Mateo 26

Kjuenka̱yáxin sin nkexrín tsꞌóñá sin Jesús

(Mr. 14:1-2; Lc. 22:1-2; Jn. 11:45-53)

1Ndá ti ó kjuixin chrónka chꞌin Jesús kaín tíha, la nixje̱he̱ chꞌan ti sin kꞌuájiko chꞌan, ndáchro chꞌan:

2 # Ex. 12:1-27. *―Jahara la ó nohara kixin tꞌitjáña yaá ña̱o ndá tsjasin sin ti kia Pascua, ndá ti Xje̱en Díos kꞌóna Chojni mé tsotsé sin la tsji̱kaán sin ti tjejó ti sin tꞌe̱to̱an, la tsja̱kꞌe̱nka̱ni sin chꞌan ijnko ntacruz ―ichro chꞌin Jesús.

3Ndá ti ncha̱tꞌá tꞌe̱to̱an la ko ti sin tjako ley la ko ti sin táda kuènté ti sin judío mé kónkotsé sin nda̱sin kuènté palacio kuènté chꞌin Caifás, ti ncha̱tꞌá tꞌe̱to̱an. 4Ntiha kjuénka̱yáxin sin nkexrín tsotsé sin ti chꞌin Jesús ndá tsꞌóñá sin. 5La iso sin ndáchro:

―Chrotséhyani chꞌan ti kia ti náhí la imá tso̱nínkaon chojni la tsꞌixin ijnko kjuanínkaon ijié.

Ijnko tjan kui̱ki̱te aceite xraxé náxrjón ikja Jesús

(Mr. 14:3-9; Jn. 12:1-8)

6Ndá chꞌin Jesús kjuákꞌe Betania, ndo̱e chꞌin Simón, ti nkexro kꞌuéchónta chin lepra. 7#Lc. 7:37, 38.*Ndá xrína̱hña kóchjina ijnko chojnichjin kjui̱ka̱o ijnko ixro̱ tsíkónaxín mármol tjiá aceite xraxé náxrjón, tjete sínkí. La na̱xa̱ tjenie chꞌin Jesús la kui̱ki̱te tjan aceite ti ikja chꞌan. 8A̱ndá ti sin kꞌuájiko chꞌin Jesús ti kꞌuíkon sin xi̱kaha, la kónínkaon sin, ndáchro sin:

―¿Nkekuènté nchexehén ti aceite i? 9Tíhi la jína chrókóxi̱xi̱n itsjé chichaon, ndá jína chrókjuinki̱tsani ti sin nóa ―ichro sin.

10Ndá chꞌin Jesús kuíhin ti nkehe ichro sin, la ndáchro chꞌan:

―¿Nkekuènté tꞌándaxíhínra ti tjan i? Ó ncho̱xon ti nkehe náxrjón kjuíchꞌe tjan, 11#Dt. 15:11.*kixin ti sin nóa la nkochríxín tsꞌejóko̱ara, a̱ndá janhan la nkochríxínhña tsꞌejóni. 12Méxra̱ ti tjan i la kjuíncheka tjan aceite xraxé náxrjón ti cuerpo kuénta̱na, kixin xi̱kaha kjua̱ko̱xi̱n tjan kixin tsoxravána. 13Chaxín ndáxrja̱n kixin ti ó tsoxrako ti itan jína tsaáxin chojni kuenté chjasintajni la kja̱xin tsochronka sin kixin xi̱kaha kjuíchꞌe ti tjan i, la xi̱kaha tsoxraxinkakonxín sin ti nkehe kjuíchꞌe tjan.

Judas kjuínchekji Jesús

(Mr. 14:10-11; Lc. 22:3-6)

14Ndá ijnko ti teyóxin ti sin kꞌuájiko chꞌin Jesús, itꞌin Judas Iscariote, mé kjuinixje̱he̱ chꞌan ti sin ncha̱tꞌá tꞌe̱to̱an 15#Zac. 11:12.*la ndáchro chꞌan:

―¿Nkekja̱ín tsjènkara ndá tso̱xrja̱nka nketí itjen Jesús?

A̱ndá ti sin ncha̱tꞌá tꞌe̱to̱an la kjuajon sin treinta chichaon plata. 16Ndá tuénxín la ti chꞌin Judas la kjueyá nkexrín tsjajon ti chꞌin Jesús.

Kjuixixín kjonieko sin Jesús

(Mr. 14:12-25; Lc. 22:7-23; Jn. 13:21-30; 1Co. 11:23-26)

17A̱ndá ti ña̱o xránkíxixín ti kia inie sin ti nio̱tja̱ tjikohya ti nkehe tꞌánkíxin, la ti sin kꞌuájiko chꞌin Jesús mé kóchjina sin la kjuanchankí sin, ndáchro sin:

―¿Ìnchéni, nketí tjinkaoan sincheyaxíxini kixin sinieni ti kia Pascua?

18Ndá ndáchro chꞌin Jesús:

―Sátjira ti chjasin ijié la tsjasánra ndo̱e ijnko nkexro, la ndáchrora: “Ti Maestro kuènténi la í séhya tsjakꞌe chꞌan, la kꞌue̱to̱an chꞌan kixin ijie la ndo̱a tso̱yaxíxin kixin sinieko chꞌan ti sin xriko chꞌan, ti kia Pascua”, mé xi̱kaha tsondáchrora ―ichro chꞌin Jesús.

19Ndá ti sin kꞌuájiko chꞌin Jesús la kjuínchexiteyá sin la sákjuí sin ndá ntiha kjuíncheyáxixín sin ti nkehe sinie sin ti kia Pascua.

20Ndá ti ó ndákóntó la chꞌin Jesús kꞌuéjóko teyó ti sin kꞌuájiko la kjónieko chꞌan sin. 21Ndá na̱xa̱ tjejónie sin la ndáchro chꞌin Jesús:

―Chaxín ndáxrja̱n kixin ijnkora tjejora ntihi mé si̱nchekjira ti janhan.

22Ndá kaín sin la imá kóxakohen sin la kꞌuává sin, la kjuankíxin sin nkojnko sin kjuanchankí sin, ndáchro sin:

―Ìnchéni, ¿á jeheni ní? ―ichro sin.

23 # Sal. 41:9. *Ndá kjuáte̱he chꞌin Jesús ndáchro:

―Ti nkexro sinchekjataxín nio̱tja̱ ti plato tjéki̱a̱n mé ti nkexro a sinchekjina. 24Janhan, ti Xje̱en Díos kꞌóna Chojni, tsjasótena éxi nixja ti xroon itén Díos, kjánchó nóa ti nkexro xi̱kaha sichꞌe. Ícha jína chrókokjíehya.

25A̱ndá Judas, ti nkexro sinchekji chꞌin Jesús, mé ndáchro:

―Maestro, ¿á janhan tíha ní?

Ndá ndáchro chꞌin Jesús:

―Ó jaha ndáchrua.

26Ndá na̱xa̱ tjejónie sin la chꞌin Jesús kuákja chꞌan ti nio̱tja̱, la chjéhe chꞌan Díos kjuasáya. Ndá kóchrítꞌo̱ chꞌan la chjéhe chꞌan kaín ti sin kꞌuájiko chꞌan kixin sinie sin. La ndáchro chꞌan:

―Intera, tíhi mé ti cuerpo kuénta̱na.

27Ndá kjuixin la kuákja chꞌan ti vaso tjiá ìnté to uva la chjéhe chꞌan kjuasáya Díos, ndá kjuixin la chjéhe chꞌan kaín ti sin tjejóko chꞌan ikꞌui sin. La ndáchro chꞌan:

―Itꞌira kaínra tíhi 28#Ex. 24:8; Jer. 31:31-34.*kixin tíhi mé ti ijni̱ kuénta̱na chrónkaxín ti nkehe ni̱xin tso̱hen. Ti ijni̱ tsꞌitji i, la tsjacha tsꞌíjmáxin iji̱é itsjé chojni. 29Chaxín ndáxrja̱n kixin i tsꞌihya ìnté ti to uva i ínaá, hasta tsjixrakájña ti ña̱o tsꞌayàha ti kjuachaxin kuènté Tꞌaná, ndá xíkꞌini ìnté ti to uva i ínaá ―ichro chꞌin Jesús.

Chronka Jesús kixin sinchemá Pedro

(Mr. 14:26-31; Lc. 22:31-34; Jn. 13:36-38)

30Ndá ti ó kjuixin la itsje sin ijnko himno, ndá sákjui̱ sin ti ijna̱ Olivo. 31#Zac. 13:7.*Ndá ndáchro chꞌin Jesús:

―Ijie tie la kaínra tsi̱to̱héra ti janhan, kixin ndáchro ti xroon itén Díos: “Tsóñá sin ti nkexro tꞌayakohen ti kolélo la kaín va tsoxika̱ye̱hí va sátsji va.” 32#Mt. 28:16.*Kjánchó ti ó tsoxechóna la sátsjia Galilea, ndá jahara la chrꞌéxi̱n tsochrehéra.

33Ndá kjuáte̱he chꞌin Pedro, ndáchro:

―Kjónté kaín sin tsíto̱ha sin, la tsíto̱ehyani ti jaha.

34Ndá ndáchro chꞌin Jesús:

―Chaxín ndáxrja̱n kixin ijie tie, na̱xa̱ tsotsjehya kochi̱ntólá, la si̱nchemána iyꞌá vece.

35Ndá chꞌin Pedro ndáchro:

―Kjónté kja̱xin janhan itsꞌén la si̱ntamáhña ti jaha.

Ndá kaín ti sin kꞌuájiko chꞌan la xi̱kaha ichro sin.

Jesús kjuákꞌe ti Huerto Getsemaní

(Mr. 14:32-42; Lc. 22:39-46)

36A̱ndá chꞌin Jesús la ko ti sin kꞌuájiko chꞌan mé kjuíji sin ijnko nonte itꞌin Getsemaní. Ndá ndáchro chꞌan:

―Tíhó tꞌejora ndá janhan la sátsjia tsonixja̱ha̱ Tꞌaná.

37Ndá sákjuíko chꞌan Pedro la ko ti yaá xje̱en chꞌin Zebedeo, la kjuankíxin kóxakohen chꞌan la ko imá kꞌuává chꞌan. 38Ndá ndáche chꞌan ti iyꞌá sin:

―Imá tꞌává a̱sená éxi itsꞌén. Ntihó tito̱hara, tꞌejotsjehéra kja̱xin ―ichro chꞌan.

39Ndá sákjuí chꞌan a̱ntsíkoá kjín, ndá kjuákꞌexín chꞌan tochꞌin chꞌan la kꞌuisén chꞌan hasta kéhe̱ ikja chꞌan nonte, la chrónoéhe̱ chꞌan ti Itꞌé chꞌan itjen nkaya nka̱jní, ndáchro chꞌan:

―Itꞌéni, ti tjinkaoan la nchekaáni kixin chrókꞌuihyani ti nkehe itsjá. Kjánchó tso̱hen éxi tjinkaoan, jehya éxi tjinkaoni ―ichro chꞌan.

40Ndá ikjan chꞌan ti kuíto̱he ti iyꞌá sin la kꞌuíkon chꞌan kixin ó tjejójua sin. Ndá ndáche chꞌan chꞌin Pedro:

―¿Á xitjahya chrókꞌuejótsjehékoarani ijnko hora ní? 41Tjejotsjehéra la nixjehéra Díos kixin tsjinki̱tsa chꞌan kixin ti Jínahña la chrókjuachahya chrókjuachròe ti jahara. Ti a̱sánra la chaxín tjinkaon sinchexiteyéhe Díos, kjánchó ti cuerpo kuèntára la tjachahya ―ichro chꞌin Jesús.

42Ndá sákjuí chꞌan ínaá la chrónoéhe̱ chꞌan Itꞌé chꞌan, ndáchro chꞌan:

―Jaha Itꞌéni, ti xitjahya tsjìin ti nkehe tsjasótexíni la tso̱hen éxi jaha tjinkaoan.

43Ndá ikjan chꞌan ínaá la kꞌuíkon chꞌan kixin ínaá tjejójua ti sin kꞌuájiko chꞌan kixin í tjiehya sin kotáchrin. 44Ndá kuíto̱he chꞌan sin la sákjuí chꞌan ínaá ti níxin vez, la xi̱kahó kjuanchehe chꞌan Itꞌé chꞌan ínaá. 45Ndá ikjan chꞌan ti kuíto̱he sin la ndáchro chꞌan:

―¿Á na̱xa̱ tjejochri̱nra la tjeto̱kꞌáhara ní? Tsjehéra, ó kjuixraká ti hora tsotsé sin ti Xje̱en Díos kꞌóna Chojni la tsji̱kaán sin ti tjejó ti chojni chónta ijie̱. 46Tꞌínkatjenra sátsjini kixin ó ikjui ti nkexro sinchekji ti janhan.

Itsé sin Jesús tsjakꞌechjina

(Mr. 14:43-50; Lc. 22:47-53; Jn. 18:2-11)

47Ndá na̱xa̱ tjenixja chꞌin Jesús, la kóchjina Judas, ijnko ti teyóxin sin kꞌuájiko chꞌan kjuíjiko chꞌan itsjé chojni xraá espada la ko inta, tsíchrꞌán ti sin ncha̱tꞌá tꞌe̱to̱an la ko ti sin táda kuènté ti sin judío. 48Ndá Judas, ti nkexro kjuínchekji chꞌan, mé tsíndáchro:

―Ti nkexro tsotjahá ijnko kochíto tue̱en la mé tíha ti nkexro tso̱tse̱ra.

49Ndá xi̱kaha kóchjinehe chꞌan ti chꞌin Jesús la nixje̱he̱ chꞌan ndáchro chꞌan:

―¿Ta nkojína, Maestro?

Ndá chjéhe chꞌan ijnko kochíto ti tue̱en chꞌin Jesús. 50Ndá kjuáte̱he chꞌin Jesús, ndáchro:

―Judas, nkehe kꞌuinkaxian, tjoka ichꞌe éxi kjuénka̱yáxian.

Ndá kóchjinehe sin ti chꞌin Jesús la itsé sin.

51Ndá ijnko ti nkexro kꞌuájiko chꞌin Jesús mé kuakitsje ti espada kuènté, la kóchríjin ndatsjon ijnko ti sin chꞌehe ixra̱ ti ncha̱tꞌá tꞌe̱to̱an. 52Ndá ndáchro chꞌin Jesús:

―Chrꞌaxehén tjo̱é ti espada méhe̱. Kixin kaín ti nkexro tjaya̱xi̱n espada la kja̱xin espada tsꞌenxín. 53¿Á noahña kixin janhan la jína chrónixja̱ha̱ Tꞌaná, la jehe chꞌan tuénxín chróchrꞌán chꞌan teyó ejército sin ángel ní? 54Kjánchó ti xi̱kaha chrókjui̱tꞌa, la nkexrín chróxiteyá ti nkehe nixja ti xroon itén Díos kixin ntiha la ndáchro kixin ticháxi̱n xi̱kaha tso̱hen.

55 # Lc. 19:47; 21:37. *Ndá chꞌin Jesús ndáche ti chojni ikui:

―¿Nkekuènté kꞌuinkakoara espada la ko inta éxi chrótse̱ra ijnko xíche̱e? Kaín ña̱o kjuakꞌé nkaxehen ni̱nko kjuàkua la, ¿nkekuènté kixin ntahya tse̱xinra ti janhan? 56Kjánchó kaín tíhi la ticháxi̱n tso̱hen kixin tsoxiteyá ti nkehe kꞌuéchronka ti nkexro tsíkjin ti xroon itén Díos ósé.

Ndá kaín ti sin kꞌuájiko chꞌin Jesús la kuíto̱he sin chꞌan, la kuinká sin.

Jesús kjuákꞌe ti tjejó ti sin tꞌe̱to̱an

(Mr. 14:53-65; Lc. 22:54-55, 63-71; Jn. 18:12-14, 19-24)

57Ndá kaín sin itsé sin chꞌin Jesús la sákjuíko sin chꞌan ndo̱e Caifás, ti ncha̱tꞌá tꞌe̱to̱an. Mé ntiha tsíkónkotsé ti sin tjako ley la ko ti sin tꞌe̱to̱an kuènté ni̱nko. 58A̱ndá Pedro mé ikjín chrèxin chꞌan, la kjuíji chꞌan ndo̱e ti ncha̱tꞌá tꞌe̱to̱an la kꞌuíxehen chꞌan ti nda̱sin la kjuákꞌetja̱xi̱n chꞌan ti tjejó ti sin policía kuènté ni̱nko kixin tsotsjehe chꞌan nkexrín tsito̱exín tíha.

59Ndá ti ncha̱tꞌá tꞌe̱to̱an, ti sin táda la ko kaín ti sin tꞌe̱to̱an mé kjueyá sin nkexrín tsꞌeka sin ijie̱ ti chꞌin Jesús kixin ndá jína tsjanchia sin ijie̱ itsꞌen chꞌan. 60La kjónté itsjé chojni kjuíji chꞌénehe kjuachꞌia ti chꞌin Jesús la kꞌuitjahya sin nkojín ijie̱ kixin chrókꞌuenxín chꞌan. Ndá xrína̱hña kjuíji yaá sin nduáhya chrónka, 61#Jn. 2:19.*la ndáchro sin:

―Kuíhini ndáchro ti nkexro í: “Janhan la jína tsꞌóxika ti ni̱nko kuènté Díos, la níxin ña̱o la ó si̱tꞌána ínaá” ―ichro sin.

62Ndá ti ncha̱tꞌá tꞌe̱to̱an mé kꞌuínkatjen la kjuanchankíhi ti chꞌin Jesús, ndáchro:

―¿Á tsjáte̱ehya ninkehó ní? ¿Chaxín xi̱kaha ndáchrua éxi ichro sin ní?

63Kjánchó chꞌin Jesús la nixjahya chꞌan. Ndá ti ncha̱tꞌá tꞌe̱to̱an mé ndáchro:

―Tꞌétua̱hán ijie kixin kjuachaxíen ihni̱é ti Díos tjechón kixin tso̱chro̱nka, ¿á jaha ti Cristo, ti Xje̱en Díos?

64 # Dn. 7:13. *Ndá kjuáte̱he chꞌin Jesús, ndáchro:

―Ó jaha ndáchrua. Kja̱xin ndáxrja̱n kixin tsꞌikuan ti Xje̱en Díos kꞌóna Chojni tsjakꞌetja̱xi̱n ti itja chjina kuènté Díos chónta kaín kjuachaxin, la ko kja̱xin tsꞌikuan itsi chꞌan chríkjan itji̱, tsi̱xi̱n chꞌan nkaya nka̱jní ―ichro chꞌin Jesús.

65 # Lv. 24:16. *Ndá ti ó kuíhin ti ncha̱tꞌá tꞌe̱to̱an xi̱kaha la imá kónínkaon, la kótséchje ti iké, la ndáchro:

―Ti nkexro i la kꞌuándaxíhi̱n Díos kixin xi̱kaha ichro. Méxra̱ í ticháxi̱nhña íso chojni tsochronka íso nkehe. Jahara la ó kuihínra nkexrín ichro chꞌan. 66A̱ndá jahara, ¿nkechrora?

Ndá kjuáte̱he sin ndáchro sin:

―Chónta chꞌan ijie̱, méxra̱ itsꞌen chꞌan.

67 # Is. 50:6. *Ndá iso sin la kui̱ki̱te sin nda̱té sin nkayakon chꞌan, íso sin la kjuate sin chꞌan, íso sin la chjéhe sin nkayakon chꞌan. 68La ndáchro sin:

―Ti chaxín jaha ti Cristo, la tónoha nkexro kjuatia.

Pedro kjuínchemá Jesús

(Mr. 14:66-72; Lc. 22:56-62; Jn. 18:15-18, 25-27)

69Ndá Pedro na̱xa̱ tjetja̱xi̱n chꞌan ti nda̱sin, la ikui ijnko tjachjin ichꞌe ixra̱ ntiha, la kóchjina tjan, ndáchro tjan:

―Kja̱xian xriko̱a ti chꞌin Jesús tsíkji̱xi̱n Galilea ―ichro tjan.

70Kjánchó chꞌin Pedro la kjuínchemá chꞌan ndáchro chꞌan nkayakon kaín ti sin tjejó ntiha:

―Nónahña nkehe ti ndáchrua.

71Ndá sákjuí chꞌan la kjuíji chꞌan chjina ti puerta. La íjnko chojnichjin kꞌuíkon ti jehe chꞌan la ndáche tjan kaín ti sin tjejóntaxín ntiha:

―Ti nkexro i la kja̱xin kꞌuájiko ti chꞌin Jesús tsíkji̱xi̱n Nazaret ―ichro tjan.

72Ndá chꞌin Pedro kjuínchemá chꞌan ínaá, kꞌuákjenxi̱n chꞌan ihni̱é Díos, ndáchro chꞌan:

―Chonhña ti nkexro a.

73Ndá ntsíkoá chrꞌéxi̱n la ti sin kꞌuejóntaxín ntiha la kóchjinehe sin ti chꞌin Pedro la ndáchro sin:

―Kja̱xin jaha la nkojín ti nkexro a, kixin ti nixja la tjatso̱anxíni.

74Ndá chꞌin Pedro kójie̱he chꞌan la kꞌuákjenxi̱n chꞌan ihni̱é Díos, ndáchro chꞌan:

―Chonhña ti nkexro a.

Ndá xrína̱hña itsje ijnko kochi̱ndólá. 75Ndá chꞌin Pedro xráxinkaon ti nkehe ndáchro chꞌin Jesús: “Ti na̱xa̱ tsotsjehya kochi̱ndólá la sinchemáni iní vece kixin chónhñani.” Ndá chꞌin Pedro kꞌuaxrjexín chꞌan ntiha la imá tsjánka la ó mero chrókꞌuenxín chꞌan ti kjuancheníhi.

Currently Selected:

Mateo 26: poeNTplus

Highlight

Copy