Lucas 10

Ti setenta chojni sátsjikjako

1Ndá chrꞌéxi̱n Ìnchéni kjueyá chꞌan íjnko setenta chojni ndá kꞌue̱to̱an chꞌan sátsji sin yayaá sin tsitónxin sin nti̱a kaín ti chjasin tjinkaon sáchrokjui chꞌan. 2#Mt. 9:37, 38.*Ndá ndáchro chꞌan:

―Chaxín ndáxrja̱n kixin imá tsíkꞌóna, kjánchó ti chojni sichꞌe ixra̱ la tsjéhya. Méxra̱ chrókjuanchehéra Ìnché ti nonte kixin chróchrꞌán chꞌan íso chojni chrókjuíchꞌe ixra̱. 3#Mt. 10:16.*Sátjira. Xráxinkaonra kixin janhan tétua̱hanra sátsjira éxi kolélo chríkjan ti konda̱níxra. 4Tsjiko̱ahyara kabolsa, tjo̱a̱ tꞌinka chichaon la ko to̱ka̱te̱ la cho̱énhñara nixjehéra chojni ti nti̱a kixin tso̱xrjenhña. 5Ti ó tsꞌixe̱hénra nkojín nchia la sa̱o nixjehéra sin, ndáchrora kixin tsꞌáyéhe̱ sin kjuaxróxin. 6A̱ndá ti tjejó ti sin chónta kjuaxróxin la tsꞌáyéhe̱ sin ti kjuaxróxin. A̱ndá ti náhí, la ti kjuaxróxin chrókꞌuáyéhe̱ sin la sátjikoára. 7#1Co. 9:14; 1Ti. 5:18.*Ndá ti nchia tsjajon sin kjuachaxin la chrókuíto̱hara, la ntiha intera la ko itꞌira ti nkehe tjajon sin, kixin ti nkexro ichꞌe ixra̱ la siín kjuachaxin tsoxenkehe sin. Tsjihyara íjnko nchia la íjnko nchia. 8Ti ó tsjasánra ijnko chjasin la tsjajon sin kjuachaxin tsꞌejora la intera ti nkehe tsjajon sin. 9La nchekito̱héra jína ti chojni níhi tjejó ntiha. La chenkara sin kixin ti kjuachaxin tꞌe̱to̱axín Díos la ó tejóko sin. 10#Hch. 13:51.*A̱ndá ti ó tsjasánra ijnko chjasin, ndá tsjajonhña sin kjuachaxin, la tꞌaxrjéxinra ntiha sátjira ti nti̱a, la ndáchrora: 11#Mt. 10:7-14; Mr. 6:8-11; Lc. 9:3-5.*“Kjónté ti inche chonta to̱téni la tsꞌóxèjini kixin tja̱ko̱xi̱ni kixin Díos sinchekjasótiara. Kjánchó chrókónohara tíhi kixin ti kjuachaxin tꞌe̱to̱axín Díos la kjínhña itjen ti tjejora.” 12#Gn. 19:24-28; Mt. 11:24; Mt. 10:15.*Chaxín ndáxrja̱n kixin ti ña̱o a la kjuaxróxinhña tsꞌatsínka sin. A̱ntsí náxrjón tsꞌatsínka ti sin Sodoma ke jehe sin ―ichro chꞌin Jesús.

Iso chjasin titekakonhña

(Mt. 11:20-24)

13 # Is. 23:1-18; Ez. 26:1—28:26; Jl. 3:4-8; Am. 1:9, 10; Zac. 9:2-4. *Ndá ndáchro chꞌin Jesús:

―¡Nóara jahara tjejora Corazín! ¡Nóara jahara tjejora Betsaida! Ti chrókꞌuixin ti kjuaxroan kꞌuíkonra ti chjasin Tiro la ko Sidón, la tjoka chrókjuitóxi̱n sin ti nkehe tjenka̱yáxin sin, la chrókꞌuinkáya sin ika tié la ko chrókjuinchekꞌia sin a̱sén sin nteso kixin chrókjua̱ko̱xi̱n sin tꞌává sin. 14Kjánchó ti ña̱o tsito̱exín iji̱é chojni la jahara a̱ntsí tsjasótiara, ke ti chjasin Tiro la ko Sidón. 15#Is. 14:13-15.*A̱ndá jahara chojni Capernaum, tjénka̱yáxinra kixin imá nohara, la sátsjira nkaya nka̱jní, ichrora, kjánchó chaxínhña. Jahara sátsjira tsjasótiara ti siín ti sin tsíkꞌen.

16 # Mt. 10:40; Mr. 9:37; Lc. 9:48; Jn. 13:20. *’Ti nkexro tihin ti nkehe ndáchrora la tihin sin ti nkehe ndáxrja̱n, a̱ndá ti titekakuenhña sin ti jahara la titekakuenhña sin ti janhan. A̱ndá ti nkexro titekakonahña ti janhan la titekakonhña sin ti nkexro ichrꞌána kꞌuinka.

Ti ikjan ti sin setenta

17A̱ndá ti ó ikjan ti sin setenta sátsíkji la imá chéhe̱ sin, ndáchro sin:

―Ìnchéni, hasta ti ncha̱kuén jínahña titekakohen ti jeheni ti ó tꞌákjenxi̱ni ti ihni̱á.

18Ndá ndáchro chꞌin Jesús:

―Chaxín, kꞌuíkua̱n kixin ti Jínahña la kꞌuánótje̱xi̱n nka̱jní éxi ijnko kjónkíxín xi̱kaha. 19#Sal. 91:13.*Tsjehéra janhan kjuánjua kjuachaxin kixin kjónté konche la ko konchi̱a̱ tsinkatjara la ninkehó tso̱anhñara kixin ninkehó ti kjuachaxin kuènté ti Jínahña tsjachahya. 20Kjánchó chrókócháhyara kixin ti ncha̱kuén jínahña titekakohen ti jahara, Náhí. Chrókócháhara kixin sínixín ihni̱ára nkaya nka̱jní ―ichro chꞌin Jesús.

Chꞌin Jesús nixje̱he̱ Díos

(Mt. 11:25-27; 13:16-17)

21A̱ndá tuénxín ti Ncha̱kuén Díos kjuínchechéhe̱ ti chꞌin Jesús la ndáchro chꞌan:

―Tja̱ha kjuasáya jaha Itꞌéni, Ìnché nka̱jní la ko chjasintajni, kixin jaha kjuánjua kjuachaxin kixin ti sin kanhñó nohe la chrókienxín sin ti nkehe kuènté nka̱jní la kjuájonhña kjuachaxin kixin ti sin imá nohe chrókꞌuitja sin tíhi. Mé xi̱kaha kóxríhan jaha Itꞌéni.

22 # Jn. 3:35; Jn. 10:15. *’Tꞌaná mé kjuajon kaín nkehe. Kohya ninkexró chaxín chóxin ti Xje̱en Díos. Jehó ti Itꞌé chꞌan. La ko ninkexró chóxin ti Itꞌé chꞌan. Jehó ti Xje̱en Díos la ko ti sin tsíkjeyá chꞌan kixin tjinkaon chꞌan tsochóxin sin ti Itꞌé chꞌan ―ichro chꞌin Jesús.

23Ndá komá chꞌan ti sin kꞌuájiko chꞌan la ndáchro:

―Díos sincheñao ti sin kꞌuíkon éxi tꞌikonra. 24Chaxín ndáxrja̱n kixin itsjé ti sin kꞌuéchronka itén Díos ósé la ko itsjé ti sin rey kꞌuétjinkaon sin chrókꞌuikon sin éxi tꞌikonra, kjánchó kꞌuíkonhña sin, kꞌuétjinkaon sin chrókuihin sin ti nkehe tjejotihínra ijie, kjánchó kienhña sin.

Chꞌin Jesús kjuíncheyóe̱xin ijnko samaritano jína

25 # Mt. 22:35-40; Mr. 12:28-34. *Ndá ijnko maestro tjako ley kꞌuínkatjen la nixje̱he̱ chꞌin Jesús kixin tjinkaon tso̱noexín á chaxín nohe chꞌin Jesús tsjate̱he, la ndáchro:

―Maestro, ¿nkexrín chrókjuíchꞌeni ndá chrókꞌuitjani ti kjuachón nkochríxín?

26Ndá chꞌin Jesús ndáchro:

―¿Nkexrín nixja ti ley? ¿Nkexrín tiénxian?

27 # Dt. 6:5; Lv. 19:18. *Ndá ti maestro tjako ley la ndáchro:

―“Tso̱tjue̱heni Ìnchéni Díos kaín a̱séni la ko kaín ti fuerza chóntani la ko kaín ti kjuaxrexinkaon kuènténi la ko chrótjue̱heni kíchóni éxi tjue̱xíni a̱séni.”

28 # Lv. 18:5. *Ndá ndáchro chꞌin Jesús:

―Jína kjuáte̱he. Xi̱kaha ichꞌe la tsochonta ti kjuachón.

29Kjánchó ti maestro tjako ley la tjinkaon chrókjua̱ko̱xi̱n kixin jína ti nkehe tsíkjanchankí la kjuanchankí ínaá, ndáchro:

―¿Xá nkexro ti kíchóni chrótjue̱heni?

30Ndá chꞌin Jesús kjuáte̱he, ndáchro:

―Ijnko chojni kjui̱xi̱n ti nti̱a ti̱xi̱n ti chjasin Jerusalén sátsji nó chjasin Jericó, ndá kꞌuátꞌóhe nti̱a iso xíche̱e, la kueéhe sin chꞌan kaín ti nkehe sáchrókjuiko chꞌan, la ko tsíkakítsjehe sin ti iké chꞌan, la tsíkjate sin chꞌan, ndá sátsíkji sin tsíkito̱he sin chꞌan, ó chjina tjetꞌen chꞌan. 31Ndá xrína̱hña kꞌuatsínka ijnko ncha̱tꞌá ti nti̱a a, ndá kꞌuíkon chꞌan xi̱kaha la ándo̱sén chꞌan kꞌuatsínké chꞌan. 32Kja̱xin ntiha kꞌuatsínka ijnko chꞌin levita ndá ti ó kꞌuíkon chꞌan xi̱kaha la ándo̱sén ikjin kꞌuatsínka chꞌan. 33#2Cr. 28:15.*Ndá ijnko nkexro kjui̱xi̱n nó Samaria kꞌuatsínka ti nti̱a a, ndá kꞌuíkon chꞌan tjetsínka ti nkexro a la kui̱konoéhe̱ chꞌan. 34Ndá kóchjinehe chꞌan ti nkexro tsíkóníhi la kjuíchꞌehe chꞌan xro̱a̱n ti tsíchritꞌo̱, chjéhe chꞌan aceite la ko vino la kjuínchentetoxín chꞌan ika. Ndá kjuínchekitákꞌá chꞌan ti si̱níhi a, ti kolócho̱e chꞌan. Ndá sákjuíko chꞌan ijnko nchia to̱kꞌèxín chojni ndá ntiha kꞌuayakohen chꞌan ti nkexro a. 35Ndá ti ó kóña̱o ti ó sátsji chꞌan la kuakitsje yaá chichaon la chjéhe chꞌan ìnché ti nchia ndáchro chꞌan: “Tꞌayakohénra ti nkexro i, a̱ndá ti tsicháxi̱hin chꞌan a̱ntsí la ti ó tsokjan ndá tsjénka̱ha kaín”, ichro ti chꞌin samaritano. 36A̱ndá ijie, ¿nkexro ti iní sin kꞌuatsínka ti nti̱a a, a̱ntsí tjue̱he ti nkexro kjuíncheníhi ti xíche̱e?

37A̱ndá kjuáte̱he ti maestro tjako ley:

―Ti nkexro kui̱konoéhe̱ ti nkexro tsíkóníhi.

Ndá ndáchro chꞌin Jesús:

―Sátjia la xi̱kaha ichꞌe ―ichro chꞌin Jesús.

Chꞌin Jesús sákjuí ndo̱e Marta la ko María

38 # Jn. 11:1. *Na̱xa̱ tjetji chꞌin Jesús la kjuíji ijnko chjasin intsí. La ntiha itjen ijnko tjan itꞌin Marta, la kjuajon tjan kjuachaxin kuíto̱he chꞌin Jesús ndo̱e tjan. 39Ndá jehe tjan chónta tjan ijnko kícho tjan itꞌin María. Ndá jehe tjan kjuákꞌetja̱xi̱n tjan to̱té chꞌin Jesús la tihin tjan nkehe tjako chꞌan. 40Kjánchó tjan Marta la tóxakohen tjan kixin nchónhña ixra̱ chónta tjan, ndá kóchjinehe tjan chꞌin Jesús la ndáchro tjan:

―Ìnchéni, ¿á ándo̱sán kixin ti tjan kíchóni la tjinki̱tsahya tjan ti jeheni, kixin jehóni tjechꞌeni kaín ixra̱ ní? Ndáche tjan kixin tsjinki̱tsa tjan ti jeheni.

41A̱ndá chꞌin Jesús kjuáte̱he, ndáchro:

―Marta, Marta, jaha la imá tóxakohan kixin nchónhña ixra̱ chonta la kjuaxróxinhña itjen. 42Kjánchó jehó nkoko̱a nkehe ti tjetoan. La María la kꞌuíchehe tjan ti nkehe a̱ntsí jína la ko ninkexró tsakítsjehya ti jehe tjan.

Currently Selected:

Lucas 10: poeNTplus

Highlight

Copy