Jon 9

A Jisas E Haꞌa-uurie Mwane E Hute Na E Ulu Oto

1A Jisas e lae-lae, na ko leesie mwane e hute na e ulu oto. 2Oto mo pwaarongoisuli ingeie ko dolosi aana uuri, “?Haꞌa-uusuli, a tei ni e oorahaꞌaala kaꞌu nge e asuie a mwane ie e hute na e ulu oto uuri ie? ?Ohe e hute urine i tehulaꞌana mo oorahaꞌaanga ingeie maraana, wa i tehulaꞌana mo oorahaꞌaanga e ro mauꞌana ingeie?”

3A Jisas e aalamire oto ko teꞌuri, “Ulunge ingeie ngeena, kaꞌa ike i tehulaꞌana nga mei oorahaꞌaanga ingeie maraana wa uri e ro mauꞌana ingeie. E ulu urine hunie uri haataꞌinilana nanamanga a God ke lae maholo haꞌa-uurilana kei lae. 4Maholo kolu ko mau-meuri ue e urihana mola e dai-dengi ue, na kolu sai esu oto nana iini e uusungeꞌinieu mei. Taꞌe aana maholo kei rodo oto, na nga iini e saꞌa asu ike loꞌu. 5Maholo nou iiꞌo ue mai laona walumalau, ineu oto raa-raa hunie walumalau.”

6A Jisas e ere mango urine, e si ngisu i mwakano na ko esuie mei pwii-pwii aana ho ngisu ngeena. Oto e aalohaꞌinie mei pwii-pwii ngeena i maana a mwaena, 7ko si unue hunie uuri, “O ke lae hodalie maamu i laona lama i Saeloam.” (Neꞌisaenga aana mei wala aana ere-erenga mo Jiu “Saeloam” ngeena nge “Uusungeꞌinie.”) Oto a mwaena e lae, e hodalie maana e si eelihoꞌi poi, na ko lio-lio oto.

8Oto mwala e iiꞌo karaꞌinie aana hanue ingeie na mo iini e talei lee-leesie kaꞌu aana e susuke toꞌoha holaꞌinaꞌo, kire ko dolosi heiliu aada uuri, “?Uri mwane nge e talei susuke toꞌoha ni oto ie?”

9Nga mo iini kire ko unue uuri, “Ingeie ni otona.”

Taꞌe ngaeta mo iini kire ko unue loꞌu uuri, “!Haꞌike! Ingeie haꞌike, taꞌe e lio mola mala ingeie.”

Oto a mwaena maraana ko unue uuri, “Ineu kaꞌu oto mwane nge nou susuke oto i naꞌo ngeena.”

10Oto kire ko dolosi aana uuri, “?Nga taa nge e da o ko lio-lio loꞌu ngeena?”

11A mwaena e aalamire, oto ko teꞌuri, “Mwane satana a Jisas e da mei pwii-pwii, oto e aalohie maaku aana, e si unue hunieu uri ne ke lai hodalie maaku i Saeloam. Oto nou lae, nou hoda maa mango mola, na no ko lio-lio oto loꞌu.”

12Oto kire ko dolosi aana a mwaena uuri, “?Ingeie oto i tei?”

E aalamire uuri, “Nou kaꞌa saie oto.”

Mo Parise Kire Kaꞌa Ilenimwaꞌe Ike Haahie Haꞌa-uurilana Mwane E Ulu

13Oto kire toolea mwane nge e ulu keꞌu ngeena i saana mo Parise. 14Na hai dinge nge a Jisas e da mei pwii-pwii na e tahanie maana mwane e ulu ngeena aana, Dinge Maaꞌi Mo Jiu ni ngeena. 15Oto mo Parise ko dolosi loꞌu aana mwaena mala mwala nge kire holaꞌi dolosi keꞌu aana uri nga taa ni e da maana nge ko lio-lio oto loꞌu.

Oto e unue hunire uuri, “E aalohie maaku aana mei pwii-pwii, oto nou hodalie maaku nge no ko lio-lio oto loꞌu ie.”

16Oto ngaeta mo Parise ko teꞌuri, “Mwane nge e asuie mei ola ienini, e kaꞌa uure ike aana God, kaꞌu e kaꞌa kinetaꞌinie ike haꞌatolanga aana Dinge Maaꞌi.”

Taꞌe ngaeta mo iini ko unue uuri, “Iinoni oorahaꞌaala e saꞌa asuie ike mo huꞌi-huꞌite mala ienini,” Oto mei oopanga ko reu i matolada mo Jiu i tehulaꞌana mo wala ienini.

17Oto mo Parise kire heꞌi dolosi loꞌu aana a mwaena uuri, “?Haꞌalaa e tahanie maamu urine, oto iꞌoe, nga taa nge o kei unue aana a mwane ngeena?”

Oto a mwaena e aalamire uuri, “Ingeie nga propet.”

18Taꞌe mo naꞌohai mwane aana mo Jiu ngeena kaꞌa sare hiiwalaimoli ike aana uri a mwane ngeena e ulu-ulu keꞌu, na ko lio oto loꞌu. Oto kire haro soie loꞌu aamana na nikana, 19na kire dolosi aadarue uuri, “?A kalemoreꞌi ni ie? ?Uri ingeie ni more unue e hute na e ulu oto? ?Oto nga taa nge e da ko lio-lio oto loꞌu ngeena?”

20Oto aamana na nikana mwaena e aala, na kirerue ko teꞌuri, “Mere saie uri mwane kalemereꞌi ni ie, na mere saie uri e hute na e ulu oto. 21Taꞌe mere kaꞌa saie ike uri nga taa e da nge ko lio-lio oto loꞌu ie, wa mere ke saie uri a tei ni e tahanie maana. Omu ke dolosi mola aana. Ingeie e rato oto hunie ke aala maraana.” 22Aamana na nikana kirerue ere urine, aena aana kirerue maꞌuteꞌinie mo naꞌohai mwane aana mo Jiu. Aana kire unue oto uri nga iini ko hiiwalaimoli aana a Jisas uri ingeie a Kraes, kire kei neꞌie i sinaha mwaanie nume ni palo-palo mo Jiu. 23Aena mei olana nge aamana na nikana kirerue unue uuri, “E rato oto. Omu ke dolosi mola aana.”

24Oto kire ko heꞌi soie loꞌu mwane nge e ulu keꞌu ngeena mai saada, na kire ko teꞌuri hunie, “O ke ere toꞌohuu mola huni haꞌamanikuluꞌaa God, na mwaanie o eero loꞌu. Aana iꞌemeelu, melu saie uri a mwane ngeena, ingeie iinoni oorahaꞌaala.”

25Oto a mwaena ko aalamire uuri, “Nou kaꞌa saie ike uri ingeie nga mwane oorahaꞌaala wa haꞌike. Taꞌa-taꞌa leu mola nou saie, nge uri nou ulu keꞌu, na ie no ko lio-lio oto loꞌu.”

26Oto kire ko dolosi loꞌu aana a mwaena uuri, “?E uaꞌo? ?E tahanie maamu uri taa?”

27A mwaena e aalamire oto ko teꞌuri, “Nou unue kaꞌu oto huniꞌomu, taꞌe omu kaꞌa sare rongo hunieu. ?E ue nge omu ko sare rongoa uri ne ke ladoa loꞌu nga taa e raune? ?Ohe omu ko sare neꞌi pwaarongoisuli ingeie loꞌu noꞌone?”

28Oto kire ko si tohungei ere aaelasie na kire ko unue loꞌu uuri, “Iꞌoe oto ngaeta pwaarongoisuli a mwane aaela ngeena, taꞌe iꞌemeelu, melu ko lulu i sulie a Mosis, propet paine iꞌemeelu. 29Kie mani saie uri a God e ere toꞌohuu hunie a Mosis, taꞌe a mwane aaela ngeena, na hule aana melu kaꞌa saie ike uri e uure i tei.”

30Oto a mwaena e aalamire ko teꞌuri, “!Aana e urine na mei ola ni pangataꞌinge! Omu kaꞌa saie ike uri e uure i tei, taꞌe ingeie nge iini e tahanie maaku. 31Kie mani saie uri a God e kaꞌa sai rongo ike hunie kira oorahaꞌaala, taꞌe e sai rongo mola hunie mo iini kire manataꞌinie a God na ko deu i sulie saena. 32Uure oto mai i aehotalana walumalau, nga iini e kaꞌa rongoa ike ue nga taꞌa-taꞌa iinoni ke tahanie maana nga iini e hute na e ulu oto. 33Mala uri mwane nge e tahanie maaku ie ke suꞌuri uure mai mwaanie a God, haꞌalaa e saꞌa roroꞌa ni esuie ike nga mei ola urine.”

34Oto kire aalamie na kire ko teꞌuri hunie, “!Iꞌoe o hute, na o oorahaꞌaa oto! ?Uri o ko sare haꞌa-uusuliꞌemeelu?” Oto kire si aasie i sinaha mwaanie nume ni palo-palo.

A Jisas E Haataꞌinie Uri Ulunge Aani Sae E Aaela Liutaa Aana Ulunge Aani Maa

35Maholo a Jisas e rongoa uri kire aasie mwane nge e tahanie maana i sinaha, oto e lae loꞌohie na ko dolosi aana uuri, “?Uri o hiiwalaimoli taane aana a Kale Ni Iinoni?”

36Oto a mwaena e aalamie uuri, “?A tei ni ingeie, Poro paine? O ke unue oodoieu hunie ne ke hiiwalaimoli aana.”

37Oto a Jisas ko teꞌuri hunie, “O leesie kaꞌu oto, na ingeie kaꞌu oto ko ere-ere peꞌiꞌo ie.”

38Oto a mwaena e si teꞌuri, “!Nou hiiwalaimoli oto aamu, Poro paine!” Oto e pouruuru i naꞌona a Jisas, na ko palo-paloa oto.

39Na a Jisas e teꞌuri, “Nou lae mai laona walumalau ie hunie uri tohungei iiꞌonga mo iinoni ke haadaꞌi. Mo iini e ulu aana kire kaꞌa lio saie ike walaimolinge i sulie a God, ne kei da uri kire ke lio-lio loꞌu. Na mo iini kire ko eero mola uri kire lio saie walaimolinge i sulie a God, ne kei haataꞌinie mola uri ikire mo iini e ulu.”

40Ngaeta mo Parise nge kire uure wau karaꞌinie kire rongoa a Jisas e ere urine, oto kire ko dolosi aana uuri, “?Uri o ko unue uri iꞌemeelu ni melu ulu?”

41Oto a Jisas ko teꞌuri hunire, “Mala uri omu ke ulu toꞌohuu aena aana omu kaꞌa rongo saie ike walaimolinge, nge haꞌalaa omu kaꞌa roroꞌa ike aana oorahaꞌaa. Taꞌe aana omu ko unu-unue uri omu ko lio-lio mola na uri omu saie walaimolinge, ngeena omu roroꞌa aana oorahaꞌaanga iꞌomu.”

Currently Selected:

Jon 9: apbNT

Highlight

Copy