonta kjuachaxin ke ti jehe chꞌan ní?

13Ndá kjuáte̱he chꞌin Jesús, ndáchro:

―Kaín ti nkexro itsꞌi ti ìnta̱ i la na̱xa̱ itsꞌen sin ìnta̱ ínaá. 14A̱ndá ti nkexro itsꞌi ti ìnta̱ tsjánjua janhan, la í tsꞌenhña sin ìnta̱ ínaá, kixin ti ìnta̱ tsjánjua janhan la mé tsꞌóna éxi ìnta̱ tjetꞌaxrje nkaya a̱sén sin, la tíha tsjajon ti kjuachón nkochríxín.

15Ndá ti tjan samaritana ndáchro:

―Ti xi̱kaha la tsjánjua ti ìnta̱ a itsꞌiá, ndá í tsꞌenhñani ìnta̱ ínaá, la ko í tsicháxi̱nhña tsjihá ntihi tsakítsje ti ìnta̱.

16Ndá ndáchro chꞌin Jesús:

―Sátjia, tikꞌeye̱hé ti xìá, ndá tsjihá ntihi ínaá.

17Ndá ndáchro tjan:

―Chontahya xìná.

Ndá ndáchro chꞌin Jesús:

―Chaxín ndoá ndáchrua kixin chontahya xìá, 18kixin inꞌó xìá kꞌuéchonta, a̱ndá ti nkexro chónta ijie la jehya xìá. Tíhi la ndoá chro̱nka.

19Ndá ti ó kuíhin tjan tíha, la ndáchro tjan:

―Tꞌíkua̱n kixin jaha la ijnko nkexro chronka itén Díos. 20Ti sin kꞌuaxrjeníxini kꞌuejó ósé mé kꞌuéxraxinkakonxín sin Díos ti ijna̱ i, kjánchó jahara chojni judío mé ndáchrora kixin ti chjasin Jerusalén, mé chrókjuikosáyexíni Díos.

21Ndá chꞌin Jesús ndáchro:

―Titekaoan kixin itsi ti ña̱o í tsjíkosáyexínhñara Itꞌéni Díos ti ijna̱ i, la ko tsjíkosáyexínhñara Díos ti chjasin Jerusalén kja̱xin. 22Jahara chojni samaritano chonhñara ti nkexro tjikosayéhéra. A̱ndá jeheni chojni judío la chóxini ti nkexro tjikosayéheni kixin ti nkexro tsaáxini mé tsꞌaxrjeníxin ti sin judío. 23Ndá ó itsi ti ña̱o, la ti ña̱o a mé ijie, la ti sin chaxín tjinkaon tsjikosáyehe Itꞌéni Díos la chaxín kaín a̱sén sin tsjikosáyehe sin ti jehe chꞌan, kixin Díos mé tóxríhi̱n kixin xi̱kaha tsjikosáyehe chojni ti jehe chꞌan. 24Díos mé tꞌikonhñani, kjánchó ti sin tjikosáyehe chꞌan mé ticháxi̱n kaín a̱sén sin tsjikosáyehe sin chꞌan éxi tjinkaon Ncha̱kuén chꞌan.

25A̱ndá ndáchro tjan:

―Ó noheni kixin itsi ti Mesías, ti Cristo. Ti ó itsi chꞌan mé tsochronkaxín chꞌan kaín nkehe ―ichro tjan.

26Ndá ndáchro chꞌin Jesús:

―Ti nkexro a mé janhan, ti nkexro tetjua ijie.

27La ti sin kꞌuájiko chꞌan mé kja̱nxi̱n sin ti chjasin, la chrákon sin kꞌuíkon sin kixin tjenixje̱he̱ chꞌan ijnko chojnichjin, kjánchó ninkexró kjuanchankíehya ti jehe chꞌan nkehe tjinkaon tjan o̱ nkehe ikjo sin. 28A̱ndá kjuákꞌe tjan ti tóa, la sákjuí tjan ti chjasin la ndáche tjan ti sin tjejó ntiha:

29―Ìntára sátsjitsjeheni ijnko nkexro chronka kaín ti nkehe kjui̱tꞌa senó. ¿Xá chrókójehya tíhi ti Cristo ní?

30Ndá ti chojni mé kꞌuaxrjexín sin ti chjasin la sákjuí sin ti itjen chꞌin Jesús. 31A̱ndá na̱xa̱ tjijihya sin, la ti sin kꞌuájiko chꞌin Jesús mé chrónoéhe̱ sin chꞌan, ndáchro sin:

―Maestro, ¿á sintehya ní? ―ichro sin.

32Ndá chꞌin Jesús ndáchro:

―Ó chonta nkehe sinié la jahara noahñara nkehe tíha.

33A̱ndá ti sin kꞌuájiko chꞌan, mé kjuanchankíhi kícho sin ndáchro sin:

―¿Xá nkojín nkexro chrókui̱ka̱o nkehe sinie chꞌan ní?

34Kjánchó ndáchro chꞌin Jesús:

―Ti ixra̱ si̱tꞌa la ko si̱ntaxiteyá ti nkehe kꞌue̱to̱an ti nkexro ichrꞌán ti janhan, mé tíha ti nkehe sinie janhan. 35Jahara ndáchrora: “Noó nitjó na̱xa̱ tꞌitjáña ndá tsotjáni.” Kjánchó janhan ndáxrja̱n kixin chrótsjehéra ti ino a kixin ó tsícha la ó jína tso̱tjara. 36Ti sin ichꞌe ixra̱ itjá la tsoxenkehe sin. A̱ndá ti nkehe tsotjá sin la mé chojni tíha, la tsꞌáyéhe̱ sin kjuachón nkochríxín, ndá xi̱kaha ti sin kꞌue̱nka̱ la ko ti sin itjá, la nkokón tso̱chéhe̱ sin. 37Mé xi̱kaha ichro ti nkehe tsíndáchro sin ósé: “Ijnko nkexro tsꞌe̱nka̱, a̱ndá ókjé nkexro tsotjá.” 38A̱ndá janhan mé ichrꞌan ti jahara kixin tso̱tjara ti nonte ókjé nkexro kꞌue̱nka̱. Ti nonte ókjé sin kꞌóxrjé sin, kjuíchꞌe sin ixra̱, a̱ndá jahara mé tso̱tjara ti nkehe tsíkꞌóna kixin ti ixra̱ kjuíchꞌe sin.

39A̱ndá itsjé ti sin samaritano kuènté ti chjasin ntiha, mé kuitekaon sin ti chꞌin Jesús kixin ti nkehe chrónka ti tjan a kixin jehe chꞌan chrónka chꞌan kaín ti nkehe kjuíchꞌe tjan senó. 40Ndá ti ó kuíhin sin ti nkehe chrónka tjan, ndá ikui sin ti itjen chꞌin Jesús la chrónoéhe̱ sin chꞌan kixin tsito̱he chꞌan ntiha. Ndá kuito̱he chꞌan ntiha yaá ña̱o. 41Ndá itsjé ti sin a kja̱xin kuitekaon sin ti jehe chꞌan kixin kuíhin sin ti nkehe nixja chꞌan. 42Ndá ndáche sin ti tjan a:

―Ijie titekaoni, jehya kixin ti nkehe chro̱nka ó. Náhí. Kixin kja̱xini kuíhini ti nkehe chronka chꞌan, la noheni kixin jehe chꞌan mé chaxín ti nkexro tsaáxin chojni chjasintajni.

Kuito̱he jína xje̱en ijnko nkexro chꞌehe ixra̱ gobierno

43A̱ndá kꞌuatsínka yaá ña̱o, ndá chꞌin Jesús kꞌuaxrjexín chꞌan Samaria, ndá sákjuí chꞌan Galilea. 44#Mt. 13:57; Mr. 6:4; Lc. 4:24.*A̱ndá jehe chꞌan tsíndáchro chꞌan kixin ti nkexro chronka itén Díos, la ti sin chjasén chꞌan la tsochóntehya sin kjuasáya ti jehe chꞌan. 45#Jn. 2:23.*Kjánchó ti ó kjuíji chꞌan Galilea la kjuikosáyehe sin chꞌan kixin kja̱xin sin tsíkji̱ sin ti kia Pascua kꞌuíxin chjasin Jerusalén, la tsíkꞌikon sin kaín ti kjuaxroan kjuasin chꞌan.

46 # Jn. 2:1-11. *Ndá chꞌin Jesús xíkjan ti chjasin Caná, nonte Galilea, ti kjuíchꞌénaxín chꞌan ìnta̱ vino. Ntiha mé kjuákꞌe ijnko nkexro tꞌe̱to̱an chꞌehe ixra̱ gobierno mé chónta ijnko ixjan níhi itjen ti chjasin Capernaum. 47Ndá kuíhin ti nkexro tꞌe̱to̱an kixin tsíki̱xi̱n chꞌin Jesús Judea la itjen chꞌan Galilea, ndá sákjuichréhe̱ chꞌan, la chronòa chꞌan kixin sáchrókjuiko chꞌan ndo̱e chꞌan kixin sinchekito̱he jína ti xje̱en chꞌan ó chjina tjetꞌen. 48Ndá ndáchro chꞌin Jesús:

―Jahara la chrókuitekákonhñara ti chrókꞌuíkonhñara chrókjuásian kjuaxroan.

49Ndá chrónòa ti nkexro tꞌe̱to̱an, ndáchro:

―¿Á jehya jína sáchrokjuini ndo̱na#4:49 ndo̱na mi casa jaí, kixin xja̱na la ó tjetꞌen?

50Ndá kjuáte̱he chꞌin Jesús, ndáchro:

―Ikjan ndo̱a kixin ti xja̱an la ó jína itjen.

Ndá ti nkexro tꞌe̱to̱an la kuitekaon ti nkehe ichro chꞌin Jesús, la sákjuí chꞌan. 51A̱ndá ti ó kjuíji chꞌan chjinaxón ndo̱e chꞌan, la ti sin chꞌehe ixra̱ ti jehe chꞌan la kjuixin sin nti̱a, chrónka sin:

―Xja̱an la ó jína itjen.

52Ndá ti ó kjuanchankí chꞌan kixin nkehora kuito̱he xjan jína, la ndáchro sin:

―Ijna la una kójín mé kjuìin ti sóa.

53Ndá kónohe chꞌan kixin xi̱kaha ti hora tsíndáchro chꞌin Jesús kixin ti xje̱en chꞌan la ó jína itjen. A̱ndá jehe chꞌan la ko kaín ti sin tjejó ndo̱e chꞌan la kuitekaon sin ti chꞌin Jesús.

54Tíha mé ti yaáxin kjuaxroan kjuasin chꞌin Jesús ti ó kui̱xi̱n chꞌan Judea, ikjan chꞌan Galilea.

Currently Selected:

San Juan 4: poeNTplus

Highlight

Copy