Ruka 22

Vanopangana Kuuraya Jesu

(Mat. 26:1-5; Mk. 14:1-2; Joh. 11:45-53)

1Zvinopano mushongano wokudya chingwa chisina mumera wakakwedzera, unozwi Phasika. 2Nevapristi vakuru nevanyori vaitsvaka njira yokumuuraya ndiyo, ngokuti vaitya vanhu.

Judhasi Unotenda Kupira Jesu

(Mat. 26:14-16; Mk. 14:10-11)

3Zvino Sathani wakapotera munaJudhasi uwo waizwi Isikarioti, umwe wevari gumi navairi; 4wakaenda kooshongana nevapristi vakuru nevangwariri veTemperi kuti waizomuita mapirenyi kwavari. 5Navo vakadakara, vakaita chitenderano kuti vamupe mare. 6Ndizvo wakatenda, akatsvaka mukuwo wokumupira kwavari pasina mbungano.

Jesu Unonasirira Kudya kwePhasika

(Mat. 26:17-25; Mk. 14:12-21; Joh. 13:21-30)

7Zvino zuva rechingwa chisina mumera rakaguma, iro raibaiwa gwai rePhasika. 8Jesu wakatuma Petro naJohani echiti, “Endai mutinasirire Phasika kuti tiridye.” 9Vakati kwaari, “Unoda kuti tirinasirire pari?” 10Wakati kwavari, “Penyai, apo mwoopotera mudhorobha, unozoshongana nemwi mwamuna wakatwara hari mwechimuteera kumhatso yaanopotera, 11nemwi munozoti kumuna wemhatso, ‘Mudzidzisi unoti kwouri, Riripari kamera revaeni, apo pendinozodya Pasika nevadzidzi vangu?’ 12Naye unozomupangidzira kamera guru romuturika rakanasirirwa ndizvo zveshe; tinasirirei apo.” 13Navo vakaenda, vakaona kudai ngezvaakaronza kwavari; navo vakanasirira Pasika.

Kudya kwaMambo

(Mat. 26:26-30; Mk. 14:22-26; 1 VaK. 11:23-25)

14Naapo awa raguma, wakagara patafura nevapostori. 15Naye wakati kwavari, “Ngokudisisa ndaida kudya iri Phasika nemwi ndisati ndatambudzika; 16ngokuti ndinomuronzera kuti andichazoridyizve, metsa razadzisika muumambo hwaMwari.” 17Naye wakatora tsani, naapo abonga wakati, “Torai ichi, mukoanisirane pakati penyu; 18ngokuti ndinomuronzera kuti andichazomwi kumichero yomuvhini metsa hugume umambo hwaMwari.” 19Wakatora chingwa, naapo abonga wakachigura, akachipa kwavari, akati, “Ichi chiri muiri wangu, unopirwa ngepamusoro penyu. Mwechiita ichi kundikarakadza inini.” 20Netsani ngokudaro ngesure kwokudya, echiti, “Tsani iyi inodururirwa imwimwi chitenderano chitsva mungazi yangu. 21Asi ringirai, nyara youwo unondipira ineni patafura. 22Ngokuti Mukororo woMunhu unoenda kudai ngezvezvakaemeswa; asi hezvo kuneuwo munhu waanozopirwa ndiye!”

23Navo vakatanga kubvunzana pakati pavo kuti ndiani kwavari waizoita ichi chiro.

Vadzidzi vaJesu Vanophikisana kuti Mukuru Ndiani

24Kwakabudazve hasha pakati pavo yokuti ndiani kwavari unozoita mukuru. 25Naye wakati kwavari, “Madzimambo emadzinza anotonga padera pavo; vanodaidzwa kuti vadetseri vevanhu. 26Asi imwimwi amuzodaro akadi; asi uwo wakakurisisa pakati penyu ngaadai ngewakatsongesesa, nouwo uri mutongi ngaadai ngomuranda. 27Ngokuti ndiani wakapinda kukura, uwo unogara panekudya nokuti uwo unoshandira? Andiyepi here uwo unogara panekudya? Asi inini ndiri pakati penyu ndakadai ngouwo unoshandira.

28“Asi imwimwi muri avo vakagara neni mukuedzwa kwangu; 29neni ndinomuemesera umambo kudai ndiBaba anguzve vakandiemesera inini, 30kuti mudye mwechimwa patafura rangu muumambo hwangu, nemwi munozogara pamadendemaro mwechitonga madzinza gumi namairi aIsuraeri.

Jesu Unoronzera Petro kuti Uchamuramba

(Mat. 26:31-35; Mk. 14:27-31; Joh. 13:36-38)

31“Simoni, Simoni, ringira, Sathani wakatenderwa kuti amupuwe, kuti amutsere kudai ngekoroni, 32asi inini ndakakukumbirira kuti kugonda kwako kusazopera; newe apo watenderukazve, ugwinyise vakoma vako.” 33Naye wakati kwaari, “Mambo, inini ndakanasirira kutoenda newe mutirongo nomukufa.” 34Naye wakati, “Ndinokuronzera iwewe Petro, jongwe arizoriri nyamashi, usati waramba katatu kuti aundizii.”

Chikwama, Nyede neShoti

35Naye wakati kwavari, “Apo zvandakamutuma musina chikwama nenyede nemagwada, mwakatama chiro here?” Navo vakati, “Atina chetakatama.” 36Naye wakati kwavari, “Asi zvinopano, uwo unechikwama ngaachitore nounenyede ngokudaro. Nouwo usina shoti ngaatengise bhachi rake atenge shoti. 37Ngokuti ndinomuronzera kuti ichi chinyorwa chinosisira kuti chizadzisike ndini kuti, ‘Naye wakaerengwa pamwepo nevashaishi;’ ngokuti izvo zvakanyorwa ngendaa yangu zvinozoitika.” 38Navo vakati, “Mambo, ringirai, shoti mbiri dziri panapa.” Naye wakati kwavari, “Zvakwana.”

Jesu Unokumbira paMutunhu wemaOrivhi

(Mat. 26:36-46; Mk. 14:32-42)

39Naye wakabuda kubanze, wakaenda kudai ngomushuma wake kuMutunhu wemaOrivhi; nevadzidzi vakamuteera. 40Naapo aguma pandau iyo wakati kwavari, “Kumbirai kuti musapinda mukuedzwa.” 41Naye wakasiyana navo nharauko inoda kudai ngeekuposhera buwe, wakagwadama pashi, akakumbira 42echiti, “Baba, dai mwechida, bvisai tsani iyi kwendiri; asi, kusaita kuda kwangu, asi kuda kwenyu ngakuitike.” [ 43Yakaoneka kwaari ngirosi yechibva mudenga yechimugwinyisa. 44Asi mukurwadziwa kakurutu, wakagwinyisira kukumbira; nezia rake raiya rakadai ngemadonhwe makuru engazi echibomhera pashi pamavhu.]#22:44Tsamba dzimweni dzekare adzina mavhesi aya. 45Naapo amiruka kubva pamukumbiro, wakauya kuvadzidzi vake, akavaona vakaata hope ngendaa yokusvipa mwoyo, 46naye wakati kwavari, “Munoatirenyi? Mukai, mukumbire kuti musapinda mukuedzwa.”

Kusungwa kwaJesu

(Mat. 26:47-56; Mk. 14:43-50; Joh. 18:3-11)

47Naapo achaereketa, kwakauya mbungano nouwo waizwi Judhasi, umwe wevari gumi navairi, echivatungamirira. Wakakwedzera kunaJesu kuti amuchingamidze ngomuromo. 48Asi Jesu wakati kwaari, “Judhasi, wopira here Mukororo woMunhu ngokuchingamidza ngomuromo?” 49Naapo avo vaimutendenedza vaona izvo zvaizoitika, vakati, “Mambo, tobaya here ngeshoti?” 50Umwe wavo wakatema hloko yomupristi mukuru, akagura nzee yake yokumudyo. 51Asi Jesu wakati, “Zvakwana izvi!” Naye wakabata nzee yake, akamuponesa. 52Jesu wakati kunevapristi vakuru nevangwariri veTemperi nevakuru vevanhu, avo vakauya kurwisana naye, “Ngenyi mwabuda nokuuya kudai ngevanorwa nembavha, muneshoti nenduku? 53Naapo ndaiya nemwi mazuva eshe muTemperi, amuzi kundibata. Asi iri riri awa renyu neresimba rechidima.”

Petro Unoramba Jesu

(Mat. 26:57,58,69-75; Mk. 14:53,54,66-72; Joh. 18:12-18,25-27)

54Naapo vakamubata, vakamukweya kuenda naye, vakamuunza mumhatso yomupristi mukuru. Asi Petro wakateera ari kuretu. 55Naapo vabasa muriro pakati poruwanze, vakagara pashi pamwepo, Petro wakagara pashi pakati pavo. 56Naapo musikana, echimuona akagara mukujeka kwomuriro, echimuringisisa wakati, “Munhu uyu waiya naye.” 57Asi iye wakaramba echiti, “Dzimai, andimuzii.” 58Ngesure kwekamukuwo, umweni wakamuona akati, “Iwewe newe uri umwe wavo.” Asi Petro wakati, “Mwamunewe, inini andiri umwe wavo akadi.” 59Ngesure kwomukuwo waida kuita awa, umwenizve wakagwinyisira kuronza echiti, “Ngegwinyiso munhu uyu waiya naye, ngokuti muGarire.” 60Asi Petro wakati, “Mwamunewe, andichizii chounoronza.” Paripo achaereketa, jongwe rakarira. 61NaMambo wakakunukuka, akaringira kunaPetro, naPetro wakakarakadza izwi raMambo, ngenjira yaakaronza kwaari kuti, “Jongwe risati rarira nyamashi, unozondiramba katatu.” 62Naye wakabuda kubanze, akachema kakurutu.

Jesu Unoitirwa Jee noKurohwa

(Mat. 26:67-68; Mk. 14:65)

63Nevamuna avo vakabata Jesu vakamuitira jee, vakamurova; 64vakamufukidza muhope, vakamubvunza vechiti, “Profeta! Ndiani uwo wakurova?” 65Vakaereketa zviro zvimweni zvakawanda ndiye vechimutsambura.

Kutongwa kwaJesu ngevaJudha

(Mat. 26:59-66; Mk. 14:55-64; Joh. 18:19-24)

66Naapo kwaedza, vakaunganidza pamwepo vakuru vevanhu nevapristi vakuru nevanyori, navo vakamukweya kuenda naye kubangano ravo vechiti, 67“Kuti uri Kristu, tironzere.” Asi iye wakati kwavari, “Kudai ndanyamuronzera, amuzotendi; 68kunyazwi ndikanyamubvunza, imwimwi amuzopinguri. 69Asi kubvira zvinopano Mukororo woMunhu unozogara ngokumudyo kwesimba raMwari.” 70Navo veshe vakati, “Iwewe zvino uri Mukororo waMwari here?” Naye wakati kwavari, “Imwimwi mwatoronza kuti ndini inini.” 71Navo vakati, “Tichatama chapupu chimweni ngenyi? Ngokuti isusu temene tazwa kubva pamuromo wake.”

Currently Selected:

Ruka 22: Ndau

Highlight

Copy