Mateo 20
20
Kjuíncheyóe̱xin Jesús ijnko chojni ichꞌe xra̱
1’Ti kjuachaxin tꞌe̱to̱axín Díos mé yóhe̱ éxi ijnko chojni chónta ixra̱ no̱nte̱e la ijnko nchítjen kꞌuaxrje sákjuikjeyá iso chojni tsotjá ti ito uva tsíkꞌóna. 2Ndá ti kꞌuitja chꞌan ti sin sichꞌe ixra̱ la ikjo sin kixin nkojnko denario tsje̱nka̱ chꞌan ti ña̱o kixin ti ixra̱ sichꞌe sin landá kꞌue̱to̱an chꞌan kixin sátsji sin ti no̱nte̱e chꞌan. 3Ndá chrꞌéxi̱n éxi ijnko las nueve nchítjen ndá sákjuí chꞌan ndasin la kꞌuíkon chꞌan íso sin tjejó ntiha chóntahya sin ixra̱. 4La ndáche chꞌan sin: “Kja̱xinra sátjira ichꞌera ixra̱ ti no̱nta̱na la tsjénka̱hára jína”, ichro chꞌan. Landá jehe sin la sákjuí sin. 5A̱ndá ti ìnché ti nonte la ínaá sákjuí chꞌan éxi chonkíxin la na̱xa̱ kꞌuitja chꞌan íso sin sichꞌe ixra̱, la ti las tres kójín la xi̱kaha kꞌuaxrje chꞌan la xíkꞌitja chꞌan íso sin. 6A̱ndá éxi las cinco kójín la na̱xa̱ sákjuí chꞌan ndasin ínaá la kꞌuitja chꞌan íso chojni tjejó ntiha la kjuanchankíhi chꞌan sin: “¿Nkekuènté tjejora ntihi kuenté ña̱o la chꞌehyara xra̱?”, ichro chꞌan. 7Ndá ndáchro sin: “Kixin ninkexró tjajonhña xra̱ sichꞌeni”, ichro sin. Ndá ndáchro ti chꞌin chónta nonte: “Kja̱xinra sátjira ichꞌera xra̱ ti no̱nta̱na la tsjénka̱hara jína”, ichro chꞌan. 8#Lv. 19:13; Dt. 24:15.*A̱ndá ti ó kóndanonte la ti ìnché ti nonte mé kꞌuéye̱he̱ ti chꞌin tꞌe̱to̱an sítóhen ixra̱, la ndáchro: “Tꞌeyehé kaín ti nkexro ichꞌe xra̱ la tjénke̱hé sin. Tjankíxixián ti chojni kjuixixín kꞌuíxehen xra̱ la chrꞌéxi̱n tjénke̱hé ti sin sa̱oxín kꞌuíxehen xra̱”, ichro chꞌan. 9A̱ndá kóchjina kaín ti sin kꞌuíxehen kjuíchꞌe ixra̱ ti las cinco kójín la nkojnko sin kꞌuáyéhe̱ sin nkojnko denario. 10Ndá kjuixin ti ó kóchjina ti sin kꞌuíxehen nchítjen, la kjuénka̱yáxin sin kixin a̱ntsí itsjé tsjacha sin. Kjánchó kja̱xin sin kꞌuáyéhe̱ sin nkojnko denario ó. 11A̱ndá ti ó kjuixin xenkehe sin la kjuankíxin kónínkaon sin la kjonta sin ìnché ti nonte, 12ndáchro sin: “Ti sin ikui kjuixixín la kjuíchꞌe sin ixra̱ nkoko̱a hora landá kja̱xin sin xenkehe sin nkokón éxi jeheni. Landá jeheni la kjuíchꞌeni xra̱ kuenté ña̱o kjónté imá sóa”, ichro sin. 13A̱ndá kjuáte̱he ìnché ti nonte, ndáche ijnko ti jehe sin: “Janhan la kjui̱tꞌayahyara ninkehó. Ó kuito̱exíni kixin nkojnko denario tsjénka̱hara ti ña̱o. 14Méxra̱ tákjára ti chi̱cha̱ko̱anra la sátjira. A̱ndá janhan la tsjénka̱ha̱ ti nkexro kꞌuíxehen kjuixixín éxi kjuénka̱hára kixin xi̱kaha tjínka̱oan. 15Janhan chi̱cha̱ko̱na tíha la, ¿xá chontahya kjuachaxin xi̱kaha tsjénka̱ha̱ sin ní? ¿Nkekuènté tóchji̱no̱xínhanra kixin xi̱kaha kjuénka̱ha̱ sin?”, ichro chꞌan. 16#Mt. 19:30; Mr. 10:31; Lc. 13:30.*Ndá kjuixin ndáchro chꞌin Jesús: ―Mé xi̱kaha ti sin kjuixixín mé sa̱o sin tsꞌejó sin, a̱ndá ti sin sa̱o mé tsjixixín tsꞌejó sin, kixin nchónhña chojni kꞌue̱ya̱ha̱, kjánchó tsjéhya sin kꞌuitja ―ichro chꞌin Jesús.
Ínaá chronka Jesús kixin itsꞌen
(Mr. 10:32-34; Lc. 18:31-34)
17Ndá ti ó sákjui̱ sin Jerusalén la chꞌin Jesús kꞌuaxrjentáko teyó ti sin kꞌuájiko la ndáchro:
18―Ijie la sátsji̱ni Jerusalén, la ntiha mé tsotsé sin ti Xje̱en Díos kꞌóna Chojni la tsjikéhen sin ti sin ncha̱tꞌá tꞌe̱to̱an la ko ti sin tjako ley. Ndá jehe sin la tsꞌe̱to̱an sin kixin itsꞌen chꞌan. 19Ndá tsjiko sin chꞌan ti siín ti chojni jehya judío la jehe sin tsjanoá sin chꞌan la ko tsjate sin chꞌan la tsja̱kꞌe̱nka̱ni sin chꞌan jnko ntacruz, kjánchó níxin ña̱o la tsoxechón chꞌan ínaá ―ichro chꞌin Jesús.
Ti nkehe kjuanchia ìñé Jacobo la ko Juan
(Mr. 10:35-45)
20A̱ndá ti ìñé chꞌin Jacobo la ko Juan xje̱en chꞌin Zebedeo, mé kjui̱ka̱o tjan ti xje̱en tjan, la kjuákꞌexín tjan tochꞌín tjan nkayakon chꞌin Jesús la chrónoéhe̱ tjan ti jehe chꞌan. 21Ndá chꞌin Jesús kjuanchankí ndáchro:
―¿Nkehe tjinkaoan?
Ndá kjuáte̱he tjan, ndáchro tjan:
―Tꞌéto̱an kixin ti ó tsjakꞌe ti tsꞌéto̱anxián la yaá ti xja̱na chrókꞌuejó sin ti tsjakꞌe jaha, ijnko la ti itjá chjina la ti íjnko la ti itjá ikjon ―ichro tjan.
22Ndá kjuáte̱he chꞌin Jesús, ndáchro:
―Jahara la noahñara nkehe ti tjánchíára. ¿Á chrókjuachara chrókꞌuira ti nkehe itsjá itsꞌia janhan ní, la ko á chrókjuachara chrókuikitera éxi tsikitia janhan ní? ―ichro chꞌan.
Ndá kjuáte̱he sin, ndáchro sin:
―Jeén, tsjachani ―ichro sin.
23Ndá ndáchro chꞌin Jesús:
―Chaxín, kjónté tsjachara itsꞌira ti nkehe itsjá itsꞌiá la ko tsikitiara éxi tsikitia janhan, kjánchó janhan la xitjahya tsjánjua kjuachaxin kixin ijnkora chrókjuakꞌera tjaná chjina ó tjaná ikjon kixin janhan la chontahya kjuachaxin tsjánjua tíha. Jehó Tꞌaná itjen nkaya nka̱jní mé nohe chꞌan nkexro tsíkjeyá chꞌan tsꞌáyéhe̱ tíha ―ichro chꞌin Jesús.
24Ndá ti ó kuíhin ti ite sin kixin xi̱kaha tsíkjanchia ti ìñé chꞌin juan la ko Jacobo, la kónínkakohen sin ti yaá sin a. 25#Lc. 22:25, 26.*A̱ndá chꞌin Jesús kꞌuéye̱he̱ chꞌan ti jehe sin, la ndáchro chꞌan:
―Jahara ó nohara kixin ti sin tꞌe̱to̱an chjasintajni la imá tꞌe̱tue̱hen sin kaín chojni la ti sin tꞌe̱to̱an mé imá nchejié a̱sén sin kixin ihyé sin. 26#Mt. 23:11; Mr. 9:35; Lc. 22:26.*Kjánchó jahara la xi̱kahña chrókjui̱chꞌera. Náhí. Ti nkojinra tjinkáonra a̱ntsí chrókuéto̱anra la a̱ntsí chrókjuínki̱tsara ti íso sin. 27A̱ndá ti nkojinra tjinkáonra chrókuéto̱anra mé ticháxi̱n senó chrókjuáko̱xinra chrókjui̱chꞌehéra ixra̱ kichuara. 28Mé xi̱kaha ti Xje̱en Díos kꞌóna Chojni la kuihya kixin chojni chrókjuíchꞌehe ixra̱. Náhí. Ikui chꞌan kixin sichꞌehe chꞌan chojni ixra̱ la ko tsꞌenyákohe̱n chꞌan itsjé chojni kixin tsaá sin ―ichro chꞌan.
Yaá chojni tꞌikonhña kuito̱he jína
(Mr. 10:46-52; Lc. 18:35-43)
29Ndá ti ó kꞌuaxrjexín sin Jericó la itsjé chojni chréhe̱ ti chꞌin Jesús. 30A̱ndá chrínta nti̱a mé tjejótja̱xi̱n yaá chojni tꞌikonhña. La ti ó kuíhin sin kixin kꞌuatsínka chꞌin Jesús ntiha la kjuankíxin kꞌóyako sin kꞌuéya sin, ndáchro sin:
―Jaha tsíkꞌaxrjeníxian David, ti̱konoéhéni ―ichro sin.
31A̱ndá kaín ti chojni chréhe̱ mé nínkaon sin ndáche sin ti chojni tꞌikonhña kixin tsotání sin.
Ndá ti sin tꞌikonhña la a̱ntsí itsen kꞌuéya sin, ndáchro sin:
―Jaha tsíkꞌaxrjeníxian David, ti̱konoéhéni ―ichro sin.
32Ndá chꞌin Jesús kjuákꞌechóhen la kꞌuéye̱he̱ ti chojni tꞌikonhña la kjuanchankíhi, ndáchro:
―¿Xá nkehe tjinkáonra si̱tꞌa? ―ichro chꞌan.
33Ndá jehe sin, ndáchro sin:
―Tjinkaoni tsꞌikoni ―ichro sin.
34Ndá chꞌin Jesús kui̱konoéhe̱ ti jehe sin la itsé chꞌan ti ikon sin. Ndá tuénxín kꞌuíkon sin la chréhe̱ sin ti jehe chꞌan.
Currently Selected:
Mateo 20: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
