लूका 2
2
येशू जन्मीदेब
1हन्छ्वाब रोमजे कैसर अगस्टसदे ङूजे देश भरी जनसङ्ख्या था पर्दीय यदेबे हुकुम चीत्दे। 2सिरियाजे हाकिम कुरेनियस क्यूप्प अम्ब पात्ता खूम् जनसङ्ख्या थाब काम चीत्दे। 3क्वाने मीन् दर्ता चेने रङ्से-रङ्से सहरने गीलीदे।
4गालीलजे नासरतदे योसेफये यहूदियाजे बेथलेहेम यब दाऊदजे सहरने गीलीदे, चेनेयलो ङू दाऊदजे खलक मेस्ये वंशजे ख्य। 5मीन् दर्ता चेने ङूदे स्येगब मरियमने प्रेटेल्देबे गीलीदे। हन्छ्वाब ङू पीच र ख्य। 6थमयू हैयाने ख्यङ्बने मरियमदे पीच जन्मीदे बील क्यूट्टदे। 7मरियमदे ङूजे जेठ च जन्मीदीदे मेस्ये ङूने कोलादे फूर्देबे प्रङ्ने ख्यब स्यङ्जे स्योङ्गाने ङ्येल्दे, चेनेयलो थमयूजे लागि ठाँटीने ने अम्प्रे।
प्रङ्बयू मेस्ये स्वर्गदूतयू
8हम्ब नेने प्रङ्बयू ख्य, थमयू चूउर्ने टूङ्देबे मून्दे रङ्सेजे रोलायू लेन्न ख्य। 9प्रभुजे स्वर्गदूत त्या थमयू ट्याने रदे, मेस्ये प्रभुजे ओथ्याङ् थमयूजे ती-छो चम्कीदीदे, होर्दे थमयू सोरो फैगदे। 10होर्दे स्वर्गदूतदे थमयूने यदे, “अम्फलाची, चेनेयलो ले, ङ नमयूने सोरो आनन्दजे सूगब खबर स्योक्क्य, अम्ब मीयू क्वाजे लागि क्यूक्क्य। 11दीनी दाऊदजे सहरने नमयूजे लागि मुक्ति पीनब त्या जन्मीदीक ख्यङ्, ङू ख्रीष्ट प्रभु ख्यङ्, 12नमयूने अम्ब च्यूनू क्यूक्क्य: नमयूदे पीच त्या कोलादे फूर्देबे स्यङ्जे स्योङ्गाने ङ्येलेब तूय।”
13होर्दे त्याफेने हम्ब स्वर्गदूतप्रे स्वर्गजे सेनाजे हुलत्या तङ्रदे। परमेश्वरजे जै-जै चीदे-चीदे, थमयूदे यदे,
14“पात्ताफ्याजे स्वर्गजे परमेश्वरने महिमा, मेस्ये पृथ्वीने कम्ब मीयूप्रे ङू बेस्से सूग ख्यङ्, हम्ब मीयूने शान्ति!”
15कन्छ्वाब स्वर्गदूतयू थमयूप्रे छूर्दीदेबे स्वर्गने गीलीदे, हन्छ्वाब प्रङ्बयू त्यादे सूजोने यदे, “ख, ङीन बेथलेहेमसेमे प्रे, मेस्ये हैयाने क्यूरब अम्ब घटना मेस्ये परमप्रभुदे ङीनने स्य्वेब पो प्रदेबे लेप्पे।”
16थमयू छ्योटोने गीलीदे, मरियम, योसेफ मेस्ये पीचनेब स्यङ्जे स्योङ्गाने ङ्येलेब तूदे। 17कन्छ्वाब थमयूदे अम्ब तङ्दे, हन्छ्वाब हम्ब पीचजे बारेने कम्ब पो थमयूने येये ख्य हम्ब थमयूदे स्योम्मीदे। 18प्रङ्बयूदे स्य्वे पो ङ्यीनबयू क्वाने सोरो हार्मन्दीकदे। 19तर मरियमदे अम्ब पोयू क्वाने ह्वे चीत्देबे सेम्ने येत्दे। 20प्रङ्बयूदे तब मेस्ये तङब साप्ता पोजे लागि थमयूदे परमेश्वरजे महिमा मेस्ये जै-जै चीदे चीदे ल्वाइदे। अम्ब साप्ता पोयू स्वर्गदूतदे थमयूने स्योदेप्रने क्यूक्क ख्य।
मन्दिरने बल्ख येशू अर्पण
21 #
लेवी 12:3; लूका 1:31 सात्याने पीचजे खतना चीप्प ङूजे मीन् येशू येत्दे, अम्ब मीन् ङू ख्वाजेने केल यली खूम्ने स्वर्गदूतदे येये ख्य।
22मोशाजे नियम अनुसार थमयूजे शुद्ध क्यूरब बील पूरा क्यूक्कमेस्ये थमयूदे ङूने परमप्रभुजे खूम्ने अर्पण चेने यरूशलेमने रेत्दे, 23#प्रस्थान 13:2,12परमप्रभुजे नियम लिख्दीये ख्यङ्, “पात्ता खूम जन्मीदेब जेठ च क्वाने परमप्रभुजे लागि पवित्र यीय।” 24#लेवी 12:6-8होर्दे “जोर्त्या धोङ्र या पूर्बजे बचर ङ्ही” यदेबे परमप्रभुजे नियमने येयेप्रने बलि चेर्देने थमयू रदे। 25यरूशलेमने शिमियोन मीन् ख्यब मीत्या ख्य। ङू इस्राएलने जूक्तीमेब मीजे आशा चीन्नब, धर्मी मेस्ये परमेश्वरजे डर येनब मी ख्य। पवित्र आत्मा ङू फ्याने ख्य। 26“परमप्रभुजे ख्रीष्टने अन्तङ्दासेमे न अन्सीब” यब पो खूम्ने पवित्र आत्मादे चीत्देबे ङूदे था प्रे ख्य। 27पवित्र आत्मादे स्योल्देबे ङू मन्दिर नङ्ने रदे। कन्छ्वाब प-मदे पीच येशूजे लागि मोशाजे नियमजे छ्यप् चेने मन्दिर नङ्ने रेत्दे, 28हन्छ्वाब शिमियोनदे पीच रङ्से पेन्ने थम्दे, मेस्ये परमेश्वरने धन्यवाद पीन्देबे यदे,
शिमियोनदे चेब सार्याजे प्रू
29“जेम्से ओ परमप्रभु, रङ्सेजे कबुल अनुसार नदे रङ्से त्वोने शान्ति क्यूत्देबे सीबस्ये पीनो।
30चेनेयलो ङैजे म्यादे नैजे उद्धार तङ ख्यङ्,
31हम्ब नदे मीयू क्वाजे खूम्ने तयार चीदे ख्यङ्,
32 #
यशैया 42:6; 49:6; 52:10 ङू यहूदी ते मीयूजे लागि लम् तनब ओथ्याङ् क्यूक्क्य, मेस्ये ङू नैजे इस्राएली मीयूजे लागि महिमा चीस्ये पीनब क्यूक्क्य।”
33होर्दे पीचजे प मेस्ये म ङूजे बारेने यब अम्ब पो तदेबे हार्मन्दीकदे। 34शिमियोनदे थमयूने असी पीन्दे, मेस्ये पीचजे म मरियमने यदे, “ले, अम्ब पीच इस्राएलने कूम मीजे नाश मेस्ये कूम मीने तो-लङजे लागि, होर्दे कूम मीदे ङूने अन्ज्य चीत्देबे क्यमब च्यूनू त्याजे लागि सेल्दे ख्यङ्, 35थमयूजे सेम्जे नङ्सू विचारयू तम्मीय। होर्दे नैजे रङ्से सेम्ये तरवारदे स्यूलप्र क्यूक्क्य।” 36आशेरजे कूलने फनूएलजे चीमी हन्ना मीन् चेब अगमवक्ता यूमत्या ख्य, ङू कन्या ख्यब बीलने ङ्येन् चीत्देबे वर्ष ङ्यी सेमेत्या प्ल्यङ्प्रे टूङ प्रेत्दे। 37होर्दे ङूजे प्ल्यङ् सीयीदेबे ङू सील्लङ्दे वर्ष स्यी फ्योये ख्य। ङू कलङ्ने यली मन्दिरने टूङ ख्य, मेस्ये बर्त मेस्ये प्रार्थना चीदे-चीदे नो-मून परमेश्वरने पूस्तीन ख्य। 38हम्ब बीलने ङू रदेबे परमेश्वरने धन्यवाद पीन्दे, मेस्ये यरूशलेमजे उद्धारजे लम् लेन्नब मीयू क्वानेने बल्ख येशूजे बारेने स्योत्दे। 39#मत्ती 2:23कन्छ्वाब थमयूदे परमप्रभुजे नियम अनुसारजे कामयू क्वाने चे जेङ्कदे, हन्छ्वाब थमयू गालीलजे रङ्से सहर नासरतने ल्वाइदे। 40बल्ख येशू ठोङ्रदेबे बोल्यो क्यूट्टदे, बुद्धि मेस्ये ज्ञान चङ्रदे मेस्ये परमेश्वरजे अनुग्रह ङू फ्याने ख्य।
बल्ख येशू मन्दिरने
41 #
प्रस्थान 12:1-27; व्यवस्था 16:1-8 वर्षजे पीछीने येशूजे म-प निस्तार-दीनबर मन्देने यरूशलेमने प्रलीम् चेख्य। 42कन्छ्वाब येशू बाह्र वर्ष क्यूत्दे, हन्छ्वाब थमयू दीनबरजे छ्यप् अनुसार यरूशलेमने गीलीदे। 43दीन्बर जेङ्क ङ्येदे थमयू ल्वारब बल्ख येशू यरूशलेमने टूनूदे। अम्ब पो ङूजे प-मदे था अम्प्रे। 44बल्ख येशू मी हुलप्रे रेन ख्यङ् मन्देबे थमयू तीयाजे लम् गीलीदे। ङूने थमयूदे नलोपीलो मेस्ये स्येब मीयू ट्याने गीलीदेबे मेल्दे, 45तर अम्प्रेत्देबे थमयू ङूने मेले-मेले फेरि यरूशलेमने ल्वाइदे। 46सोम्म्या ङ्येदे थमयूदे ङूने मन्दिरने गुरुयूजे अन्द्रने टूङ्देबे थमयूजे पो ङ्यीन्देबे थमयूने पोजे जवाफ पीन्नब तूदे। 47ङूजे ज्ञान-बुद्धि मेस्ये जवाफ पीन्नब तङ्देबे ङ्यीन्नब मीयू क्वाने हार्मन्दे ख्य। 48ङूने तङ्देबे ङूजे म-प हार्मन्दीकदे, मेस्ये ङूजे मदे यदे, “च, नदे ङीने चैने येरे चे? ले, नैजे प मेस्ये ङ नने मेल्ब हैरान क्यूत्दे।”
49ङूदे थमयूने यदे, “नमयूदे ङैने चेने मे? ङ रङ्से पजे कीम्ने क्यूर पर्दीय यदेबे नमयूने था त्वा?” 50तर ङूदे यब पो थमयूदे क्व-अङ्खू।
51होर्दे ङू थमयूप्रे मो नासरतने गीलीदे, मेस्ये प-मजे आज्ञा ङ्यीन्देबे टूङ्दे। ङूजे मदे अम्ब पोयू क्वाने सेम्ने येत्दे। 52#१ शमूएल 2:26; हितोपदेश 3:4होर्दे येशू बुद्धिने, ङ्व डल्ने, परमेश्वर मेस्ये मीयूजे अनुग्रहने ठोङ्रदे।
Currently Selected:
लूका 2: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
