لَاتَانٛوجِ 26

إِسْحَاقَ بٜى عَبِمٜلٜکْ حَا غٜرَرْ عٜ بِيرْسَبَ

1وٜىٰلٛ#26‏:1 وٜىٰلٛ مَلَّ رَڢٛ؞ وَطِ ندٜرْ لٜسْدِ، نَا طُمْ وٜىٰلٛ عَرَنْدٜ وَطْنغٛ ندٜرْ زَمَنُ إِبْرَاهِيمَ؞ إِسْحَاقَ يٜحِ غٜرَرْ، حَا عَبِمٜلٜکْ، لَامِيطٛ ڢِلِسْتِعٜنْ؞ 2جَوْمِرَاوٛ وَنغَنِمٛ، وِعِ‏: «تَا يَحْ حَا مِصْرَ، عَمَّا جٛوطَ ندٜرْ لٜسْدِ ندِ مِحٛلّٜتٜ؞ 3ڢَࢡُّ ندٜرْ مَارِ، مِوٛنْدَنْ بٜى مَ، مِبَرْکِطِنْتٜ؞ نغَمْ عَنْ عٜ دَࢩْغٛلْ مَ ندٛکَّنْمِ لٜسْطٜ طٜعٜ ڢُو؞ مِتَبِتِنَنْ حُنَيٜىٰرٜ ندٜ کُنَنِيمِ بَابَ مَ إِبْرَاهِيمَ؞ 4مِطُطِّنَنْ دَࢩْغٛلْ مَ بَنَ کٛودٜ عَسَمَ، مِحٛکَّنْ دَࢩْغٛلْ مَ لٜسْطٜ طٜعٜ ڢُو؞ دَلِيلَ دَࢩْغٛلْ مَاطَ، عُمَّاتٛوجٜ دُنِيَارُ ڢُو کٜࢡَنْ بَرْکَ#لَاتَانٛوجِ 22‏:16‏-18؞؞ 5نغَمْ إِبْرَاهِيمَ نَنَنِ يَمْ، طٛوْتَنِ عُمْرٛوجٜ عَمْ عٜ ڢَرِلَّاجِ عَمْ عٜ سَرْطِيجِ عَمْ ڢُو؞» 6بَنَ نٛنْ إِسْحَاقَ جٛوطٛرِ حَا غٜرَرْ؞

7ندٜ وٛرْࢡٜ وُرٛ مَنْ ࢨَمِمٛ حَالَ دٜبّٛ مَاکٛ، عٛوِعِ‏: «عٛ دٜىٰرْطِرَاوٛ عَمْ؞» عٛحُلِ وِعْغٛ‏: «عٛ دٜبّٛ عَمْ؞» نغَمْ عٛحُلِ تَا وٛرْࢡٜ لٜسْدِ مَنْ مبَرَ مٛ دَلِيلَ رٜبٜکَّ، نغَمْ عٛ نغَرْنِيطٛ#لَاتَانٛوجِ 12‏:13؛ 20‏:2؞؞ 8ندٜ إِسْحَاقَ دُورِ تٛنْ سٜطَّ، ࢩَنْدٜ ڢٜىٰرٜ عَبِمٜلٜکْ، لَامِيطٛ ڢِلِسْتِعٜنْ يُرْنِ حَا وُرْدٜرٜ سُودُ؞ عٛيِعِ نٛ إِسْحَاقَ ڢِجِرِ بٜى دٜبّٛ مُوطُمْ رٜبٜکَّ؞ 9عَبِمٜلٜکْ عٜوْنِ إِسْحَاقَ، وِعِ‏: «عٛ دٜبّٛ مَ سِکٜ‏! کٛنِ مبِعْطَا عٛ دٜىٰرْطِرَاوٛ مَ؟» إِسْحَاقَ جَابِمٛ‏: «مِوِعِ طُمْ نغَمْ مِحُلِ مبَرٜىٰغٛ دَلِيلَ مَاکٛ؞» 10عَبِمٜلٜکْ وِعِ‏: «کَيَّ‏! طُمٜ مبَطَّا مِنْ طٛ؟ لُتِّنٛ سٜطَّ غٛوتٛ ندٜرْ عُمَّاتٛورٜ ندٜعٜ وَالْدَنّٛ بٜى دٜبّٛ مَ، ندٜنْ عَعَيْبِنَنّٛ مِنْ؞» 11عَبِمٜلٜکْ عُمْرِ يِمْࢡٜ ڢُو، عٛوِعِ‏: «مٜىٰمْطٛ غٛرْکٛ عٛو بٜى دٜبّٛ مَاکٛ، کِيتٜتٜىٰطٛ کِيتَ مبَرٜىٰغٛ؞»

12حِتَاندٜ مَاجُمْ، إِسْحَاقَ عَاوِنٛ ندٜرْ لٜسْدِ مَاجُمْ؞ عٛࢨَامْنِ شٛوِ تٜىٰمٜرّٜ کٛ عٛعَاوِ، نغَمْ جَوْمِرَاوٛ بَرْکِطِنِمٛ؞ 13عٛرِسْکِ مَسِنْ؞ رِسْکُ مَاکٛ يٜحِ يٜىٰسٛ يٜىٰسٛ حَا عٛلَاتِ مَوْطٛ مَسِنْ؞ 14عٛمَرِ تٛکّٜ دَمّٛوجِ عٜ تٛکّٜ نَعِ عٜ سُکَعٜنْ طُوطْࢡٜ؞ نغَمْ مَاجُمْ ڢِلِسْتِعٜنْ کَاجِمٛ؞ 15ࢡُلِّ طِ حُووٛوࢡٜ بَابَ مَاکٛ إِبْرَاهِيمَ نغَسْنٛ نَانٜ ڢُو، ڢِلِسْتِعٜنْ عُوِ طِ، کٜبِّنِ طِ لٜسْدِ؞ 16عَبِمٜلٜکْ وِعِ إِسْحَاقَ‏: «دِلُّ دِغَ طٛ، نغَمْ عَࢡُرْدِ مِنْ بَاوْطٜ؞» 17إِسْحَاقَ دِلِّ، وَطِ سَنغٜىٰرٜ مُوطُمْ ندٜرْ وَادِوٛلْ غٜرَرْ؞ عٛجٛوطِ تٛنْ؞ 18إِسْحَاقَ عُڢْتِ ࢡُلِّ ندِيَمْ طِ ࢡٜنغَسْنٛ ندٜرْ زَمَنُ بَابَ مُوطُمْ إِبْرَاهِيمَ، طِ ڢِلِسْتِعٜنْ عُوْنٛ ࢡَاوٛ مَايْدٜ إِبْرَاهِيمَ؞ عٛعٜوْنِ طِ بٜى عِنْطٜ طٜ بَابَ مَاکٛ عِنْدِنّٛ طِ؞ 19سُکَعٜنْ إِسْحَاقَ نغَسِ ࢡُلْندُ ندٜرْ غَارُوٛلْ، ࢡٜتَوِ سٜىٰࢡٛورٜ؞ 20وَيْنَاࢡٜ غٜرَرْ نجٛکِّرِ بٜى ࢡٜ إِسْحَاقَ، ࢡٜمبِعِ‏: «ندِيَمْ طَعَمْ، مِنِنْ مَرِ طَمْ؞» إِسْحَاقَ عِنْدِ ࢡُلْندُ مَاجُمْ عٜسٜکْ#26‏:20 عٜسٜکْ يِطِ وِعْغٛ جٛکِّرْغٛلْ؞، نغَمْ ࢡٜنجٛکِّرْنٛ بٜى مَاکٛ؞ 21ندٜنْ سُکَعٜنْ مَاکٛ نغَسِ ࢡُلْندُ وٛطْندُ، ࢡٜنجٛکِّرِ دٛوْ مَارُ بٛو؞ عٛعِنْدِ ندُ سِتْنَ#26‏:21 سِتْنَ يِطِ وِعْغٛ کٛنَّاغُ؞؞ 22عٛعُمِّ دِغَ تٛنْ، عٛوَسِ ࢡُلْندُ وٛطْندُ ڢَحِنْ، دٛوْ مَارُ کَمْ ࢡٜنجٛکِّرَايْ؞ عٛعِنْدِ ندُ رٜحٛبٛتْ#26‏:22 رٜحٛبٛتْ يِطِ وِعْغٛ بَبَلْ ݠٜىٰشِينغَلْ؞، نغَمْ عٛوِعِ‏: «جٛنْتَ جَوْمِرَاوٛ وَطَنِ عٜنْ بَبَلْ ݠٜىٰشِينغَلْ، نغَمْ عٜنْ ࢡٜسْدٛ ندٜرْ لٜسْدِ؞»

23عٛدِلِّ دِغَ تٛنْ حَا بِيرْسَبَ؞ 24جَوْمِرَاوٛ وَنغَنِمٛ جٜمَّارٜ مَاجُمْ، وِعِ‏: «مِنْ وٛنِ اَللَّه مٛ بَابَ مَ إِبْرَاهِيمَ؞ تَا حُلْ، نغَمْ مِطٛنْ وٛنْدِ بٜى مَ؞ مِبَرْکِطِنْتٜ، مِطُطِّنَنْ دَࢩْغٛلْ مَ نغَمْ دَلِيلَ إِبْرَاهِيمَ جَغِّيطٛ عَمْ؞» 25إِسْحَاقَ مَحِ حِرْسِرْدٜ حَا نٛکُّورٜ مَنْ، عٛعٜوْنِ عِنْدٜ جَوْمِرَاوٛ ندٜرْ دٛعَ؞ عٛدَرْنِ لَيْمَارُ مَاکٛ تٛنْ، سُکَعٜنْ مَاکٛ نغَسِ ࢡُلْندُ وٛطْندُ؞ 26عَبِمٜلٜکْ وَرِ دِغَ غٜرَرْ، نغَمْ لَارُغٛ مٛ؞ عٛوَرْدِ بٜى عَحُسَتْ، سٛوبَاجٛ مَاکٛ عٜ ݠِکٛلْ، حٛورٜىٰجٛ حٛنٛوࢡٜ مَاکٛ#لَاتَانٛوجِ 21‏:22؞؞ 27إِسْحَاقَ ࢨَمِ ࢡٜ‏: «نغَمْ طُمٜ نغَرْطٛنْ لَارُغٛ يَمْ؟ عٛنْ نغَࢩِ يَمْ، عٛنْ ندِيوِ يَمْ دِغَ مٛوطٛنْ؞» 28ࢡٜنجَابِ‏: «مِنْ نغِعِ لَاࢡْطُمْ تَلْ جَوْمِرَاوٛ طٛنْ وٛنْدِ بٜى مَ؞ نغَمْ مَاجُمْ مِنْ مبِعِ سٜيْ حُنَيٜىٰرٜ وَطٜ حَکُّندٜ مٜىٰطٜنْ، وَاتٛ حَکُّندٜ عَمِنْ بٜى مَاطَ؞ مِنْ کَࢡَّ عَلْکَوَلْ بٜى مَاطَ‏: 29حُنَنَ مِنْ عَوَطَتَا مِنْ کَلُّطُمْ، بَنَ مِنِنْ بٛو مِنْ مبَطَنَايْ مَ کَلُّطُمْ، مِنْ مبَطَنِ مَ بٛوطُّمْ تَنْ، مِنْ عَشِّ مَ عَدِلِّ جَمْ؞ جٛنْتَ عَلَاتِمٛ جَوْمِرَاوٛ بَرْکِطِنِ؞» 30إِسْحَاقَ وَطَنِ ࢡٜ ࢩَامْدُوجِ، ࢡٜࢩَامِ، ࢡٜنجَرِ؞ 31ࢡٜندَوِ ڢَجِرِ شُبْ، ࢡٜکُنٛتِرِ؞ ندٜنْ إِسْحَاقَ جَࢡِّتِ ࢡٜ، ࢡٜشٜىٰدِ بٜى مَاکٛ ندٜرْ جَمْ؞ 32ࢩَلَادٜ مَنْ سُکَعٜنْ إِسْحَاقَ نغَرِ، عَنْدِنِمٛ حَالَ ࢡُلْندُ ندُ ࢡٜنغَسِ، ࢡٜمبِعِمٛ‏: «مِنْ نجٛکِّ ندِيَمْ؞» 33عٛعِنْدِ ندُ سَبَ، نغَمْ مَاجُمْ عِنْدٜ وُرٛ نغٛ لَاتِ بِيرْسَبَ#26‏:33لَارْ لَاتَانٛوجِ 21‏:31؞ حَا وَرْغٛ حَنْدٜ؞

رٜوْࢡٜ عِسُوَ جَنَنْࢡٜ

34ندٜ عِسُوَ وَطِ دُوࢡِ شَݠَّنْطٜ نَيِ (40)، عٛتٜعِ يٜحُودِتْ ࢡِي بٜىٰرِ حٜتِيجٛ؞ عٛتٜعِ بٛو بَسْمَتْ ࢡِي عٜلٛنْ حٜتِيجٛ؞ 35ࢡٜمٜتِّنِ إِسْحَاقَ عٜ رٜبٜکَّ مَسِنْ؞

Currently Selected:

لَاتَانٛوجِ 26: داَ

Highlight

Copy