لُکَ 12
12
دٜىٰنْتِنْکِ دِغَ نَاڢِکَارٜ
(مَتَّ 10:26-27)
1وَکَّتِ مَنْ يِمْࢡٜ عُجِنٜىٰجٜ مٛوࢡٛتِرِ حَا ࢡٜطٛنْ نجَاࢡْنجَاࢡْتِرَ؞ عِيسَى ڢُطِّ وٛلْوَنْغٛ ݠُکَرَعٜنْ مُوطُمْ: «کَکِّلَنٜ عُڢْنِرْطُمْ ڢَرِسَعٜنْ، وَاتٛ نَاڢِکَاکُ#مَتَّ 16:6؛ مَرْکُسْ 8:15؞؞ 2شُوطِيطُمْ ڢُو وَنغَنْ، سِرِّيجُمْ ڢُو ڢَامٛتٛ#مَرْکُسْ 4:22؛ لُکَ 8:17؞؞ 3نغَمْ کٛ مبٛلْوُطٛنْ ندٜرْ ࢩِࢡْرٜ ڢُو، طُمْ نَنٜتٜىٰطُمْ ندٜرْ أَلنّٛورَ؞ کٛ عٛنْ شٛڢْندٛتِرِ ندٜرْ شُوطِ، طُمْ نغٛويْنٜتٜىٰطُمْ ندٜرْ بَنغُطُمْ؞»
مٛيْ حَانِ حُلٜىٰغٛ؟
(مَتَّ 10:28-31)
4«مِطٛنْ وِعَ عٛنْ طُمْ، عٛنٛنْ سٛوبِرَاࢡٜ عَمْ: تَا کُلٜ وَاوَنْࢡٜ مبَرُغٛ ࢡَنْدُ، عَمَّا ࢡٜمبَاوَتَا وَطُغٛ کٛو طُمٜ کٛ ࢡُرِ نٛنْ؞ 5مِحٛلَّنْ عٛنْ مٛ کُلٛتٛنْ: کُلٜ مٛ وَاوِ مبَرُغٛ، مٛ وٛودِ بَاوْطٜ سَکِّنْغٛ ندٜرْ يِيتٜ جَحَنَّمَايٜ بٛو؞ نٛنّٛنْ، مِطٛنْ وِعَ عٛنْ، کَنغْکٛ حَانِ حُلٜىٰغٛ؞
6«ࢡٜشٛورَّتَا شٛلّٛيْ نجٛوٛيْ بٜى سُلٜيْجٜ طِطِ نَ؟ عَمَّا اَللَّه يٜجِّتِتَّا کٛو غٛوتٜلْ مَاکٛيْ؞ 7کٛو غَاسَاجِ کٛعٜ مٛوطٛنْ لِمَاطِ ڢُو؞ تَا کُلٜ سَمْ، سَمَنْ مٛوطٛنْ ࢡُرِ شٛلّٛيْ طُوطْکٛيْ؞»
سٜىٰدَاغٛ عِيسَى
(مَتَّ 10:32-33؛ 12:32؛ 10:19-20)
8«مِطٛنْ وِعَ عٛنْ، کٛو مٛيْ سٜىٰدِ يٜىٰسٛ يِمْࢡٜ عٛعَنْدِ يَمْ، ࢡِي-نٜطّٛ بٛو سٜىٰدٛتٛ عٛعَنْدِمٛ يٜىٰسٛ مَلَاعِکَعٜنْ اَللَّه؞ 9عَمَّا مٛ يٜدِّ يَمْ يٜىٰسٛ يِمْࢡٜ، عٛ غٜدّٜتٜىٰطٛ بٛو يٜىٰسٛ مَلَاعِکَعٜنْ اَللَّه؞
10«کٛو مٛيْ وٛلْوِ کَلُّکَ دٛوْ ࢡِي-نٜطّٛ، حٜࢡَنْ يَاڢُيٜ؞ عَمَّا مٛ وٛلْوِ کَلُّکَ دٛوْ رُوحُ شٜنِيطٛ، عٛيَاڢَتَاکٜ سَمْ#مَتَّ 12:32؛ مَرْکُسْ 3:29؞؞
11«تٛ ࢡٜنجَحْرِ عٛنْ حِيتٜىٰغٛ ندٜرْ شُوطِ دٜوَلْ يَحُودُعٜنْ مَلَّ يٜىٰسٛ لَامِيࢡٜ عٜ مَرْࢡٜ بَاوْطٜ، تَا ࢡِلّٛرٜ نُمُغٛ نٛ مبَنغِنِرْتٛنْ حُجَّ مٛنْ مَلَّ کٛ مبِعٛتٛنْ؞ 12نغَمْ رُوحُ شٜنِيطٛ عٜکِّتِنَنْ عٛنْ کٛ مبِعٛتٛنْ ندٜرْ سَاعِيرٜ مَنْ#مَتَّ 10:19-20؛ مَرْکُسْ 13:11؛ لُکَ 21:14-15؞؞»
بَلْندٛلْ دِسْکُطٛ سٛويَ-حَکِّيلٛوجٛ
13غٛطّٛ ندٜرْ مٛوࢡْرٜ وِعِ عِيسَى: «مٛودِبّٛ، وِعْ دٜىٰرْطِرَاوٛ عَمْ سٜنْدَنَ مِنْ ندٛنْنغُ نغُ بَابَ عَمِنْ عَشِّ؞» 14عِيسَى وِعِمٛ: «حٜيْ عَنْ! مٛيْ وَطِ يَمْ کِيتٛووٛ دٛوْ مٛوطٛنْ مَلَّ شٜنْدٛووٛ جَوْدِ مٛنْ؟» 15ندٜنْ عٛوِعِ ࢡٜ: «ندٜىٰنْتٜ عٜ سُونٛوجِ کٛو طِيٜ، نغَمْ نغٜىٰندَمْ نٜطّٛ عِوَتَا حَا جَوْدِ مُمْ، کٛو نٛ عٛرِسْکِرِ ڢُو؞» 16عٛوٛلْوَنِ ࢡٜبَلْنْدٛلْ نغٛعٛلْ: «وٛودِ غٛطّٛ دِسْکُطٛ، عٛوٛودِ غٜسٜ، طٜ مبَطَنِمٛ ࢨَامْندٜ طُوطْندٜ؞ 17عٛنُمِ ندٜرْ ࢡٜرْندٜ مَاکٛ: کٛ مبَطَنْمِ؟ نغَمْ مِوَلَا بَبَلْ حَا مٛوࢡْتَنْمِ ࢨَامْندٜ عَمْ؞ 18عٛوِعِ: يٛوَّ، ندَا کٛ مبَطَنْمِ: مِڢُسَنْ بٜىٰمبٜ عَمْ، مِمَحَ ࢡُرْطٜ مَوْنُغٛ، مِمٛوࢡْتَ عَلْکَمَارِ عٜ جَوْدِ عَمْ ڢُو حَا تٛنْ؞ 19ندٜنْ مِوِعَنَ يٛنغْکِ عَمْ: عَوٛودِ جَوْدِ طُوطْندِ سِغَاندِ، حٜعَنْدِ نغَمْ دُوࢡِ طُوطِّ! سِوْتَ، ࢩَامْ، يَرْ، سٜيَ! 20عَمَّا اَللَّه وِعِمٛ: سٛويَ-حَکِّيلٛوجٛ، جٜمَّارٜ ندٜعٜ مِحٛوسَنْ يٛنغْکِ مَ، کُوجٜ مَاطَ مٛوࢡْتَاطٜ طٜعٜ ڢُو، مٛيْ مَرَتَ طٜ؟ 21بَنَ نِي طُمْ لَاتَنْتٛ مٛ مٛوࢡْتَنِ حٛورٜ مُمْ جَوْدِ، مٛ لَاتَاکِ دِسْکُطٛ يٜىٰسٛ اَللَّه؞»
حٛولَاغٛ اَللَّه
(مَتَّ 6:25-34)
22ࢡَاوٛطٛنْ عِيسَى وِعِ ݠُکَرَعٜنْ مُوطُمْ: «نغَمْ مَاجُمْ مِطٛنْ وِعَ عٛنْ: تَا شَکْلَنٜ نغُورٜ مٛوطٛنْ، وَاتٛ کٛ عٛنْ ࢩَامَتَ مَلَّ کٛ عٛنْ ࢡٛرْنٛتٛ؞ 23نغَمْ يٛنغْکِ ࢡُرِ ࢩَامْدُ سَمَنْ، ࢡَنْدُ بٛو ࢡُرِ لِمْشٜ سَمَنْ؞ 24ندَارٜ لٜىٰکُوجٜ: طٜ عَاوَتَا، طٜ شٛدَتَا، طٜ مٛوࢡْتَتَا کٛو طُمٜ ندٜرْ شِغٛرْطُمْ مَلَّ بٜىٰمبَلْ، عَمَّا اَللَّه طٛنْ ࢩَامْنَ طٜ؞ عٛنْ ࢡُرَتَا شٛلِّ سَمَنْ ݠِوْ نَ؟ 25مٛيْ شَکَ مٛوطٛنْ وَاوِ ࢡٜسْدُغٛ بَلْطٜ مُوطُمْ کٛو سٜطَّ بٜى سَکْلٜرٜ مُوطُمْ؟ 26ندٜ عٛنْ مبَاوَتَا وَطُغٛ کٛو ݠٜىٰتُمْ، نغَمْ طُمٜ شُکْلَنْتٛوطٛنْ لُتُّطُمْ؟ 27ندَارٜ ݠِنْدِ لَدّٜ نٛ ندِ مَوْنِرْتَ؞ ندِ حُووَتَا، ندِ سَنْࢩَتَا، عَمَّا مِطٛنْ وِعَ عٛنْ: کٛو سُلَيْمَـٰنُ بٜى دَرَجَ مُوطُمْ ڢُو مٜىٰطَايْ ࢡٛرْنَاغٛ لِمْشٜ بٛوطّٜ بَنَ نغٛورِ مَنْ#1 لَامِيࢡٜ 10:4-7؛ 2 حَبَرُوجِ ࢩَلَاطٜ 9:3-6؞؞ 28اَللَّه ࢡٛرْنِ حُطٛوجِ طِ تَوٜ حَنْدٜ ندٜرْ لَدّٜ، جَنغٛ بٛو طِ شَکِّنٜ ندٜرْ يِيتٜ؞ تٛ نٛنْ کَمْ، عٛࢡٛرْنَتَا عٛنْ کٛ ࢡُرِ نٛنْ نَ، عٛنٛنْ ڢَمْطَ-نُطِّنْکِعٜنْ؟ 29تَا ࢡِلّٛرٜ کٛ ࢩَامٛتٛنْ مَلَّ کٛ نجَرٛتٛنْ؞ تَا شَکْلٜ کٛعٜ مٛوطٛنْ؞ 30حٜىٰڢٜىٰرْࢡٜ دُنِيَارُ شُکْلَنْتٛ کُوجٜ طٜعٜ ندٜ وٜىٰتِ ڢُو؞ عَمَّا بَابِرَاوٛ مٛوطٛنْ عَنْدِ عٛنْ نغٛودِ حَاجٜ کُوجٜ طٜعٜ؞ 31عَارْتٜ سُکْلَنَاغٛ لَامُ مَاکٛ، ندٜنْ عٛحٛکَّنْ عٛنْ کُوجٜ طٜعٜ ڢُو بَنَ ࢡٜسْدَارِ؞»
سِغَ حَا عَسَمَ
(مَتَّ 6:19-21)
32«تَا کُلْتٛرٜ، عٛنٛنْ تٛکّٜرٜ ڢَمَرْدٜ، نغَمْ بَابِرَاوٛ يِطِ حٛکُّغٛ عٛنْ لَامُ مُوطُمْ؞ 33شٛورّٜ کٛ مَرْطٛنْ، شَاحٜ طُمْ تَلَکَعٜنْ، مبَطَنٜ کٛعٜ مٛوطٛنْ بٛورٛوجِ سِغَاغٛ شٜىٰدٜ طِ مبٛنَّتَاکٛ عٜ جَوْدِ ندِ رٜعَتَا حَا عَسَمَ: حَا تٛنْ غُجّٛ ࢡَدَتَاکٛ، غِلْطِ بٛو مبٛنَّتَا طُمْ؞ 34نغَمْ حَا جَوْدِ مٛوطٛنْ وٛنِ، تٛنْ ࢡٜرْطٜ مٛوطٛنْ بٛو نغٛنَتَ؞»
سُکَعٜنْ رٜىٰنْࢡٜ جَاغٛرْطٛ
35«تَاسْکِتِنٜ کٛعٜ مٛنْ، ݠِتِّرْلَاجِ مٛوطٛنْ بٛو جَمْنَاطِ#مَتَّ 25:1-13؞؞ 36لَاتٜ بَنَ يِمْࢡٜ رٜىٰنَنْࢡٜ جَاغٛرْطٛ مُوطُمْعٜنْ غَرْتَنْطٛ دِغَ ࢡَنغَلْ، نغَمْ ࢡٜمَࢡِّتَنَ مٛ تٛ عٛيٛتَّکٜ، عٛتَݠِّ دَمُّغَلْ#مَرْکُسْ 13:34-36؞؞ 37بَرْکَ لَاتَنٛ سُکَعٜنْ ࢡٜ جَاغٛرْطٛ مُمْعٜنْ يَاکٜ وَرْتَتَ، تَوَ طٛنْ عَيْنَ؞ غٛونغَ مبِعَنْمِ عٛنْ، عٛتَادٛتٛ، عٛجٛعِّنَنْ ࢡٜ حَا تَابَلْ ࢩَامْدُ، عٛࢡَدِتَنْ ࢡٜ، عٛحُووَنَنْ ࢡٜ؞ 38بَرْکَ لَاتَنٛ سُکَعٜنْ ࢡٜعٜ، کٛو تٛ عٛوَرْتِ شَکَ جٜمَّ مَلَّ سَالِ سٜطَّ، عٛتَوِ ࢡٜ ࢡٜ طٛنْ عَيْنَ؞ 39ݠَامٜ بٛوطُّمْ: تٛ جَوْمُ سَارٜ عَنْدِنٛ سَاعِيرٜ ندٜيٜ غُجّٛ وَرَتَ، عٛعَشَّتَانٛ غُجّٛ نَسْتَ مٛ سَارٜ؞ 40عٛنٛنْ بٛو، لَاتٜ تَاسْکِيࢡٜ، نغَمْ ࢡِي-نٜطّٛ وَرَنْ ندٜرْ سَاعِيرٜ ندٜ عٛنْ تَمَّاکِ سَمْ#مَتَّ 24:43-44؞؞»
کُووٛووٛ غٛونغَاجٛ عٜ کُووٛووٛ کَلُّطٛ
(مَتَّ 24:45-51)
41ݠِيٜرْ وِعِمٛ: «جَوْمِرَاوٛ، مِنِنْ تَنْ مبٛلْوَنْطَ بَلْندٛلْ نغٛعٛلْ نَ مَلَّ يِمْࢡٜ ڢُو؟» 42جَوْمِرَاوٛ جَابِ: «مٛيْ وٛنِ کَلِيڢَاجٛ کٛولَاطٛ، کَکِّلْطٛ، مٛ جَاغٛرْطٛ مُمْ تَمِّ دَرْنُغٛ دٛوْ حُووٛوࢡٜ مُمْ، نغَمْ عٛحٛکَّ ࢡٜ غٜطَلْ ࢩَامْدُ مَࢡّٜ ندٜرْ وَکَّتِ مَنْ؟ 43بَرْکَ لَاتَنْتٛ کُووٛووٛ عٛو، تٛ جَاغٛرْطٛ مَاکٛ وَرْتِ، تَوْتِمٛ عٛطٛنْ سُکْلَنِ کُوغَلْ نغَعَلْ؞ 44غٛونغَ مبِعَنْمِ عٛنْ: جَاغٛرْطٛ دَرْنَنْ مٛ دٛوْ جَوْدِ مُوطُمْ ڢُو؞ 45عَمَّا تٛ کُووٛووٛ مَنْ وِعِ ندٜرْ ࢡٜرْندٜ مُوطُمْ: جَاغٛرْطٛ عَمْ نٜىٰࢡِ وَرْتُغٛ، ندٜنْ عٛڢُطِّ ڢِيُغٛ حُووٛوࢡٜ وٛطْࢡٜ، وٛرْࢡٜ عٜ رٜوْࢡٜ، عٛطٛنْ ࢩَامَ، طٛنْ يَرَ عٜ وُيْکَ، 46جَاغٛرْطٛ وَرْتٛيَنْ ࢩَلَادٜ ندٜ سُکَ عٛو تَمَّتَاکٛ عٜ ندٜرْ سَاعِيرٜ ندٜ عٛعَنْدَا؞ عٛرِيوَنْ مٛ، عٛحٛکَّنْ مٛ نغٜىٰنَارِ نَاڢِکِعٜنْ؞
47«کُووٛووٛ عَنْدُطٛ کٛ جَاغٛرْطٛ مُمْ يِطِ، عَمَّا تَاسْکِتِنَايْ کٛو طُمٜ کٛ جَاغٛرْطٛ مَاکٛ يِطِ، عٛحٜࢡَنْ ݠِيْطٜ طُوطّٜ؞ 48عَمَّا مٛ عَنْدَا کٛ جَاغٛرْطٛ مُمْ يِطِ، وَطِ کٛ حٜعِ ڢِيٜىٰغٛ، عٛحٜࢡَنْ ݠِيْطٜ سٜطَّ نٛنْ؞ مٛ ࢡٜندٛکِّ طُوطُّمْ، ࢡٜࢨَمَنْ مٛ طُوطُّمْ بٛو؞ مٛ ࢡٜکَلْڢِنِ طُوطُّمْ، ࢡٜࢨَمَنْ مٛ کٛ ࢡُرِ طُوطُغٛ؞»
عِيسَى وٛنِ دَلِيلَ شٜنْدُکِ
(مَتَّ 10:34-36)
49«مِوَرِ نغَمْ سَکِّنْغٛ يِيتٜ دٛوْ لٜسْدِ؞ مِيِطِنٛ نغٜ حُࢡّٜ جٛنْتَ! 50وٛودِ بَݠْتِسْمَ کَ نجَࢡَنْمِ، مِࢡِلِّ حَا طُمْ حٜبِّتِنٜ#مَرْکُسْ 10:38؞؞ 51عٛنْ تَمِّ مِوَرِ نغَمْ وَدُّغٛ سَلَامَنْ دٛوْ لٜسْدِ نَ؟ مِطٛنْ وِعَ عٛنْ، نَا سَلَامَنْ، عَمَّا شٜنْدُکِ؞ 52نغَمْ يٜىٰسٛ طٛ، يِمْࢡٜ نجٛوٛ ندٜرْ سَارٜ وٛورٜ شٜنْدٛتٛ: تَتٛ نَرَّتَا بٜى طِطٛ، طِطٛ بٛو نَرَّتَا بٜى تَتٛ؞ 53بَابَ وَادَنْ بٜى ࢡِيُمْ، ࢡِطّٛ غٛرْکٛ بٛو بٜى بَابَ مُمْ؞ دَادَ وَادَنْ بٜى ࢡِيُمْ دٜبّٛ، ࢡِطّٛ دٜبّٛ بٛو بٜى دَادَ مُمْ؞ عٜسِرَاوٛ دٜبّٛ بٛو وَادَنْ بٜى عٜسُمْ دٜبّٛ#مِکَ 7:6؞؞»
ڢَسِّتِرْغٛ عَلَامَ عَسَمَ
(مَتَّ 16:2-3)
54عِيسَى وِعِ مٛوࢡْرٜ ڢَحِنْ: «تٛ عٛنْ نغِعِ رُولْدٜرٜ عُمَّکٜ حَا حِيرْنَانغٜ، لَوْ عٛنْ طٛنْ مبِعَ عِيٜىٰندٜ تٛࢡَنْ، طُمْ وَطَنْ بٛو؞ 55تٛ عٛنْ نغِعِ حٜنْدُ عِوِ ڢٛمْبِنَ بٛو، عٛنْ طٛنْ مبِعَ: غُلْطُمْ وَطَنْ، طُمْ وَطَنْ بٛو؞ 56نَاڢِکِعٜنْ! عٛنْ عَنْدِ ڢَسِّتِرْغٛ کٛ لَاتٛتٛ دٛوْ لٜسْدِ عٜ کٛ لَاتٛتٛ حَا دٛوْ، نغَمْ طُمٜ عٛنْ عَنْدَا ڢَسِّتِرْغٛ زَمَنُورُ جٛنْتَارُ ندُعُ؟»
نَرُّ بٜى مٛ نجٛکِّرْطَ
(مَتَّ 5:25-26)
57«نغَمْ طُمٜ عٛنْ کٜࢡْتَنْتَا کٛعٜ مٛنْ کٛ حَانِ وَطُغٛ؟ 58تٛ عَطٛنْ يَحْدَ بٜى مٛ نجٛکِّرْطَ حَا ݠٜلّٜلْ کِيتَ، حَࢡْدُ نَرُّغٛ بٜى مَاکٛ دِغَ لَاوٛلْ، نغَمْ تَا عٛيَحْرٜ حَا کِيتٛووٛ، ندٜنْ کِيتٛووٛ حٛکّٜ حَا سٛوجٜعٜنْ عٜ سٛوجٜعٜنْ بٛو نَسْتِنٜ ڢُرْسِنَ#12:58 ڢُرْسِنَ مَلَّ يَنغَدَ؞؞ 59مِطٛنْ وِعٜ: عَوُرْتَتَاکٛ تٛنْ سَمْ، سٛنَا تٛ عَيٛࢡِ کٛ ࢡٜکِيتِ مَ ڢُو؞»
Currently Selected:
لُکَ 12: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.
