Matius Uram 18
18
Er Yesus miliramnyi nang amolbaryi aryi, “Er Imtamnyi bisi amwetam kun nang kankan aryi unanyi Iya Erebdobnyi kubkwande do?” eboka asibdenmai uram
18:1-5
1A kunmai talak ara Er miliramnyi nang amolbaryi aryi Er Yesus dam yandoka ato eboka asibdenmai. “Er Imtamnyi bira Weik Sienyi kururci, ninyi ilinto Er amwetam kun nang kimdeirirur. Ati, Er Imtamnyi amwetam kun nang kankan aryi unanyi bisi Erebdobnyi kurur do?” eboka asibmai. 2Asibdenmai uca, Er Yesus biryi, “Ni milin nang asi eterebkwaman,” tenen mitik mi tentok asi nabmou ura, Er miliramnyi nang kankan aryi boyanmou. 3Ura, Er Yesus biryi sunsi ato ebmou, “Niryi sunsi dib en uram ton ebkwinsin ati sunci diboka kekebdarur. Sunci sun, ‘Erebdob nang kibtibyi,’ tenen dinyi kum taklobdate ura, a mitik mi kanya ato luknub kanya kum bobdate ura, sunda Er Imtamnyi Weik Sienyi Er amwetam kun nang kum kibdate. 4A deyok aryi, Niryi sunsi ato ebkwinsin. Unanyi-unaner ara sun damnyi luknubdongobmangnyi ura, a mi bobmar kanya ato boramingnyi ura, sun ato kun nang ara Er Imtamnyi Weik Sienyi amwetam kun nang kankan aryi iya erebdob nang kunung,” ebmou.
5“Tonda, unanyi-unaner ara Ni si deici aryi ato mi mitik mi ato kun nang asi du dongobdinyi bira Nisi a kunum dobdobmaniriryi.” Ato eboka Yesus biryi eterebmou.
Er Yesus biryi, “Sun, ‘Malyi dinyi kubting,’ tenen yuk nang asi sakeibingnyi nang asi Er Imtamnyi biryi iya wenen dinyi karebkwande,” ebmou uram
18:6-11
6Er Yesus biryi Er miliramnyi nang asi eterenmouci, Erci ton ato ebmou, “Ba, unanyi-unaner ara a mitik mi kanya bobmar ato nang ati, ‘Malyi dinyi kubting,’ tenen sakeibtingnyi ura, Er Imtamnyi biryi a nang asi iya wenen dinyi karebkwande. Ara, sun Nisi dib tenenin nang kankan aryi tukwetam bun nang ati, ‘Sakeibtibyi,’ tenen nang ati ato ebmasin. Er Imtamnyi biryi a dib tenenin nang asi sakeibingnyi nang asi iya wenen dinyi karebkwande. Weik keil ikin keil aryi ngang youbdongoboka ilila me kwan umbura dongon dinyi ara wenen weik dinyi kurante bok, Er Imtamnyi biryi a nang asi tabakoka wenebdiryok, Erci sunsi iya mambul kurdeirin dinyi karebkwande.
7Sun im dangna tukwe dangna kun nang ara malyi dinyi kuramingiryok, sun yuk nang ati, ‘Sunbabyi malyi dinyi kubting,’ tenen sangdeiriraming se. Er Imtamnyi biryi a nang asi wenebkwande. Sun malyi kun nang ara yuk nang ati, ‘Malyi kubting,’ tenen sakeibkwaming ara bisik sengna kum uca sakeibkwaming. Ba, unanyi-unaner ara yuk nang asi sakeibtingnyi nang asi Er Imtamnyi biryi diba ati wenebkwande. 8Ura, sunci, ‘Ni taruk biriman aryi malyi dinyi kubtinyi,’ tenebmunyi ura, sunci, ‘Ni taruk biriman aryi malyi dinyi kubnyei,’ tenen sun mining taruk sekdamunci, bai donokdarur. Tonda, sunci, ‘Ni yan biriman aryi malyi dinyi kubtinyi,’ tenebmunyi ura, sunci, ‘Ni yan biriman aryi malyi dinyi kubnyei,’ tenen sun mining yan sekdamunci, bai donokdarur. Sunda taruk tentok yan tentok kuransute uca mambul kurandate bok, iya kam kun dinyi dobdobdate ara iya teleb. Ba, sunci malyi kun dinyi kunurandate ba, sun taruk bitinyi yan bitinyi tuba kuransute bok, iya angdur uk bisik dongorbasiting ara sunti teleb kum kubdeibsute. 9Ura, sunci, ‘Ni asing biriman aryi malyi dinyi kubtinyi,’ tenebmunyi uca, sunci, ‘Ni asing biriman aryi malyi dinyi kubnyei,’ tenen dinatam asing lukabokmunci, bai donokdarur. Ati, sunda asing tentok dem kuransute uca mambul kurandate bok, iya kam kun dinyi dobdobdate ara iya teleb. Ba, sunda malyi dinyi kunurandate ba, asing bitinyi kuransute bok, iya angdur bisik dongorbasiting ara sunti teleb kum kubdeibsute,” ebmou.
10Enmou cok, Er Yesus biryi ton ato ebmou, “Sun a mitik mi ato kanya bon nang ara Nisi dib tenenin nang kankan aryi tukwetam bun nang ati sunci, ‘Talyi nang aca,’ tenebmunyei. Niryi sunsi uram ton ebkwinsin ati sunci diboka kekebdarur. Sun Er Imtamnyi Uram eryuryangan nang ara a tukwetam bun nang kuramingnyi to asing diramingiryok, Ni Nai Imtamnyi urasintam aryi tuba-tuba kuramingiryi, Er Imtamnyi bisi erkarenung. A deyok aryi, Niryi sunti a nang ati, ‘ “Talyi nang aca,” tenebmunyei,’ ebmasin,” ebmou. 11“Ni Ninyi Dasinyi bira tukwetam yuryase ara, ‘Sun wanikamingnyi nang ati ingkirikoka lemdeirbinkwan,’ tenen yuryase. A deyok aryi, Niryi, ‘Sun tukwetam bun nang ati, “Talyi nang aca,” tenebmunyei,’ ebmasin.” Ato eboka Yesus biryi eterebmou.
Er Yesus biryi, “Er Imtamnyi biryi sun waningna nang asi ingkirikde barur ati bikdobting,” tenen kebdeiboka waningna domba uram eterebmou uram
18:12-14
12Er Yesus biryi Er miliramnyi nang asi eterenmouci, ton ato eboka eterebmou. “Sunda una tenebdaute do? Sun kankan dam aryi ninyi tentok er domba seratus baryi winirante asi tentok wanikmote ura, una kubte do? Erci, ‘Malyi, domba tentok akwe wanikmanir,’ kum tenebte. Eda, erci er domba sembilan puluh sembilan baryi winirante mutuk dam takloboka a waningna domba tentok asi ingkiringbite. 13Ura, anyi biryi er domba wanikmote asi ingkiringbinmote ani, sirya asing eibdobte ura, er kanya kilkil mitik kum kubte. Niryi sunsi uram ton ebkwinsin ati sunci diboka kekebdarur. A domba damnyi biryi er domba waningna kum domba sembilan puluh sembilan baryi ati kilkil kanya borantiryok, erci a wanikmote domba tentok asi tubto eibdobte ati er kanya ara bisibkaboka iya kilkil kubkwamote. 14Ura, a domba damnyi biryi, ‘Domba tentok ababyi wanikminiknicei,’ tenerande to, sun Nai Imtamnyi bibabyi sun dib tenen nang kankan tukwetam bun nang ati, ‘Ninyi tentok ababyi wanikminiknicei,’ tenerur,” ebmou.
Er Yesus biryi, “Sun kwit dib tenenanyi biryi sunti malyi dinyi kubsute ura, sunci ato-ato kubdarur,” eboka eterebmou uram
18:15-20
15Ura, Er Yesus biryi ton ato eterebmou. “Sun kwit dib tenenanyi biryi sunti malyi dinyi kubsute ura, sun yuk aryi bindoka anyi yuk ab tonkwa ebdandumunci, sunci anyi bisi, ‘Ato-ato kuboka malyi kubmanirim ati bitabdeibkwanim,’ eboka bitabdeibdarur. Ura, anyi biryi sun uram kekebte uca, ‘Diba, manmalibmakin,’ ebte ura, sun kwit biryi erdamnyi bitabdeibdandoka er malyi kun dinyi taklobte. 16Ba, anyi biryi sun, ‘Kan malyi kubmanirim dinyi asi taklobdum,’ en uram asi kum kekebsute ura, sunci bindoka ninyi tentok kum bitinyi kum inibdobmunci, sun malyi kubdeibsunyi ab tonkwa tubto ebdankwandarur. Ati, ninyi tentok kum bitinyi kum kekebingnyi ba, sunci sun kwit asi, ‘Kan malyi kubmanirim dinyi asi taklobdum,’ ebmunyi uca, sun ab sun kwit ab aryi sisikdandate deyok ara yuk nang urasintam aryi lak kibkwandur.#Ul. 19:15 17Ba, a inibdobmunyi nang tentok kum bitinyi kum aryi sunsi malyi kubdeibsounyi bisi, ‘Kan malyi kun dinyi taklobdum,’ ebmangnyi ababyi, anyi biryi sun enmangnyi uram kum kekebte ura, sunci Er Imtamnyi Uram kekena ati bulun nang dam bindoka er malyi kun dinyi lak ebkwandarur. Ba, Er Imtamnyi Uram kekena ati bulun nang aryi, ‘Kan malyi kun dinyi taklobdum,’ ebmangnyi ababyi kum kekebte ura, sunci anyi biti, ‘Iya malyi kunanyi,’ tenebdate. Ara, sunci anyi biti, ‘Anyi bira Er Imtamnyi Uram walwal atonyi kurur,’ tenena teleb. Tonda, sunci ato kunanyi biti, ‘Anyi bira Roma weik sienyi Kaisar biti pajak dengna molormilinanyi bitonyi kuboka malyi kunanyi kurur,’ tenena teleb.
18Tonda, Niryi sunsi dib en uram ton ebkwinsin ati diboka kekebdarur. Sunda Er Imtamnyi Uram kekena ati bulurandum nang ara, ‘Nunda tukwetam nang ara ato-ato kubkwayeb,’ ebmunyi ura, Er Imtamnyi bibabyi neiktoto, ‘Ato-ato kubdarur,’ ebkwande. Ba, sunci, ‘Nunda tukwetam kun nang ara ato-ato kuna mem,’ ebmunyi ura, Er Imtamnyi bibabyi neiktoto, ‘Ato-ato kuna mem,’ ebkwande.
19Tonda ebkwinsin ara ato. Sunda tukwetam nang kankan aryi ninyi bitinyi aryi neik kanya boboka, ‘Ato-ato dinyi Er Imtamnyi bisi molobkwinim,’ tenen molobmunyi ura, Ni Nai Imtamnyi biryi ato molon dinyi kunuboka karebkwansir. 20Ninyi bitinyi kum winiryi kum aryi neik dam bulubmangnyi nang ara Ni si deib aryi bulubmangnyi ura, adikum Nibabyi sun ab tonkwa miliboka kubkwayeb. A deyok aryi, Niryi sunsi, ‘Sunda neik kanya boboka molobmunyi tok Ni Nai Imtamnyi biryi kunubkwansir,’ ebmasin,” ebmou.
Er Yesus biryi, “Ninyi aryi malyi kubmasingnyi dinyi asi sunci luba kiboka antaniboka kubdobkwandarur,” eboka eterebmou uram
18:21-35
21A sirya ura, Petrus biryi yandoka Er Yesus bisi ato eboka asibdenmou, “Nai Eteresurumnyi, ni kwit dib tenenanyi biryi nisi malyi kubdongobnici ura, niryi er malyi kun dinyi luba kiboka antanibdobkwanim ara liki unabaryi antanibdobkwanim do? Liki tabaryi malyi kubdongobnici ababyi, liki tabaryi ababyi antanibdobkwanim do?” Ato eboka asibdenmou.
22Uca, Er Yesus biryi ersi ato ebmou, “Ato tenen kum. Niryi kansi ebkwinkin uram diboka kekebdum. Liki tabaryi akwe antanirdordana mem. Eda, liki tabaryi liki tujuh puluh baryi tabakoka sun kwit biryi malyi kubdongobmasingnyi ababyi, sunci er malyi kun dinyi tuba-tuba luba kibmunci, antanibdobkwandarur.
23Ati, sunci, ‘Nun kwit yabwe malyi kubdongobsingnyi dinyi tuba-tuba luba kibibiryok, antanibdobtibyi,’ tenen bikwandum ati kekebdarur. Er Imtamnyi bira Weik Sienyi kururci, ninyi ilinto Er amwetam kimdeirirur deyok ati kiklibdeibkwan. Ara, tukwetam aryi kuboka weik sienyi ton kuramwe ba, er wa irmilin nang ara er dinyi yuk-yuk bobloamnyi ati, erci sunti, ‘Ni dinyi yuk-yuk bobloamnyi asi tamuboka dekeibsiting,’ tenen nabmou. 24Er wa irmilin nang bobloamnyi dinyi nukoka lilibmaici, dengna weik keil si talenta yubwa-yubwa ara sepuluh ribu baryi bobloantunyi bisi weik sienyi urasintam boyanmai. 25Bok, a dengna weik bobloamunyi biryi keil uang damnyi bisi tubto tamubkarebman kum deyok aryi, keil uang damnyi biryi ersi ato ebmou. ‘Kan talerandim bona nirya asi doboka dekeibingnyi ura, niryi keil uang dengna weik dinyi bobloabumwe asi tamuboka dobdobkwan. Tonda, kan ab kan ner ab kan mabwe nermabwe ab ara yuk nang asi dekeibsingnyi ura, ni keil uang dengna weik dinyi bobloabumwe asi tamuboka dobdobkwan,’ ebmou.
26Uca, a wa irmilinanyi keil uang mitik kum bobloamunyi biryi er kutam ikdongoboka er nai urasin dam luknubdongobmouci, ato ebmou. ‘Nai ukubloaminyi ba, aminda aryi kan keil uang boblobse dinyi nirya asi unubkwankin arya,’ ebmou. 27Uca, a weik sienyi biryi a co bok ilinto bobloamunyi bisi boukwe kibmouci, erci, ‘Kan co bok ilinto boblobumwe asi ni luba kibkwan uca, niryi kansi, “Tamuboka dekeibnurum,” kum ebkwankin,’ ebmouci, ‘Kan da birum,’ eboka lobdeibmou.
28Uca, a wa irmilinanyi bira a weik sienyi ai aryi kuboka baitam anaboka yibinmou. Ura, bisik noutam banmou uca, er ab neik wa irmiliramnyi nang kankan aryi tonyi ab ebdanmarei. Ura, er lobdeibmunyi biryi, ‘Ei, anyi biryi keil uang dengna mitik dinyi si dinar seratus baryi bobloanou,’ tenen erci er kwit bisi bico kum tenebmou. Eda, erci er kwit dam bindoka er yinkorokna talebdongobmouci, ato ebmou, ‘Kanda ni keil uang si dinar seratus baryi boblobumwe asi ola unubnurum,’ ebmou. 29Uca, er kwit biryi er kutam ikdongoboka ersi ato eboka molobmou, ‘Ukublobmaminyi ba, co bok nirya asi unubkwankin,’ ebmou.
30Molobmou bok, er kwit lobdeibmunyi biryi er kwit co bok boblobmunyi uram kum kekebmou. Eda, erci er kwit boboka ninyi wenen ai dongorbinmou. Ara, ‘Kan boblobmoumwe co bok nirya asi sirya tamurkarebniminyi ura, lobdeibkwankin,’ eboka ninyi wenen ai dongorbinmou. 31Ura, sun kwit yabwe neik wa irmiliramnyi nang aryi a kubmou to asing eibmai uca, sunda engen kanya boboka sun nai weik sienyi bisi bindoka a kubmou to nirya nukarebmai.
32Uca, a weik sienyi biryi er wa irmilinanyi lobdeibmunyi bisi nabmou ura, erci ersi ato ebmou, ‘Kanda yu biribdob wa irmilinanyi kurum se. Kanci co bok ilinto bobloamoumwe ba, nisi moloryanmoumwe uca, niryi kansi, “Ni luba kibkwan ati, ‘Tamurkarebdum,’ eboka kum molobkwankin,” eboka lobdeibmakise. 33Niryi kanti bico tenebmakise to, kanbabyi neiktoto kan kwit biti bico tenebmatum. Ati, kanci unato ati kan kwit biti bico kum tenebmarimci, “Kan bobloamoumwe dinyi luba kibkwan,” kum ebmarim do?’ 34Ura, weik sienyi er yu weik aryi ato eboka arukdeibmou, ‘Anyi bisi ninyi wenen ai kalingna nang taruk dam karebmunyi ura, sunci ersi mambul weik dinyi kareboka wenebting,’ eboka arukdeibmou. Ara, ‘Anyi biryi bobloamwe dinyi nirya asi unubte ura, niryi ersi lobdeibtinyi,’ eboka ninyi wenen ai dongobmou,” ebmou.
35Enmou cok, Er Yesus biryi Er miliramnyi nang asi ato ebmou, “Sun kwit biryi sunsi malyi kubdongobsici ura, sunci sun kanya dam aryi, ‘Er malyi kubdongobmanir dinyi asi luba kibniryok, antanibdobkwanim,’ tenen kubdarur. Ba, sunci sun kwit malyi kun dinyi luba kum kibdate ura, Ni Nai Imtamnyi bibabyi neiktoto sun Er urasintam aryi malyi kurandum dinyi ababyi kum kilibsute. Ara, tukwetam aryi kuboka weik sienyi biryi er wa irmiliramnyi nang ati kuramwe to, Ni Nai Imtamnyi bibabyi neiktoto sunti kubkwansir,” ebmou.
Currently Selected:
Matius Uram 18: MTG
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
Matius Uram 18
18
Er Yesus miliramnyi nang amolbaryi aryi, “Er Imtamnyi bisi amwetam kun nang kankan aryi unanyi Iya Erebdobnyi kubkwande do?” eboka asibdenmai uram
18:1-5
1A kunmai talak ara Er miliramnyi nang amolbaryi aryi Er Yesus dam yandoka ato eboka asibdenmai. “Er Imtamnyi bira Weik Sienyi kururci, ninyi ilinto Er amwetam kun nang kimdeirirur. Ati, Er Imtamnyi amwetam kun nang kankan aryi unanyi bisi Erebdobnyi kurur do?” eboka asibmai. 2Asibdenmai uca, Er Yesus biryi, “Ni milin nang asi eterebkwaman,” tenen mitik mi tentok asi nabmou ura, Er miliramnyi nang kankan aryi boyanmou. 3Ura, Er Yesus biryi sunsi ato ebmou, “Niryi sunsi dib en uram ton ebkwinsin ati sunci diboka kekebdarur. Sunci sun, ‘Erebdob nang kibtibyi,’ tenen dinyi kum taklobdate ura, a mitik mi kanya ato luknub kanya kum bobdate ura, sunda Er Imtamnyi Weik Sienyi Er amwetam kun nang kum kibdate. 4A deyok aryi, Niryi sunsi ato ebkwinsin. Unanyi-unaner ara sun damnyi luknubdongobmangnyi ura, a mi bobmar kanya ato boramingnyi ura, sun ato kun nang ara Er Imtamnyi Weik Sienyi amwetam kun nang kankan aryi iya erebdob nang kunung,” ebmou.
5“Tonda, unanyi-unaner ara Ni si deici aryi ato mi mitik mi ato kun nang asi du dongobdinyi bira Nisi a kunum dobdobmaniriryi.” Ato eboka Yesus biryi eterebmou.
Er Yesus biryi, “Sun, ‘Malyi dinyi kubting,’ tenen yuk nang asi sakeibingnyi nang asi Er Imtamnyi biryi iya wenen dinyi karebkwande,” ebmou uram
18:6-11
6Er Yesus biryi Er miliramnyi nang asi eterenmouci, Erci ton ato ebmou, “Ba, unanyi-unaner ara a mitik mi kanya bobmar ato nang ati, ‘Malyi dinyi kubting,’ tenen sakeibtingnyi ura, Er Imtamnyi biryi a nang asi iya wenen dinyi karebkwande. Ara, sun Nisi dib tenenin nang kankan aryi tukwetam bun nang ati, ‘Sakeibtibyi,’ tenen nang ati ato ebmasin. Er Imtamnyi biryi a dib tenenin nang asi sakeibingnyi nang asi iya wenen dinyi karebkwande. Weik keil ikin keil aryi ngang youbdongoboka ilila me kwan umbura dongon dinyi ara wenen weik dinyi kurante bok, Er Imtamnyi biryi a nang asi tabakoka wenebdiryok, Erci sunsi iya mambul kurdeirin dinyi karebkwande.
7Sun im dangna tukwe dangna kun nang ara malyi dinyi kuramingiryok, sun yuk nang ati, ‘Sunbabyi malyi dinyi kubting,’ tenen sangdeiriraming se. Er Imtamnyi biryi a nang asi wenebkwande. Sun malyi kun nang ara yuk nang ati, ‘Malyi kubting,’ tenen sakeibkwaming ara bisik sengna kum uca sakeibkwaming. Ba, unanyi-unaner ara yuk nang asi sakeibtingnyi nang asi Er Imtamnyi biryi diba ati wenebkwande. 8Ura, sunci, ‘Ni taruk biriman aryi malyi dinyi kubtinyi,’ tenebmunyi ura, sunci, ‘Ni taruk biriman aryi malyi dinyi kubnyei,’ tenen sun mining taruk sekdamunci, bai donokdarur. Tonda, sunci, ‘Ni yan biriman aryi malyi dinyi kubtinyi,’ tenebmunyi ura, sunci, ‘Ni yan biriman aryi malyi dinyi kubnyei,’ tenen sun mining yan sekdamunci, bai donokdarur. Sunda taruk tentok yan tentok kuransute uca mambul kurandate bok, iya kam kun dinyi dobdobdate ara iya teleb. Ba, sunci malyi kun dinyi kunurandate ba, sun taruk bitinyi yan bitinyi tuba kuransute bok, iya angdur uk bisik dongorbasiting ara sunti teleb kum kubdeibsute. 9Ura, sunci, ‘Ni asing biriman aryi malyi dinyi kubtinyi,’ tenebmunyi uca, sunci, ‘Ni asing biriman aryi malyi dinyi kubnyei,’ tenen dinatam asing lukabokmunci, bai donokdarur. Ati, sunda asing tentok dem kuransute uca mambul kurandate bok, iya kam kun dinyi dobdobdate ara iya teleb. Ba, sunda malyi dinyi kunurandate ba, asing bitinyi kuransute bok, iya angdur bisik dongorbasiting ara sunti teleb kum kubdeibsute,” ebmou.
10Enmou cok, Er Yesus biryi ton ato ebmou, “Sun a mitik mi ato kanya bon nang ara Nisi dib tenenin nang kankan aryi tukwetam bun nang ati sunci, ‘Talyi nang aca,’ tenebmunyei. Niryi sunsi uram ton ebkwinsin ati sunci diboka kekebdarur. Sun Er Imtamnyi Uram eryuryangan nang ara a tukwetam bun nang kuramingnyi to asing diramingiryok, Ni Nai Imtamnyi urasintam aryi tuba-tuba kuramingiryi, Er Imtamnyi bisi erkarenung. A deyok aryi, Niryi sunti a nang ati, ‘ “Talyi nang aca,” tenebmunyei,’ ebmasin,” ebmou. 11“Ni Ninyi Dasinyi bira tukwetam yuryase ara, ‘Sun wanikamingnyi nang ati ingkirikoka lemdeirbinkwan,’ tenen yuryase. A deyok aryi, Niryi, ‘Sun tukwetam bun nang ati, “Talyi nang aca,” tenebmunyei,’ ebmasin.” Ato eboka Yesus biryi eterebmou.
Er Yesus biryi, “Er Imtamnyi biryi sun waningna nang asi ingkirikde barur ati bikdobting,” tenen kebdeiboka waningna domba uram eterebmou uram
18:12-14
12Er Yesus biryi Er miliramnyi nang asi eterenmouci, ton ato eboka eterebmou. “Sunda una tenebdaute do? Sun kankan dam aryi ninyi tentok er domba seratus baryi winirante asi tentok wanikmote ura, una kubte do? Erci, ‘Malyi, domba tentok akwe wanikmanir,’ kum tenebte. Eda, erci er domba sembilan puluh sembilan baryi winirante mutuk dam takloboka a waningna domba tentok asi ingkiringbite. 13Ura, anyi biryi er domba wanikmote asi ingkiringbinmote ani, sirya asing eibdobte ura, er kanya kilkil mitik kum kubte. Niryi sunsi uram ton ebkwinsin ati sunci diboka kekebdarur. A domba damnyi biryi er domba waningna kum domba sembilan puluh sembilan baryi ati kilkil kanya borantiryok, erci a wanikmote domba tentok asi tubto eibdobte ati er kanya ara bisibkaboka iya kilkil kubkwamote. 14Ura, a domba damnyi biryi, ‘Domba tentok ababyi wanikminiknicei,’ tenerande to, sun Nai Imtamnyi bibabyi sun dib tenen nang kankan tukwetam bun nang ati, ‘Ninyi tentok ababyi wanikminiknicei,’ tenerur,” ebmou.
Er Yesus biryi, “Sun kwit dib tenenanyi biryi sunti malyi dinyi kubsute ura, sunci ato-ato kubdarur,” eboka eterebmou uram
18:15-20
15Ura, Er Yesus biryi ton ato eterebmou. “Sun kwit dib tenenanyi biryi sunti malyi dinyi kubsute ura, sun yuk aryi bindoka anyi yuk ab tonkwa ebdandumunci, sunci anyi bisi, ‘Ato-ato kuboka malyi kubmanirim ati bitabdeibkwanim,’ eboka bitabdeibdarur. Ura, anyi biryi sun uram kekebte uca, ‘Diba, manmalibmakin,’ ebte ura, sun kwit biryi erdamnyi bitabdeibdandoka er malyi kun dinyi taklobte. 16Ba, anyi biryi sun, ‘Kan malyi kubmanirim dinyi asi taklobdum,’ en uram asi kum kekebsute ura, sunci bindoka ninyi tentok kum bitinyi kum inibdobmunci, sun malyi kubdeibsunyi ab tonkwa tubto ebdankwandarur. Ati, ninyi tentok kum bitinyi kum kekebingnyi ba, sunci sun kwit asi, ‘Kan malyi kubmanirim dinyi asi taklobdum,’ ebmunyi uca, sun ab sun kwit ab aryi sisikdandate deyok ara yuk nang urasintam aryi lak kibkwandur.#Ul. 19:15 17Ba, a inibdobmunyi nang tentok kum bitinyi kum aryi sunsi malyi kubdeibsounyi bisi, ‘Kan malyi kun dinyi taklobdum,’ ebmangnyi ababyi, anyi biryi sun enmangnyi uram kum kekebte ura, sunci Er Imtamnyi Uram kekena ati bulun nang dam bindoka er malyi kun dinyi lak ebkwandarur. Ba, Er Imtamnyi Uram kekena ati bulun nang aryi, ‘Kan malyi kun dinyi taklobdum,’ ebmangnyi ababyi kum kekebte ura, sunci anyi biti, ‘Iya malyi kunanyi,’ tenebdate. Ara, sunci anyi biti, ‘Anyi bira Er Imtamnyi Uram walwal atonyi kurur,’ tenena teleb. Tonda, sunci ato kunanyi biti, ‘Anyi bira Roma weik sienyi Kaisar biti pajak dengna molormilinanyi bitonyi kuboka malyi kunanyi kurur,’ tenena teleb.
18Tonda, Niryi sunsi dib en uram ton ebkwinsin ati diboka kekebdarur. Sunda Er Imtamnyi Uram kekena ati bulurandum nang ara, ‘Nunda tukwetam nang ara ato-ato kubkwayeb,’ ebmunyi ura, Er Imtamnyi bibabyi neiktoto, ‘Ato-ato kubdarur,’ ebkwande. Ba, sunci, ‘Nunda tukwetam kun nang ara ato-ato kuna mem,’ ebmunyi ura, Er Imtamnyi bibabyi neiktoto, ‘Ato-ato kuna mem,’ ebkwande.
19Tonda ebkwinsin ara ato. Sunda tukwetam nang kankan aryi ninyi bitinyi aryi neik kanya boboka, ‘Ato-ato dinyi Er Imtamnyi bisi molobkwinim,’ tenen molobmunyi ura, Ni Nai Imtamnyi biryi ato molon dinyi kunuboka karebkwansir. 20Ninyi bitinyi kum winiryi kum aryi neik dam bulubmangnyi nang ara Ni si deib aryi bulubmangnyi ura, adikum Nibabyi sun ab tonkwa miliboka kubkwayeb. A deyok aryi, Niryi sunsi, ‘Sunda neik kanya boboka molobmunyi tok Ni Nai Imtamnyi biryi kunubkwansir,’ ebmasin,” ebmou.
Er Yesus biryi, “Ninyi aryi malyi kubmasingnyi dinyi asi sunci luba kiboka antaniboka kubdobkwandarur,” eboka eterebmou uram
18:21-35
21A sirya ura, Petrus biryi yandoka Er Yesus bisi ato eboka asibdenmou, “Nai Eteresurumnyi, ni kwit dib tenenanyi biryi nisi malyi kubdongobnici ura, niryi er malyi kun dinyi luba kiboka antanibdobkwanim ara liki unabaryi antanibdobkwanim do? Liki tabaryi malyi kubdongobnici ababyi, liki tabaryi ababyi antanibdobkwanim do?” Ato eboka asibdenmou.
22Uca, Er Yesus biryi ersi ato ebmou, “Ato tenen kum. Niryi kansi ebkwinkin uram diboka kekebdum. Liki tabaryi akwe antanirdordana mem. Eda, liki tabaryi liki tujuh puluh baryi tabakoka sun kwit biryi malyi kubdongobmasingnyi ababyi, sunci er malyi kun dinyi tuba-tuba luba kibmunci, antanibdobkwandarur.
23Ati, sunci, ‘Nun kwit yabwe malyi kubdongobsingnyi dinyi tuba-tuba luba kibibiryok, antanibdobtibyi,’ tenen bikwandum ati kekebdarur. Er Imtamnyi bira Weik Sienyi kururci, ninyi ilinto Er amwetam kimdeirirur deyok ati kiklibdeibkwan. Ara, tukwetam aryi kuboka weik sienyi ton kuramwe ba, er wa irmilin nang ara er dinyi yuk-yuk bobloamnyi ati, erci sunti, ‘Ni dinyi yuk-yuk bobloamnyi asi tamuboka dekeibsiting,’ tenen nabmou. 24Er wa irmilin nang bobloamnyi dinyi nukoka lilibmaici, dengna weik keil si talenta yubwa-yubwa ara sepuluh ribu baryi bobloantunyi bisi weik sienyi urasintam boyanmai. 25Bok, a dengna weik bobloamunyi biryi keil uang damnyi bisi tubto tamubkarebman kum deyok aryi, keil uang damnyi biryi ersi ato ebmou. ‘Kan talerandim bona nirya asi doboka dekeibingnyi ura, niryi keil uang dengna weik dinyi bobloabumwe asi tamuboka dobdobkwan. Tonda, kan ab kan ner ab kan mabwe nermabwe ab ara yuk nang asi dekeibsingnyi ura, ni keil uang dengna weik dinyi bobloabumwe asi tamuboka dobdobkwan,’ ebmou.
26Uca, a wa irmilinanyi keil uang mitik kum bobloamunyi biryi er kutam ikdongoboka er nai urasin dam luknubdongobmouci, ato ebmou. ‘Nai ukubloaminyi ba, aminda aryi kan keil uang boblobse dinyi nirya asi unubkwankin arya,’ ebmou. 27Uca, a weik sienyi biryi a co bok ilinto bobloamunyi bisi boukwe kibmouci, erci, ‘Kan co bok ilinto boblobumwe asi ni luba kibkwan uca, niryi kansi, “Tamuboka dekeibnurum,” kum ebkwankin,’ ebmouci, ‘Kan da birum,’ eboka lobdeibmou.
28Uca, a wa irmilinanyi bira a weik sienyi ai aryi kuboka baitam anaboka yibinmou. Ura, bisik noutam banmou uca, er ab neik wa irmiliramnyi nang kankan aryi tonyi ab ebdanmarei. Ura, er lobdeibmunyi biryi, ‘Ei, anyi biryi keil uang dengna mitik dinyi si dinar seratus baryi bobloanou,’ tenen erci er kwit bisi bico kum tenebmou. Eda, erci er kwit dam bindoka er yinkorokna talebdongobmouci, ato ebmou, ‘Kanda ni keil uang si dinar seratus baryi boblobumwe asi ola unubnurum,’ ebmou. 29Uca, er kwit biryi er kutam ikdongoboka ersi ato eboka molobmou, ‘Ukublobmaminyi ba, co bok nirya asi unubkwankin,’ ebmou.
30Molobmou bok, er kwit lobdeibmunyi biryi er kwit co bok boblobmunyi uram kum kekebmou. Eda, erci er kwit boboka ninyi wenen ai dongorbinmou. Ara, ‘Kan boblobmoumwe co bok nirya asi sirya tamurkarebniminyi ura, lobdeibkwankin,’ eboka ninyi wenen ai dongorbinmou. 31Ura, sun kwit yabwe neik wa irmiliramnyi nang aryi a kubmou to asing eibmai uca, sunda engen kanya boboka sun nai weik sienyi bisi bindoka a kubmou to nirya nukarebmai.
32Uca, a weik sienyi biryi er wa irmilinanyi lobdeibmunyi bisi nabmou ura, erci ersi ato ebmou, ‘Kanda yu biribdob wa irmilinanyi kurum se. Kanci co bok ilinto bobloamoumwe ba, nisi moloryanmoumwe uca, niryi kansi, “Ni luba kibkwan ati, ‘Tamurkarebdum,’ eboka kum molobkwankin,” eboka lobdeibmakise. 33Niryi kanti bico tenebmakise to, kanbabyi neiktoto kan kwit biti bico tenebmatum. Ati, kanci unato ati kan kwit biti bico kum tenebmarimci, “Kan bobloamoumwe dinyi luba kibkwan,” kum ebmarim do?’ 34Ura, weik sienyi er yu weik aryi ato eboka arukdeibmou, ‘Anyi bisi ninyi wenen ai kalingna nang taruk dam karebmunyi ura, sunci ersi mambul weik dinyi kareboka wenebting,’ eboka arukdeibmou. Ara, ‘Anyi biryi bobloamwe dinyi nirya asi unubte ura, niryi ersi lobdeibtinyi,’ eboka ninyi wenen ai dongobmou,” ebmou.
35Enmou cok, Er Yesus biryi Er miliramnyi nang asi ato ebmou, “Sun kwit biryi sunsi malyi kubdongobsici ura, sunci sun kanya dam aryi, ‘Er malyi kubdongobmanir dinyi asi luba kibniryok, antanibdobkwanim,’ tenen kubdarur. Ba, sunci sun kwit malyi kun dinyi luba kum kibdate ura, Ni Nai Imtamnyi bibabyi neiktoto sun Er urasintam aryi malyi kurandum dinyi ababyi kum kilibsute. Ara, tukwetam aryi kuboka weik sienyi biryi er wa irmiliramnyi nang ati kuramwe to, Ni Nai Imtamnyi bibabyi neiktoto sunti kubkwansir,” ebmou.
Currently Selected:
:
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)