लूका 7
7
कप्तानजे विश्वास
मत्ती ८:५-१३
1रङ्सेजे पोयू क्वाने मीयूने स्य्वे जेनङ्येदे येशू कफर्नहुमने गीलीदे। 2कप्तान त्याजे छेब त्वोत्या ख्य, हम्ब त्वो नदेबे सीब मेल्न ख्य। 3कन्छ्वाब ङूदे येशूजे बारेने तदे, हन्छ्वाब येशू रदेबे रङ्सेजे त्वोने तम् चीम्मीस्य यदेबे बिन्ती चेने कोइ कोइ यहूदीयूजे धर्म-गुरुयूने ङू ट्याने कूल्बीदे। 4थमयू येशूट्याने रदेबे, ङूप्रे येरे बिन्ती चीत्देबे यदे, “ङू नैजे अम्ब कृपा प्रेब लायकजे ख्यङ्, 5चेनेयलो ङूदे ङीनजे जातने प्रेम चे ख्य, मेस्ये ङूदेने ङीनजे लागि सभा-कीम् बन्दीमे ख्यङ्।” 6येशू थमयूप्रे गीलीदे।
ङू कप्तानजे कीम् ट्याने फ्योइब, कप्तानदे ङूजे ख्योन्यूने ङू ट्याने येरे यदेबे कूल्बीदे, “ओ प्रभु, छर्ङ अन्चील्लाची, चेनेयलो न ङैजे कीम् नङ्ने रसे पीनब लायकजे ङ त्वो, 7ङ रङ्सेये नैट्याने रब लायकजे अम्मन्। तर वचन त्या येबी, मेस्ये ङैजे त्वो तम् क्यूक्क्य। 8चेनेयलो ङैये हाकिम केन्जे हुकुम नङ्ने टूङब मी ख्यङ्, होर्दे ङैजे हुकुमनेये सिपाईयू ख्यङ्। ङैदे त्याने ‘प्र’ यीय, होर्दे ङू प्रीय, मेस्ये सूजोने ‘ख’ यीय, होर्दे ङू रीय। ङैजे त्वोने ‘अम्ब ची’ यीय, होर्दे ङूदे चीक्क्य।”
9अम्ब पो तदेबे येशू ङूप्रे हार्मन्दीकदे, मेस्ये ल्वादेबे रङ्से ङ्येदे रब मीहुलने यदे, “ङ नमयूने यीय, ङैदे इस्राएलनेये येरप्र केन् विश्वास अन्तङ्।” 10कन्छ्वाब कूल्बेब मीयू कीम्ने ल्वारदे, थमयूदे हम्ब त्वो तम् क्यूत्देबे टूनब तूदे।
प्ल्यङ् सीयेब मदीजे च सोम्बो चीम्मेब
11नैदे-रेदे येशू नाइन सहरने गीलीदे, मेस्ये ङूजे स्यूस्स्यायू मेस्ये मीहुल केन् ङूप्रे गीलीदे। 12होर्दे येशू सहरजे ख्यो ट्याने फ्योये ख्य, प्ल्यङ् सीयेब मदी त्याजे तीत्यात्या चजे लास कूबीन ख्य। सहरजे मीहुल केन् ङूप्रे ख्य। 13कन्छ्वाब प्रभुदे हम्ब मदीने तङ्दे, हन्छ्वाब ङूने ङ्येम्देबे यदे, “अङ्-ङूलाची।”
14होर्दे ट्याने गीलीदेबे येशूदे बेङे छूत्दे, मेस्ये प्ल्येब मीयू अम्प्रलाबे मेर्दे। ङूदे यदे, “ओ स्योर्ब, ङ नने यीय, ‘लङ्’।” 15हन्छ्वाब सीयेब मीये लङ्देबे टूङ्दे, पो क्यम्दे मेस्ये येशूदे ङूने मजे जिम्माने लैदीपीदे।
16हन्छ्वाब क्वाने फैगदे, मेस्ये परमेश्वरजे महिमा चीत्देबे यदे, “सोरो केन् अगमवक्ता त्या ङीनजे अन्द्रने र ख्यङ्”, मेस्ये “परमेश्वरदे रङ्से मीयू फ्याने कृपा चे ख्यङ्।” 17येशूजे बारेने अम्ब पो यहूदियाजे तजे न-न का-मुलुकजे जिल्लयूने फीस्दीइ।
बप्तिस्मा पीनब यूहन्नाजे सवाल
मत्ती ११:२-१९
18यूहन्नाजे स्यूस्स्यायूदे अम्ब पोजे खबर क्वाने ङूने स्योम्मीदे। 19यूहन्नादे ङूजे स्यूस्स्यायू नङ्ने ङ्हीने प्रभु ट्याने अम्ब पो ल्वेने कूल्बीदे, “सू रस्ये ख्य, हम्ब नयीर? या ङी सूजो कोइजे आशा चे पर्दे?”
20कन्छ्वाब हम्ब मीयू येशू ट्याने रदे, हन्छ्वाब थमयूदे यदे, “बप्तिस्मा-पीनब यूहन्नादे ङीने नै ट्याने अम्ब पो ल्वेने कूल्बे ख्यङ्, ‘सू रस्ये ख्य, न हम्बने यीर? यी ङी सूजो कोइजे आशा चे पर्दे?”
21हम्ब बीलने येशूदे कूम मीयूने बीद, दुष्ट आत्मायूदे छूरतीमीदे, मेस्ये कूम म्या अन्तङबयूने म्या तङ्ला चीम्मीदे। 22#यशैया 35:5,6; यशैया 61:1होर्दे येशूदे थमयूने यदे, “प्र, मेस्ये नमयूदे तङब मेस्ये तब पो यूहन्नाने स्य्वे, म्या अन्तङबयूदे म्या तङ प्रेक्क्य, खोन्ड्याल्यायू प्रीय, कुष्ठ बीदजे नवयू तम् क्यूक्क्य, नाक्तूङ्यूदे न त क्यूक्क्य, सीयेबयू सोम्बो क्यूत्देबे लङ्क्य, दूख्प्रेयूने सूगब खबर स्योक्क्य। 23तम्दम्ने ङैने शङ्का अन्चेब मीयूदे असी प्रेक्क्य।”
24यूहन्नादे कूल्बेब स्यूस्स्यायू ल्वाये ङ्येदे, येशूदे यूहन्नाजे बारेने मीहुलने यने सुरु चीत्दे: “नमयू मी अन्टोङब चनमन नेने च लेने गीले? उन्दूदे लीङ्नब म्या लेने औ? 25हन्छ्वाब नमयू च लेने योङ्गे? ज्य कोला ह्वोदेब मी लेने औ? ले, ज्य कोला ह्वेब मेस्ये चेलाबे आराम टूङबयू ब मूरूम् टूङब दरबारयूने टूङ्क्य। 26तर नमयू च लेने योङ्गे? अगमवक्ताने? अ, ङ यीय, नमयूदे अगमवक्तायू यली थेप् केन्ने तङ्दे। 27#मलाकी 3:1अम्ब ङूने ख्यङ्, ङूजे बारेने लिख्दीयेब ख्यङ्,
‘ले, ङ ङैजे दूतने नैजे खूम् खूम् कूल्बीय, ङूदे नैजे खूम्दे नैजे लम् तयार चीक्क्य।’
28ङ नमयूने यीय, ‘मदीयूदे जन्मेदेबयू नङ्ने यूहन्ना यली सोरो केन् सूत्याये त्वो, होरेक्यूल्लीने सू परमेश्वरजे राज्यने सोरो चीद ख्यङ्, हम्ब ङू यलीने अझ थेप् केन् क्यूक्क्य’।”
29 #
मत्ती 21:32; लूका 3:12 होर्दे मीयू क्वाने मेस्ये स्यर्म लङबयूदे अम्ब तदेबे परमेश्वरजे पो तम्दम् टोङ् यदेबे मन्दीदे, चेनेयलो थमयूदे यूहन्नाजे लादे बप्तिस्मा किन्क ख्य। 30तर फरिसीयू मेस्ये नियमजे पन्डेयूदे ब यूहन्नाजे लादे बप्तिस्मा अङ्कीङ्कब कारणदे, परमेश्वरदे यमेब पोने रङ्सेजे लागि थमयूदे अम्मन्दी।
31येशूदे यदे, “अम्ब पुस्ताजे मीयूने ङ चैप्रे कर स्व? थमयू चप्र ख्यङ्? 32थमयू बजारने टूङब पीचयू प्र ख्यङ्, थमयूदे त्यादे त्याने येरे यदेबे फ्राचीय,
‘ङीदे नमयूजे लागि मूराली तप्दे, तर नमयू अन्स्य। ङी अन्सूग्देबे बीगन फादे, तर नमयू अङ्-ङू।’
33बप्तिस्मा पीनब यूहन्ना रदे, होर्दे ङूदे क्यङ्ये अन्च अङ्गुरजे चीये अन्थूङ्। नमयूदे ङूने छेत् लादीकब ख्यङ्’ यदे। 34मीजे च रदे, होर्दे ङूदे च थूङ चीत्दे, होर्दे नमयूदे यीय, ‘ले, चनेत्या स्ये, येतार्ने ची थूङ्ब मीयू, स्यर्म लङबयू मेस्ये पापीयूजे ख्योन्!’ 35बुद्धि ख्यब या त्वब पो ङूजे कामदेने गवाही पीन्क्य।
पापी मदीने क्षमा
36फरिसीयू नङ्ने त्यादे येशूने चसे चने निम्तो पीन्दे, मेस्ये ङू हम्ब फरिसीजे कीम्ने गीलीदेबे चने टूङ्दे। 37#मत्ती 26:7; मर्कूस 14:3; यूहन्ना 12:3हम्ब सहरने पापी मदीत्या ख्य। फरिसीजे कीम्ने येशू चसे चने टून ख्यङ् यब पो तदेबे, लूङ्गार्जे बोतोलने बस् रब मूर्गू टेल्देबे ङू हैयाने रदे, 38येशूजे तोप् ट्याने ङ्येलम्दे मेर्देबे, ङूये-ङूये ङूजे तोप् म्यामूदे स्यूइ चीम्मीदे, रङ्से ट फूदे फीले-फीले ङूजे तोप्ने म्वाँइ चीत्दे, मेस्ये हम्ब बस् रब मूर्गू छल्मीदे।
39येशूने निम्तो चेब फरिसीदे अम्ब तङ्देबे सेम्ने येरे मन्दे, ‘‘ङू तम्दम्ने अगमवक्ता यलो ङूने छ्वेब सू मेस्ये कर खल्जे मदी यदेबे ङूदे से ख्यङ्दे, चेनेयलो ङू ब पापी ख्यङ्।”
40येशूदे हम्ब फरिसीने यदे, “ओ सिमोन, नने चत्या पो य पर्दे ख्यङ्।”
ङूदे यदे, “गुरुज्यू, य।”
41“साहू त्याजे मी ङ्हीने छेर् ख्य, त्यादे सै ङ चाँदीजे मन्द्रामूली मेस्ये सूजो त्याबदेब पचास चाँदीजे मन्द्रमूलीजे छेर् ता ख्य। 42तर थमयूप्रे छेर् फाब चैये तोदेबे हम्ब साहूदे थम ङ्हीनेने छेर् क्षमा चीम्मीदे होरेयलो लो य, थमङ्ही नङ्ने सूदे ङूने कूम प्रेम चीक्क्य?”
43सिमोनदे यदे, “ङैदे मन ख्यङ्, सूदे कूम क्षमा प्रेत्दे।” येशूदे ङूने यदे, “नदे ठीक विचार चे ख्यङ्।” 44होर्दे हम्ब मदीतेले ल्वादेबे येशूदे सिमोनने यदे, “अम्ब मदीने तङ्क्वा? ङ नैजे कीम् नङ्ने रदे, तर नदे ङैने तोप् ठ्वब क्यू अम्पीन्, तर अम्ब मदीदे ङैजे तोप् म्यामूदे स्यूइ चीम्मीदे, मेस्ये ङूजे ट फूदे फील्मीदे। 45नदे ङैने म्वाँइ अन्चीम्मी, तर अम्ब मदीदे, ङ यैयाने रमेस्येने, ङैजे तोप्ने म्वाँइ चीन्न ख्यङ्। 46नदे ङैजे टने मूर्गू अन्छेल्मी, तर अम्ब मदीदेब ङैजे तोप्ने बस् रब मूर्गू छेल्मीदे। 47होरेक्यूत्देबे ङ नने यीय, ङूजे पाप, कूम ख्य, क्षमा क्यूरे ख्यङ्, चेनेयलो अम्ब मदीदे ङैने कूम प्रेम चीत्दे। तर सूने छीत्या क्षमा चीक्क्य, ङूदे छीत्या प्रेम चीक्क्य।”
48होर्दे येशूदे हम्ब मदीने यदे, “नैजे पाप क्षमा क्यूरे ख्यङ्।”
49चने टूनबयू त्यादे सूजोने यदे, “पाप क्षमा चेब ङू सू स्व?”
50येशूदे हम्ब मदीने यदे, “नैजे विश्वासदे नने बच्दीमे ख्यङ्, “शान्ति क्यूत्देबे प्र।”
Currently Selected:
लूका 7: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
