Marcos 16

Ti xechón chꞌin Jesús

(Mt. 28:1-10; Lc. 24:1-12; Jn. 20:1-10)

1A̱ndá ti ó kꞌuatsínka ti ña̱o to̱kꞌéhe chojni, ndá ti tjan María Magdalena la ko María, ìñé chꞌin Jacobo, la ko tjan Salomé mé kꞌue̱na sin xro̱a̱n xraxé náxrjón sátsjiko sin kixin sincheka sin ti cuerpo kuènté chꞌin Jesús. 2Ndá imá nchítjen ti ña̱o xránkíxixín semana mé kjuíji sin ti tsíxravá chꞌin Jesús, la na̱ntá tetji̱to̱n ña̱o. 3La jehe sin tinkákjo kícho sin ndáchro sin:

―¿Xá nkexro chrókuakjìihíni ti ixro̱ tjekjèxin ti itjo?

4Ndá xrína̱hña kꞌuíkon sin kixin ó tsíkjìin ti ixro̱, kjónté imá ijié. 5Ndá ti ó kꞌuíxehen sin la kꞌuíkon sin kixin ntiha tetja̱xi̱n ijnko ndasoá ti itja sin chjina la tjechrꞌinkáya chꞌan ijnko ika kjíjin, tjóá tsjehe, ndá imá chrakon sin. 6Ndá ndáchro ti ndasoá:

―Chrakonhñara. Ti xritjéyára ti chꞌin Jesús tsíkji̱xi̱n Nazaret kjua̱kꞌe̱nka̱ni sin ntacruz, la í kohya chꞌan ntihi. Ó xechón chꞌan. Tsjehéra ti tsíkjakꞌe sin ti cuerpo kuènté chꞌan. 7#Mt. 26:32; Mr. 14:28.*Ijie la sátjira, tjichenkara ti sin kuékꞌajiko chꞌan la ko ti chꞌin Pedro kixin ti chꞌin Jesús mé tsꞌitaón nti̱a sátsji Galilea, la ntiha tsoxétara chꞌan éxi kꞌuéchronka chꞌan.

8Ndá ti chojnichjin mé imá chrakon sin la sixrànka̱ sin, sákjuixin sin ti tsíxravá chꞌin Jesús, kjánchó ninkexró chénkahya sin ninkehó kixin imá chrákon sin.

Tjan María Magdalena titàya̱ kꞌuikuén chꞌin Jesús

(Jn. 20:11-18)

9Ti ó xechón chꞌin Jesús ti ña̱o xránkíxixín semana imá nchítjen, mé xéta chꞌan ti tjan María Magdalena, ti tjan tsíkakítsjexín chꞌan yato ncha̱kuén jínahña. 10La jehe tjan sákjuichenka tjan ti sin kuékꞌajiko chꞌin Jesús kixin imá tꞌává sin la tsjánka sin. 11A̱ndá ti ó kuíhin sin kixin tsíkꞌikon tjan kixin ó tsíxechón chꞌin Jesús la kuítekakonhña sin.

Iyó sin kuékꞌajiko sin chꞌin Jesús

(Lc. 24:13-35)

12A̱ndá chrꞌéxi̱n mé yaá sin tjejótji chrínta no̱nte̱e chojni, mé titàya̱ kꞌuikuén sin ti chꞌin Jesús, la ókjé nkexrín tsjehe chꞌan. 13Ndá jehe sin sákjuichenka sin ti íso sin a, kjánchó kja̱xin sin kuítekakonhña sin.

Chꞌin Jesús kꞌue̱tue̱hen ti sin kꞌuájiko nke ixra̱ sichꞌe sin

(Mt. 28:16-20; Lc. 24:36-49; Jn. 20:19-23)

14A̱ndá chrꞌéxi̱n la titàya̱ kꞌuikuén ti tejnko sin ti jehe chꞌan ti na̱xa̱ tjejónie sin. Ndá nixje̱he̱ chꞌan ti jehe sin kixin nkekuènté icha a̱sén sin la kuitekakuenhña sin ti nkexro tsíkꞌikon kixin ó xechón chꞌan. 15#Hch. 1:8.*La ndáchro chꞌin Jesús:

―Sátjira kuenté chjasintajni, la tjákohéra kaín chojni ti itan jína tsaáxin sin. 16Ti nkexro tsitekaon la tsikite sin la tsaá sin. A̱ndá ti nkexro tsitekakonhña la tsjasóte. 17Ndá ti sin tsitekaon ti janhan la tsjasin sin kjuaxroan ijié la kjuachaxin ni̱ná mé tsakítsjexín sin ncha̱kuén jínahña chónta chojni la ko tsonixja sin ókjé ngiva. 18Kja̱xin kjónté tsotsé sin konche la kohya nkehe tso̱hen sin la ko kjónté chrókꞌui sin ìnta̱ chónta veneno la kohya nkehe tso̱hen sin. Kja̱xin tsꞌejótja itja sin chojni níhi la tsito̱he sin jína.

Chꞌin Jesús sákjui̱ nkaya nka̱jní

(Lc. 24:50-53)

19 # Hch. 1:9-11. *Ndá ti ó kjuixin nixje̱he̱ Ìnchéni Jesús ti jehe sin, ndá sákjui̱ chꞌan nkaya nka̱jní kjuákꞌetja̱xi̱n chꞌan ti itja chjina kuènté Díos. 20A̱ndá jehe sin sákjuí sin nkuíxín sákjuikjako sin ti itan jína tsaáxin chojni. La Ìnchéni mé kjuínki̱tsa ti jehe sin la ko kjuachaxíen chꞌan mé kjuasixín sin itsjé kjuaxroan kixin tíha mé tso̱noexín ti sin tjejótihin kixin chaxín nkehe kuènté Díos kjuako sin. Mé xi̱kaha tso̱hen. Ó tjen.

Currently Selected:

Marcos 16: poeNTplus

Highlight

Copy