Zvak. 3
3
Kuponeswa kwoMunhu Waiya Chirema
1Zuva rimweni Petro naJohani vaikwira kuTemperi ngeawa rokukumbira, awa rechipfumbamwe. 2Nomunhu waiya chirema kubvira mundani yamai ake waitwarwa, uwo wevaiisa zuva ngezuva pamusiwo weTemperi, unozwi Musiwo Wakanaka, kuti apemhe kunevaipotera muTemperi. 3Naapo aona Petro naJohani vooda kupotera muTemperi wakapemha. 4Petro echimuringisisa, naJohani, wakati, “Ringira kwetiri.” 5Naye wakavaringira, echikarira kuti unozopuwa chiro ndivo. 6Asi Petro wakati, “Andina sirivha nomukore; asi ndinokupa icho chendinacho. Ngezina raJesu Kristu weNazaretha, miruka uhambe.”#3:6 Miruka uhambe:Tsamba dzimweni dzekare dzinoti Hamba. 7Naye wakamubata ngenyara yokumudyo, akamumirudza; paripo tsoka dzake nemadziso etsoka dzake zvakagwinyiswa. 8Naye echinyanduka wakaema, akatanga kuhamba, akapotera navo muTemperi, echihamba nokunyanduka, echikudza Mwari. 9Vanhu veshe vakamuona echihamba, echikudza Mwari, 10navo vakazia kuti ndiye uwo waigara echipemha zvipo pamusiwo weTemperi unozwi Musiwo Wakanaka. Vakashamiswa nokukangaidzwa ngeizvo zvaiya zvaitika kwaari.
Petro Unochumaira muTemperi
11Naapo achabata Petro naJohani, vanhu veshe vakarumba kuungana kwavari vari muBerere raSoromoni, vechishamiswa kakurutu. 12Naapo Petro azviona, wakaereketa kunavanhu, “Imwimwi vanhu vaIsuraeri, munoshamiswa ngenyi ngeizvi? Nokuti munotiringisisa ngenyi ingatei isimba redu nokuti unaku hwedu zvaita kuti ahambe? 13Mwari waAbrahama, waIsaka, waJakobe nowemadzibaba edu, wakakudza muranda wake Jesu, uwo wemwakapira imwimwi, mukamuramba pamberi pehope yaPiratu, apo paaiya ada kumusunhura. 14Asi imwimwi mwakaramba uwo Wakachena neWakarurama, mukakumbira kuti muurayi apuwe kwomuri. 15Mwakauraya Muambi wokupona; uwo waakamusa Mwari kubva kwevakafa. Isusu tiri zvapupu kuneizvi. 16Ngokugonda zina rake, zina rake remene raita kuti agwinye, uyu munhu womunoona nowomunozia; kubudikidza ngokugonda munaJesu kwaita kuti agwinye kudai pamberi penyu mweshe.
17“Nazvino hama, ndinozia kuti mwakazviita ngokusikazia, kudai ngezvevakaitawo vatongi venyu. 18Asi izvo zvaakaronza Mwari ngepamberi ngomuromo wevaprofeti veshe, kuti Kristu wake unozotambudzika, iye wakazvizadzisa kudaro. 19Ndizvo tenderukai mukunukukire kunaMwari kuti zvishaishi zvenyu zvitsukutidzwe, 20kuti nguva dzokugwinyiswa mumweya dziuye dzinobva pamberi paMambo, zve, kuti atume Kristu Jesu uwo wakaemeserwa imwimwi. 21Uwo unosisira kuti aashirwe mudenga metsa nguva yaguma yokumusirirwa kwezviro zveshe, yaakaereketa ndiyo Mwari ngemiromo yevaprofeti vake vakacheneswa kubvira pakutanga. 22Ngokuti Mosi wakati, ‘Mambo Mwari wenyu unozomumirudzira muprofeti unobva pakati pehama dzenyu, muprofeti wakadai ndini. Munosisira kuzopurutana kuzviro zveshe zvaanozoereketa kwomuri. 23Kunozoitika kuti weshe usikazopurutani kunouwo muprofeti, unozoparadzwa kubva pakati pevanhu.’ 24Eya, nevaprofeti veshe, kubvira kunaSamueri naavo veshe vakateera, vakaronza ngaaya mazuva. 25Imwimwi muri mibarirwana yevaprofeti nevechitenderano chaakaita Mwari namadzibaba enyu, echiti kunaAbrahama, ‘Ngemibarirwana yako madzinza eshe omunyika anozofumiswa.’ 26Mwari wakamirudza Muranda wake, akamutumira kwomuri kutanga kuti amufumise, ngokutenderudza umwe ngaumwe wenyu kubva mukushata kwenyu.”
Currently Selected:
Zvak. 3: Ndau
Highlight
Share
Copy
Want to have your highlights saved across all your devices? Sign up or sign in
