لُکَ 2
2
دَࢩٜىٰکِ عِيسَى
(مَتَّ 1:18-25)
1ندٜرْ سَاعِ مَنْ لَامِيطٛ عَغُسْتُسْ، عُمْرِ بِنْدٛلْ يِمْࢡٜ ندٜرْ لٜسْطٜ مَرَلْ مَاکٛ ڢُو؞ 2کَنغٛلْ وٛنِ بِنْدٛلْ عَرَنٛلْ، نغٛلْ وَطِ يَاکٜ کِرِنِيُسْ طٛنّٛ نغٛمْنَ لٜسْدِ سِرِيَ؞ 3يِمْࢡٜ نجٜحِ نغَمْ وِنْدٜىٰغٛ، کٛو مٛيْ ڢُو حَا وُرٛ عِوْدٜ مُوطُمْ؞
4يُوسُڢُ عُمِّ وُرٛ نَسَرَتُ ندٜرْ لٜسْدِ غَلِيلِ، يٜحِ ندٜرْ لٜسْدِ يَحُدِيَ، حَا بَيْتِلَامَ، وُرٛ لَامِيطٛ دَاوُدَ دَࢩَنٛ، نغَمْ عٛعِوِ حَا عَسْنغٛلْ دَاوُدَ؞ 5عٛيٜحِ تٛنْ نغَمْ وِنْدٜىٰغٛ، کَنغْکٛ عٜ مَرِيَمَ، کَࢡَّنَاطٛ مَاکٛ، رٜىٰدُوجٛ؞ 6يَاکٜ ࢡٜطٛنْ تٛنْ، ࢩَلَادٜ حَا مَرِيَمَ ࢡٜسْنَ يٛتِّ؞ 7عٛدَࢩِ ࢡِنغٜلْ غٛرْغٜلْ، عَڢٜلْ مَاکٛ، عٛسَاوِ نغٜلْ ندٜرْ لِمْشٜ، عٛوَلِّنِ نغٜلْ ندٜرْ ࢩَامْنِرْدٜ دَبَّاجِ، نغَمْ ࢡٜکٜࢡَايْ نٛکُّورٜ ندٜرْ سَارٜ حَا حٛطْࢡٜ مبٜىٰرَتَ؞
مَلَاعِکَاجٛ وَنغَنِ وَيْنَاࢡٜ
8وٛودِنٛ وَيْنَاࢡٜ حَا لَدّٜ ندٜرْ لٜسْدِ مَاجُمْ، ࢡٜطٛنْ عَيْنَ تٛکّٜ دَمّٛوجِ مَࢡّٜ جٜمَّ؞ 9مَلَاعِکَاجٛ جَوْمِرَاوٛ وَنغَنِ ࢡٜ، تٜدُّنغَلْ جَوْمِرَاوٛ يَيْنِ دٛوْ مَࢡّٜ، ࢡٜکُلْتٛرِ مَسِنْ؞ 10عَمَّا مَلَاعِکَاجٛ وِعِ ࢡٜ: «تَا کُلْتٛرٜ! نغَمْ مِوَدَّنِ عٛنْ کُبَرُوٛلْ بٜلْنغٛلْ، شٜيْنَنْنغٛلْ مَسِنْ نغَمْ عُمَّاتٛورٜ ڢُو؞ 11جٜمَّارٜ حَنْدٜىٰرٜ ندٜعٜ، کِسْنٛووٛ دَࢩَنَامَ عٛنْ ندٜرْ وُرٛ دَاوُدَ، کَنغْکٛ وٛنِ اَلْمَسِيحُ، جَوْمِرَاوٛ؞ 12ندَا، عٛنْ کٜࢡْتِرَنْ مٛ بٜى عَلَامَ کَعَ: عٛنْ تَوَنْ ࢡِنغٜلْ شَاوَانغٜلْ بٜى لِمْشٜ، بَلِّنَانغٜلْ ندٜرْ ࢩَامْنِرْدٜ دَبَّاجِ؞»
13لَوْ، مٛوࢡْرٜ مَلَاعِکَعٜنْ عَسَمَ کَوْتِ بٜى مَلَاعِکَاجٛ غٛ، ࢡٜتٜدِّنِ اَللَّه، ࢡٜمبِعِ:
14«تٜدُّنغَلْ حَا اَللَّه تٛوْطٛ دٛوْ عَسَمَنْجِ،
سَلَامَنْ بٛو دٛوْ لٜسْدِ حَا يِمْࢡٜ يِطَاࢡٜ اَللَّه!»
وَيْنَاࢡٜ نجٜحِ بَيْتِلَامَ
15ندٜ مَلَاعِکَعٜنْ عَشِّ ࢡٜ، لٛرْتِ حَا عَسَمَ، وَيْنَاࢡٜ مبِعْمبِعْتِرِ حَکُّندٜ مُوطُمْعٜنْ: «ندِلّٜنْ حَا عٜنْ نجٛتّٛ بَيْتِلَامَ، عٜنْ ندَارَ کٛ جَوْمِرَاوٛ عَنْدِنِ عٜنْ غٛ؞» 16ࢡٜنجَاوِ يَحُغٛ تٛنْ، ࢡٜتَوِ مَرِيَمَ بٜى يُوسُڢُ عٜ ࢡِنغٜلْ کٜشّٜلْ، نغٜلْ طٛنْ وَالِ ندٜرْ ࢩَامْنِرْدٜ دَبَّاجِ؞ 17ندٜ ࢡٜنغِعِ نغٜلْ، ࢡٜنغٜشِّ کٛ مَلَاعِکَاجٛ وِعْنٛ ࢡٜ دٛوْ مَاغٜلْ؞ 18نَنْࢡٜ کٛ وَيْنَاࢡٜ مبِعِ ڢُو، کَيْطِنِ؞ 19عَمَّا مَرِيَمَ جٛغِ طُمْ ڢُو ندٜرْ ࢡٜرْندٜ مُوطُمْ، عٛتٛکِّ نُمْتُغٛ طُمْ؞ 20ندٜنْ وَيْنَاࢡٜ لٛرِ، ࢡٜطٛنْ تٜدِّنَ اَللَّه، ࢡٜطٛنْ مَنغْتَ مٛ نغَمْ کُوجٜ طٜ ࢡٜنَنِ عٜ ࢡٜنغِعِ ڢُو، نغَمْ طُمْ ڢُو طُمْ لَاتِ بَنَ مَلَاعِکَاجٛ عَنْدِنّٛ ࢡٜ؞
ࢡٜنجُولْنِ عِيسَى، ࢡٜنجَحْرِمٛ حَا حَيْکَلِيرُ
21ندٜ ࢩَلْطٜ جٛوٜىٰتَتِ شَالِ، ࢡٜنجُولْنِ#2:21 نجُولْنِ مَلَّ ندٜمْنِ؞ ࢡِنغٜلْ، ࢡٜعِنْدِ نغٜلْ عِيسَى؞ عِنْدٜ ندٜ مَلَاعِکَاجٛ وِعْنٛ دَادَ مَاغٜلْ دِغَ عٛسِوَا رٜىٰدُغٛ#ڢَرِلَّاجِ لٜوِعٜنْ 12:3؛ لُکَ 1:31؞؞
22ندٜ وَکَّتِ لَࢡِّنْکِ#2:22 وَکَّتِ لَࢡِّنْکِ طُمْ ࢩَلْطٜ شَݠَّنْطٜ نَيِ ࢡَاوٛ دَࢩٜىٰکِ ࢡِنغٜلْ؞ مَرِيَمَ ڢٛدّٜ تَوْرٜىٰتَ مُوسَى حِࢡِّ، سَارٛعٜنْ نجَحْرِ ࢡِنغٜلْ حَا عُرُسَلِيمَ، نغَمْ ࢡٜنغَدَّ نغٜلْ يٜىٰسٛ جَوْمِرَاوٛ ندٜرْ حَيْکَلِيرُ؞ 23نغَمْ تَوْرٜىٰتَ جَوْمِرَاوٛ وِعِ: «ࢡِطّٛ غٛرْکٛ عَڢٛ ڢُو، جَوْمِرَاوٛ جٜيِ#غُرْتَاکِ 13:2،12؞؞» 24ࢡٜنغَرِ بٛو نغَمْ ࢡٜلِيعٛ کِرْسٜتٜىٰطُمْ بَنَ جَوْمِرَاوٛ عُمْرِ: «ݠٛولِ مَسَرْ طِطِ مَلَّ ݠٛولٛيْ طِطٛيْ#ڢَرِلَّاجِ لٜوِعٜنْ 12:6-8؞؞»
25وٛودِنٛ غٛطّٛ ڢٜىٰرٜ تٛنْ، عِنْدٜ مَاکٛ سِمٜيٛنْ، عٛ عَدِلِيجٛ عٜ کُلْطٛ اَللَّه، عٛطٛنّٛ رٜىٰنَ کِسْنٛووٛ إِسْرَاءِيلَ غَرَنْطٛ؞ رُوحُ شٜنِيطٛ طٛنْ وٛنْدِ بٜى مَاکٛ، 26عَنْدِنِمٛ عٛمَايَتَا، سٜيْ تٛ عٛيِعِ اَلْمَسِيحُ نٜلَاطٛ جَوْمِرَاوٛ؞ 27رُوحُ يٜرْࢡِمٛ، عٛيٜحِ ندٜرْ حَيْکَلِيرُ؞ سَاعِ مَاجُمْ سَارٛعٜنْ عِيسَى نغَدِّ ࢡِنغٜلْ مُوطُمْعٜنْ نغَمْ ࢡٜمبَطَنَ نغٜلْ کٛ تَوْرٜىٰتَ عُمْرِ؞ 28سِمٜيٛنْ حٛوعِ نغٜلْ حَا جُوطٜ مُوطُمْ، عٛيٜتِّ اَللَّه عٜ عٛوِعِ:
29«جٛنْتَ يَا جَوْمِرَاوٛ، عَحٜبِّتِنِ عِينَوٛلْ نغٛلْ عَوَطِ؞
عَشُّ مَشُّطٛ مَاطَ مَايَ ندٜرْ سَلَامَنْ؞
30نغَمْ مِيِعِ کِسْندَمْ مَاطَ بٜى غِتٜ عَمْ،
31کِسْندَمْ طَمْ عَتَاسْکِتِنَنِ عُمَّاتٛوجٜ ڢُو؞
32کَنْجُمْ وٛنِ أَلنّٛورَ کَ وَنغِنْتٜ حَا عُمَّاتٛوجٜ غٛطّٜ،
کَنغْکَ لَاتٛتٛ بٛو تٜدُّنغَلْ عُمَّاتٛورٜ مَاطَ إِسْرَاءِيلَ#عٜسَايَ 42:6؛ 52:10؞؞»
عَنَّبَاکُ سِمٜيٛنْ
33بَابَ عٜ دَادَ عِيسَى کَيْطِنِ ندٜ ࢡٜنَنِ سِمٜيٛنْ طٛنْ وٛلْوَ دٛوْ مَاکٛ بَنَ نٛنْ؞ 34سِمٜيٛنْ بَرْکِطِنِ ࢡٜ عٜ عٛوِعِ مَرِيَمَ، دَادَ عِيسَى: «اَللَّه سُࢡِ ࢡِنغٜلْ نغٜعٜلْ نغَمْ لَاتَاغٛ دَلِيلَ دٛعُّکِ عٜ عُمُّکِ يِمْࢡٜ طُوطْࢡٜ ندٜرْ إِسْرَاءِيلَ، عٛلَاتٛتٛ عَلَامَ اَللَّه کَ يِمْࢡٜ تَمَّايْ جَࢡُغٛ؞ 35عٛوَنغِنَنْ نُمٛوجِ يِمْࢡٜ شُوطِيطِ؞ عَنْ بٜى حٛورٜ مَاطَ بٛو، نَاوٛرْلَ تُڢٜتٜ ࢡٜرْندٜ بَنَ کَاڢَحِ!»
عَنَّ، اَلنَّبِيجٛ دٜبّٛ
36وٛودِنٛ اَلنَّبِيجٛ دٜبّٛ، عِنْدٜ مَاکٛ عَنَّ، ࢡِي ڢَنُوٜلْ، مٛ لٜࢩٛلْ عَسٜرْ؞ عٛ نَيْوِ مَسِنْ؞ عٛجٛوطِنٛ دُوࢡِ جٛوٜىٰطِطِ تَنْ بٜى غٛرِيکٛ يَاکٜ عٛ دٜرْکٜىٰجٛنٛ؞ 37عٛجٛوطِ عٛجُرُمْطٛ حَا دُوࢡِ مَاکٛ مبَطِ شَݠَّنْطٜ جٛوٜىٰتَتِ عٜ نَيِ؞ عٛطٛنْ حَا حَيْکَلِيرُ تُمْ، عٛطٛنْ جَغَّنٛ اَللَّه جٜمَّ عٜ نَانغٜ ڢُو، عٛطٛنْ سُومٛ، عٛطٛنْ وَطَ دٛعَ؞ 38عٛوَرِ وَکَّتِ مَنْ، عٛڢُطِّ يٜتُّغٛ اَللَّه؞ عٛوٛلْوِ دٛوْ ࢡِنغٜلْ نغٜعٜلْ حَا يِمْࢡٜ رٜىٰنَنْࢡٜ ندِمُ عُرُسَلِيمَ ڢُو؞
لٛرَاکِ حَا نَسَرَتُ
39ندٜ سَارٛعٜنْ عِيسَى تِمِّنِ وَطُغٛ کٛ تَوْرٜىٰتَ جَوْمِرَاوٛ عُمْرِ، ࢡٜکٛوتِ بٜى مَاکٛ حَا لٜسْدِ غَلِيلِ، حَا نَسَرَتُ بٜرْنِوٛلْ مَࢡّٜ#مَتَّ 2:23؞؞ 40ࢡِنغٜلْ تٛکِّ مَوْنُغٛ عٜ سٜمْبِطِطْغٛ، نغٜلْ حٜىٰوِ ڢَامُ؞ نغٜلْ حٜࢡِ يٜرْدُيٜ اَللَّه؞
عِيسَى ندٜرْ حَيْکَلِيرُ
41حِتَاندٜ ڢُو سَارٛعٜنْ عِيسَى طٛنْ نجَحَ عُرُسَلِيمَ نغَمْ وَطُغٛ جُولْدٜ ݠَسْکَ#غُرْتَاکِ 12:1-27؛ تٛوکْتَاکِ تَوْرٜىٰتَ 16:1-8؞؞ 42ندٜ عِيسَى وَطِ دُوࢡِ سَݠّٛ عٜ طِطِ، ࢡٜنجٜحِ تٛنْ ڢٛدّٜ عَلْعَادَ؞ 43ندٜ جُولْدٜ تِمِّ، ࢡٜکٛوتِ، عَمَّا عِيسَى لُتِّ حَا عُرُسَلِيمَ، سَارٛعٜنْ مَاکٛ کَتِّتَاکِ طُمْ؞ 44ࢡٜتَمِّنٛ عٛطٛنْ وٛنْدِ بٜى يَحْدَنْࢡٜ بٜى مَࢡّٜ؞ ࢡٜنجٜحِ بَاکِنْ ࢩَلَادٜ وٛورٜ، ندٜنْ ࢡٜݠُطِّ طَࢡِّتِتْغٛ مٛ شَکَ بَنْدِرَاࢡٜ مَࢡّٜ عٜ سٛوبِرَاࢡٜ مَࢡّٜ؞ 45عَمَّا ࢡٜکٜࢡْتَايْ مٛ، نغَمْ مَاجُمْ ࢡٜلٛرِ حَا عُرُسَلِيمَ نغَمْ طَࢡِّتٛيْغٛ مٛ؞ 46ࢩَنْدٜ تَتَࢡْرٜ مَاجُمْ، ࢡٜتَوِمٛ ندٜرْ حَيْکَلِيرُ؞ عٛطٛنْ جٛوطِ شَکَ مٛودِࢡّٜ يَحُودُعٜنْ، عٛطٛنْ نَنَ ࢡٜ عٜ عٛطٛنْ وَطَنَ ࢡٜ ࢨَمْطٜ؞ 47نَنٛوࢡٜ مٛ ڢُو کَيْطِنِ دَلِيلَ ڢَامُ مَاکٛ عٜ جَاوَابُوجِ طِ عٛجَابٛرِ؞ 48ندٜ سَارٛعٜنْ مَاکٛ نغِعِمٛ، ࢡٜکَيْطِنِ مَسِنْ؞ دَادَ مَاکٛ وِعِمٛ: «ࢡِنغٜلْ عَمْ، نغَمْ طُمٜ نغَطَّ مِنْ بَنَ نِي؟ مِنْ بٜى بَابَ مَاطَ ڢُو، مِنْ شَکْلِ مَسِنْ بٜى طَࢡِّتِتْغٛ مَ!» 49عٛجَابِ ࢡٜ، عٛوِعِ: «نغَمْ طُمٜ طَࢡِّتِتّٛنْ يَمْ؟ عٛنْ عَنْدَا سٜيْ مِوٛنَ ندٜرْ سُودُ بَابِرَاوٛ عَمْ نَ؟» 50عَمَّا ࢡٜݠَامَايْ کٛ عٛوِعِ ࢡٜ؞
51ندٜنْ عِيسَى حٛوتِ بٜى مَࢡّٜ حَا نَسَرَتُ، عٛطٛوْتَنِ ࢡٜ؞ دَادَ مَاکٛ تٛکِّ جٛغَاغٛ کُوجٜ طٜعٜ ڢُو ندٜرْ ࢡٜرْندٜ مُوطُمْ؞ 52عِيسَى طٛنْ مَوْنَ، ڢَامُ مَاکٛ يٜحِ يٜىٰسٛ يٜىٰسٛ، عٛحٜࢡِ يٜرْدُيٜ اَللَّه عٜ ندٜ يِمْࢡٜ ڢُو#1 سَمُيِلَ 2:26؛ بَلْندِ 3:4؞؞
Currently Selected:
لُکَ 2: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.
