Matius Uram 16
16
Sun Farisi nang ab sun Saduki nang ab aryi Er Yesus bisi, “Ilil tenen dinyi ton kiknibderum,” ebmai uram
16:1-4
1Ura, Musa kerek sengna dirniliramnyi nang Farisi nang ab, “Sun din nang kam kum bukwaming,” eramnyi nang Saduki nang ab ara Er Yesus dam yanmai. Ara, “Er Yesus bira Er Imtamnyi bokdonokmounyi kum kurur asi lak kibkwayeb,” tenen ukubdenkwamaici, yanmai. Ura, sunci Er Yesus bisi ato eboka molobmai, “Kanci imtam aryi kuboka ilil tenen dinyi ton kiknibdeminyi uca, nunci Kanti, ‘Er Imtamnyi biryi Bokwetebmounyi kurur,’ tenen bikwankib,” eboka molobmai.
2Bok, Er Yesus biryi sun urasintam aryi ilil tenen dinyi kum kiknibmou. Eda, Erci sunsi ato ebmou, “Sintam aryi dinmamunyi ba, isa kiting deibmaci ura, sunci ato erandum, ‘Ambutum ara dou teleb kubkwamar aryi isa kiting deibmar,’ erandum. 3Ba, berentam bukoka dinmamunyi ba, im bi obmaci ura, sunci, ‘Arub ara mo deneande,’ erandum. Ati, sunci imtam dibwelebmun cok, ‘Dou teleb kubkwamar,’ tenen, ‘Mo denebkwamar,’ tenen bingnandum. Bok, Er Imtamnyi biryi, ‘Niryi kunubde binkwaman dinyi bikniting,’ tenen lak kimdeirisurur bok, sunci Er Imtamnyi biryi kunubde binkwamar dinyi asi kum bingnandum. 4Sunda Farisi nang ab Saduki nang ab ara malyi kanya bondarur nang kurandumci, Er Imtamnyi Uram asi diboka kum milirandum. Sunci Nisi, ‘Ilil tenen dinyi ton kiknibderum,’ eboka molobmanurum bok, Niryi sun urasintam aryi ilil tenen dinyi ton kum kiknibkwaman. Eda, sunci, ‘Er Imtamnyi Uram ebdeibmaca bobaramunyi si Yunus bira lukunda winiryi kunmouci, weik mekinaia mundu umbura kunmou,’ teneibde bindarur. A dinyi teneibde bimunyi deib aryi sunci Niti, ‘Erda ato-ato anyi,’ tenen bikdate.” Er Yesus biryi ato ebmou ura, Erci sun Farisi nang ab Saduki nang ab asi takloboka bindobmou.
Er Yesus biryi, “Sun Farisi nang ab sun Saduki nang aryi tola uram etereraming asi sunci, ‘Kekeboka milibibyei,’ tenen kalikdarur,” ebmou uram
16:5-12
5Ura, Er Yesus ab Er miliramnyi nang ab co ngun-ngun dub burbindoka me kwan me kouboka otam banmai. Banmai cok, Er miliramnyi nang ara roti luba kibloboka binmai. 6Ura, Er Yesus biryi sunsi ato eboka eterebmou, “Roti bungbung erdeirin dinyi ara sun Farisi nang ab sun Saduki nang ab aryi boraming dinyi asi sunci kisibdobdarur,” ebmou.
7Uca, Er miliramnyi nang aryi, “Una deyok ati ato ebmasir do?” tenen bita kum bikdobmai cok, sunci sun mamun asi ato ebdanmai, “Nunci roti asi luba kibloboka yanmab deyok ati ato ebmasir ati tenebmab,” ebdanmai.
8Bok, Er Yesus biryi sun uram sisingmai deyok ati bikmouci, Erci sunsi ato ebmou, “Sunci, ‘Roti kum bobmab se,’ ebdanmarum ara unato ati ato ebdanmarum do? Sunci dib tenendarur cok, sunci Er Imtamnyi biti, ‘Roti kikniboka karebsute ati mikib kurur,’ tenen mikib kuboka dib kum tenendarur se. 9Er Imtamnyi biryi kwaning kareboka ninyi ilinto ababyi kalingdur ati sunci, ‘Roti kum bobmab se,’ tenen mambul kanya bona mem. Sunci a dinyi asi tuba kum bikdobmarum do? Sunci dinmandau bok, roti tokol amubaryok a kunmou bok, Er Imtamnyi biryi karebmou uca, ninyi lima ribu baryi nang aryi yinmai uca boubmou ura, kablobmai. Ura, kablobmai tobdoba ara tower aryi wiamnyi aling amolbaryi kirdongonmandau ba, langkarikmou dinyi asi sunci tuba bikdau do luba kibdau do? 10Tonda, yuk tum ara roti tokol tabaryok kunmou bok, Er Imtamnyi biryi karebmou uca, ninyi empat ribu baryi aryi yinmai uca, boubmou ura, kablobmai. Ura, sunci kablobmai yina asi bulubdeiboka tower aling tabaryi asi kibdongobmandau bok, sunci luba kibdau do? 11Niryi sunsi, ‘Roti bungbung erdeirin dinyi asi kisibdobdarur,’ ebmasin ara roti kobdob deyok ati kum ebmasin. Sunci a dinyi kum bikdobmarum ara unato ati ato kum bikdobmarum do? Sun Farisi nang ab sun Saduki nang ab ara tola uram etereraming ati Niryi, ‘A uram aryi yuk nang asi dakdongobde bacei,’ tenen, ‘Sun Farisi nang ab Saduki nang aryi bobaraming roti bungbung erdeirin ato dinyi asi kisibdobdarur,’ ebmasin. Ara, kebdeiboka ebmasin,” ebmou. 12Ato ebmou uca, Er miliramnyi nang aryi Er Yesus biryi ebmou uram deyok ati bikdobmai. Ara, “Bungbung erdeirin dinyi inirdongon roti asi kisiboka yibingnyei,” tenen Yesus biryi ato kum ebmou. Eda, “Sun Farisi nang ab Saduki nang ab aryi tola uram etereraming asi kekeboka milibingnyei,” tenen Erci, “A nang aryi boraming bungbung erdeirin ato dinyi asi kisibdobdarur,” ebmou asi bikdobmai.
Petrus biryi Er Yesus bisi, “Kanda Er Imtamnyi biryi Bokwetebkwamunyi ninyi lemsina ati yankwamwe Weik Sienyi kurum,” eboka lak ebmou uram
16:13-20
13Ura, Er Yesus ab Er miliramnyi nang ab aryi banmai ani, sunci Galilea mutuk me utam kuboka bukamwe mutuk ara Kaisarea Filipi atei dam mutuk binmai. Ura, Er Yesus biryi Er miliramnyi nang asi ato eboka asibdenmou, “Ni Ninyi Dasinyi kunun ati ninyi aryi Niti unato anyi enunung do?” Ato eboka asibdenmou.
14Uca, sunci Ersi ato ebmai, “Ninyi ton nang ara Kanti, ‘Yohanes ninyi me dongonanyi kurur,’ ekunung. Ba, ton nang ara Kanti, ‘Er Imtamnyi Uram ebdeibmaca bobaramunyi si nabi Elia tamuboka yuryauci kurur,’ ekunung. Ba, yuk nang ara Kanti, ‘Nabi Yeremia tubto kam bukoka yauci kurur.’ Ba, yuk nang ara Kanti, ‘Yeremia kuma. Eda, nabi-nabi nang diamnyi kankan aryi kam bukoka yauci kurur,’ ekunung,” ebmai.
15Ura, Er Yesus biryi sunsi tubto asibdenmou, “Ba, sunci kuboka Nisi ara unato anyi kunun tenenindarur do?” eboka asibdenmou.
16Uca, Simon Petrus biryi ato ebmou, “Kanda Er Imtamnyi biryi Bokwetebkounyi ninyi lemsina ati yanmoumwe Weik Sienyi kurum. Kanda Er Imtamnyi iya kam kururnyi Mi kobdob kurum,” ebmou.
17Uca, Yesus biryi Simon Petrus bisi ato ebmou, “Se, Simon Yunus mi. Kanci diboka ebmarim ati, kanda Er Imtamnyi biryi kisal dangkururnyi kurum. Kanci Niti, ‘Ato-ato anyi kurur,’ tenen bikmarima ara ninyi aryi lak kiboka kum ebkarebmaking. Eda, Ni Nai Imtamnyi biryi lak kiboka ebkarebmakir ati ato ebmarim. 18Ba, kanci Nisi, ‘Ato-ato anyi kurum,’ ebmanirim to, Nibabyi neiktoto kanti, ‘Ato-ato anyi kurum,’ ebkwinkin. Kan si ara, ‘Petrus,’ ekunung ara danguboka, ‘Lulungna kum keil,’ ekunung. Ati, kanci lulungna kum uca Nisi dib eboka lak ebmanirim deyok aryi, ninyi aryi kan si, ‘Petrus,’ diboka ekunung. Ura, Niryi ninyi ilinto naboka bulubdeibkwan ara kanci lulungna kum uca lak ebmanirim to deici aryi tikeibkwan. Ba, ninyi dirdeirin dinyi ara mikib weik kuboka sun din nang asi diboka talernururandiryok, a dinyi ara Niryi naboka bulubdeibkwan nang asi muna kum kibdongobkwande. 19Niryi kansi mikib karebmakin uca, kanci Er Imtamnyi amwetam kibdeibmaci nang asi, ‘Ato-ato kubdarur,’ eboka kalikwandim. Tonda, kanci sun tukwetam nang asi, ‘Ato-ato kubdarur,’ ebminyi tok, Er Imtamnyi bibabyi neiktoto, ‘Ato-ato kubdarur,’ ebkwande. Tonda, kanci sun tukwetam nang asi, ‘Ato-ato kuna mem,’ ebminyi tok, Er Imtamnyi bibabyi neiktoto, ‘Ato-ato kuna mem,’ ebkwande.” Ato eboka Er Yesus biryi eterebmou. 20Ura, Er Yesus biryi Er miliramnyi nang asi ato ebmou, “Sunci yuk nang asi Niti, ‘Er Imtamnyi biryi Bokwetebunyi ninyi lebkwande ati yanmou Weik Sienyi kurur,’ ebde yibana mem!” Ato eboka Erci uram ebkatabmou.
Er Yesus biryi, “Ninyi aryi Nisi mambul kibdeiboka obkwaning,” eboka lak ebmou ura, Erci, “Sun Nisi milibkwamingnyi nang ara ato-ato kuboka milibkwanunung,” eboka eterebmou uram
16:21-28
21Ura, a talak aryi kuboka Er Yesus biryi Er miliramnyi nang asi, “Ninyi aryi mambul kibdeiboka obkwaning,” eboka eterebkalibmou. Ati, Yesus biryi sunsi ato eboka eterebmou, “Er Imtamnyi biryi Niti teleb teneanou to, Nira Yerusalem weik atei binmanyi ura, ninyi aryi Nisi obkwaning. Ara, sun Yahudi yala nang sien nang ab Er Imtamnyi kan ninyi kan noutam kuboka antanirdeirin deyok nang ab Musa kerek sengna eterenung nang ab aryi Niti, ‘Nun li,’ tenen dokdonokningiryok, mambul weik kibdeiboka obkwaning. Ba, sirya obningnyi ura, uki bitinyi dibmanyi ani, uki winiryi tum ara Er Imtamnyi biryi Nisi kam bukeibkwanir,” ebmou.
22Ebmou bok, Petrus biryi Er Yesus bisi yuk bobinmouci, Ersi kerebdobmouci, ato ebmou, “Nai Arungdeirisurumnyi, Kanci, ‘Ninyi aryi mambul kibdeiboka obkwaning,’ ebmarim dinyi ara diboka kum kunubkwamakir,” ebmou.
23Ebmou bok, Er Yesus biryi Petrus bisi ato eboka erekdobmou, “Kanda isa sienyi uram erandanyi bitonyi kurum se. Kanci Niti bisik sekmanirimnyi kurum. Ati, kanci Ni dongtam birum. Er Imtamnyi biryi teneibmar to kanci kum teneibmarim. Eda, ninyi aryi teneiraming to teneibmarimci. A deyok aryi, Niryi kansi, ‘Ni dongtam birum,’ ebmakin,” ebmou.
24Ura, Er Yesus biryi Er miliramnyi nang asi ato ebmou, “Unanyi-unaner aryi, ‘Er Yesus bisi milibkwan,’ tenebci ura, a nang ara sun tenerdaramingnyi dinyi asi dongtam kibdeiboka Er Imtamnyi teleb tenesurur dinyi asi u dikum deirina teleb. Tonda, a nang ara, ‘Ninyi aryi mambul kibdeibningiryok, co lase ikin dinyi takubdeiboka obningnyi ababyi niryi Yesus bisi milibkwan,’ tenen Nisi milinina teleb. 25Ara, unanyi-unaner aryi, ‘Ninyi aryi ni obningnyei,’ tenen Nisi tangloraming ara kam kun dinyi kum dobdobkwaming. Ba, unanyi-unaner aryi Ni deyok ati, ‘Malyi. Ninyi aryi nisi obningnyi ababyi, niryi nun Du Yesus bisi milibkwan,’ tenen kuramingnyi nang ara iya kam kun dinyi dobdobkwaming. 26Ninyi tentok aryi im dangna tukwe dangna aryi kuboka bona bon dinyi nirya asi talerante bok, Er Imtamnyi biryi karerande kam kun dinyi kum dobdobte ura, er talerante bona bon dinyi ersi teleb kubdeibte do? Ato tenen kum. Tonda, anyi biryi, ‘Iya kam kun dinyi dobdobtinyi,’ tenen Er bona bon dinyi nirya asi karebtiryok, iya kam kun dinyi dekdobte do? Ato tenen kum. 27Ni Ninyi Dasinyi biryi tamuryuryankwan ara iya mikibnyi kuboka tamuryuryankwan. Ara, Ni Nai Imtamnyi iya mikibnyi kurur to, Nira iya mikibnyi kuboka Er Imtamnyi Uram eryuryangan nang ab tonkwa tamuryuryankwayeb. A uki tum ara Niryi ninyi kunubde ban dinyi nirya asi lilibdiryok, sun yuk-yuk aryi kunubde baramingnyi dinyi deib aryi dekeibkwan. A deyok aryi, Niryi sunsi, ‘Nisi milibnumunyi ura, iya kam kun dinyi dobdobkwandum,’ ebmasin. 28Niryi sunsi dib en uram ton ebkwinsin asi sunci diboka kekebdarur. Sun a tikmarum nang kankan aryi ton nang ara Ni Ninyi Dasinyi mikib asing eibkwanurum. Ara, kam tuba kurandumci, asing dinmarum bok, Nira Iya Weik Sienyi biryi mikib kuboka yankwan asi asing eibkwanurum,” ebmou.
Currently Selected:
Matius Uram 16: MTG
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
