لُکَ 7
7
عِيسَى يَمْطِتِنِ سُکَ مَوْطٛ سٛوجٜعٜنْ
(مَتَّ 8:5-13)
1ندٜ عِيسَى تِمِّنِ وٛلْوَنْغٛ مٛوࢡْرٜ بٛلّٜ طٜعٜ، عٛدِلِّ کَڢَرْنَحُمْ؞ 2وٛودِ تٛنْ رٛمَاجٛ، مَوْطٛ دٛوْ سٛوجٜعٜنْ تٜىٰمٜرّٜ، مٛ سُکَ مُمْ غِطَاطٛ ࢩَوِ، ࢡَدَکٜ مَايُغٛ؞ 3ندٜ مَوْطٛ سٛوجٜعٜنْ عٛو نَنِ حَبَرُ عِيسَى، عٛنٜلِ ندٛتِّعٜنْ يَحُودُعٜنْ حَا مَاکٛ نغَمْ تٛرَاغٛ مٛ عٛوَرَ عٛيَمْطِتِنَ سُکَ مَاکٛ؞ 4ࢡٜنغَرِ حَا عِيسَى، ࢡٜتٛرِمٛ طُوطُّمْ، ࢡٜمبِعِ: «غٛطّٛ عٛو، حَانِ عَوَلَّ مٛ، 5نغَمْ عٛيِطِ عُمَّاتٛورٜ مٜىٰطٜنْ، کَنغْکٛ مَحَنِ مِنْ سُودُ دٜوَلْ؞» 6ندٜنْ عِيسَى دِلِّدِ بٜى مَࢡّٜ؞ ندٜ عٛدَايٛتِرَايْ ڢَحِنْ بٜى سَارٜ، مَوْطٛ سٛوجٜعٜنْ غٛ نٜلِ سٛوبِرَاࢡٜ مُمْ، ࢡٜمبِعَ مٛ: «مٛودِبّٛ، تَا ࢡِلُّ حٛورٜ مَ، نغَمْ مِ حٜعَايْ عَنَسْتَ سَارٜ عَمْ؞ 7نغَمْ مَاجُمْ مِلَارِ مِ حٜعَايْ يَحُغٛ حَا مَاطَ بٜى حٛورٜ عَمْ؞ عَمَّا وٛلْوُ وٛلْدٜ وٛورٜ تَنْ، سُکَ عَمْ يَمْطِتَنْ؞ 8مِنْ بٛو، مِوٛودِ مَوْࢡٜ دٛوْ عَمْ، مِوٛودِ سٛوجٜعٜنْ بٛو لٜسْ بَاوْطٜ عَمْ؞ تٛ مِوِعِ عٛو: يَحْ، عٛيَحَنْ؞ تٛ مِوِعِ عٛيَ بٛو: وَرْ، عٛوَرَنْ؞ تٛ مِوِعِ سُکَ عَمْ: وَطْ نِي، عٛوَطَنْ؞» 9ندٜ عِيسَى نَنِ بٛلّٜ طٜعٜ، عٛحَيْطِنِ دَلِيلَ مَوْطٛ سٛوجٜ غٛ، عٛيٜىٰسِتِ عٜ عٛوِعِ تٛکِّيࢡٜ مٛ: «مِطٛنْ وِعَ عٛنْ: کٛو ندٜرْ إِسْرَاءِيلَ، مِمٜىٰطَايْ تَوُغٛ نُطِّنْکِ مَکِّ بَنَ کِعِ؞» 10ندٜ نٜلَاࢡٜ لٛرِ حَا سَارٜ مَوْطٛ سٛوجٜعٜنْ، ࢡٜتَوِ سُکَ غٛ يَمْطِتِ؞
عِيسَى عُمِّتِنِ ࢡِنغٜلْ دٜبّٛ جُرُمْطٛ
11ࢡَاوٛطٛنْ عِيسَى يٜحِ حَا وُرٛ وِعٜتٜىٰنغٛ نَيِنْ؞ ݠُکَرَعٜنْ مَاکٛ بٜى يِمْࢡٜ طُوطْࢡٜ نجَحْدِ بٜى مَاکٛ؞ 12ندٜ عٛࢡَدِ نَسْتٛرْدٜ وُرٛ، ندَا يِمْࢡٜ طٛنْ ندٛونْدِ مَايْطٛ حَا ࢡٜعُوٛيَ؞ طُمْ ࢡِنغٜلْ بَجّٜلْ حَا دَادَ عٜ دَادَ بٛو جُرُمْطٛ؞ يِمْࢡٜ وُرٛ طُوطْࢡٜ طٛنّٛ نغٛنْدِ بٜى دٜبّٛ مَنْ؞ 13ندٜ عِيسَى يِعِمٛ، عٛيُرْمِنِمٛ، عٛوِعِ: «تَا وٛيْ؞» 14ندٜنْ عٛيٜحِ، عٛمٜىٰمِ کٜسْ مَايْطٛ مَنْ؞ رٛونْدِيࢡٜ ندَرِ؞ عِيسَى وِعِ: «سُکَاجٛ، مِوِعِ مَ: عُمَّ!» 15مَايْطٛ عُمِّ، جٛوطِ، ڢُطِّ وٛلْوُغٛ؞ عِيسَى حٛکِّتِمٛ دَادَ مَاکٛ؞ 16يِمْࢡٜ ڢُو کُلْتٛرِ، ࢡٜتٜدِّنِ اَللَّه، ࢡٜمبِعِ: «اَلنَّبِيجٛ مَوْطٛ وَنغِ شَکَ مٜىٰطٜنْ! اَللَّه وَرِ وَلُّغٛ يِمْࢡٜ مُوطُمْ!» 17حَبَرُ عِيسَى سَنغْکِتِ حَا لٜسْدِ يَحُدِيَ عٜ لٜسْطٜ تَارِيطٜ ڢُو؞
نٜلَاࢡٜ يُحَنَّ بَطٛووٛ بَݠْتِسْمَ
(مَتَّ 11:2-19)
18ݠُکَرَعٜنْ يُحَنَّ نغٜشِّمٛ کُوجٜ طٜعٜ ڢُو؞ عٛعٜوْنِ طِطٛ ندٜرْ مَࢡّٜ، 19عٛنٜلِ ࢡٜ حَا جَوْمِرَاوٛ، ࢡٜࢨَمَ مٛ: «عَنْ وٛنِ اَلْمَسِيحُ مٛ تَمِّ وَرْغٛ مَلَّ مِنْ ندٜىٰنَ غٛطّٛ ڢٜىٰرٜ؟» 20ندٜ ࢡٜنغَرِ حَا عِيسَى، ࢡٜمبِعِمٛ: «يُحَنَّ بَطٛووٛ بَݠْتِسْمَ نٜلِ مِنْ حَا مَ، حَا مِنْ ࢨَمٜ: عَنْ وٛنِ اَلْمَسِيحُ مٛ تَمِّ وَرْغٛ مَلَّ مِنْ ندٜىٰنَ غٛطّٛ ڢٜىٰرٜ؟» 21ندٜرْ وَکَّتِ مَنْ ندٜنْ بٛو عِيسَى يَمْطِتِنِ طُوطْࢡٜ مَرْࢡٜ ࢩَوُجِ ڢٜىٰرٜ ڢٜىٰرٜ عٜ مَرْࢡٜ رُوحُوجِ شٛࢡْطِ عٜ عٛوُمْتِنِ وُمْࢡٜ طُوطْࢡٜ؞ 22ندٜنْ عٛجَابِ نٜلَاࢡٜ يُحَنَّ غٛ: «نجٜحٜ، مبِعٜ يُحَنَّ کٛ عٛنْ نغِعِ عٜ کٛ عٛنْ نَنِ: وُمْࢡٜ طٛنْ نغِعَ، وٛوسْࢡٜ طٛنْ نجَحَ، کُتُرُعٜنْ نجَمْطِتِ، مُوکَاࢡٜ طٛنْ نَنَ، مَايْࢡٜ طٛنْ عُمِّتٛ، کُبَرُوٛلْ شٜيْنٛووٛلْ بٛو عَنْدِنَامَ حَا لَاڢُࢡٜ#عٜسَايَ 35:5-6؛ 61:1؞؞ 23بَرْکَ لَاتَنْتٛ کٛو مٛيْ مٛ عَشَّايْ نُطِّنْغٛ يَمْ سَمْ؞»
24ندٜ نٜلَاࢡٜ يُحَنَّ ندِلِّ، عِيسَى ڢُطِّ وٛلْوَنْغٛ يِمْࢡٜ دٛوْ يُحَنَّ، عٛوِعِ: «طُمٜ نجَحْطٛنْ لَارٛيْغٛ حَا لَدّٜ؟ ࢨٛمْبَلْ نغَلْ حٜنْدُ دِمْبَتَ نَ؟ 25کَدِ طُمٜ نجَحْطٛنْ لَارٛيْغٛ؟ غٛطّٛ ࢡٛرْنِيطٛ لِمْشٜ بٛوطّٜ نَ؟ ࢡٛرْنِيࢡٜ لِمْشٜ بٛوطّٜ، جٜيْنِتِيࢡٜ، حَا لَامٛرْطٜ نغٛنِ؞ 26طُمٜ نجَحْطٛنْ لَارٛيْغٛ کَدِ؟ اَلنَّبِيجٛ نَ؟ عٛوحٛ، مِطٛنْ وِعَ عٛنْ: ڢَکَتْ، عٛࢡُرِ اَلنَّبِيجٛ؞ 27نغَمْ يُحَنَّ وٛنِ مٛ دٜڢْتٜرٜ وِعِ دٛوْ مُوطُمْ:
اَللَّه وِعِ: مِنٜلَنْ نٜلَاطٛ عَمْ يٜىٰسٛ مَ،
حَا عٛمٛعِّنَ لَاوٛلْ يٜىٰسٛ مَاطَ#مَلَکِيَ 3:1؞؞»
28عِيسَى وِعِ ڢَحِنْ: «مِطٛنْ وِعَ عٛنْ: شَکَ ࢡِࢡّٜ عَادَمَ ڢُو وَلَا ࢡُرْطٛ يُحَنَّ مَنغُ؞ عَمَّا مٛ ࢡُرِ لٜىٰسُغٛ حَا لَامُ اَللَّه، ࢡُرَنْ مٛ؞»
29عُمَّاتٛورٜ عٜ جٛمْنٛوࢡٜ نَنْࢡٜ مٛ ڢُو عَنْدِتِ عَدِلَاکُ اَللَّه، ࢡٜنجَࢡِ بَݠْتِسْمَ يُحَنَّ؞ 30عَمَّا ڢَرِسَعٜنْ عٜ مٛودِࢡّٜ تَوْرٜىٰتَ نغُدِنِ مُويٛ اَللَّه نغَمْ مَࢡّٜ، ࢡٜشَلِ جَࢡُغٛ بَݠْتِسْمَ دِغَ يُحَنَّ#مَتَّ 21:32؛ لُکَ 3:12؞؞
31عِيسَى تٛکِّ وِعُغٛ: «بٜى مٛيْ نَنْدِنَنْمِ يِمْࢡٜ زَمَنُورُ ندُعُ؟ بٜى ࢡٜيٜ ࢡٜنَنْدِنْتٜ؟ 32ࢡٜنَنْدِ بٜى ࢡِکّٛيْ نجٛوطِيکٛيْ حَا لُومٛ، ࢡٜطٛنْ عٜوْنٛتِرَ، ࢡٜطٛنْ مبِعَ: مِنْ ݠُوڢَنِ عٛنْ عَلْغَيْتَارُ، عٛنْ نغَمَايْ؞ مِنْ نغِمَنِ عٛنْ غِمٛلْ بٛجِّ، عٛنْ مبٛيَايْ؞ 33نغَمْ يُحَنَّ بَطٛووٛ بَݠْتِسْمَ وَرِ، عٛطٛنْ سُومٛ، عٛيَرَتَا نغُيْکِنٛوجَمْ بٛو، عَمَّا عٛنْ مبِعِ عٛ غِنَّاطٛ؞ 34ࢡِي-نٜطّٛ وَرِ، عٛطٛنْ ࢩَامَ، عٛطٛنْ يَرَ، عٛنْ مبِعِ عٛطُوطَ-ࢩَامْطٜىٰجٛ عٜ غُيْکٛووٛ، عٛ سٛوبَاجٛ جٛمْنٛوࢡٜ عٜ حَکّٜعٜنْ؞ 35عَمَّا حِکْمَ اَللَّه غٛونغْطِنَامَ حَا يِمْࢡٜ ࢡٜنجَࢡِ کَ ڢُو؞»
عِيسَى ندٜرْ سَارٜ سِمٛنْ ڢَرِسَاجٛ
36ڢَرِسَاجٛ ڢٜىٰرٜ عٜوْنِ عِيسَى نغَمْ عٛࢩَامْدَ بٜى مَاکٛ؞ عِيسَى يٜحِ حَا سَارٜ ڢَرِسَاجٛ مَنْ، عٛجٛوطِ حَا عٛࢩَامَ؞ 37وٛودِ دٜبّٛ حَکّٜىٰجٛ حَا وُرٛ مَنْ؞ ندٜ عٛنَنِ عِيسَى طٛنْ ࢩَامَ حَا سَارٜ ڢَرِسَاجٛ غٛ، عٛوَدِّ ڢَاندُ سَطْندُ حٜىٰوْندُ عُورْدِ؞ 38عٛدَرِ ࢡَاوٛ عِيسَى حٜىٰدِ کٛسْطٜ مُوطُمْ؞ عٛطٛنْ وٛيَ، حَا عٛسٛوڢْنِ کٛسْطٜ عِيسَى بٜى غٛنْطِ مَاکٛ، ندٜنْ عٛوٛوسْتِ طُمْ بٜى غَاسَ حٛورٜ مَاکٛ، عٛحٜبِّ طٜ، عٛرُڢَنِ طٜ عُورْدِ#مَتَّ 26:7؛ مَرْکُسْ 14:3؛ يُحَنَّ 12:3؞؞ 39ندٜ ڢَرِسَاجٛ عٜوْنِيطٛ عِيسَى غٛ يِعِ طُمْ، عٛنُمِ ندٜرْ ࢡٜرْندٜ مَاکٛ: «تٛ غٛرْکٛ عٛو عٛعَنَّبِيجٛنٛ، عٛعَنْدَنّٛ دٜبّٛ مٜىٰمْطٛ مٛ عٛو، عٛحَکّٜىٰجٛ؞» 40عِيسَى ڢُطِّ وٛلْوُغٛ، عٛوِعِ سِمٛنْ: «وٛودِ کٛ مِيِطِ وِعْغٛ مَ؞» سِمٛنْ جَابِ: «وٛلْوُ، مٛودِبّٛ؞» 41عِيسَى وِعِ: «وٛودِ غٛطّٛ مٛ تٛکِّ يِمْࢡٜ طِطٛ ࢩَمَاندٜ؞ عٛتٛکِّ عَرَنٛ سُلٜيْجٜ شَرْدِ تٜىٰمٜطّٜ جٛوِ عٜ غٛوتٛ بٛو شَݠَّنْطٜ جٛوِ؞ 42ࢡٜمبَاوَايْ يٛࢡُغٛ مٛ؞ نغَمْ مَاجُمْ عٛيَاڢَنِ ࢡٜ، ࢡٜ طِطٛ ڢُو؞ مٛيْ ࢡُرَتَ يِطُغٛ مٛ شَکَ طِطٛ ࢡٜعٜ؟» 43سِمٛنْ جَابِ: «مِتَمِّمٛ عٛيَاڢَنِ ࢡُرْطُمْ طُوطُغٛ؞» عِيسَى وِعِمٛ: «غٛونغَ مبِعْطَ؞» 44ندٜنْ عِيسَى وَيْلِتِ غَلْ دٜبّٛ، عٛوِعِ سِمٛنْ: «عَطٛنْ لَارَ دٜبّٛ عٛو نَ؟ مِوَرِ سَارٜ مَ، عَحٛکَّايْ يَمْ ندِيَمْ نغَمْ لٛوتُغٛ کٛسْطٜ عَمْ، عَمَّا کَنغْکٛ عٛسٛوڢْنِ طٜ بٜى غٛنْطِ مَاکٛ، عٛوٛوسْتِ طٜ بٜى غَاسَ حٛورٜ مَاکٛ؞ 45عَحٜبَّاکِ يَمْ، عَمَّا کَنغْکٛ، دِغَ مِوَرِ سَارٜ مَ، عٛعَشَّايْ حٜبَّاغٛ کٛسْطٜ عَمْ؞ 46عَرُڢَايْ نٜبَّمْ دٛوْ حٛورٜ عَمْ، عَمَّا کَنغْکٛ، عٛرُڢِ عُورْدِ حَا کٛسْطٜ عَمْ؞ 47نغَمْ مَاجُمْ مِطٛنْ وِعٜ: يِيدٜ مَاکٛ مَوْندٜ وَنغِنِ حَکّٜىٰجِ مَاکٛ طُوطِّ نجَاڢَامَ؞ عَمَّا مٛ ࢡٜنجَاڢَنِ ݠَمَرُمْ، يِيدٜ ندٜ عٛوَنغِنْتَ ڢَمْطَنْ؞» 48ندٜنْ عِيسَى وِعِ دٜبّٛ: «حَکّٜىٰجِ مَاطَ نجَاڢَامَ؞» 49ࢩَامْدَنْࢡٜ بٜى مَاکٛ ݠُطِّ نُمُغٛ: «مٛيْ عٛو، مٛ وَاوِ يَاڢُغٛ حَکّٜىٰجِ؟» 50عَمَّا عِيسَى وِعِ دٜبّٛ: «نُطِّنْکِ مَ حِسْنِ مَ، يَحْ جَمْ؞»
Currently Selected:
لُکَ 7: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.
