Mateo 23

Ti nkehe nduáhya ichꞌe ti sin fariseo la ko ti sin tjako ley

(Mr. 12:38-40; Lc. 11:37-54; 20:45-47)

1Ndá chrꞌéxi̱n nixje̱he̱ chꞌin Jesús ti sin kꞌuájiko chꞌan la ko ti chojni kꞌuejó ntiha, ndáchro chꞌan:

2―Ti nkexro tjako ley la ko ti sin fariseo mé nohe sin tsochronkaxín sin ti ley kjuako Moisés. 3Méxra̱ chrókjui̱nchexiteyára kaín ti nkehe tꞌe̱to̱an sin la ko chrókuitekáonra, kjánchó chrókuankíehyara sin kixin jehe sin la ijnko nkehe ndáchro sin la ókjé nkehe ichꞌe sin. 4La ko tꞌe̱tue̱hen sin chojni kixin tsamá nkehe imá iye, ijnko nkehe ninkexró tjachahya tamá. A̱ndá jehe sin la ni ijnko ndedo itja sin nchekinkíhya sin kixin chrókjuinki̱tsehe sin ti nkexro a. 5#Mt. 6:1; Dt. 6:8; Nm. 15:38.*Kaín ti nkehe ichꞌe sin la kixin tjinkaon sin tsꞌikon chojni la tsjikosáyehe ti jehe sin. Tóxrínhi̱n sin tsjakꞌenkáni sin totjín sin la ko itja sin ijnko xroon sínixín itén Díos, la ko tjasinkáni sin iké sin nkehe tjáki̱ni. 6Jehe sin la tjinkaon sin tsꞌejótja̱xi̱n sin ti silla tjetoan ti ó itji sin ijnko kia la ko tjinkaon sin tsꞌejótja̱xi̱n sin ti silla sa̱oxín tjejó nkaxehen ni̱nko. 7La tjinkaon sin kixin chrókjuikosáyehe chojni ti jehe sin ti ó tsoxéta sin ndasin la ko tóxríhi̱n sin kixin tsondáchro chojni kixin maestro sin.

8’Kjánchó jahara la ti̱toéhyara kixin tsondáchro chojni kixin maestrora kixin jahara la nkokón kichuara, la chontara nkoko̱a maestro, mé Cristo tíha. 9La chróndáchehyara nkojín nkexro itꞌára ntihi chjasintajni, kixin jahara la chontara nkoko̱a Itꞌára mé itjen nkaya nka̱jní. 10Kja̱xin chrókui̱to̱éhyara kixin chróndáchro chojni kixin jahara mé imá chontara kjuachaxin, kixin jehó Cristo mé ti nkexro imá chónta kjuachaxin. 11#Mt. 20:26, 27; Mr. 9:35; 10:43, 44; Lc. 22:26.*Ti nkexro a̱ntsí tjetoan mé chrókꞌóna éxi ti nkexro chꞌehe ixra̱ íso chojni. 12#Lc. 14:11; 18:14.*Ti nkexro tjenka̱yáxin kixin imá tjetoan la tso̱ntsí. A̱ndá ti nkexro nchenkehya la a̱ntsí tsotjetoan.

13’Méxra̱ nóara jahara maestro tjákora ley la ko jahara fariseo. Nkojinxónhña tjénka̱yáxinra. Tikjehéra ti puerta tsꞌixexín chojni ti tꞌe̱to̱axín Díos. A̱ndá jahara la tꞌixe̱nhñara la ko tjájonhñara kjuachaxin tsꞌixehen ti sin tjinkaon tsꞌixehen.

14’Nóara jahara maestro tjákora ley la ko jahara fariseo. Nkojinxónhña tjénka̱yáxinra. Jahara takítsjehéra ndo̱e ti chojni tsíkókꞌán a̱ndá isé nixjehéra Díos kixin xi̱kaha chꞌiyexínra chojni kixin jínara. Méxra̱ a̱ntsí tsjasótiara kixin xi̱kaha ichꞌera.

15’Nóara jahara maestro tjako ley la ko jahara fariseo. Nkojinxónhña tjénka̱yáxinra. Jahara la sátjira nkuíxín nda̱ñao la ko nkojnko chjasin kixin tjinkáonra tsꞌitjára ijnko chojni tsinkáchónki éxi tinkachónkira, a̱ndá ti ó tjachara tjachróera sin, la jehe sin a̱ntsí tsjasótexín sin ti xrohi tsꞌankahya nkochríxín ke jahara.

16’Nóara jahara kixin tꞌéto̱anra, kjánchó ntakótánra.#23:16 ntakótánra tꞌikohña sin ciegos Ndáchrora kixin ti nkojín chojni tsondáchro kixin sichꞌe nkojín nkehe la tsꞌákjexi̱n ti ni̱nko la í tsicháxi̱nhña sinchexiteyá sin. A̱ndá ti tsondáchro sin kixin sichꞌe sin nkojín nkehe la tsꞌákjexi̱n sin ti oro siín nkaxehen ni̱nko la ticháxi̱n sinchexiteyá sin. 17Jahara la imá lo̱nti̱ra la ko ntakótánra. ¿Xá a̱ntsí tjetoan ti oro o̱ ti ni̱nko?, kixin ti ni̱nko la kótjuáxin ti oro. 18Kja̱xin ndáchrora: “Ti nkojín chojni tsondáchro sin kixin sinchexiteyá sin nkojín nkehe la tsꞌákjexi̱n sin ti altar la ticháxi̱nhña sinchexiteyá sin. A̱ndá ti tsondáchro sin kixin sinchexiteyá sin nkojín nkehe ndá tsꞌákjexi̱n sin ti nkehe tjokehe sin Díos chritaón ti altar la ó ticháxi̱n sinchexiteyá sin ti nkehe ndáchro sin.” 19Chojni ntakótán. ¿Á imá tjetoan ti nkehe tsochje̱héra Díos ní o̱ á imá tjetoan ti altar?, kixin ti altar mé tótjuáxin ti nkehe tsjájonra. 20Kixin ti nkexro tsondáchro kixin sinchexiteyá nkojín nkehe la tꞌákje̱xi̱n ti altar la jehya tꞌákje̱xi̱n jehó ti altar ó. Kja̱xin tꞌákje̱xi̱n sin kaín ti nkehe siín chritaón ntiha. 21A̱ndá ti nkexro tsondáchro kixin sinchexiteyá jína ti nkehe la tꞌákje̱xi̱n ti ni̱nko la jehya tꞌákje̱xi̱n jehó ti ni̱nko ó. Kja̱xin tꞌákje̱xi̱n sin ihni̱é Díos itjen ntiha. 22#Is. 66:1; Mt. 5:34.*A̱ndá ti nkexro tꞌákje̱xi̱n nka̱jní la kja̱xin tꞌákje̱xi̱n ti trono kuènté Díos la ko ti nkexro tjetꞌe̱to̱an ntiha.

23 # Lv. 27:30. *’Nóara jahara maestro tjákora ley la ko jahara fariseo. Jahara nkojinxónhña tjénka̱yáxinra. Chje̱héra Díos ijnko ite parte kaín ti kaxro̱a̱n tsjiko ti nkehe inieni, ti menta, anís la ko comino. Kjánchó tahyara kuentá ti nkehe imá tjetoan kuènté ti ley; mé tíha la chrókjuénka̱yáxinra ndoá la ko chrókui̱konoéhéra kichuara la ko chrókuinkachónkira Díos. Tíhi la a̱ntsí tjetoan chrókjui̱nchexiteyára la ko kja̱xin chrókꞌuitjáñahñara ti íso nkehe. 24Jahara la tꞌéto̱anra kjánchó ntakótánra. Jahara la nchekꞌánkíhíra, kjónté ijnko kochji̱se̱n intsí chónta ti nkehe itsꞌira, a̱ndá tꞌìnkara ijnko kokamello.

25’Nóara jahara maestro tjako ley la ko jahara fariseo. Nkojinxónhña tjénka̱yáxinra. Jahara la nchetjóára chritaón ti vaso la ko ti plato, a̱ndá ti nkaxehen la síkaón kjuache̱e la ko ti nkehe nduáhya. 26Jahara chojni fariseo imá ntakótánra. Sa̱o nchetjóára nkaxehen ti vaso la ko ti plato, ndá chrꞌéxi̱n ti chritaón kja̱xin.

27 # Hch. 23:3. *’Nóara jahara maestro tjako ley la ko chojni fariseo. Nkojinxónhña tjénka̱yáxinra. Jahara la éxi ijnko tòye̱ tsíxravá chojni, imá náxrjón tsjehe ndója, a̱ndá ti nkaxehen la síkaón huéso̱e chojni la ko kaín ti nkehe tjuáhya. 28Mé xi̱kaha jahara la tꞌikoni éxi chojni jína, a̱ndá nkojinxónhña tjénka̱yáxinra la ko tjénka̱yáxinra ti nkehe jínahñara.

29’Nóara jahara maestro tjako ley la ko chojni fariseo. Nkojinxónhña tjénka̱yáxinra. Jahara la chꞌénara tja̱tꞌo̱ náxrjón chritaón ti tòye̱ tsíxravá ti sin kꞌuékjako itén Díos ósé la ko nchekꞌitsára chritaón ti tòye̱ kuènté ti sin jína a̱sén. 30La ndáchrora kixin ti chrókꞌuejora ti ña̱o kꞌuejó ti sin tsíkꞌaxrjeníxinra la chrókjuínki̱tsahyara chrókꞌuen ti sin kjuako itén Díos. 31Kjánchó tjáko̱xinra kixin chaxín nkokón ti nkehe nduáhya ichꞌera éxi kjuíchꞌe ti sin a. 32Méxra̱ ijie la jahara nchekjintaxínra ti ixra̱ náxrjónhña kjuíchꞌe ti sin kꞌuaxrjeníxinra.

33 # Mt. 3:7; 12:34; Lc. 3:7. *’¡Jahara tsíkꞌaxrjeníxinra konche! ¿Xá nkexrín chrókuaára ti ó itsi ti tsjasótiara? 34Méxra̱ janhan tsochrꞌan chojni tsochronka itén Díos la ko chojni imá nohe la ko chojni tsjako. A̱ndá jahara la tsꞌo̱ñára sin la tsꞌejoyánira sin ntacruz la íso sin la tsjatexínra sin nkaxehen ti nchia xrakue̱xin ti sin judío la ko tsochrehéra sin nkojnko chjasin kixin tsꞌo̱ñára sin. 35#Gn. 4:8; 2Cr. 24:20, 21.*Mé xi̱kaha jahara tsamára ti ijie̱ kixin ti sin jína kꞌuitjí ijni̱é senó. Tsamára ti ijie̱ ndesi ti ijni̱é Abel, ti nkexro jína, la ko kaín ti íso sin hasta ikꞌuén Zacarías, xje̱en Berequías, ti nkexro kꞌo̱ñáxinra chjino ti altar itjen nkaxehen ni̱nko. 36Chaxín ndáxrja̱n kixin kaín ti ijie̱ a, mé tsamá ti chojni siín ijie.

Tsjánka Jesús

(Lc. 13:34-35)

37Ndá chꞌin Jesús ndáchro:

―Jerusalén, Jerusalén, jahara tꞌoñára ti sin tjako itén Díos la chje̱héra ixro̱ ti sin ichrꞌán chꞌan ikui chrókjuínki̱tsara. Nchónhña vece tjínka̱oan chrókónkotséra la chrókꞌuayakohanra éxi ijnko kochíká tꞌayakohen ti xje̱en chrínkí ti ka̱ñe̱ñe̱e, mé xi̱kaha tjínka̱oan chrókꞌuayakohanra, kjánchó tjinkákonhñara. 38#Jer. 22:5.*Ndá ijie la Díos la tsíto̱he ti jahara. 39#Sal. 118:26.*Ndáxrja̱n kixin í tsꞌikonhñara ti janhan ínaá hasta tsjixrakájña ti ña̱o tsondáchrora: “Imá jína ti nkexro kui̱xi̱n kjuachaxíen ihni̱é Ìnchéni”, ―mé xi̱kaha ichro chꞌin Jesús.

Currently Selected:

Mateo 23: poeNTplus

Highlight

Copy