लूका 14
14
येशू फरिसीत्याजे कीम्ने
1येशू आराम टूङब दिनने फरिसीयूजे हक चील्लेब मीत्याजे कीम्त्याने कङ् चने गीलीदे। थमयूदे ङूजे च्यूव चीन्न ख्य। 2स्यङब बीददे पेर्दीनब मी त्या ङूजे खूम्दे ख्य। 3येशूदे नियमजे पन्डेयू मेस्ये फरिसीयूने लोत्दे, “आराम टूङब दिनने तम् चेब नियम अनुसार ख्यङ्, यी त्वो?” 4तर थमयू पारा अम्पूल्लाबे टूङ्दे, मेस्ये येशूदे हम्ब नवजे ङ्वने ला येत्देबे तम् चीम्मीदे मेस्ये ङूने प्रस्ये पीन्दे।
5 #
मत्ती 12:11
होर्दे येशूदे थमयूने यदे, “नमयू नङ्ने सूदे रङ्से लप् या गधा आराम टूङब-दिनने इनारने तल्बदेयलो नमयूदे ङूने खात्याने अन्-योनया?” 6होर्दे थमयूदे अम्ब पोजे जवाफ पीनने अङ्खू।
7होर्दे भात्यार् चने रब ङ्योवयूदे मान् गेसेन् प्रेब ने सेलब तङ्देबे येशूदे थमयूने उखान त्या यदे: 8#हितोपदेश 25:6,7“ङ्येन्जे भात्यार्ने नदे कोइ मीजे निम्तो प्रेत्दे यलो गेसेन् प्रेब नेने अन्टोङ्लाची। नयली थेप् केन् गेसेन् चे पर्देब मीदे हैयाने निम्तो प्रेब क्यूर खूइय। 9नैप्रे ङूने निम्तो पीनब मीदे रदेबे नने यरीय्, ‘न टूङ नेने ङूने टूङ्से पीनो’, मेस्ये नब त्वादेबे चैकम्तेब नेने टूङ पर्दीय। 10तर कन्छ्वाब नदे निम्तो प्रेक्क्य, प्रदेबे गेसेन् छीत्या प्रेब नेने टूङ्, नने निम्तो पीनब मी रदेबे नने यीय, ‘ओ ख्योन्’ तो प्रदेबे टूङ्।’ हन्छ्वाब नैप्रे चने टूनबयूजे खूम्दे नैजे इज्जत क्यूक्क्य। 11#मत्ती 23:12; लूका 18:14चेनेयलो सूदे रङ्सेने केन् चीक्क्य, हम्ब चीद चीक्क्य मेस्ये रङ्सेने चीद चेबनेब केन् चीक्क्य।”
12होर्दे ङूदे हम्ब निम्तो पीनबने यदे, “नमयूदे नप्जे या नूस्यूङ्जे भत्यार् पीन्ब, रङ्से ख्योन्यू, रङ्से अत-च्योन्ने या नैजे ङ्येन् पर्देब मीयूने या फ्योबो खीम्चेयूने निम्तो अम्पीन्लाची, नत्र थमयूदेये हम्बजे सट्टने निम्तो पीन्देबे नैजे लोन् फाय।
13तर नदे भत्यार् लङ्ब, दूख्प्रे, लूला, खोन्ड्याल्या, म्या अन्तङयूने को, 14मेस्ये नदे असी प्रेक्क्य, चेनेयलो थमयूदे नैजे लोन् फा अन्खू तर धार्मिक मीयू सीबदे सोम्बो क्यूप्प नदे इनाम प्रेक्क्य।”
केन् भत्यार्जे उखान
मत्ती २२:१-१४
15येशूप्रे चसे चने टूनबयू नङ्ने मी त्यादे हम्ब पोयू क्वाने ङ्यीन्देबे ङूने यदे, “परमेश्वरजे राज्यने भत्यार् च प्रेब मीयू असी प्रेब ख्यङ्!”
16तर येशूदे ङूने यदे, “मी त्यादे नूस्यूङ्जे भत्यार् बेस्से केन् तयार चीत्दे, मेस्ये कूम मीयूने निम्तो पीन्दे। 17ङूदे रङ्से त्वोने भत्यार् चब बीलने निम्तो प्रेब मीयूने साप्ताने तयार क्यूत्दे ‘ख, यदेबे क्वने कूल्बीदे।’
18तर थमयू क्वादेने त्याप्र क्यूत्देबे ङ्यूङ् चेमेदे। खूम्जेदे ङूने यदे, ‘ङैदे रङ्त्या कीन ख्यङ्, ङ हम्ब लेने प्र पर्दे ख्यङ्। ङ बिन्ती चीक्क्य, ङैने क्षमा पीनो।’
19“होर्दे सूजोबदे यदे, ‘ङैदे लप् हल ङ कीन ख्यङ्, ङ हम्ब लेने प्रीय। ङ बिन्ती चीक्क्य, ङैने क्षमा पीनो।’
20“सूजोबदेये यदे, ‘ङैदे ङ्येन् चे ख्यङ् होरेक्यूत्देबे ङ र अन्खू।’
21“होर्दे त्वोदे रदेबे रङ्से मालिकने अम्ब पो येमीदे मेस्ये कीम्जे नोबो प्रो लङ्देबे ङूजे त्वोने यदे, ‘सहरजे लम्यू मेस्ये गल्लीयूने छीट्टो प्र, दूख्प्रेब मीयू, लूलायू, खोन्ड्याल्यायूने, म्या अन्तङयूने अन्-याने नङ्ने सीक।’
22“होर्दे त्वोदे यदे, ‘नदे पीनब आज्ञा अनुसार काम क्यूर ख्यङ्, तर अझ ने खाली ख्यङ्।’
23“मालिकदे त्वोने यदे, “मूल लम्यू मेस्ये गल्लीयूने प्रदेबे मीयूने नङ्ने रने कर चङ्, मेस्ये ङैजे कीम् फ्यास्य। 24चेनेयलो ङ नमयूने यीय, निम्तो प्रेबयू नङ्जे सूदेये ङैजे भात्यार्जे ङाम्बा म्यङ प्रेस्ये त्वो’।”
ख्रीष्टजे स्यूस्स्यायूदे फा परदेब लू
25मीयूजे हुल केन् येशूप्रे प्रेन ख्य, मेस्ये ङूदे ल्वादेबे थमयूने यदे, 26#मत्ती 10:37“सू ङैट्याने रीय, मेस्ये रङ्से प-म, मज, च-चीमीयू मेस्ये अत, अजी-च्योन्यूने मेस्ये रङ्से प्राणनेये ह्यल चे अन्खूलो, हम्ब ङैजे स्यूस्स्या क्यूर अन्खू। 27#मत्ती 10:38; 16:24; मर्कूस 8:34; लूका 9:23कम्ब मीदे रङ्से क्रूस प्लेदेबे ङैजे ङ्येदे अम्प्र, हम्ब ङैजे स्यूस्स्या क्यूर अन्खू।
28“नमयू नङ्ने त्यादे धरहारा बन्देब सेम् चीत्दे यलो, हम्ब बन्देब खर्च रङ्सेप्रे ख्यङ् यी त्वो यदेबे ङूदे खूम्ने हिसाब किताब अन्चे स्व? 29कादेये ङूदे जा पूत्देबे पूरा चेने अन्खूलो, तङब क्वादेने येरे यदेबे ङूने फ्य्वने सुरु चीक्क्य, 30‘अम्ब मीदे बन्देने सुरुब चीत्दे तर जेन अन्खू।’
31“कम्ब मूरुम् ख्यङ्दे ङूदे सूजो मूरुमप्रे लडाइँ चेने प्रब रङ्सेप्रे ख्यब हजार च्यूदे ङूजे विरुद्धने रब नूस्स्यू हजारप्रे जीङ खूइ अन्खू यदेबे खूम्ने टूङ्देबे मोतो अन्चे? 32ङूदे अङ्खूदेयलो, हम्ब त्याब मूरुम् चीन्तङ् ख्यङ्बने मिलापजे पो ल्वेने मूरुम्जे दूत कूल्बीय। 33होरेक्यूत्देबे नमयू नङ्जे सूदे रङ्सेप्रे ख्यब साप्ता थोक अन्त्याग्दी, ङू ङैजे स्यूस्स्या क्यूर अन्खू।
34“च ज्य ख्यङ्, तर च-अङ्-ङम क्यूत्देयलो चैदे हम्ब ङम्ला चे? 35हम्ब न सने काम लादीय, न मल बन्देने काम लादीय। मीयूदे हम्ब छाबीय।
ङ्यीनब मीदे चेलाबे ङ्यीन्स्य।”
Currently Selected:
लूका 14: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
