Lucas 12

Ti nkehe tꞌánkíxin nio̱tja̱ kuènté ti sin fariseo

1 # Mt. 16:6; Mr. 8:15. *A̱ndá nchónhña mil chojni tsíkónkotsé sin la hasta tꞌindate kícho sin. Ndá chꞌin Jesús nixje̱he̱ ti sin kꞌuájiko, ndáchro:

―Chrokuitekákonhñara ti nkehe nduáhya tjenka̱yáxin ti sin fariseo, kixin ndáchro sin jnko nkehe jína la ókjé nkehe tja̱ko̱xi̱n sin. 2#Mr. 4:22; Lc. 8:17.*Kohya nkehe imó ijie chrókónoxínhña chrꞌéxi̱n, la ko kohya nkehe tjemá ijie chrókónoehña chojni chrꞌéxi̱n. 3Kaín ti nkehe ndáchrora ti sítie la chrꞌéxi̱n tsihin chojni ti ó ncha̱kotjin; la ko kaín nkehe ndáchrora imó nkaxehen nchia la chrꞌéxi̱n itsen tsochronka sin chritaón nchia tsihin kaín chojni.

Nkexro ti chróchrako̱he̱ni

(Mt. 10:28-31)

4’Jahara chojni chóxini, chrakuenhñara ti chojni tꞌóñá ti cuerpo, kixin chrꞌéxi̱n la kohya nkehe tsjacha sin chrókjuitꞌahara sin. 5Kjánchó tso̱tjo̱nkara nkexro tsochrakohénra. Chrako̱hénra ti nkexro tsjacha tsꞌóñá ti cuerpo la ko tsochrꞌán chojni ti siín xrohi tsꞌankahya nkochríxín. Ti nkexro a mé chrako̱hénra.

6’¿Á chrókóxi̱xi̱nhña inꞌó koxroxe yaá chichaon ntsíntsí ní? Kjánchó Díos tsꞌitjáñehña nijnko ti jehe va. 7Kjónté ti ka̱xi̱hi chónta ikjára la Díos nohe nkekja̱ín. Méxra̱ chrakonhñara kixin a̱ntsí tjete sínkíra ke ti nchónhña koxroxe.

Chróchronkani kixin tinkáchónkini Ìnchéni

(Mt. 10:32-33; 12:32; 10:19-20)

8’Ndáxrja̱n kixin ti nkexro tsochronka kixin tinkáchónki ti janhan nkayakon chojni, la kja̱xin ti Xje̱en Díos kꞌóna Chojni, tsochronka kixin chóxin ti jehe sin, nkayakon ti sin ángel kuènté Díos. 9A̱ndá ti sin sinchemá ti janhan tsondáchro kixin chonhña ti janhan nkayakon chojni, la kja̱xin janhan tsondáxrja̱n kixin chónhña sin nkayakon ti sin ángel kuènté Díos.

10 # Mt. 12:32; Mr. 3:29. *’A̱ndá ti nkojín nkexro tsꞌándaxínhi̱n ti Xje̱en Díos kꞌóna Chojni la na̱xa̱ jína tsꞌitjáña ti iji̱é sin. A̱ndá ti nkexro tsꞌándaxínhi̱n ti Ncha̱kuén Díos la xitjahya tsjìin ti iji̱é sin.

11 # Mt. 10:19, 20; Mr. 13:11; Lc. 21:14, 15. *’Ti ó tsjiko chojni ti jahara nkaxehen ti nchia xrako̱exín ti sin judío o̱ ti tjejó ti sin tꞌe̱to̱an la tóxakuanhñara nkehe tsjate̱héra la ko tóxakuanhñara nkehe tsixrora 12kixin ti ó tsonixjara la ti Ncha̱kuén Díos sinchexraxinkáonra nkehe tsixrora.

Ti chojni rico nduáhya tjenka̱yáxin

13Ndá ijnko ti nkexro tjenkákjan ti sin tsíkónkotsé mé ndáche ti chꞌin Jesús:

―Maestro, ndáche ti kíchóni kixin tsjajon ti nkehe chrókuákjani tsíkito̱he itꞌéni.

14Ndá kjuáte̱he chꞌin Jesús ndáchro:

―Lo̱nti̱ra jahara. ¿Nkekuènté chꞌénara juez ti janhan kixin chrókꞌóxika̱ya̱ha̱ ti nkehe chrókuákjára?

15Kja̱xin ndáchro chꞌin Jesús:

―Chrokóxakohanra ti chontara itsjé nkehe kixin jehya ti nchónhña nkehe chróchontara ndá kjuaxróxin chrókꞌuejora.

16Ndá kjuíncheyóe̱xin chꞌin Jesús ijnko nkehe, ndáchro:

―Kjuákꞌe ijnko chojni chónta itsjé nkehe la ti no̱nte̱e chꞌan la imá kꞌóna. 17A̱ndá ti nkexro a kjuénka̱yáxin ndáchro: “¿Nkexrín chrókjui̱tꞌa ijie kixin chontahya nketí tsꞌi̱nka̱chjinañá ti noa?” 18Ndá ndáchro chꞌan: “Ó nona nkehe si̱tꞌa. Tsꞌóxika ti tꞌinkachjinañá noa chonta ndá si̱tꞌána íjnko a̱ntsí ijié kixin tsꞌinkachjinañá kaín ti nkehe kꞌóna. 19Ndá tsondátjan a̱sená: A̱séni, nchónhña nkehe chóntani síchjína la tíha tsjacha itsjé nánó. Méxra̱ ijie to̱kꞌáha, inte, la ko itꞌia”, ichro ti nkexro a. 20Kjánchó Díos ndáche ti nkexro a: “Lo̱ntia kixin xi̱kaha ichrua kixin ijie tie itsi ijnko nkexro tsjanchia ti a̱sán. A̱ndá ti nkehe kjuásichjína la, ¿xá nkexro tsꞌóna kuènté tíha?”, ichro Díos. 21Mé xi̱kaha tso̱hen ti nkexro chónta nchónhña nkehe ntihi chjasintajni, ndá kjueyáhya ti nkehe kuènté nkaya nka̱jní ―ichro chꞌin Jesús.

Díos mé tꞌayakohen ti xje̱en

(Mt. 6:25-34)

22Ndá chrꞌéxi̱n ndáche chꞌin Jesús ti sin xriko:

―Tjo̱nka̱ra kixin chrókóxakuanhñara ti nkehe chrókjontera la ko ti ika chrókꞌuítsa̱ra, 23kixin a̱ntsí sínkí ti kjuachón ke ti nkehe sinieni o̱ ti nkehe itsꞌini la ko a̱ntsí sínkí ti cuerpo kuèntára ke ti ika chrókꞌuítsa̱ra. 24Tsjehéra nkexrín siín ti kontálo. Tꞌe̱nka̱hya va la ko tjáhya va la ko chóntahya va nketí tsꞌe̱nka̱chji̱na̱ñá va noa, kjánchó Díos la tjajon nkehe sinie va. A̱ndá jahara la a̱ntsí tjetoanra ke ti iko xritjaká. 25¿Á nkojinra tjénka̱yáxinra kixin ti imá chrókóxakohanra ndá chrókjuachara chrókꞌuankíra itꞌo̱ metro ní? 26Ndá ti xitjahya chrókjui̱chꞌera tíha, kjónté ijnko nkehe intsí, ¿ndá nkekuènté tóxakohanra ti íso nkehe siín?

27 # 1Rs. 10:4-7; 2Cr. 9:3-6. *’Tsjehéra nkexrín tꞌánkí ti itsjo lirio, chꞌehya ixra̱ la ko tjo̱nhña. La chaxín ndáxrja̱n kixin kjónté ti rey Salomón kꞌuéchónta kaín ti ika náxrjón tsjehe kuékꞌinkáya la na̱xa̱ kjuíncheyóe̱hya éxi tsjehe ti itsjo a. 28A̱ndá ti Díos xi̱kaha nchekꞌitsá kaín ti kayoa, kjónté ijie síchón la ndóye tsoche, la xi̱kaha tsjajon chꞌan ti nkehe tsꞌítsa̱ra jahara. ¿Ndá nkekuènté na̱xa̱ chaxínhña titekákonhñara Díos? 29Méxra̱ chrókóxakuanhñara nkehe sintera o̱ nkehe itsꞌira. 30Kixin ti chojni chónhña Díos la xritjeyá sin kaín tíha, kjánchó Itꞌára itjen nkaya nka̱jní la ó nohe kaín ti nkehe tichánxi̱hanra. 31Méxra̱ sa̱o chrókjuéyára ti kjuachaxin kuènté Díos, ndá jehe chꞌan tsjajon chꞌan kaín ti nkehe tichánxi̱hanra.

Ti nkehe tjete siín nkaya nka̱jní

(Mt. 6:19-21)

32’Chrakonhñara jahara kolélo kuénta̱na. Kjónté tsjéhyara la Itꞌára tóxríhi̱n tso̱tjáhara ti kjuachaxin kuènté chꞌan. 33Nchekjira ti nkehe chontara la chje̱héra ti sin chóntahya. A̱ndá ti xi̱kaha la tso̱ntaxinhña ti tjo̱a̱ tꞌinka chi̱cha̱ko̱anra kixin ti nkehe tjete siín nkaya nka̱jní la tsjeje̱hya la ko ntiha la kohya xíche̱e la ko tsꞌínhña ikué. 34Kixin ti nketí chontara ti nkehe tjete la ntiha tsjakꞌe ti a̱sánra.

Ticháxi̱n listo chrókꞌuejóchóheni

35 # Mt. 25:1-13. *’Ticháxi̱n listo tsꞌejocho̱nhénra la ko tsjakꞌeche ti xrohi kuèntára. 36#Mr. 13:34-36.*Chrokꞌónara éxi ti chojni chꞌexín ixra̱ tjechóhen kixin tsokjan ti làmoé tsíkji jnko kia tsíkóte̱he chojni kixin ti ó itsi la tsꞌèya, la tjoka tsakitje̱he̱ sin ti puerta. 37Díos sincheñao ti sin ichꞌe ixra̱ ti ó tsokjan ti lamo la tsꞌikon kixin na̱xa̱ tjejótsjehe sin. Chaxín ndáxrja̱n kixin ti lamo la tsꞌe̱to̱an chꞌan kixin tsꞌejótja̱xi̱n sin ti itjen mesa ndá jehe chꞌan tsjajon chꞌan nkehe sinie sin. 38Kjónté chrókui ti lamo kꞌaxrotjen o̱ na̱ndóye la chrókꞌuikon chꞌan kixin na̱xa̱ tjejótsjehe sin la xi̱kaha a̱ntsí tso̱chéhe̱ sin. 39#Mt. 24:43, 44.*Chrokónohara tíhi kixin ti chrókónohe ti ìnché nchia nke hora chrókui jnko xíche̱e la chrókjuakꞌetsjehe la chrókuíto̱ehya kixin chrókꞌuixehen ti xíche̱e la chrókueé. 40Méxra̱ jahara kja̱xinra chrókꞌuejotsjehera kixin noahñara nke hora itsi ti Xje̱en Díos kꞌóna Chojni.

Ti nkexro jína ichꞌe ixra̱

(Mt. 24:45-51)

41A̱ndá chꞌin Pedro ndáchro:

―Ìnchéni, ¿á jehóni kjui̱ncheyóe̱xián ti nkehe ndáchrua ní o̱ kaín chojni?

42Ndá ndáchro Ìnchéni:

―Ti nkexro tꞌe̱to̱an tóhen ixra̱ la jína tꞌe̱to̱an la ti lamo tsꞌe̱to̱an kixin tsꞌayakohen chꞌan ti chojni siín ti nchia la tsjajon chꞌan nkehe sinie sin chji̱nti̱i hora. 43Díos sincheñao ti nkexro a ti ó itsi ti lamo la tsꞌikon kixin chaxín tjechꞌe chꞌan ixra̱. 44Chaxín ndáxrja̱n kixin ti lamo la tsochjéhe chꞌan kaín ti ixra̱ chónta chꞌan tsꞌe̱to̱an ti nkexro a. 45A̱ndá ti nkexro ichꞌe ixra̱ tsjenka̱yáxin kixin tjokahya tsokjan ti làmoé, ndá tsjankíxin tsjajo̱nko ti íso chojni ichꞌe xra̱, ti chojnindoa la ko ti chojnichjin, la sinie la ko itsꞌi la ko tso̱koan. 46A̱ndá ti ña̱o tjenka̱yáxinhña ti nkexro a la ko ti hora noehña chꞌan la tsokjan ti lamo. La ti lamo la sinchekjasóte chꞌan ti nkexro kjuínchexiteyáhya la tsꞌe̱to̱an chꞌan sátsji ti nkexro a tsjasóteko ti sin titekakonhña.

47’A̱ndá ti nkexro nohe ti nkehe tjinkaon ti làmoé la tóxakuenhña la titekakonhña kjuinchexiteyá ti nkehe tjinkaon ti lamo la mé imá tsjasóte chꞌan tsꞌekon chꞌan. 48A̱ndá ti nkexro noehña ti nkehe tjinkaon ti làmoé ndá ichꞌe nkehe nduáhya la kanhñó tsjasóte. Kixin ti nkexro kꞌuáyéhe̱ nchónhña nkehe la a̱ntsí itsjé ixra̱ tsꞌáyéhe̱ la ko a̱ntsí itsjé ixra̱ tsoxranchehe ti nkexro kꞌuáyéhe̱ itsjé.

Nkoko̱ahya tsjenka̱yáxin chojni

(Mt. 10:34-36)

49’Janhan kꞌuinka kixin si̱ntakꞌákjen xrohi ti chjasintajni. La tjinka̱oan kixin ó chrókjuakꞌekꞌakjen ti xrohi, Kjánchó na̱xa̱ náhí. 50#Mr. 10:38.*Ticháxi̱n nchónhña tso̱na tsjasótena. Tóxakona tsoxiteyájia kaín tíha. 51¿Á tjénka̱yáxinra kixin kꞌuinkakian kjuaxróxin ti chjasintajni ní? Náhí. Kꞌuinka kixin nkoko̱ahya tsjenka̱yáxin chojni. 52Kixin ndesi ijie la ti sin na̱xa̱ kjéhya la nkoko̱ahya tsjenka̱yáxin sin. Iní chojni tso̱nínkakohen ti yaá. Ti yaá chojni la tso̱nínkakohen ti iní. 53#Mi. 7:6.*Ti itꞌé xjan la tso̱nínkakohen ti xje̱en ndoa, la ti xjan ndoa tso̱nínkakohen ti itꞌé. Ti ìñé xjan la tso̱nínkakohen ti xje̱en chjin, la ti xjan chjin la tso̱nínkakohen ti ìñé. Ti ichꞌe̱e sin la tso̱nínkakohen ti tikínte̱e la ti tikínta la tso̱nínkakohen ti ichꞌe̱e.

Ti nkehe chrónkaxín nkehe tso̱hen

(Mt. 16:1-4; Mr. 8:11-13)

54Kja̱xin ndáche Chꞌin Jesús kaín ti chojni tjejó ntiha:

―Ti ó tꞌikonra tꞌàya tji̱ ti tjiatóxin ña̱o, la ndáchrora kixin tsꞌaniá ichrin, ndá xi̱kaha tóhen. 55La xi̱kaha ti ó chjéhe xri̱nto̱ tji̱xi̱n nó sur la ndáchrora kixin tso̱sóa, ndá xi̱kaha tóhen. 56Jahara chojni nkojinxónhña tjénka̱yáxin. Nohara tjénka̱yáxinra nkexrín tso̱hen nka̱jní la ko chjasintajni. ¿Ndá nkexrín tiénxinhñara ti nkehe sítóhen ti tjejora ijie?

Kjuaxróxin chrókꞌuejókoni ti sin nínkakohen ti jeheni

(Mt. 5:25-26)

57’¿Nkekuènté tjéyáhyara ti nkehe jína chrókjui̱chꞌera? 58Ti nkojín nkexro tjanchia ijie̱ chrókjuiko ti jahara nkayakon ti sin tꞌe̱to̱an la ícha jína nti̱a ó chrókjóxinra ti nkexro a kixin tso̱yóxin ti kjuanínkaon kixin sátsjikoáhyara chꞌan ti itjen juez, kixin ti juez tsꞌe̱to̱an kixin sátsjikoára ti sin comandante, a̱ndá ti comandante chróchrꞌaxahanra ndo̱echjiso. 59La tjo̱nka̱ra kixin tsꞌaxrjéxinhñara ntiha hasta tsjènkara kaín ti chichaon chontara.

Currently Selected:

Lucas 12: poeNTplus

Highlight

Copy